Ashtavakra Gita Shodasho'dhyayah

ॐ

ಅಷ್ಟಾವಕ್ರ ಗೀತಾ ಷೋಡಶೋಽಧ್ಯಾಯಃ

Gita Kannada

ಅಷ್ಟಾವಕ್ರ ಉವಾಚ ॥

ಆಚಕ್ಷ್ವ ಶೃಣು ವಾ ತಾತ ನಾನಾಶಾಸ್ತ್ರಾಣ್ಯನೇಕಶಃ ।

ತಥಾಪಿ ನ ತವ ಸ್ವಾಸ್ಥ್ಯಂ ಸರ್ವವಿಸ್ಮರಣಾದೃತೇ ॥ 16-1॥

ಭೋಗಂ ಕರ್ಮ ಸಮಾಧಿಂ ವಾ ಕುರು ವಿಜ್ಞ ತಥಾಪಿ ತೇ ।

ಚಿತ್ತಂ ನಿರಸ್ತಸರ್ವಾಶಮತ್ಯರ್ಥಂ ರೋಚಯಿಷ್ಯತಿ ॥ 16-2॥

ಆಯಾಸಾತ್ಸಕಲೋ ದುಃಖೀ ನೈನಂ ಜಾನಾತಿ ಕಶ್ಚನ ।

ಅನೇನೈವೋಪದೇಶೇನ ಧನ್ಯಃ ಪ್ರಾಪ್ನೋತಿ ನಿರ್ವೃತಿಮ್ ॥ 16-3॥

ವ್ಯಾಪಾರೇ ಖಿದ್ಯತೇ ಯಸ್ತು ನಿಮೇಷೋನ್ಮೇಷಯೋರಪಿ ।

ತಸ್ಯಾಲಸ್ಯ ಧುರೀಣಸ್ಯ ಸುಖಂ ನಾನ್ಯಸ್ಯ ಕಸ್ಯಚಿತ್ ॥ 16-4॥

ಇದಂ ಕೃತಮಿದಂ ನೇತಿ ದ್ವನ್ದ್ವೈರ್ಮುಕ್ತಂ ಯದಾ ಮನಃ ।

ಧರ್ಮಾರ್ಥಕಾಮಮೋಕ್ಷೇಷು ನಿರಪೇಕ್ಷಂ ತದಾ ಭವೇತ್ ॥ 16-5॥

ವಿರಕ್ತೋ ವಿಷಯದ್ವೇಷ್ಟಾ ರಾಗೀ ವಿಷಯಲೋಲುಪಃ ।

ಗ್ರಹಮೋಕ್ಷವಿಹೀನಸ್ತು ನ ವಿರಕ್ತೋ ನ ರಾಗವಾನ್ ॥ 16-6॥

ಹೇಯೋಪಾದೇಯತಾ ತಾವತ್ಸಂಸಾರವಿಟಪಾಙ್ಕುರಃ ।

ಸ್ಪೃಹಾ ಜೀವತಿ ಯಾವದ್ ವೈ ನಿರ್ವಿಚಾರದಶಾಸ್ಪದಮ್ ॥ 16-7॥

ಪ್ರವೃತ್ತೌ ಜಾಯತೇ ರಾಗೋ ನಿರ್ವೃತ್ತೌ ದ್ವೇಷ ಏವ ಹಿ ।

ನಿರ್ದ್ವನ್ದ್ವೋ ಬಾಲವದ್ ಧೀಮಾನ್ ಏವಮೇವ ವ್ಯವಸ್ಥಿತಃ ॥ 16-8॥

ಹಾತುಮಿಚ್ಛತಿ ಸಂಸಾರಂ ರಾಗೀ ದುಃಖಜಿಹಾಸಯಾ ।

ವೀತರಾಗೋ ಹಿ ನಿರ್ದುಃಖಸ್ತಸ್ಮಿನ್ನಪಿ ನ ಖಿದ್ಯತಿ ॥ 16-9॥

ಯಸ್ಯಾಭಿಮಾನೋ ಮೋಕ್ಷೇಽಪಿ ದೇಹೇಽಪಿ ಮಮತಾ ತಥಾ ।

ನ ಚ ಜ್ಞಾನೀ ನ ವಾ ಯೋಗೀ ಕೇವಲಂ ದುಃಖಭಾಗಸೌ ॥ 16-10॥

ಹರೋ ಯದ್ಯುಪದೇಷ್ಟಾ ತೇ ಹರಿಃ ಕಮಲಜೋಽಪಿ ವಾ ।

ತಥಾಪಿ ನ ತವ ಸ್ವಾಸ್ಥ್ಯಂ ಸರ್ವವಿಸ್ಮರಣಾದೃತೇ ॥ 16-11॥

Roman (IAST) Transliteration

aṣṭāvakra uvāca ||

ācakṣva śṛṇu vā tāta nānāśāstrāṇyanekaśaḥ |

tathāpi na tava svāsthyaṃ sarvavismaraṇādṛte || 16-1||

bhogaṃ karma samādhiṃ vā kuru vijña tathāpi te |

cittaṃ nirastasarvāśamatyarthaṃ rocayiṣyati || 16-2||

āyāsātsakalo duḥkhī nainaṃ jānāti kaścana |

anenaivopadeśena dhanyaḥ prāpnoti nirvṛtim || 16-3||

vyāpāre khidyate yastu nimeṣonmeṣayorapi |

tasyālasya dhurīṇasya sukhaṃ nānyasya kasyacit || 16-4||

idaṃ kṛtamidaṃ neti dvandvairmuktaṃ yadā manaḥ |

dharmārthakāmamokṣeṣu nirapekṣaṃ tadā bhavet || 16-5||

virakto viṣayadveṣṭā rāgī viṣayalolupaḥ |

grahamokṣavihīnastu na virakto na rāgavān || 16-6||

heyopādeyatā tāvatsaṃsāraviṭapāṅkuraḥ |

spṛhā jīvati yāvad vai nirvicāradaśāspadam || 16-7||

pravṛttau jāyate rāgo nirvṛttau dveṣa eva hi |

nirdvandvo bālavad dhīmān evameva vyavasthitaḥ || 16-8||

hātumicchati saṃsāraṃ rāgī duḥkhajihāsayā |

vītarāgo hi nirduḥkhastasminnapi na khidyati || 16-9||

yasyābhimāno mokṣe'pi dehe'pi mamatā tathā |

na ca jñānī na vā yogī kevalaṃ duḥkhabhāgasau || 16-10||

haro yadyupadeṣṭā te hariḥ kamalajo'pi vā |

tathāpi na tava svāsthyaṃ sarvavismaraṇādṛte || 16-11||