Rina Vimochana Angaraka (mangala) Stotram

ॐ

ઋણ વિમોચન અઙ્ગારક (મઙ્ગલ) સ્તોત્રમ્

Angaraka Stotram Gujarati

સ્કન્દ ઉવાચ ।

ઋણગ્રસ્તનરાણાં તુ ઋણમુક્તિઃ કથં ભવેત્ ।

બ્રહ્મોવાચ ।

વક્ષ્યેઽહં સર્વલોકાનાં હિતાર્થં હિતકામદમ્ ॥

અસ્ય શ્રી અઙ્ગારક સ્તોત્ર મહામન્ત્રસ્ય ગૌતમ ઋષિઃ, અનુષ્ટુપ્ છન્દઃ, અઙ્ગારકો દેવતા મમ ઋણ વિમોચનાર્થે જપે વિનિયોગઃ ।

ધ્યાનમ્ –

ધરણી ગર્ભ સમ્ભૂતં વિદ્યુત્કાન્તિ સમપ્રભમ્ ।

કુમારં શક્તિહસ્તં તં કુજં પ્રણમામ્યહમ્ ॥ 1 ॥

રક્તમાલ્યામ્બરધરઃ શૂલશક્તિગદાધરઃ ।

ચતુર્ભુજો મેષગતો વરદશ્ચ ધરાસુતઃ ॥ 2 ॥

અથ સ્તોત્રમ્ –

મઙ્ગલો ભૂમિપુત્રશ્ચ ઋણહર્તા ધનપ્રદઃ ।

સ્થિરાસનો મહાકાયઃ સર્વકર્માવબોધકઃ ॥ 3 ॥

લોહિતો લોહિતાઙ્ગશ્ચ સામગાયી કૃપાકરઃ ।

ધર્મરાજઃ કુજો ભૌમો ભૂમિજો ભૂમિનન્દનઃ ॥ 4 ॥

અઙ્ગારકો યમશ્ચૈવ સર્વરોગાપહારકઃ ।

સૃષ્ટિકર્તાઽપહર્તા ચ સર્વકામફલપ્રદઃ ॥ 5 ॥

ભૂતિદો ગ્રહપૂજ્યશ્ચ વક્ત્રો રક્તવપુઃ પ્રભુઃ ।

એતાનિ કુજનામાનિ યો નિત્યં પ્રયતઃ પઠેત્ ।

ઋણં ન જાયતે તસ્ય ધનં પ્રાપ્નોત્યસંશયમ્ ॥ 6 ॥

રક્તપુષ્પૈશ્ચ ગન્ધૈશ્ચ દીપધૂપાદિભિસ્તથા ।

મઙ્ગલં પૂજયિત્વા તુ મઙ્ગલેઽહનિ સર્વદા ॥ 7 ॥

ઋણરેખાઃ પ્રકર્તવ્યાઃ દગ્ધાઙ્ગારૈસ્તદગ્રતઃ ।

સપ્તવિંશતિનામાનિ પઠિત્વા તુ તદન્તિકે ॥ 8 ॥

તાશ્ચ પ્રમાર્જયેત્પશ્ચાદ્વામપાદેન સંસ્પૃશન્ ।

એવં કૃત્વા ન સન્દેહો ઋણહીનો ધની ભવેત્ ॥ 9 ॥

ભૂમિજસ્ય પ્રસાદેન ગ્રહપીડા વિનશ્યતિ ।

યેનાર્જિતા જગત્કીર્તિર્ભૂમિપુત્રેણ શાશ્વતી ॥ 10 ॥

શત્રવશ્ચ હતા યેન ભૌમેન મહિતાત્મના ।

સ પ્રીયતાં તુ ભૌમોઽદ્ય તુષ્ટો ભૂયાત્ સદા મમ ॥ 11 ॥

મૂલમન્ત્રઃ –

અઙ્ગારક મહીપુત્ર ભગવન્ ભક્તવત્સલ ।

નમોઽસ્તુ તે મમાશેષ ઋણમાશુ વિમોચય ॥ 12 ॥

અર્ઘ્યમ્ –

ભૂમિપુત્ર મહાતેજઃ સ્વેદોદ્ભવ પિનાકિનઃ ।

ઋણાર્તસ્ત્વાં પ્રપન્નોઽસ્મિ ગૃહાણાર્ઘ્યં નમોઽસ્તુ તે ॥ 13 ॥

ઇતિ ઋણ વિમોચન અઙ્ગારક સ્તોત્રમ્ ॥

Roman (IAST) Transliteration

skanda uvāca |

ṛṇagrastanarāṇāṃ tu ṛṇamuktiḥ kathaṃ bhavet |

brahmovāca |

vakṣye'haṃ sarvalokānāṃ hitārthaṃ hitakāmadam ||

asya śrī aṅgāraka stotra mahāmantrasya gautama ṛṣiḥ, anuṣṭup chandaḥ, aṅgārako devatā mama ṛṇa vimocanārthe jape viniyogaḥ |

dhyānam –

dharaṇī garbha sambhūtaṃ vidyutkānti samaprabham |

kumāraṃ śaktihastaṃ taṃ kujaṃ praṇamāmyaham || 1 ||

raktamālyāmbaradharaḥ śūlaśaktigadādharaḥ |

caturbhujo meṣagato varadaśca dharāsutaḥ || 2 ||

atha stotram –

maṅgalo bhūmiputraśca ṛṇahartā dhanapradaḥ |

sthirāsano mahākāyaḥ sarvakarmāvabodhakaḥ || 3 ||

lohito lohitāṅgaśca sāmagāyī kṛpākaraḥ |

dharmarājaḥ kujo bhaumo bhūmijo bhūminandanaḥ || 4 ||

aṅgārako yamaścaiva sarvarogāpahārakaḥ |

sṛṣṭikartā'pahartā ca sarvakāmaphalapradaḥ || 5 ||

bhūtido grahapūjyaśca vaktro raktavapuḥ prabhuḥ |

etāni kujanāmāni yo nityaṃ prayataḥ paṭhet |

ṛṇaṃ na jāyate tasya dhanaṃ prāpnotyasaṃśayam || 6 ||

raktapuṣpaiśca gandhaiśca dīpadhūpādibhistathā |

maṅgalaṃ pūjayitvā tu maṅgale'hani sarvadā || 7 ||

ṛṇarekhāḥ prakartavyāḥ dagdhāṅgāraistadagrataḥ |

saptaviṃśatināmāni paṭhitvā tu tadantike || 8 ||

tāśca pramārjayetpaścādvāmapādena saṃspṛśan |

evaṃ kṛtvā na sandeho ṛṇahīno dhanī bhavet || 9 ||

bhūmijasya prasādena grahapīḍā vinaśyati |

yenārjitā jagatkīrtirbhūmiputreṇa śāśvatī || 10 ||

śatravaśca hatā yena bhaumena mahitātmanā |

sa prīyatāṃ tu bhaumo'dya tuṣṭo bhūyāt sadā mama || 11 ||

mūlamantraḥ –

aṅgāraka mahīputra bhagavan bhaktavatsala |

namo'stu te mamāśeṣa ṛṇamāśu vimocaya || 12 ||

arghyam –

bhūmiputra mahātejaḥ svedodbhava pinākinaḥ |

ṛṇārtastvāṃ prapanno'smi gṛhāṇārghyaṃ namo'stu te || 13 ||

iti ṛṇa vimocana aṅgāraka stotram ||