1.27 Balakanda - Saptavimsha Sargah

ॐ

1.27 બાલકાણ્ડ - સપ્તવિંશ સર્ગઃ

Valmiki Gujarati

શ્રીમદ્વાલ્મીકીય રામાયણે બાલકાણ્ડમ્ ।

અથ સપ્તવિંશસ્સર્ગઃ ।

અથ તાં રજનીમુષ્ય વિશ્વામિત્રો મહાયશાઃ ।

પ્રહસ્ય રાઘવં વાક્યમુવાચ મધુરાક્ષરમ્ ॥ 1 ॥

પરિતુષ્ટોઽસ્મિ ભદ્રં તે રાજપુત્ર મહાયશઃ ।

પ્રીત્યા પરમયા યુક્તો દદામ્યસ્ત્રાણિ સર્વશઃ ॥ 2 ॥

દેવાસુરગણાન્વાપિ સગન્ધર્વોરગાનપિ ।

યૈરમિત્રાન્ પ્રસહ્યાજૌ વશીકૃત્ય જયિષ્યસિ ॥ 3 ॥

તાનિ દિવ્યાનિ ભદ્રં તે દદામ્યસ્ત્રાણિ સર્વશઃ ।

દણ્ડચક્રં મહદ્દિવ્યં તવ દાસ્યામિ રાઘવ ॥ 4 ॥

ધર્મચક્રં તતો વીર કાલચક્રં તથૈવ ચ ।

વિષ્ણુચક્રં તથાત્યુગ્રમૈન્દ્રમસ્ત્રં તથૈવ ચ ॥ 5 ॥

વજ્રમસ્ત્રં નરશ્રેષ્ઠ શૈવં શૂલવરં તથા ।

અસ્ત્રં બ્રહ્મશિરશ્ચૈવ ઐષીકમપિ રાઘવ ॥ 6 ॥

દદામિ તે મહાબાહો બ્રાહ્મમસ્ત્રમનુત્તમમ્ ।

ગદે દ્વે ચૈવ કાકુત્સ્થ મોદકી શિખરી ઉભે ॥ 7 ॥

પ્રદીપ્તે નરશાર્દૂલ પ્રયચ્છામિ નૃપાત્મજ ।

ધર્મપાશમહં રામ કાલપાશં તથૈવ ચ ॥ 8 ॥

પાશં વારુણમસ્ત્રં ચ દદામ્યહમનુત્તમમ્ ।

અશની દ્વે પ્રયચ્છામિ શુષ્કાર્દ્રે રઘુનન્દન ॥ 9 ॥

દદામિ ચાસ્ત્રં પૈનાકમસ્ત્રં નારાયણં તથા ।

આગ્નેયમસ્ત્રં દયિતં શિખરં નામ નામતઃ ॥ 10 ॥

વાયવ્યં પ્રથનં નામ દદામિ ચ તવાનઘ ।

અસ્ત્રં હયશિરો નામ ક્રૌઞ્ચમસ્ત્રં તથૈવ ચ ।

શક્તિદ્વયં ચ કાકુત્સ્થ દદામિ તવ રાઘવ ॥ 11 ॥

કઙ્કાલં મુસલં ઘોરં કાપાલમથ કઙ્કણમ્ ।

ધારયન્ત્યસુરા યાનિ દદામ્યેતાનિ સર્વશઃ ॥ 12 ॥

વૈદ્યાધરં મહાસ્ત્રં ચ નન્દનં નામ નામતઃ ।

અસિરત્નં મહાબાહો દદામિ ચ નૃપાત્મજ ॥ 13 ॥

ગાન્ધર્વમસ્ત્રં દયિતં માનવં નામ નામતઃ ।

પ્રસ્વાપનપ્રશમને દદ્મિ સૌરં ચ રાઘવ ॥ 14 ॥

દર્પણં શોષણં ચૈવ સન્તાપનવિલાપને ।

મદનં ચૈવ દુર્ધર્ષં કન્દર્પદયિતં તથા ॥ 15 ॥

પૈશાચમસ્ત્રં દયિતં મોહનં નામ નામતઃ ।

પ્રતીચ્છ નરશાર્દૂલ રાજપુત્ર મહાયશઃ ॥ 16 ॥

તામસં નરશાર્દૂલ સૌમનં ચ મહાબલ ।

સંવર્ધં ચૈવ દુર્ધર્ષં મૌસલં ચ નૃપાત્મજ ॥ 17 ॥

સત્યમસ્ત્રં મહાબાહો તથા માયાધરં પરમ્ ।

ઘોરં તેજઃ પ્રભં નામ પરતેજોઽપકર્ષણમ્ ॥ 18 ॥

સૌમ્યાસ્ત્રં શિશિરં નામ ત્વષ્ટુરસ્ત્રં સુદામનમ્ ।

દારુણં ચ ભગસ્યાપિ શિતેષુ મથ માનવમ્ ॥ 19 ॥

એતાન્ રામ મહાબાહો કામરૂપાન્ મહાબલાન્ ।

ગૃહાણ પરમોદારાન્ ક્ષિપ્રમેવ નૃપાત્મજ ॥ 20 ॥

સ્થિતસ્તુ પ્રાઙ્મુખો ભૂત્વા શુચિર્મુનિવરસ્તદા ।

દદૌ રામાય સુપ્રીતો મન્ત્રગ્રામમનુત્તમમ્ ॥ 21 ॥

સર્વસઙ્ગ્રહણં યેષાં દૈવતૈરપિ દુર્લભમ્ ।

તાન્યસ્ત્રાણિ તદા વિપ્રો રાઘવાય ન્યવેદયત્ ॥ 22 ॥

જપતસ્તુ મુનેસ્તસ્ય વિશ્વામિત્રસ્ય ધીમતઃ ।

ઉપતસ્થુર્મહાર્હાણિ સર્વાણ્યસ્ત્રાણિ રાઘવમ્ ॥ 23 ॥

ઊચુશ્ચ મુદિતાસ્સર્વે રામં પ્રાઞ્જલયસ્તદા ।

ઇમે સ્મ પરમોદારાઃ કિઙ્કરાસ્તવ રાઘવ ॥ 24 ॥

પ્રતિગૃહ્ય ચ કાકુત્સ્થઃ સમાલભ્ય ચ પાણિના ।

માનસા મે ભવિષ્યધ્વમિતિ તાનભ્યચોદયત્ ॥ 25 ॥

તતઃ પ્રીતમના રામો વિશ્વામિત્રં મહામુનિમ્ ।

અભિવાદ્ય મહાતેજા ગમનાયોપચક્રમે ॥ 26 ॥

ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાણ્ડે સપ્તવિંશસ્સર્ગઃ ॥

Roman (IAST) Transliteration

śrīmadvālmīkīya rāmāyaṇe bālakāṇḍam |

atha saptaviṃśassargaḥ |

atha tāṃ rajanīmuṣya viśvāmitro mahāyaśāḥ |

prahasya rāghavaṃ vākyamuvāca madhurākṣaram || 1 ||

parituṣṭo'smi bhadraṃ te rājaputra mahāyaśaḥ |

prītyā paramayā yukto dadāmyastrāṇi sarvaśaḥ || 2 ||

devāsuragaṇānvāpi sagandharvoragānapi |

yairamitrān prasahyājau vaśīkṛtya jayiṣyasi || 3 ||

tāni divyāni bhadraṃ te dadāmyastrāṇi sarvaśaḥ |

daṇḍacakraṃ mahaddivyaṃ tava dāsyāmi rāghava || 4 ||

dharmacakraṃ tato vīra kālacakraṃ tathaiva ca |

viṣṇucakraṃ tathātyugramaindramastraṃ tathaiva ca || 5 ||

vajramastraṃ naraśreṣṭha śaivaṃ śūlavaraṃ tathā |

astraṃ brahmaśiraścaiva aiṣīkamapi rāghava || 6 ||

dadāmi te mahābāho brāhmamastramanuttamam |

gade dve caiva kākutstha modakī śikharī ubhe || 7 ||

pradīpte naraśārdūla prayacchāmi nṛpātmaja |

dharmapāśamahaṃ rāma kālapāśaṃ tathaiva ca || 8 ||

pāśaṃ vāruṇamastraṃ ca dadāmyahamanuttamam |

aśanī dve prayacchāmi śuṣkārdre raghunandana || 9 ||

dadāmi cāstraṃ painākamastraṃ nārāyaṇaṃ tathā |

āgneyamastraṃ dayitaṃ śikharaṃ nāma nāmataḥ || 10 ||

vāyavyaṃ prathanaṃ nāma dadāmi ca tavānagha |

astraṃ hayaśiro nāma krauñcamastraṃ tathaiva ca |

śaktidvayaṃ ca kākutstha dadāmi tava rāghava || 11 ||

kaṅkālaṃ musalaṃ ghoraṃ kāpālamatha kaṅkaṇam |

dhārayantyasurā yāni dadāmyetāni sarvaśaḥ || 12 ||

vaidyādharaṃ mahāstraṃ ca nandanaṃ nāma nāmataḥ |

asiratnaṃ mahābāho dadāmi ca nṛpātmaja || 13 ||

gāndharvamastraṃ dayitaṃ mānavaṃ nāma nāmataḥ |

prasvāpanapraśamane dadmi sauraṃ ca rāghava || 14 ||

darpaṇaṃ śoṣaṇaṃ caiva santāpanavilāpane |

madanaṃ caiva durdharṣaṃ kandarpadayitaṃ tathā || 15 ||

paiśācamastraṃ dayitaṃ mohanaṃ nāma nāmataḥ |

pratīccha naraśārdūla rājaputra mahāyaśaḥ || 16 ||

tāmasaṃ naraśārdūla saumanaṃ ca mahābala |

saṃvardhaṃ caiva durdharṣaṃ mausalaṃ ca nṛpātmaja || 17 ||

satyamastraṃ mahābāho tathā māyādharaṃ param |

ghoraṃ tejaḥ prabhaṃ nāma paratejo'pakarṣaṇam || 18 ||

saumyāstraṃ śiśiraṃ nāma tvaṣṭurastraṃ sudāmanam |

dāruṇaṃ ca bhagasyāpi śiteṣu matha mānavam || 19 ||

etān rāma mahābāho kāmarūpān mahābalān |

gṛhāṇa paramodārān kṣiprameva nṛpātmaja || 20 ||

sthitastu prāṅmukho bhūtvā śucirmunivarastadā |

dadau rāmāya suprīto mantragrāmamanuttamam || 21 ||

sarvasaṅgrahaṇaṃ yeṣāṃ daivatairapi durlabham |

tānyastrāṇi tadā vipro rāghavāya nyavedayat || 22 ||

japatastu munestasya viśvāmitrasya dhīmataḥ |

upatasthurmahārhāṇi sarvāṇyastrāṇi rāghavam || 23 ||

ūcuśca muditāssarve rāmaṃ prāñjalayastadā |

ime sma paramodārāḥ kiṅkarāstava rāghava || 24 ||

pratigṛhya ca kākutsthaḥ samālabhya ca pāṇinā |

mānasā me bhaviṣyadhvamiti tānabhyacodayat || 25 ||

tataḥ prītamanā rāmo viśvāmitraṃ mahāmunim |

abhivādya mahātejā gamanāyopacakrame || 26 ||

ityārṣe śrīmadrāmāyaṇe vālmīkīya ādikāvye bālakāṇḍe saptaviṃśassargaḥ ||