Ashtavakra Gita Panchadasho'dhyayah

ॐ

ಅಷ್ಟಾವಕ್ರ ಗೀತಾ ಪಞ್ಚದಶೋಽಧ್ಯಾಯಃ

Gita Kannada

ಅಷ್ಟಾವಕ್ರ ಉವಾಚ ॥

ಯಥಾತಥೋಪದೇಶೇನ ಕೃತಾರ್ಥಃ ಸತ್ತ್ವಬುದ್ಧಿಮಾನ್ ।

ಆಜೀವಮಪಿ ಜಿಜ್ಞಾಸುಃ ಪರಸ್ತತ್ರ ವಿಮುಹ್ಯತಿ ॥ 15-1॥

ಮೋಕ್ಷೋ ವಿಷಯವೈರಸ್ಯಂ ಬನ್ಧೋ ವೈಷಯಿಕೋ ರಸಃ ।

ಏತಾವದೇವ ವಿಜ್ಞಾನಂ ಯಥೇಚ್ಛಸಿ ತಥಾ ಕುರು ॥ 15-2॥

ವಾಗ್ಮಿಪ್ರಾಜ್ಞಾಮಹೋದ್ಯೋಗಂ ಜನಂ ಮೂಕಜಡಾಲಸಮ್ ।

ಕರೋತಿ ತತ್ತ್ವಬೋಧೋಽಯಮತಸ್ತ್ಯಕ್ತೋ ಬುಭುಕ್ಷಭಿಃ ॥ 15-3॥

ನ ತ್ವಂ ದೇಹೋ ನ ತೇ ದೇಹೋ ಭೋಕ್ತಾ ಕರ್ತಾ ನ ವಾ ಭವಾನ್ ।

ಚಿದ್ರೂಪೋಽಸಿ ಸದಾ ಸಾಕ್ಷೀ ನಿರಪೇಕ್ಷಃ ಸುಖಂ ಚರ ॥ 15-4॥

ರಾಗದ್ವೇಷೌ ಮನೋಧರ್ಮೌ ನ ಮನಸ್ತೇ ಕದಾಚನ ।

ನಿರ್ವಿಕಲ್ಪೋಽಸಿ ಬೋಧಾತ್ಮಾ ನಿರ್ವಿಕಾರಃ ಸುಖಂ ಚರ ॥ 15-5॥

ಸರ್ವಭೂತೇಷು ಚಾತ್ಮಾನಂ ಸರ್ವಭೂತಾನಿ ಚಾತ್ಮನಿ ।

ವಿಜ್ಞಾಯ ನಿರಹಙ್ಕಾರೋ ನಿರ್ಮಮಸ್ತ್ವಂ ಸುಖೀ ಭವ ॥ 15-6॥

ವಿಶ್ವಂ ಸ್ಫುರತಿ ಯತ್ರೇದಂ ತರಙ್ಗಾ ಇವ ಸಾಗರೇ ।

ತತ್ತ್ವಮೇವ ನ ಸನ್ದೇಹಶ್ಚಿನ್ಮೂರ್ತೇ ವಿಜ್ವರೋ ಭವ ॥ 15-7॥

ಶ್ರದ್ಧಸ್ವ ತಾತ ಶ್ರದ್ಧಸ್ವ ನಾತ್ರ ಮೋಹಂ ಕುರುಷ್ವ ಭೋಃ ।

ಜ್ಞಾನಸ್ವರೂಪೋ ಭಗವಾನಾತ್ಮಾ ತ್ವಂ ಪ್ರಕೃತೇಃ ಪರಃ ॥ 15-8॥

ಗುಣೈಃ ಸಂವೇಷ್ಟಿತೋ ದೇಹಸ್ತಿಷ್ಠತ್ಯಾಯಾತಿ ಯಾತಿ ಚ ।

ಆತ್ಮಾ ನ ಗನ್ತಾ ನಾಗನ್ತಾ ಕಿಮೇನಮನುಶೋಚಸಿ ॥ 15-9॥

ದೇಹಸ್ತಿಷ್ಠತು ಕಲ್ಪಾನ್ತಂ ಗಚ್ಛತ್ವದ್ಯೈವ ವಾ ಪುನಃ ।

ಕ್ವ ವೃದ್ಧಿಃ ಕ್ವ ಚ ವಾ ಹಾನಿಸ್ತವ ಚಿನ್ಮಾತ್ರರೂಪಿಣಃ ॥ 15-10॥

ತ್ವಯ್ಯನನ್ತಮಹಾಮ್ಭೋಧೌ ವಿಶ್ವವೀಚಿಃ ಸ್ವಭಾವತಃ ।

ಉದೇತು ವಾಸ್ತಮಾಯಾತು ನ ತೇ ವೃದ್ಧಿರ್ನ ವಾ ಕ್ಷತಿಃ ॥ 15-11॥

ತಾತ ಚಿನ್ಮಾತ್ರರೂಪೋಽಸಿ ನ ತೇ ಭಿನ್ನಮಿದಂ ಜಗತ್ ।

ಅತಃ ಕಸ್ಯ ಕಥಂ ಕುತ್ರ ಹೇಯೋಪಾದೇಯಕಲ್ಪನಾ ॥ 15-12॥

ಏಕಸ್ಮಿನ್ನವ್ಯಯೇ ಶಾನ್ತೇ ಚಿದಾಕಾಶೇಽಮಲೇ ತ್ವಯಿ ।

ಕುತೋ ಜನ್ಮ ಕುತೋ ಕರ್ಮ ಕುತೋಽಹಙ್ಕಾರ ಏವ ಚ ॥ 15-13॥

ಯತ್ತ್ವಂ ಪಶ್ಯಸಿ ತತ್ರೈಕಸ್ತ್ವಮೇವ ಪ್ರತಿಭಾಸಸೇ ।

ಕಿಂ ಪೃಥಕ್ ಭಾಸತೇ ಸ್ವರ್ಣಾತ್ ಕಟಕಾಙ್ಗದನೂಪುರಮ್ ॥ 15-14॥

ಅಯಂ ಸೋಽಹಮಯಂ ನಾಹಂ ವಿಭಾಗಮಿತಿ ಸನ್ತ್ಯಜ ।

ಸರ್ವಮಾತ್ಮೇತಿ ನಿಶ್ಚಿತ್ಯ ನಿಃಸಙ್ಕಲ್ಪಃ ಸುಖೀ ಭವ ॥ 15-15॥

ತವೈವಾಜ್ಞಾನತೋ ವಿಶ್ವಂ ತ್ವಮೇಕಃ ಪರಮಾರ್ಥತಃ ।

ತ್ವತ್ತೋಽನ್ಯೋ ನಾಸ್ತಿ ಸಂಸಾರೀ ನಾಸಂಸಾರೀ ಚ ಕಶ್ಚನ ॥ 15-16॥

ಭ್ರಾನ್ತಿಮಾತ್ರಮಿದಂ ವಿಶ್ವಂ ನ ಕಿಞ್ಚಿದಿತಿ ನಿಶ್ಚಯೀ ।

ನಿರ್ವಾಸನಃ ಸ್ಫೂರ್ತಿಮಾತ್ರೋ ನ ಕಿಞ್ಚಿದಿವ ಶಾಮ್ಯತಿ ॥ 15-17॥

ಏಕ ಏವ ಭವಾಮ್ಭೋಧಾವಾಸೀದಸ್ತಿ ಭವಿಷ್ಯತಿ ।

ನ ತೇ ಬನ್ಧೋಽಸ್ತಿ ಮೋಕ್ಷೋ ವಾ ಕೃತಕೃತ್ಯಃ ಸುಖಂ ಚರ ॥ 15-18॥

ಮಾ ಸಙ್ಕಲ್ಪವಿಕಲ್ಪಾಭ್ಯಾಂ ಚಿತ್ತಂ ಕ್ಷೋಭಯ ಚಿನ್ಮಯ ।

ಉಪಶಾಮ್ಯ ಸುಖಂ ತಿಷ್ಠ ಸ್ವಾತ್ಮನ್ಯಾನನ್ದವಿಗ್ರಹೇ ॥ 15-19॥

ತ್ಯಜೈವ ಧ್ಯಾನಂ ಸರ್ವತ್ರ ಮಾ ಕಿಞ್ಚಿದ್ ಹೃದಿ ಧಾರಯ ।

ಆತ್ಮಾ ತ್ವಂ ಮುಕ್ತ ಏವಾಸಿ ಕಿಂ ವಿಮೃಶ್ಯ ಕರಿಷ್ಯಸಿ ॥ 15-20॥

Roman (IAST) Transliteration

aṣṭāvakra uvāca ||

yathātathopadeśena kṛtārthaḥ sattvabuddhimān |

ājīvamapi jijñāsuḥ parastatra vimuhyati || 15-1||

mokṣo viṣayavairasyaṃ bandho vaiṣayiko rasaḥ |

etāvadeva vijñānaṃ yathecchasi tathā kuru || 15-2||

vāgmiprājñāmahodyogaṃ janaṃ mūkajaḍālasam |

karoti tattvabodho'yamatastyakto bubhukṣabhiḥ || 15-3||

na tvaṃ deho na te deho bhoktā kartā na vā bhavān |

cidrūpo'si sadā sākṣī nirapekṣaḥ sukhaṃ cara || 15-4||

rāgadveṣau manodharmau na manaste kadācana |

nirvikalpo'si bodhātmā nirvikāraḥ sukhaṃ cara || 15-5||

sarvabhūteṣu cātmānaṃ sarvabhūtāni cātmani |

vijñāya nirahaṅkāro nirmamastvaṃ sukhī bhava || 15-6||

viśvaṃ sphurati yatredaṃ taraṅgā iva sāgare |

tattvameva na sandehaścinmūrte vijvaro bhava || 15-7||

śraddhasva tāta śraddhasva nātra mohaṃ kuruṣva bhoḥ |

jñānasvarūpo bhagavānātmā tvaṃ prakṛteḥ paraḥ || 15-8||

guṇaiḥ saṃveṣṭito dehastiṣṭhatyāyāti yāti ca |

ātmā na gantā nāgantā kimenamanuśocasi || 15-9||

dehastiṣṭhatu kalpāntaṃ gacchatvadyaiva vā punaḥ |

kva vṛddhiḥ kva ca vā hānistava cinmātrarūpiṇaḥ || 15-10||

tvayyanantamahāmbhodhau viśvavīciḥ svabhāvataḥ |

udetu vāstamāyātu na te vṛddhirna vā kṣatiḥ || 15-11||

tāta cinmātrarūpo'si na te bhinnamidaṃ jagat |

ataḥ kasya kathaṃ kutra heyopādeyakalpanā || 15-12||

ekasminnavyaye śānte cidākāśe'male tvayi |

kuto janma kuto karma kuto'haṅkāra eva ca || 15-13||

yattvaṃ paśyasi tatraikastvameva pratibhāsase |

kiṃ pṛthak bhāsate svarṇāt kaṭakāṅgadanūpuram || 15-14||

ayaṃ so'hamayaṃ nāhaṃ vibhāgamiti santyaja |

sarvamātmeti niścitya niḥsaṅkalpaḥ sukhī bhava || 15-15||

tavaivājñānato viśvaṃ tvamekaḥ paramārthataḥ |

tvatto'nyo nāsti saṃsārī nāsaṃsārī ca kaścana || 15-16||

bhrāntimātramidaṃ viśvaṃ na kiñciditi niścayī |

nirvāsanaḥ sphūrtimātro na kiñcidiva śāmyati || 15-17||

eka eva bhavāmbhodhāvāsīdasti bhaviṣyati |

na te bandho'sti mokṣo vā kṛtakṛtyaḥ sukhaṃ cara || 15-18||

mā saṅkalpavikalpābhyāṃ cittaṃ kṣobhaya cinmaya |

upaśāmya sukhaṃ tiṣṭha svātmanyānandavigrahe || 15-19||

tyajaiva dhyānaṃ sarvatra mā kiñcid hṛdi dhāraya |

ātmā tvaṃ mukta evāsi kiṃ vimṛśya kariṣyasi || 15-20||