Devyaparadha Kshamapana Stotram

ॐ

દેવ્યપરાધ ક્ષમાપણ સ્તોત્રમ્

Radha Stotram Adi Shankaracharya Gujarati

ન મન્ત્રં નો યન્ત્રં તદપિ ચ ન જાને સ્તુતિમહો

ન ચાહ્વાનં ધ્યાનં તદપિ ચ ન જાને સ્તુતિકથાઃ ।

ન જાને મુદ્રાસ્તે તદપિ ચ ન જાને વિલપનં

પરં જાને માતસ્ત્વદનુસરણં ક્લેશહરણમ્ ॥ 1 ॥

વિધેરજ્ઞાનેન દ્રવિણવિરહેણાલસતયા

વિધેયાશક્યત્વાત્તવ ચરણયોર્યા ચ્યુતિરભૂત્ ।

તદેતત્ ક્ષન્તવ્યં જનનિ સકલોદ્ધારિણિ શિવે

કુપુત્રો જાયેત ક્વચિદપિ કુમાતા ન ભવતિ ॥ 2 ॥

પૃથિવ્યાં પુત્રાસ્તે જનનિ બહવઃ સન્તિ સરલાઃ

પરં તેષાં મધ્યે વિરલતરલોઽહં તવ સુતઃ ।

મદીયોઽયં ત્યાગઃ સમુચિતમિદં નો તવ શિવે

કુપુત્રો જાયેત ક્વચિદપિ કુમાતા ન ભવતિ ॥ 3 ॥

જગન્માતર્માતસ્તવ ચરણસેવા ન રચિતા

ન વા દત્તં દેવિ દ્રવિણમપિ ભૂયસ્તવ મયા ।

તથાપિ ત્વં સ્નેહં મયિ નિરુપમં યત્પ્રકુરુષે

કુપુત્રો જાયેત ક્વચિદપિ કુમાતા ન ભવતિ ॥ 4 ॥

પરિત્યક્તા દેવાન્વિવિધવિધિસેવાકુલતયા

મયા પઞ્ચાશીતેરધિકમપનીતે તુ વયસિ ।

ઇદાનીં ચેન્માતસ્તવ યદિ કૃપા નાપિ ભવિતા

નિરાલમ્બો લમ્બોદરજનનિ કં યામિ શરણમ્ ॥ 5 ॥

શ્વપાકો જલ્પાકો ભવતિ મધુપાકોપમગિરા

નિરાતઙ્કો રઙ્કો વિહરતિ ચિરં કોટિકનકૈઃ ।

તવાપર્ણે કર્ણે વિશતિ મનુવર્ણે ફલમિદં

જનઃ કો જાનીતે જનનિ જપનીયં જપવિધૌ ॥ 6 ॥

ચિતાભસ્માલેપો ગરલમશનં દિક્પટધરો

જટાધારી કણ્ઠે ભુજગપતિહારી પશુપતિઃ ।

કપાલી ભૂતેશો ભજતિ જગદીશૈકપદવીં

ભવાની ત્વત્પાણિગ્રહણપરિપાટી ફલમિદમ્ ॥ 7 ॥

ન મોક્ષસ્યાકાઙ્ક્ષા ન ચ વિભવવાઞ્છાપિ ચ ન મે

ન વિજ્ઞાનાપેક્ષા શશિમુખિ સુખેચ્છાપિ ન પુનઃ ।

અતસ્ત્વાં સંયાચે જનનિ જનનં યાતુ મમ વૈ

મૃડાની રુદ્રાણી શિવ શિવ ભવાનીતિ જપતઃ ॥ 8 ॥

નારાધિતાસિ વિધિના વિવિધોપચારૈઃ

કિં રૂક્ષચિન્તનપરૈર્ન કૃતં વચોભિઃ ।

શ્યામે ત્વમેવ યદિ કિઞ્ચન મય્યનાથે

ધત્સે કૃપામુચિતમમ્બ પરં તવૈવ ॥ 9 ॥

આપત્સુ મગ્નઃ સ્મરણં ત્વદીયં

કરોમિ દુર્ગે કરુણાર્ણવે શિવે ।

નૈતચ્છઠત્વં મમ ભાવયેથાઃ

ક્ષુધાતૃષાર્તાઃ જનનીં સ્મરન્તિ ॥ 10 ॥

જગદમ્બ વિચિત્રમત્ર કિં

પરિપૂર્ણા કરુણાસ્તિ ચેન્મયિ ।

અપરાધપરમ્પરાવૃતં

ન હિ માતા સમુપેક્ષતે સુતમ્ ॥ 11 ॥

મત્સમઃ પાતકી નાસ્તિ પાપઘ્ની ત્વત્સમા ન હિ ।

એવં જ્ઞાત્વા મહાદેવી યથા યોગ્યં તથા કુરુ ॥ 12 ॥

ઇતિ શ્રીમચ્છઙ્કરાચાર્ય વિરચિતં દેવ્યપરાધક્ષમાપણ સ્તોત્રમ્ ।

Roman (IAST) Transliteration

na mantraṃ no yantraṃ tadapi ca na jāne stutimaho

na cāhvānaṃ dhyānaṃ tadapi ca na jāne stutikathāḥ |

na jāne mudrāste tadapi ca na jāne vilapanaṃ

paraṃ jāne mātastvadanusaraṇaṃ kleśaharaṇam || 1 ||

vidherajñānena draviṇaviraheṇālasatayā

vidheyāśakyatvāttava caraṇayoryā cyutirabhūt |

tadetat kṣantavyaṃ janani sakaloddhāriṇi śive

kuputro jāyeta kvacidapi kumātā na bhavati || 2 ||

pṛthivyāṃ putrāste janani bahavaḥ santi saralāḥ

paraṃ teṣāṃ madhye viralataralo'haṃ tava sutaḥ |

madīyo'yaṃ tyāgaḥ samucitamidaṃ no tava śive

kuputro jāyeta kvacidapi kumātā na bhavati || 3 ||

jaganmātarmātastava caraṇasevā na racitā

na vā dattaṃ devi draviṇamapi bhūyastava mayā |

tathāpi tvaṃ snehaṃ mayi nirupamaṃ yatprakuruṣe

kuputro jāyeta kvacidapi kumātā na bhavati || 4 ||

parityaktā devānvividhavidhisevākulatayā

mayā pañcāśīteradhikamapanīte tu vayasi |

idānīṃ cenmātastava yadi kṛpā nāpi bhavitā

nirālambo lambodarajanani kaṃ yāmi śaraṇam || 5 ||

śvapāko jalpāko bhavati madhupākopamagirā

nirātaṅko raṅko viharati ciraṃ koṭikanakaiḥ |

tavāparṇe karṇe viśati manuvarṇe phalamidaṃ

janaḥ ko jānīte janani japanīyaṃ japavidhau || 6 ||

citābhasmālepo garalamaśanaṃ dikpaṭadharo

jaṭādhārī kaṇṭhe bhujagapatihārī paśupatiḥ |

kapālī bhūteśo bhajati jagadīśaikapadavīṃ

bhavānī tvatpāṇigrahaṇaparipāṭī phalamidam || 7 ||

na mokṣasyākāṅkṣā na ca vibhavavāñchāpi ca na me

na vijñānāpekṣā śaśimukhi sukhecchāpi na punaḥ |

atastvāṃ saṃyāce janani jananaṃ yātu mama vai

mṛḍānī rudrāṇī śiva śiva bhavānīti japataḥ || 8 ||

nārādhitāsi vidhinā vividhopacāraiḥ

kiṃ rūkṣacintanaparairna kṛtaṃ vacobhiḥ |

śyāme tvameva yadi kiñcana mayyanāthe

dhatse kṛpāmucitamamba paraṃ tavaiva || 9 ||

āpatsu magnaḥ smaraṇaṃ tvadīyaṃ

karomi durge karuṇārṇave śive |

naitacchaṭhatvaṃ mama bhāvayethāḥ

kṣudhātṛṣārtāḥ jananīṃ smaranti || 10 ||

jagadamba vicitramatra kiṃ

paripūrṇā karuṇāsti cenmayi |

aparādhaparamparāvṛtaṃ

na hi mātā samupekṣate sutam || 11 ||

matsamaḥ pātakī nāsti pāpaghnī tvatsamā na hi |

evaṃ jñātvā mahādevī yathā yogyaṃ tathā kuru || 12 ||

iti śrīmacchaṅkarācārya viracitaṃ devyaparādhakṣamāpaṇa stotram |