5.8 Sundarakanda - Ashtama Sargah

ॐ

5.8 સુન્દરકાણ્ડ - અષ્ટમ સર્ગઃ

Valmiki Gujarati

શ્રીમદ્વાલ્મીકીય રામાયણે સુન્દરકાણ્ડમ્ ।

અથ અષ્ટમસ્સર્ગઃ ।

સ તસ્ય મધ્યે ભવનસ્ય સંસ્થિતં મહદ્વિમાનં મણિવજ્રચિત્રિતમ્ ।

પ્રતપ્તજામ્બૂનદજાલકૃત્રિમં દદર્શ વીરઃ પવનાત્મજઃ કપિઃ ॥ 1 ॥

તદપ્રમેયાપ્રતિકારકૃત્રિમં કૃતં સ્વયં સાધ્વિતિ વિશ્વકર્મણા ।

દિવં ગતં વાયુપથપ્રતિષ્ઠિતં વ્યરાજતાદિત્યપથસ્ય લક્ષ્મવત્ ॥ 2 ॥

ન તત્ર કિઞ્ચિન્ન કૃતં પ્રયત્નતો ન તત્ર કિઞ્ચિન્ન મહાર્હરત્નવત્ ।

ન તે વિશેષા નિયતાઃ સુરેષ્વપિ ન તત્ર કિઞ્ચિન્ન મહાવિશેષવત્ ॥ 3 ॥

તપઃ સમાધાનપરાક્રમાર્જિતં મનઃ સમાધાનવિચારચારિણમ્ ।

અનેકસંસ્થાનવિશેષનિર્મિતં તતસ્તતસ્તુલ્યવિશેષદર્શનમ્ ॥ 4 ॥

વિશેષમાલમ્બ્ય વિશેષસંસ્થિતં વિચિત્રકૂટં બહુકૂટમણ્ડિતમ્ ।

મનોઽભિરામં શરદિન્દુનિર્મલં વિચિત્રકૂટં શિખરં ગિરેર્યથા ॥ 5 ॥

વહન્તિ યં કુણ્ડલશોભિતાનનાઃ મહાશના વ્યોમચરા નિશાચરાઃ ।

વિવૃત્તવિધ્વસ્તવિશાલલોચનાઃ મહાજવા ભૂતગણાઃ સહસ્રશઃ ॥ 6 ॥

વસન્તપુષ્પોત્કરચારુદર્શનં વસન્તમાસાદપિ કાન્તદર્શનમ્ ।

સ પુષ્પકં તત્ર વિમાનમુત્તમં દદર્શ તદ્વાનરવીરસત્તમઃ ॥ 7 ॥

ઇત્યાર્ષે શ્રીમદ્રામાયણે વાલ્મીકીય આદિકાવ્યે સુન્દરકાણ્ડે અષ્ટમસ્સર્ગઃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha aṣṭamassargaḥ |

sa tasya madhye bhavanasya saṃsthitaṃ mahadvimānaṃ maṇivajracitritam |

prataptajāmbūnadajālakṛtrimaṃ dadarśa vīraḥ pavanātmajaḥ kapiḥ || 1 ||

tadaprameyāpratikārakṛtrimaṃ kṛtaṃ svayaṃ sādhviti viśvakarmaṇā |

divaṃ gataṃ vāyupathapratiṣṭhitaṃ vyarājatādityapathasya lakṣmavat || 2 ||

na tatra kiñcinna kṛtaṃ prayatnato na tatra kiñcinna mahārharatnavat |

na te viśeṣā niyatāḥ sureṣvapi na tatra kiñcinna mahāviśeṣavat || 3 ||

tapaḥ samādhānaparākramārjitaṃ manaḥ samādhānavicāracāriṇam |

anekasaṃsthānaviśeṣanirmitaṃ tatastatastulyaviśeṣadarśanam || 4 ||

viśeṣamālambya viśeṣasaṃsthitaṃ vicitrakūṭaṃ bahukūṭamaṇḍitam |

mano'bhirāmaṃ śaradindunirmalaṃ vicitrakūṭaṃ śikharaṃ gireryathā || 5 ||

vahanti yaṃ kuṇḍalaśobhitānanāḥ mahāśanā vyomacarā niśācarāḥ |

vivṛttavidhvastaviśālalocanāḥ mahājavā bhūtagaṇāḥ sahasraśaḥ || 6 ||

vasantapuṣpotkaracārudarśanaṃ vasantamāsādapi kāntadarśanam |

sa puṣpakaṃ tatra vimānamuttamaṃ dadarśa tadvānaravīrasattamaḥ || 7 ||

ityārṣe śrīmadrāmāyaṇe vālmīkīya ādikāvye sundarakāṇḍe aṣṭamassargaḥ ||