Shri Rama Karnamritam — InfoLyter.in

ॐ

શ્રી રામ કર્ણામૃતમ્

Shri Rama Karnamritam

Rama Gujarati

મઙ્ગલશ્લોકાઃ

મઙ્ગલં ભગવાન્વિષ્ણુર્મઙ્ગલં મધુસૂદનઃ ।

મઙ્ગલં પુણ્ડરીકાક્ષો મઙ્ગલં ગરુડધ્વજઃ ॥ 1

મઙ્ગલં કોસલેન્દ્રાય મહનીયગુણાબ્ધયે ।

ચક્રવર્તિતનૂજાય સાર્વભૌમાય મઙ્ગલમ્ ॥ 2

વેદવેદાન્તવેદ્યાય મેઘશ્યામલમૂર્તયે ।

પુંસાં મોહનરૂપાય પુણ્યશ્લોકાય મઙ્ગલમ્ ॥ 3

વિશ્વામિત્રાન્તરઙ્ગાય મિથિલાનગરીપતેઃ ।

ભાગ્યાનાં પરિપાકાય ભવ્યરૂપાય મઙ્ગલમ્ ॥ 4

પિતૃભક્તાય સતતં ભ્રાતૃભિઃ સહ સીતયા ।

નન્દિતાખિલલોકાય રામચન્દ્રાય મઙ્ગલમ્ ॥ 5

ત્યક્તસાકેતવાસાય ચિત્રકૂટવિહારિણે ।

સેવ્યાય સર્વયમિનાં ધીરોદાત્તાય મઙ્ગલમ્ ॥ 6

સૌમિત્રિણા ચ જાનક્યા ચાપબાણાસિધારિણા ।

સંસેવ્યાય સદા ભક્ત્યા સાનુજાયાસ્તુ મઙ્ગલમ્ ॥ 7

દણ્ડકારણ્યવાસાય ખણ્ડિતામરશત્રવે ।

ગૃધ્રરાજાય ભક્તાય મુક્તિદાયાસ્તુ મઙ્ગલમ્ ॥ 8

સાદરં શબરીદત્તફલમૂલાભિલાષિણે ।

સૌલભ્યપરિપૂર્ણાય સત્ત્વોદ્યુક્તાય મઙ્ગલમ્ ॥ 9

હનૂમત્સમવેતાય હરીશાભીષ્ટદાયિને ।

વાલિપ્રમથનાયાસ્તુ મહાધીરાય મઙ્ગલમ્ ॥ 10

શ્રીમતે રઘુવીરાય સેતુલઙ્ઘિતસિન્ધવે ।

જિતરાક્ષસરાજાય રણધીરાય મઙ્ગલમ્ ॥ 11

આસાદ્ય નગરીં દિવ્યામભિષિક્તાય સીતયા ।

રાજાધિરાજરાજાય રામભદ્રાય મઙ્ગલમ્ ॥ 12

વિભીષણકૃતે પ્રીત્યા વિશ્વાભીષ્ટપ્રદાયિને ।

જાનકીપ્રાણનાથાય સદા રામાય મઙ્ગલમ્ ॥ 13

—-

શ્રીરામં ત્રિજગદ્ગુરું સુરવરં સીતામનોનાયકં

શ્યામાઙ્ગં શશિકોટિપૂર્ણવદનં ચઞ્ચત્કલાકૌસ્તુભમ્ ।

સૌમ્યં સત્યગુણોત્તમં સુસરયૂતીરે વસન્તં પ્રભું

ત્રાતારં સકલાર્થસિદ્ધિસહિતં વન્દે રઘૂણાં પતિમ્ ॥ 14

શ્રીરાઘવં દશરથાત્મજમપ્રમેયં

સીતાપતિં રઘુવરાન્વયરત્નદીપમ્ ।

આજાનુબાહુમરવિન્દદલાયતાક્ષં

રામં નિશાચરવિનાશકરં નમામિ ॥ 15

શ્રીરામચન્દ્ર કરુણાકર રાઘવેન્દ્ર

રાજેન્દ્રચન્દ્ર રઘુવંશસમુદ્રચન્દ્ર ।

સુગ્રીવનેત્રયુગલોત્પલ-પૂર્ણચન્દ્ર

સીતામનઃકુમુદચન્દ્ર નમો નમસ્તે ॥ 16

સીતામનોમાનસરાજહંસ

સંસારસન્તાપહર ક્ષમાવન્ ।

શ્રીરામ દૈત્યાન્તક શાન્તરૂપ

શ્રીતારકબ્રહ્મ નમો નમસ્તે ॥ 17

વિષ્ણો રાઘવ વાસુદેવ નૃહરે દેવૌઘચૂડામણે ।

સંસારાર્ણવકર્ણધારક હરે કૃષ્ણાય તુભ્યં નમઃ ॥ 18

સુગ્રીવાદિસમસ્તવાનરવરૈસ્સંસેવ્યમાનં સદા ।

વિશ્વામિત્રપરાશરાદિમુનિભિસ્સંસ્તૂયમાનં ભજે ॥ 19

રામં ચન્દનશીતલં ક્ષિતિસુતામોહાકરં શ્રીકરં

વૈદેહીનયનારવિન્દમિહિરં સમ્પૂર્ણચન્દ્રાનનમ્ ।

રાજાનં કરુણાસમેતનયનં સીતામનોનન્દનં

સીતાદર્પણચારુગણ્ડલલિતં વન્દે સદા રાઘવમ્ ॥ 20

જાનાતિ રામ તવ નામરુચિં મહેશો

જાનાતિ ગૌતમસતી ચરણપ્રભાવમ્ ।

જાનાતિ દોર્બલપરાક્રમમીશચાપો

જાનાત્યમોઘપટુબાણગતિં પયોધિઃ ॥ 21

માતા રામો મત્પિતા રામચન્દ્રો

ભ્રાતા રામો મત્સખા રાઘવેશઃ ।

સર્વસ્વં મે રામચન્દ્રો દાયાલુ-

ર્નાન્યં દૈવં નૈવ જાને ન જાને ॥ 22

વિમલકમલનેત્રં વિસ્ફુરન્નીલગાત્રં

તપનકુલપવિત્રં દાનવધ્વન્તમિત્રમ્ ।

ભુવનશુભચરિત્રં ભૂમિપુત્રીકલત્રં

દશરથવરપુત્રં નૌમિ રામાખ્યમિત્રમ્ ॥ 23

માર્ગે માર્ગે શાખિનાં રત્નવેદી

વેદ્યાં વેદ્યાં કિન્નરીબૃન્દગીતમ્ ।

ગીતે ગીતે મઞ્જુલાલાપગોષ્ઠી

ગોષ્ઠ્યાં ગોષ્ઠ્યાં ત્વત્કથા રામચન્દ્ર ॥ 24

વૃક્ષે વૃક્ષે વીક્ષિતાઃ પક્ષિસઙ્ઘાઃ

સઙ્ઘે સઙ્ઘે મઞ્જુલામોદવાક્યમ્ ।

વાક્યે વાક્યે મઞ્જુલાલાપગોષ્ઠી

ગોષ્ઠ્યાં ગોષ્ઠ્યાં ત્વત્કથા રામચન્દ્ર ॥ 25

દુરિતતિમિરચન્દ્રો દુષ્ટકઞ્જાતચન્દ્રઃ

સુરકુવલયચન્દ્રસ્સૂર્યવંશાબ્ધિચન્દ્રઃ ।

સ્વજનનિવહચન્દ્રશ્શત્રુરાજીવચન્દ્રઃ

પ્રણતકુમુદચન્દ્રઃ પાતુ માં રામચન્દ્રઃ ॥ 26

કલ્યાણદં કૌશિકયજ્ઞપાલં

કલાનિધિં કાઞ્ચનશૈલધીરમ્ ।

કઞ્જાતનેત્રં કરુણાસમુદ્રં

કાકુત્સ્થરામં કલયામિ ચિત્તે ॥ 27

રાજીવાયતલોચનં રઘુવરં નીલોત્પલશ્યામલં

મન્દારાઞ્ચિતમણ્ડપે સુલલિતે સૌવર્ણકે પુષ્પકે ।

આસ્થાને નવરત્નરાજિખચિતે સિંહાસને સંસ્થિતં

સીતાલક્ષ્મણલોકપાલસહિતં વન્દે મુનીન્દ્રાસ્પદમ્ ॥ 28

ધ્યાયે રામં સુધાંશું નતસકલભવારણ્યતાપપ્રહારમ્ ।

શ્યામં શાન્તં સુરેન્દ્રં સુરમુનિવિનુતં કોટિસૂર્યપ્રકાશમ્ ।

સીતાસૌમિત્રિસેવ્યં સુરનરસુગમં દિવ્યસિંહાસનસ્થમ્ ।

સાયાહ્ને રામચન્દ્રં સ્મિતરુચિરમુખં સર્વદા મે પ્રસન્નમ્ ॥ 29

ઇન્દ્રનીલમણિસન્નિભદેહં

વન્દનીયમસકૃન્મુનિબૃન્દૈઃ ।

લમ્બમાનતુલસીવનમાલં

ચિન્તયામિ સતતં રઘુવીરમ્ ॥ 30

સમ્પૂર્ણચન્દ્રવદનં સરસીરુહાક્ષં

માણિક્યકુણ્ડલધરં મુકુટાભિરામમ્ ।

ચામ્પેયગૌરવસનં શરચાપહસ્તં

શ્રીરામચન્દ્રમનિશં મનસા સ્મરામિ ॥ 31

માતુઃ પાર્શ્વે ચરન્તં મણિમયશયને મઞ્જુભૂષાઞ્ચિતાઙ્ગમ્ ।

મન્દં મન્દં પિબન્તં મુકુલિતનયનં સ્તન્યમન્યસ્તનાગ્રમ્ ।

અઙ્ગુલ્યાગ્રૈઃ સ્પૃશન્તં સુખપરવશયા સસ્મિતાલિઙ્ગિતાઙ્ગમ્ ।

ગાઢં ગાઢં જનન્યા કલયતુ હૃદયં મામકં રામબાલમ્ ॥ 32

રામાભિરામં નયનાભિરામં

વાચાભિરામં વદનાભિરામમ્ ।

સર્વાભિરામં ચ સદાભિરામં

વન્દે સદા દાશરથિં ચ રામમ્ ॥ 33

રાશબ્દોચ્ચારમાત્રેણ મુખાન્નિર્યાતિ પાતકાઃ ।

પુનઃ પ્રવેશભીત્યા ચ મકારસ્તુ કવાટવત્ ॥ 34

અનર્ઘમાણિક્યવિરાજમાન-

શ્રીપાદુકાલઙ્કૃતશોભનાભ્યામ્ ।

અશેષબૃન્દારકવન્દિતાભ્યાં

નમો નમો રામપદામ્બુજાભ્યામ્ ॥ 35

ચલત્કનકકુણ્ડલોલ્લસિતદિવ્યગણ્ડસ્થલં

ચરાચરજગન્મયં ચરણપદ્મગઙ્ગાશ્રયમ્ ।

ચતુર્વિધફલપ્રદં ચરમપીઠમધ્યસ્થિતં

ચિદંશમખિલાસ્પદં દશરથાત્મજં ચિન્તયે ॥ 36

સનન્દનમુનિપ્રિયં સકલવર્ણવેદાત્મકં

સમસ્તનિગમાગમસ્ફુરિતતત્ત્વસિંહાસનમ્ ।

સહસ્રનયનાબ્જજાદ્યમરબૃન્દસંસેવિતં

સમષ્ટિપુરવલ્લભં દશરથાત્મજં ચિન્તયે ॥ 37

જાગ્રત્સ્વપ્નસુષુપ્તિ-કાલવિલસત્તત્ત્વાત્મચિન્માત્રકં

ચૈતન્યાત્મકમાધિપાપરહિતં ભૂમ્યાદિતન્માત્રકમ્ ।

શામ્ભવ્યાદિસમસ્તયોગકુલકં સાઙ્ખ્યાદિતત્ત્વાત્પરં

શબ્દાવાચ્યમહં નમામિ સતતં વ્યુત્પત્તિનાશાત્પરમ્ ॥ 38

ઇક્ષ્વાકુવંશાર્ણવજાતરત્નં

સીતાઙ્ગનાયૌવનભાગ્યરત્નમ્ ।

વૈકુણ્ઠરત્નં મમ ભાગ્યરત્નં

શ્રીરામરત્નં શિરસા નમામિ ॥ 39

ઇક્ષ્વાકુનન્દનં સુગ્રીવપૂજિતં

ત્રૈલોક્યરક્ષકં સત્યસન્ધં સદા ।

રાઘવં રઘુપતિં રાજીવલોચનં

રામચન્દ્રં ભજે રાઘવેશં ભજે ॥ 40

ભક્તપ્રિયં ભક્તસમાધિગમ્યં

ચિન્તાહરં ચિન્તિતકામધેનુમ્ ।

સૂર્યેન્દુકોટિદ્યુતિભાસ્વરં તં

રામં ભજે રાઘવરામચન્દ્રમ્ ॥ 41

શ્રીરામં જનકક્ષિતીશ્વરસુતાવક્ત્રામ્બુજાહારિણં

શ્રીમદ્ભાનુકુલાબ્ધિકૌસ્તુભમણિં શ્રીરત્નવક્ષસ્સ્થલમ્ ।

શ્રીકણ્ઠાદ્યમરૌઘરત્નમકુટાલઙ્કારપાદામ્બુજં

શ્રીવત્સોજ્જ્વલમિન્દ્રનીલસદૃશં શ્રીરામચન્દ્રં ભજે ॥ 42

રામચન્દ્ર ચરિતાકથામૃતં

લક્ષ્મણાગ્રજગુણાનુકીર્તનમ્ ।

રાઘવેશ તવ પાદસેવનં

સમ્ભવન્તુ મમ જન્મજન્મનિ ॥ 43

અજ્ઞાનસમ્ભવ-ભવામ્બુધિબાડબાગ્નિ-

રવ્યક્તતત્ત્વનિકરપ્રણવાધિરૂઢઃ ।

સીતાસમેતમનુજેન હૃદન્તરાલે

પ્રાણપ્રયાણસમયે મમ સન્નિધત્તે ॥ 44

રામો મત્કુલદૈવતં સકરુણં રામં ભજે સાદરં

રામેણાખિલઘોરપાપનિહતી રામાય તસ્મૈ નમઃ ।

રામાન્નાસ્તિ જગત્રયૈકસુલભો રામસ્ય દાસોઽસ્મ્યહં

રામે પ્રીતિરતીવ મે કુલગુરો શ્રીરામ રક્ષસ્વ મામ્ ॥ 45

વૈદેહીસહિતં સુરદ્રુમતલે હૈમે મહામણ્ટપે ।

મધ્યેપુષ્પકમાસને મણિમયે વીરાસને સંસ્થિતમ્ ।

અગ્રે વાચયતિ પ્રભઞ્જનસુતે તત્ત્વં મુનિભ્યઃ પરમ્ ।

વ્યાખ્યાન્તં ભરતાદિભિઃ પરિવૃતં રામં ભજે શ્યામલમ્ ॥ 46

વામે ભૂમિસુતા પુરસ્તુ હનુમાન્પશ્ચાત્સુમિત્રાસુત-

શ્શત્રુઘ્નો ભરતશ્ચ પાર્શ્વદલયોર્વાય્વાદિકોણેષ્વપિ ।

સુગ્રીવશ્ચ વિભીષણશ્ચ યુવરાટ્ તારાસુતો જામ્બવાન્

મધ્યે નીલસરોજકોમલરુચિં રામં ભજે શ્યામલમ્ ॥ 47

કેયૂરાઙ્ગદકઙ્કણૈર્મણિગણૈર્વૈરોચમાનં સદા

રાકાપર્વણિચન્દ્રકોટિસદૃશં છત્રેણ વૈરાજિતમ્ ।

હેમસ્તમ્ભસહસ્રષોડશયુતે મધ્યે મહામણ્ડપે

દેવેશં ભરતાદિભિઃ પરિવૃતં રામં ભજે શ્યામલમ્ ॥ 48

સાકેતે શરદિન્દુકુન્દધવલે સૌઘે મહામણ્ટપે ।

પર્યસ્તાગરુધૂપધૂમપટલે કર્પૂરદીપોજ્જ્વલે ।

સુગ્રીવાઙ્ગદવાયુપુત્રસહિતં સૌમિત્રિણા સેવિતં

લીલામાનુષવિગ્રહં રઘુપતિં રામં ભજે શ્યામલમ્ ॥ 49

શાન્તં શારદચન્દ્રકોટિસદૃશં ચન્દ્રાભિરામાનનં

ચન્દ્રાર્કાગ્નિવિકાસિકુણ્ડલધરં ચન્દ્રાવતંસસ્તુતમ્ ।

વીણાપુસ્તકસાક્ષસૂત્રવિલસદ્વ્યાખ્યાનમુદ્રાકરં

દેવેશં ભરતાદિભિઃ પરિવૃતં રામં ભજે શ્યામલમ્ ॥ 50

રામં રાક્ષસમર્દનં રઘુપતિં શક્રારિવિધ્વંસિનં

સુગ્રીવેપ્સિતરાજ્યદં સુરપતેઃ પુત્રાન્તકં શાર્‍ઙ્ગિણમ્ ।

ભક્તાનામભયપ્રદં ભયહરં પાપૌઘવિધ્વંસિનં

સીતાસેવિતપાદપદ્મયુગલં રામં ભજે શ્યામલમ્ ॥ 51

કન્દર્પાયુતકોટિકોટિતુલિતં કાલામ્બુદશ્યામલં

કમ્બુગ્રીવમુદારકૌસ્તુભધરં કર્ણાવતંસોત્પલમ્ ।

કસ્તૂરીતિલકોજ્જ્વલં સ્મિતમુખં ચિન્મુદ્રયાલઙ્કૃતં

સીતાલક્ષ્મણવાયુપુત્રસહિતં સિંહાસનસ્થં ભજે ॥ 52

સાકેતે નવરત્નપઙ્ક્તિખચિતે ચિત્રધ્વજાલઙ્કૃતે

વાસે સ્વર્ણમયે દલાષ્ટલલિતે પદ્મે વિમાનોત્તમે ।

આસીનં ભરતાદિસોદરજનૈઃ શાખામૃગૈઃ કિન્નરૈઃ

દિક્પાલૈર્મુનિપુઙ્ગવૈર્નૃપગણૈસ્સંસેવ્યમાનં ભજે ॥ 53

કસ્તૂરીઘનસારકુઙ્કુમલસચ્છ્રીચન્દનાલઙ્કૃતં

કન્દર્પાધિકસુન્દરં ઘનનિભં કાકુત્સ્થવંશધ્વજમ્ ।

કલ્યાણામ્ભરવેષ્ટિતં કમલયા યુક્તં કલાવલ્લભં

કલ્યાણાચલકાર્મુકપ્રિયસખં કલ્યાણરામં ભજે ॥ 54

મુક્તેર્મૂલં મુનિવરહૃદાનન્દકન્દં મુકુન્દં

કૂટસ્થાખ્યં સકલવરદં સર્વચૈતન્યરૂપમ્ ।

નાદાતીતં કમલનિલયં નાદનાદાન્તતત્ત્વં

નાદાતીતં પ્રકૃતિરહિતં રામચન્દ્રં ભજેઽહમ્ ॥ 55

તારાકારં નિખિલનિલયં તત્ત્વમસ્યાદિલક્ષ્યં

શબ્દાવાચ્યં ત્રિગુણરહિતં વ્યોમમઙ્ગુષ્ઠમાત્રમ્ ।

નિર્વાણાખ્યં સગુણમગુણવ્યોમરન્ધ્રાન્તરસ્થં

સૌષુમ્નાન્તઃ પ્રણવસહિતં રામચન્દ્રં ભજેઽહમ્ ॥ 56

નિજાનન્દાકારં નિગમતુરગારાધિતપદં

પરબ્રહ્માનન્દં પરમપદગં પાપહરણમ્ ।

કૃપાપારાવારં પરમપુરુષં પદ્મનિલયં

ભજે રામં શ્યામં પ્રકૃતિરહિતં નિર્ગુણમહમ્ ॥ 57

સાકેતે નગરે સમસ્તમહિમાધારે જગન્મોહને

રત્નસ્તમ્ભસહસ્રમણ્ટપમહાસિંહાસને સામ્બુજે ।

વિશ્વામિત્રવસિષ્ઠગૌતમશુકવ્યાસાદિભિર્મૌનિભિઃ

ધ્યેયં લક્ષ્મણલોકપાલસહિતં સીતાસમેતં ભજે ॥ 58

રામં શ્યામાભિરામં રવિશશિનયનં કોટિસૂર્યપ્રકાશં

દિવ્યં દિવ્યાસ્ત્રપાણિં શરમુખશરધિં ચારુકોડણ્ડહસ્તમ્ ।

કાલં કાલાગ્નિરુદ્રં રિપુકુલદહનં વિઘ્નવિચ્છેદદક્ષં

ભીમં ભીમાટ્ટહાસં સકલભયહરં રામચન્દ્રં ભજેઽહમ્ ॥ 59

શ્રીરામં ભુવનૈકસુન્દરતનું ધારાધરશ્યામલં

રાજીવાયતલોચનં રઘુવરં રાકેન્દુબિમ્બાનનમ્ ।

કોદણ્ડાદિનિજાયુધાશ્રિતભુજૈર્ભ્રાન્તં વિદેહાત્મજા-

ધીશં ભક્તજનાવનં રઘુવરં શ્રીરામચન્દ્રં ભજે ॥ 60

શ્રીવત્સાઙ્કમુદારકૌસ્તુભલસત્પીતામ્બરાલઙ્કૃતં

નાનારત્નવિરાજમાનમકુટં નીલામ્બુદશ્યામલમ્ ।

કસ્તૂરીઘનસારચર્ચિતતનું મન્દારમાલાધરં

કન્દર્પાયુતસુન્દરં રઘુપતિં સીતાસમેતં ભજે ॥ 61

સદાનન્દદેવે સહસ્રારપદ્મે

ગલચ્ચન્દ્રપીયૂષધારામૃતાન્તે ।

સ્થિતં રામમૂર્તિં નિષેવે નિષેવે-

ઽન્યદૈવં ન સેવે ન સેવે ન સેવે ॥ 62

સુધાભાસિતદ્વીપમધ્યે વિમાને

સુપર્વાલિવૃક્ષોજ્જ્વલે શેષતલ્પે ।

નિષણ્ણં રમાઙ્કં નિષેવે નિષેવે-

ઽન્યદૈવં ન સેવે ન સેવે ન સેવે ॥ 63

ચિદંશં સમાનન્દમાનન્દકન્દં

સુષુમ્નાખ્યરન્ધ્રાન્તરાલે ચ હંસમ્ ।

સચક્રં સશઙ્ખં સપીતામ્બરાઙ્કં

પરઞ્ચાન્યદૈવં ન જાને ન જાને ॥ 64

ચતુર્વેદકૂટોલ્લસત્કારણાખ્યં

સ્ફુરદ્દિવ્યવૈમાનિકે ભોગિતલ્પે ।

પરન્ધામમૂર્તિં નિષણ્ણં નિષેવે

નિષેવેઽન્યદૈવં ન સેવે ન સેવે ॥ 65

સિંહાસનસ્થં સુરસેવિતવ્યં

રત્નાઙ્કિતાલઙ્કૃતપાદપદ્મમ્ ।

સીતાસમેતં શશિસૂર્યનેત્રં

રામં ભજે રાઘવ રામચન્દ્રમ્ ॥ 66

રામં પુરાણપુરુષં રમણીયવેષં

રાજાધિરાજમકુટાર્ચિતપાદપીઠમ્ ।

સીતાપતિં સુનયનં જગદેકવીરં

શ્રીરામચન્દ્રમનિશં કલયામિ ચિત્તે ॥ 67

પરાનન્દવસ્તુસ્વરૂપાદિસાક્ષિં

પરબ્રહ્મગમ્યં પરઞ્જ્યોતિમૂર્તિમ્ ।

પરાશક્તિમિત્રાઽપ્રિયારાધિતાઙ્ઘ્રિં

પરન્ધામરૂપં ભજે રામચન્દ્રમ્ ॥ 68

મન્દસ્મિતં કુણ્ડલગણ્ડભાગં

પીતામ્બરં ભૂષણભૂષિતાઙ્ગમ્ ।

નીલોત્પલાઙ્ગં ભુવનૈકમિત્રં

રામં ભજે રાઘવ રામચન્દ્રમ્ ॥ 69

અચિન્ત્યમવ્યક્તમનન્તરૂપ-

મદ્વૈતમાનન્દમનાદિગમ્યમ્ ।

પુણ્યસ્વરૂપં પુરુષોત્તમાખ્યં

રામં ભજે રાઘવ રામચન્દ્રમ્ ॥ 70

પદ્માસનસ્થં સુરસેવિતવ્યં

પદ્માલયાનન્દકટાક્ષવીક્ષ્યમ્ ।

ગન્ધર્વવિદ્યાધરગીયમાનં

રામં ભજે રાઘવ રામચન્દ્રમ્ ॥ 71

અનન્તકીર્તિં વરદં પ્રસન્નં

પદ્માસનં સેવકપારિજાતમ્ ।

રાજાધિરાજં રઘુવીરકેતું

રામં ભજે રાઘવ રામચન્દ્રમ્ ॥ 72

સુગ્રીવમિત્રં સુજનાનુરૂપં

લઙ્કાહરં રાક્ષસવંશનાશમ્ ।

વેદાશ્રયાઙ્ગં વિપુલાયતાક્ષં

રામં ભજે રાઘવ રામચન્દ્રમ્ ॥ 73

સકૃત્પ્રણતરક્ષાયાં સાક્ષી યસ્ય વિભીષણઃ ।

સાપરાધપ્રતીકારઃ સ શ્રીરામો ગતિર્મમ ॥ 74

ફલમૂલાશિનૌ દાન્તૌ તાપસૌ ધર્મચારિણૌ ।

રક્ષઃકુલવિહન્તારૌ ભ્રાતરૌ રામલક્ષ્મણૌ ॥ 75

તરુણૌ રૂપસમ્પન્નૌ સુકુમારૌ મહાબલૌ ।

પુણ્ડરીક વિશાલાક્ષૌ ચીરકૃષ્ણાજિનામ્બરૌ ॥ 76

કૌસલ્યાનયનેન્દું દશરથમુખારવિન્દમાર્તાણ્ડમ્ ।

સીતામાનસહંસં રામં રાજીવલોચનં વન્દે ॥ 77

ભર્જનં ભવબીજાનાં માર્જનં સુખસમ્પદામ્ ।

તર્જનં યમદૂતાનાં રામરામેતિ કીર્તનમ્ ॥ 78

ન જાને જાનકી જાને રામ ત્વન્નામવૈભવમ્ ।

સર્વેશો ભગવાન્ શમ્ભુર્વાલ્મીકિર્વેત્તિ વા નવા ॥ 79

કરતલધૃતચાપં કાલમેઘસ્વરૂપં

સરસિજદલનેત્રં ચારુહાસં સુગાત્રમ્ ।

વિચિનુતવનવાસં વિક્રમોદગ્રવેષં

પ્રણમત રઘુનાથં જાનકીપ્રાણનાથમ્ ॥ 80

વિદ્યુત્સ્ફુરન્મકરકુણ્ડલદીપ્તચારુ-

ગણ્ડસ્થલં મણિકિરીટવિરાજમાનમ્ ।

પીતામ્બરં જલદનીલમુદારકાન્તિં

શ્રીરામચન્દ્રમનિશં કલયામિ ચિત્તે ॥ 81

રત્નોલ્લસજ્જ્વલિતકુણ્ડલગણ્ડભાગં

કસ્તૂરિકાતિલકશોભિતફાલભાગમ્ ।

કર્ણાન્તદીર્ઘનયનં કરુણાકટાક્ષં

શ્રીરામચન્દ્ર મુખમાત્મનિ સન્નિધત્તમ્ ॥ 82

વૈદેહીસહિતં ચ લક્ષ્મણયુતં કૈકેયિપુત્રાન્વિતં

સુગ્રીવં ચ વિભીષણાનિલસુતૌ નીલં નલં સાઙ્ગદમ્ ।

વિશ્વામિત્રવસિષ્ઠગૌતમભરદ્વાજાદિકાન્ માનયન્

રામો મારુતિસેવિતઃ સ્મરતુ માં સામ્રાજ્યસિંહાસને ॥ 83

સકલગુણનિધાનં યોગિભિસ્સ્તૂયમાનં

ભજિતસુરવિમાનં રક્ષિતેન્દ્રાદિમાનમ્ ।

મહિતવૃષભયાનં સીતયા શોભમાનં

સ્મરતુ હૃદયભાનું બ્રહ્મરામાભિરામમ્ ॥ 84

ત્રિદશકુમુદચન્દ્રો દાનવામ્ભોજચન્દ્રો

દુરિતતિમિરચન્દ્રો યોગિનાં જ્ઞાનચન્દ્રઃ ।

પ્રણતનયનચન્દ્રો મૈથિલીનેત્રચન્દ્રો

દશમુખરિપુચન્દ્રઃ પાતુ માં રામચન્દ્રઃ ॥ 85

યન્નામૈવ સહસ્રનામસદૃશં યન્નામ વેદૈસ્સમં

યન્નામાઙ્કિતવાક્ય-માસુરબલસ્ત્રીગર્ભવિચ્છેદનમ્ ।

યન્નામ શ્વપચાર્યભેદરહિતં મુક્તિપ્રદાનોજ્જ્વલં

તન્નામાઽલઘુરામરામરમણં શ્રીરામનામામૃતમ્ ॥ 86

રાજીવનેત્ર રઘુપુઙ્ગવ રામભદ્ર

રાકેન્દુબિમ્બસદૃશાનન નીલગાત્ર ।

રામાઽભિરામ રઘુવંશસમુદ્ભવ ત્વં

શ્રીરામચન્દ્ર મમ દેહિ કરાવલમ્બમ્ ॥ 87

માણિક્યમઞ્જીરપદારવિન્દં

રામાર્કસમ્ફુલ્લમુખારવિન્દમ્ ।

ભક્તાભયપ્રાપિકરારવિન્દાં

દેવીં ભજે રાઘવવલ્લભાં તામ્ ॥ 88

જયતુ વિજયકારી જાનકીમોદકારી

તપનકુલવિહારી દણ્ડકારણ્યચારી ।

દશવદનકુઠારી દૈત્યવિચ્છેદકારી

મણિમકુટકધારી ચણ્ડકોદણ્ડધારી ॥ 89

રામઃ પિતા રઘવ એવ માતા

રામસ્સુબન્ધુશ્ચ સખા હિતશ્ચ ।

રામો ગુરુર્મે પરમં ચ દૈવં

રામં વિના નાઽન્યમહં સ્મરામિ ॥ 90

શ્રીરામ મે ત્વં હિ પિતા ચ માતા

શ્રીરામ મે ત્વં હિ સુહૃચ્ચ બન્ધુઃ ।

શ્રીરામ મે ત્વં હિ ગુરુશ્ચ ગોષ્ઠી

શ્રીરામ મે ત્વં હિ સમસ્તમેવ ॥ 91

રામચન્દ્રચરિતામૃતપાનં

સોમપાનશતકોટિસમાનમ્ ।

સોમપાનશતકોટિભિરીયા-

જ્જન્મ નૈતિ રઘુનાયકનામ્ના ॥ 92

રામ રામ દયાસિન્ધો રાવણારે જગત્પતે ।

ત્વત્પાદકમલાસક્તિ-ર્ભવેજ્જન્મનિ જન્મનિ ॥ 93

શ્રીરામચન્દ્રેતિ દયાપરેતિ

ભક્તપ્રિયેતિ ભવબન્ધનમોચનેતિ ।

નાથેતિ નાગશયનેતિ સદા સ્તુવન્તં

માં પાહિ ભીતમનિશં કૃપણં કૃપાલો ॥ 94

અયોધ્યાનાથ રાજેન્દ્ર સીતાકાન્ત જગત્પતે ।

શ્રીરામ પુણ્ડરીકાક્ષ રામચન્દ્ર નમોઽસ્તુ તે ॥ 95

હે રામ હે રમણ હે જગદેકવીર

હે નાથ હે રઘુપતે કરુણાલવાલ ।

હે જાનકીરમણ હે જગદેકબન્ધો

માં પાહિ દીનમનિશં કૃપણં કૃતઘ્નમ્ ॥ 96

જાનાતિ રામ તવ તત્ત્વગતિં હનૂમાન્ ।

જાનાતિ રામ તવ સખ્યગતિં કપીશઃ ।

જાનાતિ રામ તવ યુદ્ધગતિં દશાસ્યો ।

જાનાતિ રામ ધનદાનુજ એવ સત્યમ્ ॥ 97

સેવ્યં શ્રીરામમન્ત્રં શ્રવણશુભકરં શ્રેષ્ઠસુજ્ઞાનિમન્ત્રં

સ્તવ્યં શ્રીરામમન્ત્રં નરકદુરિતદુર્વારનિર્ઘાતમન્ત્રમ્ ।

ભવ્યં શ્રીરામમન્ત્રં ભજતુ ભજતુ સંસારનિસ્તારમન્ત્રં

દિવ્યં શ્રીરામમન્ત્રં દિવિ ભુવિ વિલસન્મોક્ષરક્ષૈકમન્ત્રમ્ ॥ 98

નિખિલનિલયમન્ત્રં નિત્યતત્ત્વાખ્યમન્ત્રં

ભવકુલહરમન્ત્રં ભૂમિજાપ્રાણમન્ત્રમ્ ।

પવનજનુતમન્ત્રં પાર્વતીમોક્ષમન્ત્રં

પશુપતિનિજમન્ત્રં પાતુ માં રામમન્ત્રમ્ ॥ 99

પ્રણવનિલયમન્ત્રં પ્રાણનિર્વાણમન્ત્રં

પ્રકૃતિપુરુષમન્ત્રં બ્રહ્મરુદ્રેન્દ્રમન્ત્રમ્ ।

પ્રકટદુરિતરાગદ્વેષનિર્ણાશમન્ત્રં

100

રઘુપતિનિજમન્ત્રં રામરામેતિમન્ત્રમ્ ॥ 100

દશરથસુતમન્ત્રં દૈત્યસંહારમન્ત્રં

વિબુધવિનુતમન્ત્રં વિશ્વવિખ્યાતમન્ત્રમ્ ।

મુનિગણનુતમન્ત્રં મુક્તિમાર્ગૈકમન્ત્રં

101

રઘુપતિનિજમન્ત્રં રામરામેતિમન્ત્રમ્ ॥ 101

સંસારસાગરભયાપહવિશ્વમન્ત્રં

સાક્ષાન્મુમુક્ષુજનસેવિતસિદ્ધમન્ત્રમ્ ।

સારઙ્ગહસ્તમુખહસ્તનિવાસમન્ત્રં

102

કૈવલ્યમન્ત્રમનિશં ભજ રામમન્ત્રમ્ ॥ 102

જયતુ જયતુ મન્ત્રં જન્મસાફલ્યમન્ત્રં

જનનમરણભેદક્લેશવિચ્છેદમન્ત્રમ્ ।

સકલનિગમમન્ત્રં સર્વશાસ્ત્રૈકમન્ત્રં

103

રઘુપતિનિજમન્ત્રં રામરામેતિમન્ત્રમ્ ॥ 103

જગતિ વિશદમન્ત્રં જાનકીપ્રાણમન્ત્રં

વિબુધવિનુતમન્ત્રં વિશ્વવિખ્યાતમન્ત્રમ્ ।

દશરથસુતમન્ત્રં દૈત્યસંહારમન્ત્રં

104

રઘુપતિનિજમન્ત્રં રામરામેતિમન્ત્રમ્ ॥ 104

બ્રહ્માદિયોગિમુનિપૂજિતસિદ્ધમન્ત્રં

દારિદ્ર્યદુઃખભવરોગવિનાશમન્ત્રમ્ ।

સંસારસાગરસમુત્તરણૈકમન્ત્રં

105

વન્દે મહાભયહરં રઘુરામમન્ત્રમ્ ॥ 105

શત્રુચ્છેદૈકમન્ત્રં સરસમુપનિષદ્વાક્યસમ્પૂજ્યમન્ત્રં

સંસારોત્તારમન્ત્રં સમુચિતસમયે સઙ્ગનિર્યાણમન્ત્રમ્ ।

સર્વૈશ્વર્યૈકમન્ત્રં વ્યસનભુજગસન્દષ્ટસન્ત્રાણમન્ત્રં

106

જિહ્વે શ્રીરામમન્ત્રં જપ જપ સફલં જન્મસાફલ્યમન્ત્રમ્ ॥ 106

નિત્યં શ્રીરામમન્ત્રં નિરુપમમધિકં નીતિસુજ્ઞાનમન્ત્રં

સત્યં શ્રીરામમન્ત્રં સદમલહૃદયે સર્વદારોગ્યમન્ત્રમ્ ।

સ્તુત્યં શ્રીરામમન્ત્રં સુલલિતસુમનસ્સૌખ્યસૌભાગ્યમન્ત્રં

107

પઠ્યં શ્રીરામમન્ત્રં પવનજવરદં પાતુ માં રામમન્ત્રમ્ ॥ 107

વ્યામોહપ્રશમૌષધં મુનિમનોવૃત્તિપ્રવૃત્ત્યૌષધં

દૈત્યોન્મૂલકરૌષધં ભવભયપ્રધ્વંસનૈકૌષધમ્ ।

ભક્તાનન્દકરૌષધં ત્રિભુવને સઞ્જીવનૈકૌષધં

108

શ્રેયઃ પ્રાપ્તિકરૌષધં પિબ મનઃ શ્રીરામનામૌષધમ્ ॥ 108

સકલભુવનરત્નં સર્વશાસ્ત્રાર્થરત્નં

સમરવિજયરત્નં સચ્ચિદાનન્દરત્નમ્ ।

દશમુખહરરત્નં દાનવારાતિરત્નં

109

રઘુકુલનૃપરત્નં પાતુ માં રામરત્નમ્ ॥ 109

સકલભુવનરત્નં સચ્ચિદાનન્દરત્નં

સકલહૃદયરત્નં સૂર્યબિમ્બાન્તરત્નમ્ ।

વિમલસુકૃતરત્નં વેદવેદાન્તરત્નં

110

પુરહરજપરત્નં પાતુ માં રામરત્નમ્ ॥ 110

નિગમશિખરરત્નં નિર્મલાનન્દરત્નં

નિરુપમગુણરત્નં નાદનાદાન્તરત્નમ્ ।

દશરથકુલરત્નં દ્વાદશાન્તસ્સ્થરત્નં

111

પશુપતિજપરત્નં પાતુ માં રામરત્નમ્ ॥ 111

શતમખસુતરત્નં ષોડશાન્તસ્સ્થરત્નં

મુનિજનજપરત્નં મુખ્યવૈકુણ્ઠરત્નમ્ ।

નિરુપમગુણરત્નં નીરજાન્તસ્સ્થરત્નં

112

પરમપદવિરત્નં પાતુ માં રામરત્નમ્ ॥ 112

સકલસુકૃતરત્નં સત્યવાક્યાર્થરત્નં

શમદમગુણરત્નં શાશ્વતાનન્દરત્નમ્ ।

પ્રણયનિલયરત્નં પ્રસ્ફુટદ્યોતિરત્નં

113

પરમપદવિરત્નં પાતુ માં રામરત્નમ્ ॥ 113

નિગમશિખરરત્નં નિત્યમાશાસ્યરત્નં

જનનુતનૃપરત્નં જાનકીરૂપરત્નમ્ ।

ભુવનવલયરત્નં ભૂભુજામેકરત્નં

114

રઘુકુલવરરત્નં પાતુ માં રામરત્નમ્ ॥ 114

વિશાલનેત્રં પરિપૂર્ણગાત્રં

સીતાકલત્રં સુરવૈરિજૈત્રમ્ ।

કારુણ્યપાત્રં જગતઃ પવિત્રં

115

શ્રીરામરત્નં પ્રણતોઽસ્મિ નિત્યમ્ ॥ 115

હે ગોપાલક હે દયાજલનિધે હે સદ્ગુણામ્ભોનિધે

હે દૈત્યાન્તક હે વિભીષણદયાપરીણ હે ભૂપતે ।

હે વૈદેહસુતામનોજવિહૃતે હે કોટિમારાકૃતે

116

હે નવ્યામ્બુજનેત્ર પાલય પરં જાનામિ ન ત્વાં વિના ॥ 116

યસ્ય કિઞ્ચિદપિ નો હરણીયં

કર્મ કિઞ્ચિદપિ નો ચરણીયમ્ ।

રામનામ ચ સદા સ્મરણીયં

117

લીલયા ભવજલં તરણીયમ્ ॥ 117

દશરથસુતમીશં દણ્ડકારણ્યવાસં

શતમખમણિનીલં જાનકીપ્રાણલોલમ્ ।

સકલભુવનમોહં સન્નુતામ્ભોદદેહં

118

બહુલનુતસમુદ્રં ભાવયે રામભદ્રમ્ ॥ 118

વિશાલનેત્રં પરિપૂર્ણગાત્રં

સીતાકલત્રં સુરવૈરિજૈત્રમ્ ।

જગત્પવિત્રં પરમાત્મતન્ત્રં

119

શ્રીરામચન્દ્રં પ્રણમામિ ચિત્તે ॥ 119

જય જય રઘુરામ શ્રીમુખામ્ભોજભાનો

જય જય રઘુવીર શ્રીમદમ્ભોજનેત્ર ।

જય જય રઘુનાથ શ્રીકરાભ્યર્ચિતાઙ્ઘ્રિ

120

જય જય રઘુવર્ય શ્રીશ કારુણ્યસિન્ધો ॥ 120

મન્દારમૂલે મણિપીઠસંસ્થં

સુધાપ્લુતં દિવ્યવિરાટ્સ્વરૂપમ્ ।

સબિન્દુનાદાન્તકલાન્તતુર્ય-

121

મૂર્તિં ભજેઽહં રઘુવંશરત્નમ્ ॥ 121

નાદં નાદવિનીલચિત્તપવનં નાદાન્તત્ત્વપ્રિયં

નામાકારવિવર્જિતં નવઘનશ્યામાઙ્ગનાદપ્રિયમ્ ।

નાદામ્ભોજમરન્દમત્તવિલસદ્ભૃઙ્ગં મદાન્તસ્સ્થિતં

122

નાદાન્તધૃવમણ્ડલાબ્જરુચિરં રામં ભજે તારકમ્ ॥ 122

નાનાભૂતહૃદબ્જપદ્મનિલયં નામોજ્જ્વલાભૂષણમ્ ।

નામસ્તોત્રપવિત્રિતત્રિભુવનં નારાયણાષ્ટાક્ષરમ્ ।

નાદાન્તેન્દુગલત્સુધાપ્લુતતનું નાનાત્મચિન્માત્રકમ્ ।

123

નાનાકોટિયુગાન્તભાનુસદૃશં રામં ભજે તારકમ્ ॥ 123

વેદ્યં વેદગુરું વિરિઞ્ચિજનકં વેદાન્તમૂર્તિં સ્ફુર-

દ્વેદં વેદકલાપમૂલમહિમાધારાન્તકન્દાઙ્કુરમ્ ।

વેદશૃઙ્ગસમાનશેષશયનં વેદાન્તવેદ્યાત્મકં

124

વેદારાધિતપાદપઙ્કજમહં રામં ભજે તારકમ્ ॥ 124

મજ્જીવં મદનુગ્રહં મદધિપં મદ્ભાવનં મત્સુખં

મત્તાતં મમ સદ્ગુરું મમ વરં મોહાન્ધવિચ્છેદનમ્ ।

મત્પુણ્યં મદનેકબાન્ધવજનં મજ્જીવનં મન્નિધિં

125

મત્સિદ્ધિં મમ સર્વકર્મસુકૃતં રામં ભજે તારકમ્ ॥ 125

નિત્યં નીરજલોચનં નિરુપમં નીવારશૂકોપમં

નિર્ભેદાનુભવં નિરન્તરગુણં નીલાઙ્ગરાગોજ્જ્વલમ્ ।

નિષ્પાપં નિગમાગમાર્ચિતપદં નિત્યાત્મકં નિર્મલં

126

નિષ્પુણ્યં નિખિલં નિરઞ્જનપદં રામં ભજે તારકમ્ ॥ 126

ધ્યાયે ત્વાં હૃદયામ્બુજે રઘુપતિં વિજ્ઞાનદીપાઙ્કુરં

હંસોહંસપરમ્પરાદિમહિમાધારં જગન્મોહનમ્ ।

હસ્તામ્ભોજગદાબ્જચક્રમતુલં પીતામ્બરં કૌસ્તુભં

127

શ્રીવત્સં પુરુષોત્તમં મણિનિભં રામં ભજે તારકમ્ ॥ 127

સત્યજ્ઞાનમનન્તમચ્યુતમજં ચાવ્યાકૃતં તત્પરં

કૂટસ્થાદિસમસ્તસાક્ષિમનઘં સાક્ષાદ્વિરાટ્તત્ત્વદમ્ ।

વેદ્યં વિશ્વમયં સ્વલીનભુવનસ્વારાજ્યસૌખ્યપ્રદં

128

પૂર્ણં પૂર્ણતરં પુરાણપુરુષં રામં ભજે તારકમ્ ॥ 128

રામં રાક્ષસવંશનાશનકરં રાકેન્દુબિમ્બાનનં

રક્ષોરિં રઘુવંશવર્ધનકરં રક્તાધરં રાઘવમ્ ।

રાધાયાત્મનિવાસિનં રવિનિભં રમ્યં રમાનાયકં

129

રન્ધ્રાન્તર્ગતશેષશાયિનમહં રામં ભજે તારકમ્ ॥ 129

ઓતપ્રોતસમસ્તવસ્તુનિચયં ઓઙ્કારબીજાક્ષરં

ઓઙ્કારપ્રકૃતિં ષડક્ષરહિતં ઓઙ્કારકન્દાઙ્કુરમ્ ।

ઓઙ્કારસ્ફુટભૂર્ભુવસ્સુપરિતં ઓઘત્રયારાધિતમ્

130

ઓઙ્કારોજ્જ્વલસિંહપીઠનિલયં રામં ભજે તારકમ્ ॥ 130

સાકેતે નગરે સમસ્તસુખદે હર્મ્યેઽબ્જકોટિદ્યુતે

નક્ષત્રગ્રહપઙ્ક્તિલગ્નશિખરે ચાન્તર્યપઙ્કેરુહે ।

વાલ્મીકાત્રિપરાશરાદિમુનિભિસ્સંસેવ્યમાનં સ્થિતં

131

સીતાલઙ્કૃતવામભાગમનિશં રામં ભજે તારકમ્ ॥ 131

વૈકુણ્ઠે નગરે સુરદ્રુમતલે ચાનન્દવપ્રાન્તરે

નાનારત્નવિનિર્મિતસ્ફુટપટુપ્રાકારસંવેષ્ટિતે ।

સૌધેન્દૂપલશેષતલ્પલલિતે નીલોત્પલચ્છાદિતે

132

પર્યઙ્કે શયનં રમાદિસહિતં રામં ભજે તારકમ્ ॥ 132

વન્દે રામમનાદિપૂરુષમજં વન્દે રમાનાયકં

વન્દે હારિકિરીટકુણ્ડલધરં વન્દે સુનીલદ્યુતિમ્ ।

વન્દે ચાપકલમ્બકોજ્જ્વલકરં વન્દે જગન્મઙ્ગલં

133

વન્દે પઙ્ક્તિરથાત્મજં મમ ગુરું વન્દે સદા રાઘવમ્ ॥ 133

વન્દે શૌનકગૌતમાદ્યભિનુતં વન્દે ઘનશ્યામલં

વન્દે તારકપીઠમધ્યનિલયં વન્દે જગન્નાયકમ્ ।

વન્દે ભક્તજનૌઘદેવિવટપં વન્દે ધનુર્વલ્લભં

134

વન્દે તત્ત્વમસીતિવાક્યજનકં વન્દે સદા રાઘવમ્ ॥ 134

વન્દે સૂર્યશશાઙ્કલોચનયુગં વન્દે જગત્પાવનં

વન્દે પત્રસહસ્રપદ્મનિલયં વન્દે પુરારિપ્રિયમ્ ।

વન્દે રાક્ષસવંશનાશનકરં વન્દે સુધાશીતલં

135

વન્દે દેવકપીન્દ્રકોટિવિનુતં વન્દે સદા રાઘવમ્ ॥ 135

વન્દે સાગરગર્વભઙ્ગવિશિખં વન્દે જગજ્જીવનં

વન્દે કૌશિકયાગરક્ષણકરં વન્દે ગુરુણાં ગુરુમ્ ।

વન્દે બાણશરાસનોજ્જ્વલકરં વન્દે જટાવલ્કલં

136

વન્દે લક્ષ્મણભૂમિજાન્વિતમહં વન્દે સદા રાઘવમ્ ॥ 136

વન્દે પાણ્ડરપુણ્ડરીકનયનં વન્દેઽબ્જબિમ્બાનનં

વન્દે કમ્બુગલં કરાબ્જયુગલં વન્દે લલાટોજ્જ્વલમ્ ।

વન્દે પીતદુકૂલમમ્બુદનિભં વન્દે જગન્મોહનં

137

વન્દે કારણમાનુષોજ્જ્વલતનું વન્દે સદા રાઘવમ્ ॥ 137

વન્દે નીલસરોજકોમલરુચિં વન્દે જગદ્વન્દિતં

વન્દે સૂર્યકુલાબ્ધિકૌસ્તુભમણિં વન્દે સુરારાધિતમ્ ।

વન્દે પાતકપઞ્ચકપ્રહરણં વન્દે જગત્કારણં

138

વન્દે વિંશતિપઞ્ચતત્ત્વરહિતં વન્દે સદા રાઘવમ્ ॥ 138

વન્દે સાધકવર્ગકલ્પકતરું વન્દે ત્રિમૂર્ત્યાત્મકં

વન્દે નાદલયાન્તરસ્થલગતં વન્દે ત્રિવર્ગાત્મકમ્ ।

વન્દે રાગવિહીનચિત્તસુલભં વન્દે સભાનાયકં

139

વન્દે પૂર્ણદયામૃતાર્ણવમહં વન્દે સદા રાઘવમ્ ॥ 139

વન્દે સાત્ત્વિકતત્ત્વમુદ્રિતતનું વન્દે સુધાદાયકં

વન્દે ચારુચતુર્ભુજં મણિનિભં વન્દે ષડબ્જસ્થિતમ્ ।

વન્દે બ્રહ્મપિપીલિકાદિનિલયં વન્દે વિરાટ્વિગ્રહં

140

વન્દે પન્નગતલ્પશાયિનમહં વન્દે સદા રાઘવમ્ ॥ 140

સિંહાસનસ્થં મુનિસિદ્ધસેવ્યં

રક્તોત્પલાલઙ્કૃતપાદપદ્મમ્ ।

સીતાસમેતં શશિસૂર્યનેત્રં

141

રામં ભજે રાઘવરામચન્દ્રમ્ ॥ 141

શ્રીરામભદ્રાશ્રિતસદ્ગુરૂણાં

પાદારવિન્દં ભજતાં નરાણામ્ ।

આરોગ્યમૈશ્વર્યમનન્તકીર્તિ-

142

રન્તે ચ વિષ્ણોઃ પદમસ્તિ સત્યમ્ ॥ 142

દશરથવરપુત્રં જાનકીસત્કલત્રં

દશમુખહરદક્ષં પદ્મપત્રાયતાક્ષમ્ ।

કરધૃતશરચાપં ચારુમુક્તાકલાપં

143

રઘુકુલનૃવરેણ્યં રામમીડે શરણ્યમ્ ॥ 143

દશમુખગજસિંહં દૈત્યગર્વાતિરંહં

કદનભયદહસ્તં તારકબ્રહ્મ શસ્તમ્ ।

મણિખચિતકિરીટં મઞ્જુલાલાપવાટં

144

દશરથકુલચન્દ્રં રામચન્દ્રં ભજેઽહમ્ ॥ 144

રામં રક્તસરોરુહાક્ષમમલં લઙ્કાધિનાથાન્તકં

કૌસલ્યાનયનોત્સુકં રઘુવરં નાગેન્દ્રતલ્પસ્થિતમ્ ।

વૈદેહીકુચકુમ્ભકુઙ્કુમરજોલઙ્કારહારં હરિં

145

માયામાનુષવિગ્રહં રઘુપતિં સીતાસમેતં ભજે ॥ 145

રામં રાક્ષસમર્દનં રઘુવરં દૈતેયભિધ્વંસિનં

સુગ્રીવેપ્સિતરાજ્યદં સુરપતેર્ભીત્યન્તકં શાર્‍ઙ્ગિણમ્ ।

ભક્તાનામભયપ્રદં ભયહરં પાપૌઘવિધ્વંસિનં

146

સામીરિસ્તુતપાદપદ્મયુગલં સીતાસમેતં ભજે ॥ 146

યત્પાદામ્બુજરેણુના મુનિસતી મુક્તિઙ્ગતા યન્મહઃ

પુણ્યં પાતકનાશનં ત્રિજગતાં ભાતિ સ્મૃતં પાવનમ્ ।

સ્મૃત્વા રાઘવમપ્રમેયમમલં પૂર્ણેન્દુમન્દસ્મિતં

147

તં રામં સરસીરુહાક્ષમમલં સીતાસમેતં ભજે ॥ 147

વૈદેહીકુચમણ્ડલાગ્ર-વિલસન્માણિક્યહસ્તામ્બુજં

ચઞ્ચત્કઙ્કણહારનૂપુર-લસત્કેયૂરહારાન્વિતમ્ ।

દિવ્યશ્રીમણિકુણ્ડલોજ્જ્વલ-મહાભૂષાસહસ્રાન્વિતં

148

વીરશ્રીરઘુપુઙ્ગવં ગુણનિધિં સીતાસમેતં ભજે ॥ 148

વૈદેહીકુચમણ્ડલોપરિ-લસન્માણિક્યહારાવલી-

મધ્યસ્થં નવનીતકોમલરુચિં નીલોત્પલશ્યામલમ્ ।

કન્દર્પાયુતકોટિસુન્દરતનું પૂર્ણેન્દુબિમ્બાનનં

149

કૌસલ્યાકુલભૂષણં રઘુપતિં સીતાસમેતં ભજે ॥ 149

દિવ્યારણ્યયતીન્દ્રનામનગરે મધ્યે મહામણ્ટપે

સ્વર્ણસ્તમ્ભસહસ્રષોડશયુતે મન્દારમૂલાશ્રિતે ।

નાનારત્નવિચિત્રનિર્મલમહાસિંહાસને સંસ્થિતં

150

સીતાલક્ષ્મણસેવિતં રઘુપતિં સીતાસમેતં ભજે ॥ 150

કસ્તૂરીતિલકં કપીન્દ્રહરણં કારુણ્યવારાન્નિધિં

ક્ષીરામ્ભોધિસુતામુખાબ્જમધુપં કલ્યાણસમ્પન્નિધિમ્ ।

કૌસલ્યાનયનોત્સુકં કપિવરત્રાણં મહાપૌરુષં

151

કૌમારપ્રિયમર્કકોટિસદૃશં સીતાસમેતં ભજે ॥ 151

વિદ્યુત્કોટિદિવાકરદ્યુતિનિભં શ્રીકૌસ્તુભાલઙ્કૃતં

યોગીન્દ્રૈસ્સનકાદિભિઃ પરિવૃતં કૈલાસનાથપ્રિયમ્ ।

મુક્તારત્નકિરીટકુણ્ડલધરં ગ્રૈવેયહારાન્વિતં

152

વૈદેહીકુચસન્નિવાસમનિશં સીતાસમેતં ભજે ॥ 152

મેઘશ્યામલમમ્બુજાતનયનં વિસ્તીર્ણવક્ષસ્સ્થલં

બાહુદ્વન્દ્વવિરાજિતં સુવદનં શોણાઙ્ઘ્રિપઙ્કેરુહમ્ ।

નાનારત્નવિચિત્રભૂષણયુતં કોદણ્ડબાણાઙ્કિતં

153

ત્રૈલોક્યાઽપ્રતિમાનસુન્દરતનું સીતાસમેતં ભજે ॥ 153

વૈદેહીયુતવામભાગમતુલં વન્દારુમન્દારકં

વન્દે પ્રસ્તુતકીર્તિવાસિતતરુચ્છાયાનુકારિપ્રભમ્ ।

વૈદેહીકુચકુઙ્કુમાઙ્કિતમહોરસ્કં મહાભૂષણં

154

વેદાન્તૈરુપગીયમાનમસકૃત્સીતાસમેતં ભજે ॥ 154

દેવાનાં હિતકારણેન ભુવને ધૃત્વાઽવતારં ધ્રુવં

રામં કૌશિકયજ્ઞવિઘ્નદલનં તત્તાટકાસંહરમ્ ।

નિત્યં ગૌતમપત્નિશાપદલનશ્રીપાદરેણું શુભં

155

શમ્ભોરુત્કટચાપખણ્ડનમહાસત્વં ભજે રાઘવમ્ ॥ 155

શ્રીરામં નવરત્નકુણ્ડલધરં શ્રીરામરક્ષામણિં

શ્રીરામં ચ સહસ્રભાનુસદૃશં શ્રીરામચન્દ્રોદયમ્ ।

શ્રીરામં શ્રુતકીર્તિમાકરમહં શ્રીરામમુક્તિપ્રદં

156

શ્રીરામં રઘુનન્દનં ભયહરં શ્રીરામચન્દ્રં ભજે ॥ 156

રામમિન્દીવરશ્યામં રાજીવાયતલોચનમ્ ।

157

જ્યાઘોષનિર્જિતારાતિં જાનકીરમણં ભજે ॥ 157

દીર્ઘબાહુમરવિન્દલોચનં

દીનવત્સલમનાથરક્ષકમ્ ।

દીક્ષિતં સકલલોકરક્ષણે

158

દૈવતં દશરથાત્મજં ભજે ॥ 158

પ્રાતસ્સ્મરામિ રઘુનાથમુખારવિન્દં

મન્દસ્મિતં મધુરભાષિ વિશાલફાલમ્ ।

કર્ણાવલમ્બિચલકુણ્ડલગણ્ડભાગં

159

કર્ણાન્તદીર્ઘનયનં નયનાભિરામમ્ ॥ 159

પ્રાતર્ભજામિ રઘુનાથકરારવિન્દં

રક્ષોગણાય ભયદં વરદં નિજેભ્યઃ ।

યદ્રાજસંસદિ વિભિદ્ય મહેશચાપં

160

સીતાકરગ્રહણમઙ્ગલમાપ સદ્યઃ ॥ 160

પ્રાતર્નમામિ રઘુનાથપદારવિન્દં

પદ્માઙ્કુશાદિશુભરેખશુભાવહં ચ ।

યોગીન્દ્રમાનસમધુવ્રતસેવ્યમાનં

161

શાપાપહં સપદિ ગૌતમધર્મપત્ન્યાઃ ॥ 161

પ્રાતર્વદામિ વચસા રઘુનાથનામ

વાગ્દોષહારિ સકલં કલુષં નિહન્તૃ ।

યત્પાર્વતી સ્વપતિના સહ ભોક્તુકામા

162

પ્રીત્યા સહસ્રહરિનામસમં જજાપ ॥ 162

પ્રાતઃ શ્રયે શ્રુતિનુતં રઘુનાથમૂર્તિં

નીલામ્બુદોત્પલસિતેતરરત્નનીલામ્ ।

આમુક્તમૌક્તિકવિશેષવિભૂષણાઢ્યાં

163

ધ્યેયાં સમસ્તમુનિભિર્નિજભૃત્યમુખ્યૈઃ ॥ 163

રઘુકુલવરનાથો જાનકીપ્રાણનાથઃ

પિતૃવચનવિધાતા કીશરાજ્યપ્રદાતા ।

પ્રતિનિશિચરનાશઃ પ્રાપ્તરાજ્યપ્રવેશો

164

વિહિતભુવનરક્ષઃ પાતુ પદ્માયતાક્ષઃ ॥ 164

કુવલયદલનીલઃ પીતવાસાઃ સ્મિતાસ્યો

વિવિધરુચિરભૂષાભૂષિતો દિવ્યમૂર્તિઃ ।

દશરથકુલનાથો જાનકીપ્રાણનાથો

165

નિવસતુ મમ ચિત્તે સર્વદા રામચન્દ્રઃ ॥ 165

જયતુ જયતુ રામો જાનકીવલ્લભોઽયં

જયતુ જયતુ રામશ્ચન્દ્રચૂડાર્ચિતાઙ્ઘ્રિઃ ।

જયતુ જયતુ વાણીનાથનાથઃ પરાત્મા

166

જયતુ જયતુ રામોઽનાથનાથઃ કૃપાલુઃ ॥ 166

વદતુ વદતુ વાણી રામરામેતિ નિત્યં

જયતુ જયતુ ચિત્તં રામપાદારવિન્દમ્ ।

નમતુ નમતુ દેહં સન્તતં રામચન્દ્રં

167

ન ભવતુ મમ પાપં જન્મજન્માન્તરેષુ ॥ 167

આનન્દરૂપં વરદં પ્રસન્નં

સિંહેક્ષણં સેવકપારિજાતમ્ ।

નીલોત્પલાઙ્ગં ભુવનૈકમિત્રં

168

રામં ભજે રાઘવરામચન્દ્રમ્ ॥ 168

લઙ્કાવિરામં રણરઙ્ગભીમં

રાજીવનેત્રં રઘુવંશમિત્રમ્ ।

કારુણ્યમૂર્તિં કરુણાપ્રપૂર્તિં

169

શ્રીરામચન્દ્રં શરણં પ્રપદ્યે ॥ 169

સુગ્રીવમિત્રં પરમં પવિત્રં

સીતાકલત્રં નવહેમસૂત્રમ્ ।

કારુણ્યપાત્રં શતપત્રનેત્રં

170

શ્રીરામચન્દ્રં શિરસા નમામિ ॥ 170

શ્રીરાઘવેતિ રમણેતિ રઘૂદ્વહેતિ

રામેતિ રાવણહરેતિ રમાધવેતિ ।

સાકેતનાથસુમુખેતિ ચ સુવ્રતેતિ

171

વાણી સદા વદતુ રામ હરે હરેતિ ॥ 171

શ્રીરામનામામૃતમન્ત્રબીજં

સઞ્જીવનં ચેન્મનસિ પ્રતિષ્ઠમ્ ।

હાલાહલં વા પ્રલયાનલં વા

172

મૃત્યોર્મુખં વા વિતથીકરોતિ ॥ 172

કિં યોગશાસ્ત્રૈઃ કિમશેષવિદ્યા

કિં યાગગઙ્ગાદિવિશેષતીર્થૈઃ ।

કિં બ્રહ્મચર્યાશ્રમસઞ્ચરેણ

173

ભક્તિર્નચેત્તે રઘુવંશકીર્ત્યામ્ ॥ 173

ઇદં શરીરં શ્લથસન્ધિજર્ઝરં

પતત્યવશ્યં પરિણામપેશલમ્ ।

કિમૌષથં પૃચ્છસિ મૂઢ દુર્મતે

174

નિરામયં રામકથામૃતં પિબ ॥ 174

હે રામભદ્રાશ્રય હે કૃપાલો

હે ભક્તલોકૈકશરણ્યમૂર્તે ।

પુનીહિ માં ત્વચ્ચરણારવિન્દં

175

જગત્પવિત્રં શરણં મમાઽસ્તુ ॥ 175

નીલાભ્રદેહ નિખિલેશ જગન્નિવાસ

રાજીવનેત્ર રમણીયગુણાભિરામ ।

શ્રીદામ દૈત્યકુલમર્દન રામચન્દ્ર

176

ત્વત્પાદપદ્મમનિશં કલયામિ ચિત્તે ॥ 176

શ્રીરામચન્દ્ર કરુણાકર દીનબન્ધો

સીતાસમેત ભરતાગ્રજ રાઘવેશ ।

પાપાર્તિભઞ્જન ભયાતુરદીનબન્ધો

177

પાપામ્બુધૌ પતિતમુદ્ધર મામનાથમ્ ॥ 177

ઇન્દીવરદલશ્યામ-મિન્દુકોટિનિભાનનમ્ ।

175

કન્દર્પકોટિલાવણ્યં વન્દેઽહં રઘુનન્દનમ્ ॥ 175

ઇતિ શ્રીબોધેન્દ્રસરસ્વતી કૃત શ્રીરામકર્ણામૃતમ્ ॥

Roman (IAST) Transliteration

maṅgalaślokāḥ

maṅgalaṃ bhagavānviṣṇurmaṅgalaṃ madhusūdanaḥ |

maṅgalaṃ puṇḍarīkākṣo maṅgalaṃ garuḍadhvajaḥ || 1

maṅgalaṃ kosalendrāya mahanīyaguṇābdhaye |

cakravartitanūjāya sārvabhaumāya maṅgalam || 2

vedavedāntavedyāya meghaśyāmalamūrtaye |

puṃsāṃ mohanarūpāya puṇyaślokāya maṅgalam || 3

viśvāmitrāntaraṅgāya mithilānagarīpateḥ |

bhāgyānāṃ paripākāya bhavyarūpāya maṅgalam || 4

pitṛbhaktāya satataṃ bhrātṛbhiḥ saha sītayā |

nanditākhilalokāya rāmacandrāya maṅgalam || 5

tyaktasāketavāsāya citrakūṭavihāriṇe |

sevyāya sarvayamināṃ dhīrodāttāya maṅgalam || 6

saumitriṇā ca jānakyā cāpabāṇāsidhāriṇā |

saṃsevyāya sadā bhaktyā sānujāyāstu maṅgalam || 7

daṇḍakāraṇyavāsāya khaṇḍitāmaraśatrave |

gṛdhrarājāya bhaktāya muktidāyāstu maṅgalam || 8

sādaraṃ śabarīdattaphalamūlābhilāṣiṇe |

saulabhyaparipūrṇāya sattvodyuktāya maṅgalam || 9

hanūmatsamavetāya harīśābhīṣṭadāyine |

vālipramathanāyāstu mahādhīrāya maṅgalam || 10

śrīmate raghuvīrāya setulaṅghitasindhave |

jitarākṣasarājāya raṇadhīrāya maṅgalam || 11

āsādya nagarīṃ divyāmabhiṣiktāya sītayā |

rājādhirājarājāya rāmabhadrāya maṅgalam || 12

vibhīṣaṇakṛte prītyā viśvābhīṣṭapradāyine |

jānakīprāṇanāthāya sadā rāmāya maṅgalam || 13

—-

śrīrāmaṃ trijagadguruṃ suravaraṃ sītāmanonāyakaṃ

śyāmāṅgaṃ śaśikoṭipūrṇavadanaṃ cañcatkalākaustubham |

saumyaṃ satyaguṇottamaṃ susarayūtīre vasantaṃ prabhuṃ

trātāraṃ sakalārthasiddhisahitaṃ vande raghūṇāṃ patim || 14

śrīrāghavaṃ daśarathātmajamaprameyaṃ

sītāpatiṃ raghuvarānvayaratnadīpam |

ājānubāhumaravindadalāyatākṣaṃ

rāmaṃ niśācaravināśakaraṃ namāmi || 15

śrīrāmacandra karuṇākara rāghavendra

rājendracandra raghuvaṃśasamudracandra |

sugrīvanetrayugalotpala-pūrṇacandra

sītāmanaḥkumudacandra namo namaste || 16

sītāmanomānasarājahaṃsa

saṃsārasantāpahara kṣamāvan |

śrīrāma daityāntaka śāntarūpa

śrītārakabrahma namo namaste || 17

viṣṇo rāghava vāsudeva nṛhare devaughacūḍāmaṇe |

saṃsārārṇavakarṇadhāraka hare kṛṣṇāya tubhyaṃ namaḥ || 18

sugrīvādisamastavānaravaraissaṃsevyamānaṃ sadā |

viśvāmitraparāśarādimunibhissaṃstūyamānaṃ bhaje || 19

rāmaṃ candanaśītalaṃ kṣitisutāmohākaraṃ śrīkaraṃ

vaidehīnayanāravindamihiraṃ sampūrṇacandrānanam |

rājānaṃ karuṇāsametanayanaṃ sītāmanonandanaṃ

sītādarpaṇacārugaṇḍalalitaṃ vande sadā rāghavam || 20

jānāti rāma tava nāmaruciṃ maheśo

jānāti gautamasatī caraṇaprabhāvam |

jānāti dorbalaparākramamīśacāpo

jānātyamoghapaṭubāṇagatiṃ payodhiḥ || 21

mātā rāmo matpitā rāmacandro

bhrātā rāmo matsakhā rāghaveśaḥ |

sarvasvaṃ me rāmacandro dāyālu-

rnānyaṃ daivaṃ naiva jāne na jāne || 22

vimalakamalanetraṃ visphurannīlagātraṃ

tapanakulapavitraṃ dānavadhvantamitram |

bhuvanaśubhacaritraṃ bhūmiputrīkalatraṃ

daśarathavaraputraṃ naumi rāmākhyamitram || 23

mārge mārge śākhināṃ ratnavedī

vedyāṃ vedyāṃ kinnarībṛndagītam |

gīte gīte mañjulālāpagoṣṭhī

goṣṭhyāṃ goṣṭhyāṃ tvatkathā rāmacandra || 24

vṛkṣe vṛkṣe vīkṣitāḥ pakṣisaṅghāḥ

saṅghe saṅghe mañjulāmodavākyam |

vākye vākye mañjulālāpagoṣṭhī

goṣṭhyāṃ goṣṭhyāṃ tvatkathā rāmacandra || 25

duritatimiracandro duṣṭakañjātacandraḥ

surakuvalayacandrassūryavaṃśābdhicandraḥ |

svajananivahacandraśśatrurājīvacandraḥ

praṇatakumudacandraḥ pātu māṃ rāmacandraḥ || 26

kalyāṇadaṃ kauśikayajñapālaṃ

kalānidhiṃ kāñcanaśailadhīram |

kañjātanetraṃ karuṇāsamudraṃ

kākutstharāmaṃ kalayāmi citte || 27

rājīvāyatalocanaṃ raghuvaraṃ nīlotpalaśyāmalaṃ

mandārāñcitamaṇḍape sulalite sauvarṇake puṣpake |

āsthāne navaratnarājikhacite siṃhāsane saṃsthitaṃ

sītālakṣmaṇalokapālasahitaṃ vande munīndrāspadam || 28

dhyāye rāmaṃ sudhāṃśuṃ natasakalabhavāraṇyatāpaprahāram |

śyāmaṃ śāntaṃ surendraṃ suramunivinutaṃ koṭisūryaprakāśam |

sītāsaumitrisevyaṃ suranarasugamaṃ divyasiṃhāsanastham |

sāyāhne rāmacandraṃ smitaruciramukhaṃ sarvadā me prasannam || 29

indranīlamaṇisannibhadehaṃ

vandanīyamasakṛnmunibṛndaiḥ |

lambamānatulasīvanamālaṃ

cintayāmi satataṃ raghuvīram || 30

sampūrṇacandravadanaṃ sarasīruhākṣaṃ

māṇikyakuṇḍaladharaṃ mukuṭābhirāmam |

cāmpeyagauravasanaṃ śaracāpahastaṃ

śrīrāmacandramaniśaṃ manasā smarāmi || 31

mātuḥ pārśve carantaṃ maṇimayaśayane mañjubhūṣāñcitāṅgam |

mandaṃ mandaṃ pibantaṃ mukulitanayanaṃ stanyamanyastanāgram |

aṅgulyāgraiḥ spṛśantaṃ sukhaparavaśayā sasmitāliṅgitāṅgam |

gāḍhaṃ gāḍhaṃ jananyā kalayatu hṛdayaṃ māmakaṃ rāmabālam || 32

rāmābhirāmaṃ nayanābhirāmaṃ

vācābhirāmaṃ vadanābhirāmam |

sarvābhirāmaṃ ca sadābhirāmaṃ

vande sadā dāśarathiṃ ca rāmam || 33

rāśabdoccāramātreṇa mukhānniryāti pātakāḥ |

punaḥ praveśabhītyā ca makārastu kavāṭavat || 34

anarghamāṇikyavirājamāna-

śrīpādukālaṅkṛtaśobhanābhyām |

aśeṣabṛndārakavanditābhyāṃ

namo namo rāmapadāmbujābhyām || 35

calatkanakakuṇḍalollasitadivyagaṇḍasthalaṃ

carācarajaganmayaṃ caraṇapadmagaṅgāśrayam |

caturvidhaphalapradaṃ caramapīṭhamadhyasthitaṃ

cidaṃśamakhilāspadaṃ daśarathātmajaṃ cintaye || 36

sanandanamunipriyaṃ sakalavarṇavedātmakaṃ

samastanigamāgamasphuritatattvasiṃhāsanam |

sahasranayanābjajādyamarabṛndasaṃsevitaṃ

samaṣṭipuravallabhaṃ daśarathātmajaṃ cintaye || 37

jāgratsvapnasuṣupti-kālavilasattattvātmacinmātrakaṃ

caitanyātmakamādhipāparahitaṃ bhūmyāditanmātrakam |

śāmbhavyādisamastayogakulakaṃ sāṅkhyāditattvātparaṃ

śabdāvācyamahaṃ namāmi satataṃ vyutpattināśātparam || 38

ikṣvākuvaṃśārṇavajātaratnaṃ

sītāṅganāyauvanabhāgyaratnam |

vaikuṇṭharatnaṃ mama bhāgyaratnaṃ

śrīrāmaratnaṃ śirasā namāmi || 39

ikṣvākunandanaṃ sugrīvapūjitaṃ

trailokyarakṣakaṃ satyasandhaṃ sadā |

rāghavaṃ raghupatiṃ rājīvalocanaṃ

rāmacandraṃ bhaje rāghaveśaṃ bhaje || 40

bhaktapriyaṃ bhaktasamādhigamyaṃ

cintāharaṃ cintitakāmadhenum |

sūryendukoṭidyutibhāsvaraṃ taṃ

rāmaṃ bhaje rāghavarāmacandram || 41

śrīrāmaṃ janakakṣitīśvarasutāvaktrāmbujāhāriṇaṃ

śrīmadbhānukulābdhikaustubhamaṇiṃ śrīratnavakṣassthalam |

śrīkaṇṭhādyamaraugharatnamakuṭālaṅkārapādāmbujaṃ

śrīvatsojjvalamindranīlasadṛśaṃ śrīrāmacandraṃ bhaje || 42

rāmacandra caritākathāmṛtaṃ

lakṣmaṇāgrajaguṇānukīrtanam |

rāghaveśa tava pādasevanaṃ

sambhavantu mama janmajanmani || 43

ajñānasambhava-bhavāmbudhibāḍabāgni-

ravyaktatattvanikarapraṇavādhirūḍhaḥ |

sītāsametamanujena hṛdantarāle

prāṇaprayāṇasamaye mama sannidhatte || 44

rāmo matkuladaivataṃ sakaruṇaṃ rāmaṃ bhaje sādaraṃ

rāmeṇākhilaghorapāpanihatī rāmāya tasmai namaḥ |

rāmānnāsti jagatrayaikasulabho rāmasya dāso'smyahaṃ

rāme prītiratīva me kulaguro śrīrāma rakṣasva mām || 45

vaidehīsahitaṃ suradrumatale haime mahāmaṇṭape |

madhyepuṣpakamāsane maṇimaye vīrāsane saṃsthitam |

agre vācayati prabhañjanasute tattvaṃ munibhyaḥ param |

vyākhyāntaṃ bharatādibhiḥ parivṛtaṃ rāmaṃ bhaje śyāmalam || 46

vāme bhūmisutā purastu hanumānpaścātsumitrāsuta-

śśatrughno bharataśca pārśvadalayorvāyvādikoṇeṣvapi |

sugrīvaśca vibhīṣaṇaśca yuvarāṭ tārāsuto jāmbavān

madhye nīlasarojakomalaruciṃ rāmaṃ bhaje śyāmalam || 47

keyūrāṅgadakaṅkaṇairmaṇigaṇairvairocamānaṃ sadā

rākāparvaṇicandrakoṭisadṛśaṃ chatreṇa vairājitam |

hemastambhasahasraṣoḍaśayute madhye mahāmaṇḍape

deveśaṃ bharatādibhiḥ parivṛtaṃ rāmaṃ bhaje śyāmalam || 48

sākete śaradindukundadhavale saughe mahāmaṇṭape |

paryastāgarudhūpadhūmapaṭale karpūradīpojjvale |

sugrīvāṅgadavāyuputrasahitaṃ saumitriṇā sevitaṃ

līlāmānuṣavigrahaṃ raghupatiṃ rāmaṃ bhaje śyāmalam || 49

śāntaṃ śāradacandrakoṭisadṛśaṃ candrābhirāmānanaṃ

candrārkāgnivikāsikuṇḍaladharaṃ candrāvataṃsastutam |

vīṇāpustakasākṣasūtravilasadvyākhyānamudrākaraṃ

deveśaṃ bharatādibhiḥ parivṛtaṃ rāmaṃ bhaje śyāmalam || 50

rāmaṃ rākṣasamardanaṃ raghupatiṃ śakrārividhvaṃsinaṃ

sugrīvepsitarājyadaṃ surapateḥ putrāntakaṃ śār‍ṅgiṇam |

bhaktānāmabhayapradaṃ bhayaharaṃ pāpaughavidhvaṃsinaṃ

sītāsevitapādapadmayugalaṃ rāmaṃ bhaje śyāmalam || 51

kandarpāyutakoṭikoṭitulitaṃ kālāmbudaśyāmalaṃ

kambugrīvamudārakaustubhadharaṃ karṇāvataṃsotpalam |

kastūrītilakojjvalaṃ smitamukhaṃ cinmudrayālaṅkṛtaṃ

sītālakṣmaṇavāyuputrasahitaṃ siṃhāsanasthaṃ bhaje || 52

sākete navaratnapaṅktikhacite citradhvajālaṅkṛte

vāse svarṇamaye dalāṣṭalalite padme vimānottame |

āsīnaṃ bharatādisodarajanaiḥ śākhāmṛgaiḥ kinnaraiḥ

dikpālairmunipuṅgavairnṛpagaṇaissaṃsevyamānaṃ bhaje || 53

kastūrīghanasārakuṅkumalasacchrīcandanālaṅkṛtaṃ

kandarpādhikasundaraṃ ghananibhaṃ kākutsthavaṃśadhvajam |

kalyāṇāmbharaveṣṭitaṃ kamalayā yuktaṃ kalāvallabhaṃ

kalyāṇācalakārmukapriyasakhaṃ kalyāṇarāmaṃ bhaje || 54

muktermūlaṃ munivarahṛdānandakandaṃ mukundaṃ

kūṭasthākhyaṃ sakalavaradaṃ sarvacaitanyarūpam |

nādātītaṃ kamalanilayaṃ nādanādāntatattvaṃ

nādātītaṃ prakṛtirahitaṃ rāmacandraṃ bhaje'ham || 55

tārākāraṃ nikhilanilayaṃ tattvamasyādilakṣyaṃ

śabdāvācyaṃ triguṇarahitaṃ vyomamaṅguṣṭhamātram |

nirvāṇākhyaṃ saguṇamaguṇavyomarandhrāntarasthaṃ

sauṣumnāntaḥ praṇavasahitaṃ rāmacandraṃ bhaje'ham || 56

nijānandākāraṃ nigamaturagārādhitapadaṃ

parabrahmānandaṃ paramapadagaṃ pāpaharaṇam |

kṛpāpārāvāraṃ paramapuruṣaṃ padmanilayaṃ

bhaje rāmaṃ śyāmaṃ prakṛtirahitaṃ nirguṇamaham || 57

sākete nagare samastamahimādhāre jaganmohane

ratnastambhasahasramaṇṭapamahāsiṃhāsane sāmbuje |

viśvāmitravasiṣṭhagautamaśukavyāsādibhirmaunibhiḥ

dhyeyaṃ lakṣmaṇalokapālasahitaṃ sītāsametaṃ bhaje || 58

rāmaṃ śyāmābhirāmaṃ raviśaśinayanaṃ koṭisūryaprakāśaṃ

divyaṃ divyāstrapāṇiṃ śaramukhaśaradhiṃ cārukoḍaṇḍahastam |

kālaṃ kālāgnirudraṃ ripukuladahanaṃ vighnavicchedadakṣaṃ

bhīmaṃ bhīmāṭṭahāsaṃ sakalabhayaharaṃ rāmacandraṃ bhaje'ham || 59

śrīrāmaṃ bhuvanaikasundaratanuṃ dhārādharaśyāmalaṃ

rājīvāyatalocanaṃ raghuvaraṃ rākendubimbānanam |

kodaṇḍādinijāyudhāśritabhujairbhrāntaṃ videhātmajā-

dhīśaṃ bhaktajanāvanaṃ raghuvaraṃ śrīrāmacandraṃ bhaje || 60

śrīvatsāṅkamudārakaustubhalasatpītāmbarālaṅkṛtaṃ

nānāratnavirājamānamakuṭaṃ nīlāmbudaśyāmalam |

kastūrīghanasāracarcitatanuṃ mandāramālādharaṃ

kandarpāyutasundaraṃ raghupatiṃ sītāsametaṃ bhaje || 61

sadānandadeve sahasrārapadme

galaccandrapīyūṣadhārāmṛtānte |

sthitaṃ rāmamūrtiṃ niṣeve niṣeve-

'nyadaivaṃ na seve na seve na seve || 62

sudhābhāsitadvīpamadhye vimāne

suparvālivṛkṣojjvale śeṣatalpe |

niṣaṇṇaṃ ramāṅkaṃ niṣeve niṣeve-

'nyadaivaṃ na seve na seve na seve || 63

cidaṃśaṃ samānandamānandakandaṃ

suṣumnākhyarandhrāntarāle ca haṃsam |

sacakraṃ saśaṅkhaṃ sapītāmbarāṅkaṃ

parañcānyadaivaṃ na jāne na jāne || 64

caturvedakūṭollasatkāraṇākhyaṃ

sphuraddivyavaimānike bhogitalpe |

parandhāmamūrtiṃ niṣaṇṇaṃ niṣeve

niṣeve'nyadaivaṃ na seve na seve || 65

siṃhāsanasthaṃ surasevitavyaṃ

ratnāṅkitālaṅkṛtapādapadmam |

sītāsametaṃ śaśisūryanetraṃ

rāmaṃ bhaje rāghava rāmacandram || 66

rāmaṃ purāṇapuruṣaṃ ramaṇīyaveṣaṃ

rājādhirājamakuṭārcitapādapīṭham |

sītāpatiṃ sunayanaṃ jagadekavīraṃ

śrīrāmacandramaniśaṃ kalayāmi citte || 67

parānandavastusvarūpādisākṣiṃ

parabrahmagamyaṃ parañjyotimūrtim |

parāśaktimitrā'priyārādhitāṅghriṃ

parandhāmarūpaṃ bhaje rāmacandram || 68

mandasmitaṃ kuṇḍalagaṇḍabhāgaṃ

pītāmbaraṃ bhūṣaṇabhūṣitāṅgam |

nīlotpalāṅgaṃ bhuvanaikamitraṃ

rāmaṃ bhaje rāghava rāmacandram || 69

acintyamavyaktamanantarūpa-

madvaitamānandamanādigamyam |

puṇyasvarūpaṃ puruṣottamākhyaṃ

rāmaṃ bhaje rāghava rāmacandram || 70

padmāsanasthaṃ surasevitavyaṃ

padmālayānandakaṭākṣavīkṣyam |

gandharvavidyādharagīyamānaṃ

rāmaṃ bhaje rāghava rāmacandram || 71

anantakīrtiṃ varadaṃ prasannaṃ

padmāsanaṃ sevakapārijātam |

rājādhirājaṃ raghuvīraketuṃ

rāmaṃ bhaje rāghava rāmacandram || 72

sugrīvamitraṃ sujanānurūpaṃ

laṅkāharaṃ rākṣasavaṃśanāśam |

vedāśrayāṅgaṃ vipulāyatākṣaṃ

rāmaṃ bhaje rāghava rāmacandram || 73

sakṛtpraṇatarakṣāyāṃ sākṣī yasya vibhīṣaṇaḥ |

sāparādhapratīkāraḥ sa śrīrāmo gatirmama || 74

phalamūlāśinau dāntau tāpasau dharmacāriṇau |

rakṣaḥkulavihantārau bhrātarau rāmalakṣmaṇau || 75

taruṇau rūpasampannau sukumārau mahābalau |

puṇḍarīka viśālākṣau cīrakṛṣṇājināmbarau || 76

kausalyānayanenduṃ daśarathamukhāravindamārtāṇḍam |

sītāmānasahaṃsaṃ rāmaṃ rājīvalocanaṃ vande || 77

bharjanaṃ bhavabījānāṃ mārjanaṃ sukhasampadām |

tarjanaṃ yamadūtānāṃ rāmarāmeti kīrtanam || 78

na jāne jānakī jāne rāma tvannāmavaibhavam |

sarveśo bhagavān śambhurvālmīkirvetti vā navā || 79

karataladhṛtacāpaṃ kālameghasvarūpaṃ

sarasijadalanetraṃ cāruhāsaṃ sugātram |

vicinutavanavāsaṃ vikramodagraveṣaṃ

praṇamata raghunāthaṃ jānakīprāṇanātham || 80

vidyutsphuranmakarakuṇḍaladīptacāru-

gaṇḍasthalaṃ maṇikirīṭavirājamānam |

pītāmbaraṃ jaladanīlamudārakāntiṃ

śrīrāmacandramaniśaṃ kalayāmi citte || 81

ratnollasajjvalitakuṇḍalagaṇḍabhāgaṃ

kastūrikātilakaśobhitaphālabhāgam |

karṇāntadīrghanayanaṃ karuṇākaṭākṣaṃ

śrīrāmacandra mukhamātmani sannidhattam || 82

vaidehīsahitaṃ ca lakṣmaṇayutaṃ kaikeyiputrānvitaṃ

sugrīvaṃ ca vibhīṣaṇānilasutau nīlaṃ nalaṃ sāṅgadam |

viśvāmitravasiṣṭhagautamabharadvājādikān mānayan

rāmo mārutisevitaḥ smaratu māṃ sāmrājyasiṃhāsane || 83

sakalaguṇanidhānaṃ yogibhisstūyamānaṃ

bhajitasuravimānaṃ rakṣitendrādimānam |

mahitavṛṣabhayānaṃ sītayā śobhamānaṃ

smaratu hṛdayabhānuṃ brahmarāmābhirāmam || 84

tridaśakumudacandro dānavāmbhojacandro

duritatimiracandro yogināṃ jñānacandraḥ |

praṇatanayanacandro maithilīnetracandro

daśamukharipucandraḥ pātu māṃ rāmacandraḥ || 85

yannāmaiva sahasranāmasadṛśaṃ yannāma vedaissamaṃ

yannāmāṅkitavākya-māsurabalastrīgarbhavicchedanam |

yannāma śvapacāryabhedarahitaṃ muktipradānojjvalaṃ

tannāmā'laghurāmarāmaramaṇaṃ śrīrāmanāmāmṛtam || 86

rājīvanetra raghupuṅgava rāmabhadra

rākendubimbasadṛśānana nīlagātra |

rāmā'bhirāma raghuvaṃśasamudbhava tvaṃ

śrīrāmacandra mama dehi karāvalambam || 87

māṇikyamañjīrapadāravindaṃ

rāmārkasamphullamukhāravindam |

bhaktābhayaprāpikarāravindāṃ

devīṃ bhaje rāghavavallabhāṃ tām || 88

jayatu vijayakārī jānakīmodakārī

tapanakulavihārī daṇḍakāraṇyacārī |

daśavadanakuṭhārī daityavicchedakārī

maṇimakuṭakadhārī caṇḍakodaṇḍadhārī || 89

rāmaḥ pitā raghava eva mātā

rāmassubandhuśca sakhā hitaśca |

rāmo gururme paramaṃ ca daivaṃ

rāmaṃ vinā nā'nyamahaṃ smarāmi || 90

śrīrāma me tvaṃ hi pitā ca mātā

śrīrāma me tvaṃ hi suhṛcca bandhuḥ |

śrīrāma me tvaṃ hi guruśca goṣṭhī

śrīrāma me tvaṃ hi samastameva || 91

rāmacandracaritāmṛtapānaṃ

somapānaśatakoṭisamānam |

somapānaśatakoṭibhirīyā-

jjanma naiti raghunāyakanāmnā || 92

rāma rāma dayāsindho rāvaṇāre jagatpate |

tvatpādakamalāsakti-rbhavejjanmani janmani || 93

śrīrāmacandreti dayāpareti

bhaktapriyeti bhavabandhanamocaneti |

nātheti nāgaśayaneti sadā stuvantaṃ

māṃ pāhi bhītamaniśaṃ kṛpaṇaṃ kṛpālo || 94

ayodhyānātha rājendra sītākānta jagatpate |

śrīrāma puṇḍarīkākṣa rāmacandra namo'stu te || 95

he rāma he ramaṇa he jagadekavīra

he nātha he raghupate karuṇālavāla |

he jānakīramaṇa he jagadekabandho

māṃ pāhi dīnamaniśaṃ kṛpaṇaṃ kṛtaghnam || 96

jānāti rāma tava tattvagatiṃ hanūmān |

jānāti rāma tava sakhyagatiṃ kapīśaḥ |

jānāti rāma tava yuddhagatiṃ daśāsyo |

jānāti rāma dhanadānuja eva satyam || 97

sevyaṃ śrīrāmamantraṃ śravaṇaśubhakaraṃ śreṣṭhasujñānimantraṃ

stavyaṃ śrīrāmamantraṃ narakaduritadurvāranirghātamantram |

bhavyaṃ śrīrāmamantraṃ bhajatu bhajatu saṃsāranistāramantraṃ

divyaṃ śrīrāmamantraṃ divi bhuvi vilasanmokṣarakṣaikamantram || 98

nikhilanilayamantraṃ nityatattvākhyamantraṃ

bhavakulaharamantraṃ bhūmijāprāṇamantram |

pavanajanutamantraṃ pārvatīmokṣamantraṃ

paśupatinijamantraṃ pātu māṃ rāmamantram || 99

praṇavanilayamantraṃ prāṇanirvāṇamantraṃ

prakṛtipuruṣamantraṃ brahmarudrendramantram |

prakaṭaduritarāgadveṣanirṇāśamantraṃ

raghupatinijamantraṃ rāmarāmetimantram || 100

daśarathasutamantraṃ daityasaṃhāramantraṃ

vibudhavinutamantraṃ viśvavikhyātamantram |

munigaṇanutamantraṃ muktimārgaikamantraṃ

raghupatinijamantraṃ rāmarāmetimantram || 101

saṃsārasāgarabhayāpahaviśvamantraṃ

sākṣānmumukṣujanasevitasiddhamantram |

sāraṅgahastamukhahastanivāsamantraṃ

kaivalyamantramaniśaṃ bhaja rāmamantram || 102

jayatu jayatu mantraṃ janmasāphalyamantraṃ

jananamaraṇabhedakleśavicchedamantram |

sakalanigamamantraṃ sarvaśāstraikamantraṃ

raghupatinijamantraṃ rāmarāmetimantram || 103

jagati viśadamantraṃ jānakīprāṇamantraṃ

vibudhavinutamantraṃ viśvavikhyātamantram |

daśarathasutamantraṃ daityasaṃhāramantraṃ

raghupatinijamantraṃ rāmarāmetimantram || 104

brahmādiyogimunipūjitasiddhamantraṃ

dāridryaduḥkhabhavarogavināśamantram |

saṃsārasāgarasamuttaraṇaikamantraṃ

vande mahābhayaharaṃ raghurāmamantram || 105

śatrucchedaikamantraṃ sarasamupaniṣadvākyasampūjyamantraṃ

saṃsārottāramantraṃ samucitasamaye saṅganiryāṇamantram |

sarvaiśvaryaikamantraṃ vyasanabhujagasandaṣṭasantrāṇamantraṃ

jihve śrīrāmamantraṃ japa japa saphalaṃ janmasāphalyamantram || 106

nityaṃ śrīrāmamantraṃ nirupamamadhikaṃ nītisujñānamantraṃ

satyaṃ śrīrāmamantraṃ sadamalahṛdaye sarvadārogyamantram |

stutyaṃ śrīrāmamantraṃ sulalitasumanassaukhyasaubhāgyamantraṃ

paṭhyaṃ śrīrāmamantraṃ pavanajavaradaṃ pātu māṃ rāmamantram || 107

vyāmohapraśamauṣadhaṃ munimanovṛttipravṛttyauṣadhaṃ

daityonmūlakarauṣadhaṃ bhavabhayapradhvaṃsanaikauṣadham |

bhaktānandakarauṣadhaṃ tribhuvane sañjīvanaikauṣadhaṃ

śreyaḥ prāptikarauṣadhaṃ piba manaḥ śrīrāmanāmauṣadham || 108

sakalabhuvanaratnaṃ sarvaśāstrārtharatnaṃ

samaravijayaratnaṃ saccidānandaratnam |

daśamukhahararatnaṃ dānavārātiratnaṃ

raghukulanṛparatnaṃ pātu māṃ rāmaratnam || 109

sakalabhuvanaratnaṃ saccidānandaratnaṃ

sakalahṛdayaratnaṃ sūryabimbāntaratnam |

vimalasukṛtaratnaṃ vedavedāntaratnaṃ

puraharajaparatnaṃ pātu māṃ rāmaratnam || 110

nigamaśikhararatnaṃ nirmalānandaratnaṃ

nirupamaguṇaratnaṃ nādanādāntaratnam |

daśarathakularatnaṃ dvādaśāntasstharatnaṃ

paśupatijaparatnaṃ pātu māṃ rāmaratnam || 111

śatamakhasutaratnaṃ ṣoḍaśāntasstharatnaṃ

munijanajaparatnaṃ mukhyavaikuṇṭharatnam |

nirupamaguṇaratnaṃ nīrajāntasstharatnaṃ

paramapadaviratnaṃ pātu māṃ rāmaratnam || 112

sakalasukṛtaratnaṃ satyavākyārtharatnaṃ

śamadamaguṇaratnaṃ śāśvatānandaratnam |

praṇayanilayaratnaṃ prasphuṭadyotiratnaṃ

paramapadaviratnaṃ pātu māṃ rāmaratnam || 113

nigamaśikhararatnaṃ nityamāśāsyaratnaṃ

jananutanṛparatnaṃ jānakīrūparatnam |

bhuvanavalayaratnaṃ bhūbhujāmekaratnaṃ

raghukulavararatnaṃ pātu māṃ rāmaratnam || 114

viśālanetraṃ paripūrṇagātraṃ

sītākalatraṃ suravairijaitram |

kāruṇyapātraṃ jagataḥ pavitraṃ

śrīrāmaratnaṃ praṇato'smi nityam || 115

he gopālaka he dayājalanidhe he sadguṇāmbhonidhe

he daityāntaka he vibhīṣaṇadayāparīṇa he bhūpate |

he vaidehasutāmanojavihṛte he koṭimārākṛte

he navyāmbujanetra pālaya paraṃ jānāmi na tvāṃ vinā || 116

yasya kiñcidapi no haraṇīyaṃ

karma kiñcidapi no caraṇīyam |

rāmanāma ca sadā smaraṇīyaṃ

līlayā bhavajalaṃ taraṇīyam || 117

daśarathasutamīśaṃ daṇḍakāraṇyavāsaṃ

śatamakhamaṇinīlaṃ jānakīprāṇalolam |

sakalabhuvanamohaṃ sannutāmbhodadehaṃ

bahulanutasamudraṃ bhāvaye rāmabhadram || 118

viśālanetraṃ paripūrṇagātraṃ

sītākalatraṃ suravairijaitram |

jagatpavitraṃ paramātmatantraṃ

śrīrāmacandraṃ praṇamāmi citte || 119

jaya jaya raghurāma śrīmukhāmbhojabhāno

jaya jaya raghuvīra śrīmadambhojanetra |

jaya jaya raghunātha śrīkarābhyarcitāṅghri

jaya jaya raghuvarya śrīśa kāruṇyasindho || 120

mandāramūle maṇipīṭhasaṃsthaṃ

sudhāplutaṃ divyavirāṭsvarūpam |

sabindunādāntakalāntaturya-

mūrtiṃ bhaje'haṃ raghuvaṃśaratnam || 121

nādaṃ nādavinīlacittapavanaṃ nādāntattvapriyaṃ

nāmākāravivarjitaṃ navaghanaśyāmāṅganādapriyam |

nādāmbhojamarandamattavilasadbhṛṅgaṃ madāntassthitaṃ

nādāntadhṛvamaṇḍalābjaruciraṃ rāmaṃ bhaje tārakam || 122

nānābhūtahṛdabjapadmanilayaṃ nāmojjvalābhūṣaṇam |

nāmastotrapavitritatribhuvanaṃ nārāyaṇāṣṭākṣaram |

nādāntendugalatsudhāplutatanuṃ nānātmacinmātrakam |

nānākoṭiyugāntabhānusadṛśaṃ rāmaṃ bhaje tārakam || 123

vedyaṃ vedaguruṃ viriñcijanakaṃ vedāntamūrtiṃ sphura-

dvedaṃ vedakalāpamūlamahimādhārāntakandāṅkuram |

vedaśṛṅgasamānaśeṣaśayanaṃ vedāntavedyātmakaṃ

vedārādhitapādapaṅkajamahaṃ rāmaṃ bhaje tārakam || 124

majjīvaṃ madanugrahaṃ madadhipaṃ madbhāvanaṃ matsukhaṃ

mattātaṃ mama sadguruṃ mama varaṃ mohāndhavicchedanam |

matpuṇyaṃ madanekabāndhavajanaṃ majjīvanaṃ mannidhiṃ

matsiddhiṃ mama sarvakarmasukṛtaṃ rāmaṃ bhaje tārakam || 125

nityaṃ nīrajalocanaṃ nirupamaṃ nīvāraśūkopamaṃ

nirbhedānubhavaṃ nirantaraguṇaṃ nīlāṅgarāgojjvalam |

niṣpāpaṃ nigamāgamārcitapadaṃ nityātmakaṃ nirmalaṃ

niṣpuṇyaṃ nikhilaṃ nirañjanapadaṃ rāmaṃ bhaje tārakam || 126

dhyāye tvāṃ hṛdayāmbuje raghupatiṃ vijñānadīpāṅkuraṃ

haṃsohaṃsaparamparādimahimādhāraṃ jaganmohanam |

hastāmbhojagadābjacakramatulaṃ pītāmbaraṃ kaustubhaṃ

śrīvatsaṃ puruṣottamaṃ maṇinibhaṃ rāmaṃ bhaje tārakam || 127

satyajñānamanantamacyutamajaṃ cāvyākṛtaṃ tatparaṃ

kūṭasthādisamastasākṣimanaghaṃ sākṣādvirāṭtattvadam |

vedyaṃ viśvamayaṃ svalīnabhuvanasvārājyasaukhyapradaṃ

pūrṇaṃ pūrṇataraṃ purāṇapuruṣaṃ rāmaṃ bhaje tārakam || 128

rāmaṃ rākṣasavaṃśanāśanakaraṃ rākendubimbānanaṃ

rakṣoriṃ raghuvaṃśavardhanakaraṃ raktādharaṃ rāghavam |

rādhāyātmanivāsinaṃ ravinibhaṃ ramyaṃ ramānāyakaṃ

randhrāntargataśeṣaśāyinamahaṃ rāmaṃ bhaje tārakam || 129

otaprotasamastavastunicayaṃ oṅkārabījākṣaraṃ

oṅkāraprakṛtiṃ ṣaḍakṣarahitaṃ oṅkārakandāṅkuram |

oṅkārasphuṭabhūrbhuvassuparitaṃ oghatrayārādhitam

oṅkārojjvalasiṃhapīṭhanilayaṃ rāmaṃ bhaje tārakam || 130

sākete nagare samastasukhade harmye'bjakoṭidyute

nakṣatragrahapaṅktilagnaśikhare cāntaryapaṅkeruhe |

vālmīkātriparāśarādimunibhissaṃsevyamānaṃ sthitaṃ

sītālaṅkṛtavāmabhāgamaniśaṃ rāmaṃ bhaje tārakam || 131

vaikuṇṭhe nagare suradrumatale cānandavaprāntare

nānāratnavinirmitasphuṭapaṭuprākārasaṃveṣṭite |

saudhendūpalaśeṣatalpalalite nīlotpalacchādite

paryaṅke śayanaṃ ramādisahitaṃ rāmaṃ bhaje tārakam || 132

vande rāmamanādipūruṣamajaṃ vande ramānāyakaṃ

vande hārikirīṭakuṇḍaladharaṃ vande sunīladyutim |

vande cāpakalambakojjvalakaraṃ vande jaganmaṅgalaṃ

vande paṅktirathātmajaṃ mama guruṃ vande sadā rāghavam || 133

vande śaunakagautamādyabhinutaṃ vande ghanaśyāmalaṃ

vande tārakapīṭhamadhyanilayaṃ vande jagannāyakam |

vande bhaktajanaughadevivaṭapaṃ vande dhanurvallabhaṃ

vande tattvamasītivākyajanakaṃ vande sadā rāghavam || 134

vande sūryaśaśāṅkalocanayugaṃ vande jagatpāvanaṃ

vande patrasahasrapadmanilayaṃ vande purāripriyam |

vande rākṣasavaṃśanāśanakaraṃ vande sudhāśītalaṃ

vande devakapīndrakoṭivinutaṃ vande sadā rāghavam || 135

vande sāgaragarvabhaṅgaviśikhaṃ vande jagajjīvanaṃ

vande kauśikayāgarakṣaṇakaraṃ vande guruṇāṃ gurum |

vande bāṇaśarāsanojjvalakaraṃ vande jaṭāvalkalaṃ

vande lakṣmaṇabhūmijānvitamahaṃ vande sadā rāghavam || 136

vande pāṇḍarapuṇḍarīkanayanaṃ vande'bjabimbānanaṃ

vande kambugalaṃ karābjayugalaṃ vande lalāṭojjvalam |

vande pītadukūlamambudanibhaṃ vande jaganmohanaṃ

vande kāraṇamānuṣojjvalatanuṃ vande sadā rāghavam || 137

vande nīlasarojakomalaruciṃ vande jagadvanditaṃ

vande sūryakulābdhikaustubhamaṇiṃ vande surārādhitam |

vande pātakapañcakapraharaṇaṃ vande jagatkāraṇaṃ

vande viṃśatipañcatattvarahitaṃ vande sadā rāghavam || 138

vande sādhakavargakalpakataruṃ vande trimūrtyātmakaṃ

vande nādalayāntarasthalagataṃ vande trivargātmakam |

vande rāgavihīnacittasulabhaṃ vande sabhānāyakaṃ

vande pūrṇadayāmṛtārṇavamahaṃ vande sadā rāghavam || 139

vande sāttvikatattvamudritatanuṃ vande sudhādāyakaṃ

vande cārucaturbhujaṃ maṇinibhaṃ vande ṣaḍabjasthitam |

vande brahmapipīlikādinilayaṃ vande virāṭvigrahaṃ

vande pannagatalpaśāyinamahaṃ vande sadā rāghavam || 140

siṃhāsanasthaṃ munisiddhasevyaṃ

raktotpalālaṅkṛtapādapadmam |

sītāsametaṃ śaśisūryanetraṃ

rāmaṃ bhaje rāghavarāmacandram || 141

śrīrāmabhadrāśritasadgurūṇāṃ

pādāravindaṃ bhajatāṃ narāṇām |

ārogyamaiśvaryamanantakīrti-

rante ca viṣṇoḥ padamasti satyam || 142

daśarathavaraputraṃ jānakīsatkalatraṃ

daśamukhaharadakṣaṃ padmapatrāyatākṣam |

karadhṛtaśaracāpaṃ cārumuktākalāpaṃ

raghukulanṛvareṇyaṃ rāmamīḍe śaraṇyam || 143

daśamukhagajasiṃhaṃ daityagarvātiraṃhaṃ

kadanabhayadahastaṃ tārakabrahma śastam |

maṇikhacitakirīṭaṃ mañjulālāpavāṭaṃ

daśarathakulacandraṃ rāmacandraṃ bhaje'ham || 144

rāmaṃ raktasaroruhākṣamamalaṃ laṅkādhināthāntakaṃ

kausalyānayanotsukaṃ raghuvaraṃ nāgendratalpasthitam |

vaidehīkucakumbhakuṅkumarajolaṅkārahāraṃ hariṃ

māyāmānuṣavigrahaṃ raghupatiṃ sītāsametaṃ bhaje || 145

rāmaṃ rākṣasamardanaṃ raghuvaraṃ daiteyabhidhvaṃsinaṃ

sugrīvepsitarājyadaṃ surapaterbhītyantakaṃ śār‍ṅgiṇam |

bhaktānāmabhayapradaṃ bhayaharaṃ pāpaughavidhvaṃsinaṃ

sāmīristutapādapadmayugalaṃ sītāsametaṃ bhaje || 146

yatpādāmbujareṇunā munisatī muktiṅgatā yanmahaḥ

puṇyaṃ pātakanāśanaṃ trijagatāṃ bhāti smṛtaṃ pāvanam |

smṛtvā rāghavamaprameyamamalaṃ pūrṇendumandasmitaṃ

taṃ rāmaṃ sarasīruhākṣamamalaṃ sītāsametaṃ bhaje || 147

vaidehīkucamaṇḍalāgra-vilasanmāṇikyahastāmbujaṃ

cañcatkaṅkaṇahāranūpura-lasatkeyūrahārānvitam |

divyaśrīmaṇikuṇḍalojjvala-mahābhūṣāsahasrānvitaṃ

vīraśrīraghupuṅgavaṃ guṇanidhiṃ sītāsametaṃ bhaje || 148

vaidehīkucamaṇḍalopari-lasanmāṇikyahārāvalī-

madhyasthaṃ navanītakomalaruciṃ nīlotpalaśyāmalam |

kandarpāyutakoṭisundaratanuṃ pūrṇendubimbānanaṃ

kausalyākulabhūṣaṇaṃ raghupatiṃ sītāsametaṃ bhaje || 149

divyāraṇyayatīndranāmanagare madhye mahāmaṇṭape

svarṇastambhasahasraṣoḍaśayute mandāramūlāśrite |

nānāratnavicitranirmalamahāsiṃhāsane saṃsthitaṃ

sītālakṣmaṇasevitaṃ raghupatiṃ sītāsametaṃ bhaje || 150

kastūrītilakaṃ kapīndraharaṇaṃ kāruṇyavārānnidhiṃ

kṣīrāmbhodhisutāmukhābjamadhupaṃ kalyāṇasampannidhim |

kausalyānayanotsukaṃ kapivaratrāṇaṃ mahāpauruṣaṃ

kaumārapriyamarkakoṭisadṛśaṃ sītāsametaṃ bhaje || 151

vidyutkoṭidivākaradyutinibhaṃ śrīkaustubhālaṅkṛtaṃ

yogīndraissanakādibhiḥ parivṛtaṃ kailāsanāthapriyam |

muktāratnakirīṭakuṇḍaladharaṃ graiveyahārānvitaṃ

vaidehīkucasannivāsamaniśaṃ sītāsametaṃ bhaje || 152

meghaśyāmalamambujātanayanaṃ vistīrṇavakṣassthalaṃ

bāhudvandvavirājitaṃ suvadanaṃ śoṇāṅghripaṅkeruham |

nānāratnavicitrabhūṣaṇayutaṃ kodaṇḍabāṇāṅkitaṃ

trailokyā'pratimānasundaratanuṃ sītāsametaṃ bhaje || 153

vaidehīyutavāmabhāgamatulaṃ vandārumandārakaṃ

vande prastutakīrtivāsitatarucchāyānukāriprabham |

vaidehīkucakuṅkumāṅkitamahoraskaṃ mahābhūṣaṇaṃ

vedāntairupagīyamānamasakṛtsītāsametaṃ bhaje || 154

devānāṃ hitakāraṇena bhuvane dhṛtvā'vatāraṃ dhruvaṃ

rāmaṃ kauśikayajñavighnadalanaṃ tattāṭakāsaṃharam |

nityaṃ gautamapatniśāpadalanaśrīpādareṇuṃ śubhaṃ

śambhorutkaṭacāpakhaṇḍanamahāsatvaṃ bhaje rāghavam || 155

śrīrāmaṃ navaratnakuṇḍaladharaṃ śrīrāmarakṣāmaṇiṃ

śrīrāmaṃ ca sahasrabhānusadṛśaṃ śrīrāmacandrodayam |

śrīrāmaṃ śrutakīrtimākaramahaṃ śrīrāmamuktipradaṃ

śrīrāmaṃ raghunandanaṃ bhayaharaṃ śrīrāmacandraṃ bhaje || 156

rāmamindīvaraśyāmaṃ rājīvāyatalocanam |

jyāghoṣanirjitārātiṃ jānakīramaṇaṃ bhaje || 157

dīrghabāhumaravindalocanaṃ

dīnavatsalamanātharakṣakam |

dīkṣitaṃ sakalalokarakṣaṇe

daivataṃ daśarathātmajaṃ bhaje || 158

prātassmarāmi raghunāthamukhāravindaṃ

mandasmitaṃ madhurabhāṣi viśālaphālam |

karṇāvalambicalakuṇḍalagaṇḍabhāgaṃ

karṇāntadīrghanayanaṃ nayanābhirāmam || 159

prātarbhajāmi raghunāthakarāravindaṃ

rakṣogaṇāya bhayadaṃ varadaṃ nijebhyaḥ |

yadrājasaṃsadi vibhidya maheśacāpaṃ

sītākaragrahaṇamaṅgalamāpa sadyaḥ || 160

prātarnamāmi raghunāthapadāravindaṃ

padmāṅkuśādiśubharekhaśubhāvahaṃ ca |

yogīndramānasamadhuvratasevyamānaṃ

śāpāpahaṃ sapadi gautamadharmapatnyāḥ || 161

prātarvadāmi vacasā raghunāthanāma

vāgdoṣahāri sakalaṃ kaluṣaṃ nihantṛ |

yatpārvatī svapatinā saha bhoktukāmā

prītyā sahasraharināmasamaṃ jajāpa || 162

prātaḥ śraye śrutinutaṃ raghunāthamūrtiṃ

nīlāmbudotpalasitetararatnanīlām |

āmuktamauktikaviśeṣavibhūṣaṇāḍhyāṃ

dhyeyāṃ samastamunibhirnijabhṛtyamukhyaiḥ || 163

raghukulavaranātho jānakīprāṇanāthaḥ

pitṛvacanavidhātā kīśarājyapradātā |

pratiniśicaranāśaḥ prāptarājyapraveśo

vihitabhuvanarakṣaḥ pātu padmāyatākṣaḥ || 164

kuvalayadalanīlaḥ pītavāsāḥ smitāsyo

vividharucirabhūṣābhūṣito divyamūrtiḥ |

daśarathakulanātho jānakīprāṇanātho

nivasatu mama citte sarvadā rāmacandraḥ || 165

jayatu jayatu rāmo jānakīvallabho'yaṃ

jayatu jayatu rāmaścandracūḍārcitāṅghriḥ |

jayatu jayatu vāṇīnāthanāthaḥ parātmā

jayatu jayatu rāmo'nāthanāthaḥ kṛpāluḥ || 166

vadatu vadatu vāṇī rāmarāmeti nityaṃ

jayatu jayatu cittaṃ rāmapādāravindam |

namatu namatu dehaṃ santataṃ rāmacandraṃ

na bhavatu mama pāpaṃ janmajanmāntareṣu || 167

ānandarūpaṃ varadaṃ prasannaṃ

siṃhekṣaṇaṃ sevakapārijātam |

nīlotpalāṅgaṃ bhuvanaikamitraṃ

rāmaṃ bhaje rāghavarāmacandram || 168

laṅkāvirāmaṃ raṇaraṅgabhīmaṃ

rājīvanetraṃ raghuvaṃśamitram |

kāruṇyamūrtiṃ karuṇāprapūrtiṃ

śrīrāmacandraṃ śaraṇaṃ prapadye || 169

sugrīvamitraṃ paramaṃ pavitraṃ

sītākalatraṃ navahemasūtram |

kāruṇyapātraṃ śatapatranetraṃ

śrīrāmacandraṃ śirasā namāmi || 170

śrīrāghaveti ramaṇeti raghūdvaheti

rāmeti rāvaṇahareti ramādhaveti |

sāketanāthasumukheti ca suvrateti

vāṇī sadā vadatu rāma hare hareti || 171

śrīrāmanāmāmṛtamantrabījaṃ

sañjīvanaṃ cenmanasi pratiṣṭham |

hālāhalaṃ vā pralayānalaṃ vā

mṛtyormukhaṃ vā vitathīkaroti || 172

kiṃ yogaśāstraiḥ kimaśeṣavidyā

kiṃ yāgagaṅgādiviśeṣatīrthaiḥ |

kiṃ brahmacaryāśramasañcareṇa

bhaktirnacette raghuvaṃśakīrtyām || 173

idaṃ śarīraṃ ślathasandhijarjharaṃ

patatyavaśyaṃ pariṇāmapeśalam |

kimauṣathaṃ pṛcchasi mūḍha durmate

nirāmayaṃ rāmakathāmṛtaṃ piba || 174

he rāmabhadrāśraya he kṛpālo

he bhaktalokaikaśaraṇyamūrte |

punīhi māṃ tvaccaraṇāravindaṃ

jagatpavitraṃ śaraṇaṃ mamā'stu || 175

nīlābhradeha nikhileśa jagannivāsa

rājīvanetra ramaṇīyaguṇābhirāma |

śrīdāma daityakulamardana rāmacandra

tvatpādapadmamaniśaṃ kalayāmi citte || 176

śrīrāmacandra karuṇākara dīnabandho

sītāsameta bharatāgraja rāghaveśa |

pāpārtibhañjana bhayāturadīnabandho

pāpāmbudhau patitamuddhara māmanātham || 177

indīvaradalaśyāma-mindukoṭinibhānanam |

kandarpakoṭilāvaṇyaṃ vande'haṃ raghunandanam || 175

iti śrībodhendrasarasvatī kṛta śrīrāmakarṇāmṛtam ||