📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
5.19 𑌸𑍁𑌨𑍍𑌦𑌰𑌕𑌾𑌣𑍍𑌡 - 𑌏𑌕𑍋𑌨𑌵𑌿𑌂𑌶 𑌸𑌰𑍍𑌗𑌃
5.19 Sundarakanda - Ekonavimsha Sargah
Valmiki Grantha
𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌨𑍍𑌦𑌰𑌕𑌾𑌣𑍍𑌡𑌮𑍍 ।
𑌅𑌥 𑌏𑌕𑍋𑌨𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌸𑍍𑌮𑌿𑌨𑍍𑌨𑍇𑌵 𑌤𑌤𑌃 𑌕𑌾𑌲𑍇 𑌰𑌾𑌜𑌪𑍁𑌤𑍍𑌰𑍀 𑌤𑍍𑌵𑌨𑌿𑌨𑍍𑌦𑌿𑌤𑌾 ।
𑌰𑍂𑌪𑌯𑍗𑌵𑌨𑌸𑌮𑍍𑌪𑌨𑍍𑌨𑌂 𑌭𑍂𑌷𑌣𑍋𑌤𑍍𑌤𑌮𑌭𑍂𑌷𑌿𑌤𑌮𑍍 ॥ 1 ॥
𑌤𑌤𑍋 𑌦𑍃𑌷𑍍𑌟𑍍𑌵𑍈𑌵 𑌵𑍈𑌦𑍇𑌹𑍀 𑌰𑌾𑌵𑌣𑌂 𑌰𑌾𑌕𑍍𑌷𑌸𑌾𑌧𑌿𑌪𑌮𑍍 ।
𑌪𑍍𑌰𑌾𑌵𑍇𑌪𑌤 𑌵𑌰𑌾𑌰𑍋𑌹𑌾 𑌪𑍍𑌰𑌵𑌾𑌤𑍇 𑌕𑌦𑌲𑍀 𑌯𑌥𑌾 ॥ 2 ॥
𑌆𑌚𑍍𑌛𑌾𑌦𑍍𑌯𑍋𑌦𑌰𑌮𑍂𑌰𑍁𑌭𑍍𑌯𑌾𑌂 𑌬𑌾𑌹𑍁𑌭𑍍𑌯𑌾𑌂 𑌚 𑌪𑌯𑍋𑌧𑌰𑍗 ।
𑌉𑌪𑌵𑌿𑌷𑍍𑌟𑌾 𑌵𑌿𑌶𑌾𑌲𑌾𑌕𑍍𑌷𑍀 𑌰𑍁𑌦𑌨𑍍𑌤𑍀 𑌵𑌰𑌵𑌰𑍍𑌣𑌿𑌨𑍀 ॥ 3 ॥
𑌦𑌶𑌗𑍍𑌰𑍀𑌵𑌸𑍍𑌤𑍁 𑌵𑍈𑌦𑍇𑌹𑍀𑌂 𑌰𑌕𑍍𑌷𑌿𑌤𑌾𑌂 𑌰𑌾𑌕𑍍𑌷𑌸𑍀𑌗𑌣𑍈𑌃 ।
𑌦𑌦𑌰𑍍𑌶 𑌸𑍀𑌤𑌾𑌂 𑌦𑍁𑌃𑌖𑌾𑌰𑍍𑌤𑌾𑌂 𑌨𑌾𑌵𑌂 𑌸𑌨𑍍𑌨𑌾𑌮𑌿𑌵𑌾𑌰𑍍𑌣𑌵𑍇 ॥ 4 ॥
𑌅𑌸𑌂𑌵𑍃𑌤𑌾𑌯𑌾𑌮𑌾𑌸𑍀𑌨𑌾𑌂 𑌧𑌰𑌣𑍍𑌯𑌾𑌂 𑌸𑌂𑌶𑌿𑌤𑌵𑍍𑌰𑌤𑌾𑌮𑍍 ।
𑌛𑌿𑌨𑍍𑌨𑌾𑌂 𑌪𑍍𑌰𑌪𑌤𑌿𑌤𑌾𑌂 𑌭𑍂𑌮𑍗 𑌶𑌾𑌖𑌾𑌮𑌿𑌵 𑌵𑌨𑌸𑍍𑌪𑌤𑍇𑌃 ॥ 5 ॥
𑌮𑌲𑌮𑌣𑍍𑌡𑌨𑌚𑌿𑌤𑍍𑌰𑌾𑌙𑍍𑌗𑍀𑌂 𑌮𑌣𑍍𑌡𑌨𑌾𑌰𑍍𑌹𑌾𑌮𑌮𑌣𑍍𑌡𑌿𑌤𑌾𑌮𑍍 ।
𑌮𑍃𑌣𑌾𑌲𑍀 𑌪𑌙𑍍𑌕𑌦𑌿𑌗𑍍𑌧𑍇𑌵 𑌵𑌿𑌭𑌾𑌤𑌿 𑌨 𑌵𑌿𑌭𑌾𑌤𑌿 𑌚 ॥ 6 ॥
𑌸𑌮𑍀𑌪𑌂 𑌰𑌾𑌜𑌸𑌿𑌂𑌹𑌸𑍍𑌯 𑌰𑌾𑌮𑌸𑍍𑌯 𑌵𑌿𑌦𑌿𑌤𑌾𑌤𑍍𑌮𑌨𑌃 ।
𑌸𑌙𑍍𑌕𑌲𑍍𑌪𑌹𑌯𑌸𑌂𑌯𑍁𑌕𑍍𑌸𑍈𑌰𑍍𑌯𑌾𑌨𑍍𑌤𑍀𑌮𑌿𑌵 𑌮𑌨𑍋𑌰𑌥𑍈𑌃 ॥ 7 ॥
𑌶𑍁𑌷𑍍𑌯𑌨𑍍𑌤𑍀𑌂 𑌰𑍁𑌦𑌤𑍀𑌮𑍇𑌕𑌾𑌂 𑌧𑍍𑌯𑌾𑌨𑌶𑍋𑌕𑌪𑌰𑌾𑌯𑌣𑌾𑌮𑍍 ।
𑌦𑍁𑌃𑌖𑌸𑍍𑌯𑌾𑌨𑍍𑌤𑌮𑌪𑌶𑍍𑌯𑌨𑍍𑌤𑍀𑌂 𑌰𑌾𑌮𑌾𑌂 𑌰𑌾𑌮𑌮𑌨𑍁𑌵𑍍𑌰𑌤𑌾𑌮𑍍 ॥ 8 ॥
𑌵𑍇𑌷𑍍𑌟𑌮𑌾𑌨𑌾𑌂 𑌤𑌥𑌾𑌽𑌵𑌿𑌷𑍍𑌟𑌾𑌂 𑌪𑌨𑍍𑌨𑌗𑍇𑌨𑍍𑌦𑍍𑌰𑌵𑌧𑍂𑌮𑌿𑌵 ।
𑌧𑍂𑌪𑍍𑌯𑌮𑌾𑌨𑌾𑌂 𑌗𑍍𑌰𑌹𑍇𑌣𑍇𑌵 𑌰𑍋𑌹𑌿𑌣𑍀𑌂 𑌧𑍂𑌮𑌕𑍇𑌤𑍁𑌨𑌾 ॥ 9 ॥
𑌵𑍃𑌤𑍍𑌤𑌶𑍀𑌲𑌕𑍁𑌲𑍇 𑌜𑌾𑌤𑌾𑌮𑌾𑌚𑌾𑌰𑌵𑌤𑌿 𑌧𑌾𑌰𑍍𑌮𑌿𑌕𑍇 ।
𑌪𑍁𑌨𑌃𑌸𑌂𑌸𑍍𑌕𑌾𑌰𑌮𑌾𑌪𑌨𑍍𑌨𑌾𑌂 𑌜𑌾𑌤𑌾𑌮𑌿𑌵 𑌚 𑌦𑍁𑌷𑍍𑌕𑍁𑌲𑍇 ॥ 10 ॥
𑌅𑌭𑍂𑌤𑍇𑌨𑌾𑌪𑌵𑌾𑌦𑍇𑌨 𑌕𑍀𑌰𑍍𑌤𑌿𑌂 𑌨𑌿𑌪𑌤𑌿𑌤𑌾𑌮𑌿𑌵 ।
𑌆𑌮𑍍𑌨𑌾𑌯𑌾𑌨𑌾𑌮𑌯𑍋𑌗𑍇𑌨 𑌵𑌿𑌦𑍍𑌯𑌾𑌂 𑌪𑍍𑌰𑌶𑌿𑌥𑌿𑌲𑌾𑌮𑌿𑌵 ॥ 11 ॥
𑌸𑌨𑍍𑌨𑌾𑌮𑌿𑌵 𑌮𑌹𑌾𑌕𑍀𑌰𑍍𑌤𑌿𑌂 𑌶𑍍𑌰𑌦𑍍𑌧𑌾𑌮𑌿𑌵 𑌵𑌿𑌮𑌾𑌨𑌿𑌤𑌾𑌮𑍍 ।
𑌪𑍂𑌜𑌾𑌮𑌿𑌵 𑌪𑌰𑌿𑌕𑍍𑌷𑍀𑌣𑌾𑌮𑌾𑌶𑌾𑌂 𑌪𑍍𑌰𑌤𑌿𑌹𑌤𑌾𑌮𑌿𑌵 ॥ 12 ॥
𑌆𑌯𑌤𑍀𑌮𑌿𑌵 𑌵𑌿𑌧𑍍𑌵𑌸𑍍𑌤𑌾𑌮𑌾𑌜𑍍𑌞𑌾𑌂 𑌪𑍍𑌰𑌤𑌿𑌹𑌤𑌾𑌮𑌿𑌵 ।
𑌦𑍀𑌪𑍍𑌤𑌾𑌮𑌿𑌵 𑌦𑌿𑌶𑌂 𑌕𑌾𑌲𑍇 𑌪𑍂𑌜𑌾𑌮𑌪𑌹𑍃𑌤𑌾𑌮𑌿𑌵 ॥ 13 ॥
𑌪𑌦𑍍𑌮𑌿𑌨𑍀𑌮𑌿𑌵 𑌵𑌿𑌧𑍍𑌵𑌸𑍍𑌤𑌾𑌂 𑌹𑌤𑌶𑍂𑌰𑌾𑌂 𑌚𑌮𑍂𑌮𑌿𑌵 ।
𑌪𑍍𑌰𑌭𑌾𑌮𑌿𑌵 𑌤𑌮𑍋𑌧𑍍𑌵𑌸𑍍𑌤𑌾𑌮𑍁𑌪𑌕𑍍𑌷𑍀𑌣𑌾𑌮𑌿𑌵𑌾𑌪𑌗𑌾𑌮𑍍 ॥ 14 ॥
𑌵𑍇𑌦𑍀𑌮𑌿𑌵 𑌪𑌰𑌾𑌮𑍃𑌷𑍍𑌟𑌾𑌂 𑌶𑌾𑌨𑍍𑌤𑌾𑌮𑌗𑍍𑌨𑌿𑌶𑌿𑌖𑌾𑌮𑌿𑌵 ।
𑌪𑍗𑌰𑍍𑌣𑌮𑌾𑌸𑍀𑌮𑌿𑌵 𑌨𑌿𑌶𑌾𑌂 𑌰𑌾𑌹𑍁𑌗𑍍𑌰𑌸𑍍𑌤𑍇𑌨𑍍𑌦𑍁𑌮𑌣𑍍𑌡𑌲𑌾𑌮𑍍 ॥ 15 ॥
𑌉𑌤𑍍𑌕𑍃𑌷𑍍𑌟𑌪𑌰𑍍𑌣𑌕𑌮𑌲𑌾𑌂 𑌵𑌿𑌤𑍍𑌰𑌾𑌸𑌿𑌤𑌵𑌿𑌹𑌙𑍍𑌗𑌮𑌾𑌮𑍍 ।
𑌹𑌸𑍍𑌤𑌿𑌹𑌸𑍍𑌤𑌪𑌰𑌾𑌮𑍃𑌷𑍍𑌟𑌾𑌮𑌾𑌕𑍁𑌲𑌾𑌂 𑌪𑌦𑍍𑌮𑌿𑌨𑍀𑌮𑌿𑌵 ॥ 16 ॥
𑌪𑌤𑌿𑌶𑍋𑌕𑌾𑌤𑍁𑌰𑌾𑌂 𑌶𑍁𑌷𑍍𑌕𑌾𑌂 𑌨𑌦𑍀𑌂 𑌵𑌿𑌸𑍍𑌰𑌾𑌵𑌿𑌤𑌾𑌮𑌿𑌵 ।
𑌪𑌰𑌯𑌾 𑌮𑍃𑌜𑌯𑌾 𑌹𑍀𑌨𑌾𑌂 𑌕𑍃𑌷𑍍𑌣𑌪𑌕𑍍𑌷𑌨𑌿𑌶𑌾𑌮𑌿𑌵 ॥ 17 ॥
𑌸𑍁𑌕𑍁𑌮𑌾𑌰𑍀𑌂 𑌸𑍁𑌜𑌾𑌤𑌾𑌙𑍍𑌗𑍀𑌂 𑌰𑌤𑍍𑌨𑌗𑌰𑍍𑌭𑌗𑍃𑌹𑍋𑌚𑌿𑌤𑌾𑌮𑍍 ।
𑌤𑌪𑍍𑌯𑌮𑌾𑌨𑌾𑌮𑌿𑌵𑍋𑌷𑍍𑌣𑍇𑌨 𑌮𑍃𑌣𑌾𑌲𑍀𑌮𑌚𑌿𑌰𑍋𑌦𑍍𑌧𑍃𑌤𑌾𑌮𑍍 ॥ 18 ॥
𑌗𑍃𑌹𑍀𑌤𑌾𑌮𑌾𑌲𑌿𑌤𑌾𑌂 𑌸𑍍𑌤𑌮𑍍𑌭𑍇 𑌯𑍂𑌥𑌪𑍇𑌨 𑌵𑌿𑌨𑌾𑌕𑍃𑌤𑌾𑌮𑍍 ।
𑌨𑌿𑌃𑌶𑍍𑌵𑌸𑌨𑍍𑌤𑍀𑌂 𑌸𑍁𑌦𑍁𑌃𑌖𑌾𑌰𑍍𑌤𑌾𑌂 𑌗𑌜𑌰𑌾𑌜𑌵𑌧𑍂𑌮𑌿𑌵 ॥ 19 ॥
𑌏𑌕𑌯𑌾 𑌦𑍀𑌰𑍍𑌘𑌯𑌾 𑌵𑍇𑌣𑍍𑌯𑌾 𑌶𑍋𑌭𑌮𑌾𑌨𑌾𑌮𑌯𑌤𑍍𑌨𑌤𑌃 ।
𑌨𑍀𑌲𑌯𑌾 𑌨𑍀𑌰𑌦𑌾𑌪𑌾𑌯𑍇 𑌵𑌨𑌰𑌾𑌜𑍍𑌯𑌾 𑌮𑌹𑍀𑌮𑌿𑌵 ॥ 20 ॥
𑌉𑌪𑌵𑌾𑌸𑍇𑌨 𑌶𑍋𑌕𑍇𑌨 𑌧𑍍𑌯𑌾𑌨𑍇𑌨 𑌚 𑌭𑌯𑍇𑌨 𑌚 ।
𑌪𑌰𑌿𑌕𑍍𑌷𑍀𑌣𑌾𑌂 𑌕𑍃𑌶𑌾𑌂 𑌦𑍀𑌨𑌾𑌮𑌲𑍍𑌪𑌾𑌹𑌾𑌰𑌾𑌂 𑌤𑌪𑍋𑌧𑌨𑌾𑌮𑍍 ॥ 21 ॥
𑌆𑌯𑌾𑌚𑌮𑌾𑌨𑌾𑌂 𑌦𑍁𑌃𑌖𑌾𑌰𑍍𑌤𑌾𑌂 𑌪𑍍𑌰𑌾𑌞𑍍𑌜𑌲𑌿𑌂 𑌦𑍇𑌵𑌤𑌾𑌮𑌿𑌵 ।
𑌭𑌾𑌵𑍇𑌨 𑌰𑌘𑍁𑌮𑍁𑌖𑍍𑌯𑌸𑍍𑌯 𑌦𑌶𑌗𑍍𑌰𑍀𑌵𑌪𑌰𑌾𑌭𑌵𑌮𑍍 ॥ 22 ॥
𑌸𑌮𑍀𑌕𑍍𑌷𑌮𑌾𑌣𑌾𑌂 𑌰𑍁𑌦𑌤𑍀𑌮𑌨𑌿𑌨𑍍𑌦𑌿𑌤𑌾𑌂 𑌸𑍁𑌪𑌕𑍍𑌷𑍍𑌮𑌤𑌾𑌮𑍍𑌰𑌾𑌯𑌤𑌶𑍁𑌕𑍍𑌲𑌲𑍋𑌚𑌨𑌾𑌮𑍍 ।
𑌅𑌨𑍁𑌵𑍍𑌰𑌤𑌾𑌂 𑌰𑌾𑌮𑌮𑌤𑍀𑌵 𑌮𑍈𑌥𑌿𑌲𑍀𑌂 𑌪𑍍𑌰𑌲𑍋𑌭𑌯𑌾𑌮𑌾𑌸 𑌵𑌧𑌾𑌯 𑌰𑌾𑌵𑌣𑌃 ॥ 23 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌨𑍍𑌦𑌰𑌕𑌾𑌣𑍍𑌡𑍇 𑌏𑌕𑍋𑌨𑌵𑌿𑌂𑌶𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe sundarakāṇḍam |
atha ekonaviṃśassargaḥ |
tasminneva tataḥ kāle rājaputrī tvaninditā |
rūpayauvanasampannaṃ bhūṣaṇottamabhūṣitam || 1 ||
tato dṛṣṭvaiva vaidehī rāvaṇaṃ rākṣasādhipam |
prāvepata varārohā pravāte kadalī yathā || 2 ||
ācchādyodaramūrubhyāṃ bāhubhyāṃ ca payodharau |
upaviṣṭā viśālākṣī rudantī varavarṇinī || 3 ||
daśagrīvastu vaidehīṃ rakṣitāṃ rākṣasīgaṇaiḥ |
dadarśa sītāṃ duḥkhārtāṃ nāvaṃ sannāmivārṇave || 4 ||
asaṃvṛtāyāmāsīnāṃ dharaṇyāṃ saṃśitavratām |
chinnāṃ prapatitāṃ bhūmau śākhāmiva vanaspateḥ || 5 ||
malamaṇḍanacitrāṅgīṃ maṇḍanārhāmamaṇḍitām |
mṛṇālī paṅkadigdheva vibhāti na vibhāti ca || 6 ||
samīpaṃ rājasiṃhasya rāmasya viditātmanaḥ |
saṅkalpahayasaṃyuksairyāntīmiva manorathaiḥ || 7 ||
śuṣyantīṃ rudatīmekāṃ dhyānaśokaparāyaṇām |
duḥkhasyāntamapaśyantīṃ rāmāṃ rāmamanuvratām || 8 ||
veṣṭamānāṃ tathā'viṣṭāṃ pannagendravadhūmiva |
dhūpyamānāṃ graheṇeva rohiṇīṃ dhūmaketunā || 9 ||
vṛttaśīlakule jātāmācāravati dhārmike |
punaḥsaṃskāramāpannāṃ jātāmiva ca duṣkule || 10 ||
abhūtenāpavādena kīrtiṃ nipatitāmiva |
āmnāyānāmayogena vidyāṃ praśithilāmiva || 11 ||
sannāmiva mahākīrtiṃ śraddhāmiva vimānitām |
pūjāmiva parikṣīṇāmāśāṃ pratihatāmiva || 12 ||
āyatīmiva vidhvastāmājñāṃ pratihatāmiva |
dīptāmiva diśaṃ kāle pūjāmapahṛtāmiva || 13 ||
padminīmiva vidhvastāṃ hataśūrāṃ camūmiva |
prabhāmiva tamodhvastāmupakṣīṇāmivāpagām || 14 ||
vedīmiva parāmṛṣṭāṃ śāntāmagniśikhāmiva |
paurṇamāsīmiva niśāṃ rāhugrastendumaṇḍalām || 15 ||
utkṛṣṭaparṇakamalāṃ vitrāsitavihaṅgamām |
hastihastaparāmṛṣṭāmākulāṃ padminīmiva || 16 ||
patiśokāturāṃ śuṣkāṃ nadīṃ visrāvitāmiva |
parayā mṛjayā hīnāṃ kṛṣṇapakṣaniśāmiva || 17 ||
sukumārīṃ sujātāṅgīṃ ratnagarbhagṛhocitām |
tapyamānāmivoṣṇena mṛṇālīmaciroddhṛtām || 18 ||
gṛhītāmālitāṃ stambhe yūthapena vinākṛtām |
niḥśvasantīṃ suduḥkhārtāṃ gajarājavadhūmiva || 19 ||
ekayā dīrghayā veṇyā śobhamānāmayatnataḥ |
nīlayā nīradāpāye vanarājyā mahīmiva || 20 ||
upavāsena śokena dhyānena ca bhayena ca |
parikṣīṇāṃ kṛśāṃ dīnāmalpāhārāṃ tapodhanām || 21 ||
āyācamānāṃ duḥkhārtāṃ prāñjaliṃ devatāmiva |
bhāvena raghumukhyasya daśagrīvaparābhavam || 22 ||
samīkṣamāṇāṃ rudatīmaninditāṃ supakṣmatāmrāyataśuklalocanām |
anuvratāṃ rāmamatīva maithilīṃ pralobhayāmāsa vadhāya rāvaṇaḥ || 23 ||
ityārṣe śrīmadrāmāyaṇe vālmīkīya ādikāvye sundarakāṇḍe ekonaviṃśassargaḥ ||
InfoLyter.in — Sacred Vedic Knowledge Portal · Free forever