5.66 Sundarakanda - Shatshashtitama Sargah

ॐ

5.66 સુન્દરકાણ્ડ - ષટ્ષષ્ટિતમ સર્ગઃ

Valmiki Gujarati

શ્રીમદ્વાલ્મીકીય રામાયણે સુન્દરકાણ્ડમ્ ।

અથ ષટ્ષષ્ટિતમસ્સર્ગઃ ।

એવમુક્તો હનુમતા રામો દશરથાત્મજઃ ।

તં મણિં હૃદયે કૃત્વા પ્રરુરોદ સલક્ષ્મણઃ ॥ 1 ॥

તં તુ દૃષ્ટ્વા મણિશ્રેષ્ઠં રાઘવ શ્શોકકર્શિતઃ ।

નેત્રાભ્યામશ્રુપૂર્ણાભ્યાં સુગ્રીવમિદમબ્રવીત્ ॥ 2 ॥

યથૈવ ધેનુ સ્સ્રવતિ સ્નેહાદ્વત્સસ્ય વત્સલા ।

તથા મમાપિ હૃદયં મણિરત્નસ્ય દર્શનાત્ ॥ 3 ॥

મણિરત્નમિદં દત્તં વૈદેહ્યાશ્શ્વશુરેણ મે ।

વધૂકાલે યથાબદ્ધમધિકં મૂર્ધ્નિ શોભતે ॥ 4 ॥

અયં હિ જલસમ્ભૂતો મણિસ્સજ્જનપૂજિતઃ ।

યજ્ઞે પરમતુષ્ટેન દત્તશ્શક્રેણ ધીમતા ॥ 5 ॥

ઇમં દૃષ્ટ્વા મણિશ્રેષ્ઠં યથા તાતસ્ય દર્શનમ્ ।

અદ્યાસ્મ્યવગતસ્સૌમ્ય વૈદેહસ્ય તથા વિભોઃ ॥ 6 ॥

અયં હિ શોભતે તસ્યાઃ પ્રિયાયા મૂર્ધ્નિ મે મણિઃ ।

અસ્યાદ્ય દર્શને નાહં પ્રાપ્તાં તામિવ ચિન્તયે ॥ 7 ॥

કિમાહ સીતા વૈદેહી બ્રૂહિ સૌમ્ય પુનઃ પુનઃ ।

પિપાસુમિવ તોયેન સિઞ્ચન્તી વાક્યવારિણા ॥ 8 ॥

ઇતસ્તુ કિં દુઃખતરં યદિમં વારિસમ્ભવમ્ ।

મણિં પશ્યામિ સૌમિત્રે વૈદેહીમાગતાં વિના ॥ 9 ॥

ચિરં જીવતિ વૈદેહી યદિ માસં ધરિષ્યતિ ।

ક્ષણં સૌમ્ય ન જીવેયં વિના તામસિતેક્ષણામ્ ॥ 10 ॥

નય મામપિ તં દેશં યત્ર દૃષ્ટા મમ પ્રિયા ।

ન તિષ્ઠેયં ક્ષણમપિ પ્રવૃત્તિમુપલભ્ય ચ ॥ 11 ॥

કથં સા મમ સુશ્રોણી ભીરુભીરુ સ્સતી સદા ।

ભયાવહાનાં ઘોરાણાં મધ્યે તિષ્ઠતિ રક્ષસામ્ ॥ 12 ॥

શારદ સ્તિમિરોન્મુક્તો નૂનં ચન્દ્રં ઇવામ્બુધૈઃ ।

આવૃતં વદનં તસ્યા ન વિરાજતિ રાક્ષસૈઃ ॥ 13 ॥

કિમાહ સીતા હનુમંસ્તત્ત્વતઃ કથયાદ્ય મે ।

એતેન ખલુ જીવિષ્યે ભેષજેનાતુરો યથા ॥ 14 ॥

મધુરા મધુરાલાપા કિમાહ મમ ભામિની ।

મદ્વિહીના વરારોહા હનુમન્ કથયસ્વ મે ॥ 15 ॥

ઇત્યાર્ષે શ્રીમદ્રામાયણે વાલ્મીકીય આદિકાવ્યે સુન્દરકાણ્ડે ષટ્ષષ્ટિતમસ્સર્ગઃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha ṣaṭṣaṣṭitamassargaḥ |

evamukto hanumatā rāmo daśarathātmajaḥ |

taṃ maṇiṃ hṛdaye kṛtvā praruroda salakṣmaṇaḥ || 1 ||

taṃ tu dṛṣṭvā maṇiśreṣṭhaṃ rāghava śśokakarśitaḥ |

netrābhyāmaśrupūrṇābhyāṃ sugrīvamidamabravīt || 2 ||

yathaiva dhenu ssravati snehādvatsasya vatsalā |

tathā mamāpi hṛdayaṃ maṇiratnasya darśanāt || 3 ||

maṇiratnamidaṃ dattaṃ vaidehyāśśvaśureṇa me |

vadhūkāle yathābaddhamadhikaṃ mūrdhni śobhate || 4 ||

ayaṃ hi jalasambhūto maṇissajjanapūjitaḥ |

yajñe paramatuṣṭena dattaśśakreṇa dhīmatā || 5 ||

imaṃ dṛṣṭvā maṇiśreṣṭhaṃ yathā tātasya darśanam |

adyāsmyavagatassaumya vaidehasya tathā vibhoḥ || 6 ||

ayaṃ hi śobhate tasyāḥ priyāyā mūrdhni me maṇiḥ |

asyādya darśane nāhaṃ prāptāṃ tāmiva cintaye || 7 ||

kimāha sītā vaidehī brūhi saumya punaḥ punaḥ |

pipāsumiva toyena siñcantī vākyavāriṇā || 8 ||

itastu kiṃ duḥkhataraṃ yadimaṃ vārisambhavam |

maṇiṃ paśyāmi saumitre vaidehīmāgatāṃ vinā || 9 ||

ciraṃ jīvati vaidehī yadi māsaṃ dhariṣyati |

kṣaṇaṃ saumya na jīveyaṃ vinā tāmasitekṣaṇām || 10 ||

naya māmapi taṃ deśaṃ yatra dṛṣṭā mama priyā |

na tiṣṭheyaṃ kṣaṇamapi pravṛttimupalabhya ca || 11 ||

kathaṃ sā mama suśroṇī bhīrubhīru ssatī sadā |

bhayāvahānāṃ ghorāṇāṃ madhye tiṣṭhati rakṣasām || 12 ||

śārada stimironmukto nūnaṃ candraṃ ivāmbudhaiḥ |

āvṛtaṃ vadanaṃ tasyā na virājati rākṣasaiḥ || 13 ||

kimāha sītā hanumaṃstattvataḥ kathayādya me |

etena khalu jīviṣye bheṣajenāturo yathā || 14 ||

madhurā madhurālāpā kimāha mama bhāminī |

madvihīnā varārohā hanuman kathayasva me || 15 ||

ityārṣe śrīmadrāmāyaṇe vālmīkīya ādikāvye sundarakāṇḍe ṣaṭṣaṣṭitamassargaḥ ||