Narayaniyam Dashaka 25 - Narasimhavataram

ॐ

નારાયણીયં દશક 25 - નરસિંહાવતારમ્

Vishnu Narayana Bhattathiri Gujarati

સ્તમ્ભે ઘટ્ટયતો હિરણ્યકશિપોઃ કર્ણૌ સમાચૂર્ણય-

ન્નાઘૂર્ણજ્જગદણ્ડકુણ્ડકુહરો ઘોરસ્તવાભૂદ્રવઃ ।

શ્રુત્વા યં કિલ દૈત્યરાજહૃદયે પૂર્વં કદાપ્યશ્રુતં

કમ્પઃ કશ્ચન સમ્પપાત ચલિતોઽપ્યમ્ભોજભૂર્વિષ્ટરાત્ ॥1॥

દૈત્યે દિક્ષુ વિસૃષ્ટચક્ષુષિ મહાસંરમ્ભિણિ સ્તમ્ભતઃ

સમ્ભૂતં ન મૃગાત્મકં ન મનુજાકારં વપુસ્તે વિભો ।

કિં કિં ભીષણમેતદદ્ભુતમિતિ વ્યુદ્ભ્રાન્તચિત્તેઽસુરે

વિસ્ફૂર્જ્જદ્ધવલોગ્રરોમવિકસદ્વર્ષ્મા સમાજૃમ્ભથાઃ ॥2॥

તપ્તસ્વર્ણસવર્ણઘૂર્ણદતિરૂક્ષાક્ષં સટાકેસર-

પ્રોત્કમ્પપ્રનિકુમ્બિતામ્બરમહો જીયાત્તવેદં વપુઃ ।

વ્યાત્તવ્યાપ્તમહાદરીસખમુખં ખડ્ગોગ્રવલ્ગન્મહા-

જિહ્વાનિર્ગમદૃશ્યમાનસુમહાદંષ્ટ્રાયુગોડ્ડામરમ્ ॥3॥

ઉત્સર્પદ્વલિભઙ્ગભીષણહનુ હ્રસ્વસ્થવીયસ્તર-

ગ્રીવં પીવરદોશ્શતોદ્ગતનખક્રૂરાંશુદૂરોલ્બણમ્ ।

વ્યોમોલ્લઙ્ઘિ ઘનાઘનોપમઘનપ્રધ્વાનનિર્ધાવિત-

સ્પર્ધાલુપ્રકરં નમામિ ભવતસ્તન્નારસિંહં વપુઃ ॥4॥

નૂનં વિષ્ણુરયં નિહન્મ્યમુમિતિ ભ્રામ્યદ્ગદાભીષણં

દૈત્યેન્દ્રં સમુપાદ્રવન્તમધૃથા દોર્ભ્યાં પૃથુભ્યામમુમ્ ।

વીરો નિર્ગલિતોઽથ ખડ્ગફલકૌ ગૃહ્ણન્વિચિત્રશ્રમાન્

વ્યાવૃણ્વન્ પુનરાપપાત ભુવનગ્રાસોદ્યતં ત્વામહો ॥5॥

ભ્રામ્યન્તં દિતિજાધમં પુનરપિ પ્રોદ્ગૃહ્ય દોર્ભ્યાં જવાત્

દ્વારેઽથોરુયુગે નિપાત્ય નખરાન્ વ્યુત્ખાય વક્ષોભુવિ ।

નિર્ભિન્દન્નધિગર્ભનિર્ભરગલદ્રક્તામ્બુ બદ્ધોત્સવં

પાયં પાયમુદૈરયો બહુ જગત્સંહારિસિંહારવાન્ ॥6॥

ત્યક્ત્વા તં હતમાશુ રક્તલહરીસિક્તોન્નમદ્વર્ષ્મણિ

પ્રત્યુત્પત્ય સમસ્તદૈત્યપટલીં ચાખાદ્યમાને ત્વયિ ।

ભ્રામ્યદ્ભૂમિ વિકમ્પિતામ્બુધિકુલં વ્યાલોલશૈલોત્કરં

પ્રોત્સર્પત્ખચરં ચરાચરમહો દુઃસ્થામવસ્થાં દધૌ ॥7॥

તાવન્માંસવપાકરાલવપુષં ઘોરાન્ત્રમાલાધરં

ત્વાં મધ્યેસભમિદ્ધકોપમુષિતં દુર્વારગુર્વારવમ્ ।

અભ્યેતું ન શશાક કોપિ ભુવને દૂરે સ્થિતા ભીરવઃ

સર્વે શર્વવિરિઞ્ચવાસવમુખાઃ પ્રત્યેકમસ્તોષત ॥8॥

ભૂયોઽપ્યક્ષતરોષધામ્નિ ભવતિ બ્રહ્માજ્ઞયા બાલકે

પ્રહ્લાદે પદયોર્નમત્યપભયે કારુણ્યભારાકુલઃ ।

શાન્તસ્ત્વં કરમસ્ય મૂર્ધ્નિ સમધાઃ સ્તોત્રૈરથોદ્ગાયત-

સ્તસ્યાકામધિયોઽપિ તેનિથ વરં લોકાય ચાનુગ્રહમ્ ॥9॥

એવં નાટિતરૌદ્રચેષ્ટિત વિભો શ્રીતાપનીયાભિધ-

શ્રુત્યન્તસ્ફ़ઉટગીતસર્વમહિમન્નત્યન્તશુદ્ધાકૃતે ।

તત્તાદૃઙ્નિખિલોત્તરં પુનરહો કસ્ત્વાં પરો લઙ્ઘયેત્

પ્રહ્લાદપ્રિય હે મરુત્પુરપતે સર્વામયાત્પાહિ મામ્ ॥10॥

Roman (IAST) Transliteration

stambhe ghaṭṭayato hiraṇyakaśipoḥ karṇau samācūrṇaya-

nnāghūrṇajjagadaṇḍakuṇḍakuharo ghorastavābhūdravaḥ |

śrutvā yaṃ kila daityarājahṛdaye pūrvaṃ kadāpyaśrutaṃ

kampaḥ kaścana sampapāta calito'pyambhojabhūrviṣṭarāt ||1||

daitye dikṣu visṛṣṭacakṣuṣi mahāsaṃrambhiṇi stambhataḥ

sambhūtaṃ na mṛgātmakaṃ na manujākāraṃ vapuste vibho |

kiṃ kiṃ bhīṣaṇametadadbhutamiti vyudbhrāntacitte'sure

visphūrjjaddhavalograromavikasadvarṣmā samājṛmbhathāḥ ||2||

taptasvarṇasavarṇaghūrṇadatirūkṣākṣaṃ saṭākesara-

protkampapranikumbitāmbaramaho jīyāttavedaṃ vapuḥ |

vyāttavyāptamahādarīsakhamukhaṃ khaḍgogravalganmahā-

jihvānirgamadṛśyamānasumahādaṃṣṭrāyugoḍḍāmaram ||3||

utsarpadvalibhaṅgabhīṣaṇahanu hrasvasthavīyastara-

grīvaṃ pīvaradośśatodgatanakhakrūrāṃśudūrolbaṇam |

vyomollaṅghi ghanāghanopamaghanapradhvānanirdhāvita-

spardhāluprakaraṃ namāmi bhavatastannārasiṃhaṃ vapuḥ ||4||

nūnaṃ viṣṇurayaṃ nihanmyamumiti bhrāmyadgadābhīṣaṇaṃ

daityendraṃ samupādravantamadhṛthā dorbhyāṃ pṛthubhyāmamum |

vīro nirgalito'tha khaḍgaphalakau gṛhṇanvicitraśramān

vyāvṛṇvan punarāpapāta bhuvanagrāsodyataṃ tvāmaho ||5||

bhrāmyantaṃ ditijādhamaṃ punarapi prodgṛhya dorbhyāṃ javāt

dvāre'thoruyuge nipātya nakharān vyutkhāya vakṣobhuvi |

nirbhindannadhigarbhanirbharagaladraktāmbu baddhotsavaṃ

pāyaṃ pāyamudairayo bahu jagatsaṃhārisiṃhāravān ||6||

tyaktvā taṃ hatamāśu raktalaharīsiktonnamadvarṣmaṇi

pratyutpatya samastadaityapaṭalīṃ cākhādyamāne tvayi |

bhrāmyadbhūmi vikampitāmbudhikulaṃ vyālolaśailotkaraṃ

protsarpatkhacaraṃ carācaramaho duḥsthāmavasthāṃ dadhau ||7||

tāvanmāṃsavapākarālavapuṣaṃ ghorāntramālādharaṃ

tvāṃ madhyesabhamiddhakopamuṣitaṃ durvāragurvāravam |

abhyetuṃ na śaśāka kopi bhuvane dūre sthitā bhīravaḥ

sarve śarvaviriñcavāsavamukhāḥ pratyekamastoṣata ||8||

bhūyo'pyakṣataroṣadhāmni bhavati brahmājñayā bālake

prahlāde padayornamatyapabhaye kāruṇyabhārākulaḥ |

śāntastvaṃ karamasya mūrdhni samadhāḥ stotrairathodgāyata-

stasyākāmadhiyo'pi tenitha varaṃ lokāya cānugraham ||9||

evaṃ nāṭitaraudraceṣṭita vibho śrītāpanīyābhidha-

śrutyantaspha़uṭagītasarvamahimannatyantaśuddhākṛte |

tattādṛṅnikhilottaraṃ punaraho kastvāṃ paro laṅghayet

prahlādapriya he marutpurapate sarvāmayātpāhi mām ||10||