4.42 Kishkindhakanda - Dvichatvarimsha Sargah

ॐ

4.42 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡 - 𑌦𑍍𑌵𑌿𑌚𑌤𑍍𑌵𑌾𑌰𑌿𑌂𑌶 𑌸𑌰𑍍𑌗𑌃

Valmiki Grantha

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡𑌮𑍍 ।

𑌅𑌥 𑌦𑍍𑌵𑌿𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।

𑌅𑌥 𑌪𑍍𑌰𑌸𑍍𑌥𑌾𑌪𑍍𑌯 𑌸𑍁𑌗𑍍𑌰𑍀𑌵𑌸𑍍𑌤𑌾𑌨𑍍𑌹𑌰𑍀𑌨𑍍𑌦𑌕𑍍𑌷𑌿𑌣𑌾𑌂 𑌦𑌿𑌶𑌮𑍍 ।

𑌅𑌬𑍍𑌰𑌵𑍀𑌨𑍍𑌮𑍇𑌘𑌸𑌙𑍍𑌕𑌾𑌶𑌂 𑌸𑍁𑌷𑍇𑌣𑌂 𑌨𑌾𑌮 𑌯𑍂𑌥𑌪𑌮𑍍 ॥ 1 ॥

𑌤𑌾𑌰𑌾𑌯𑌾𑌃 𑌪𑌿𑌤𑌰𑌂 𑌰𑌾𑌜𑌾 𑌶𑍍𑌵𑌶𑍁𑌰𑌂 𑌭𑍀𑌮𑌵𑌿𑌕𑍍𑌰𑌮𑌮𑍍 ।

𑌅𑌬𑍍𑌰𑌵𑍀𑌤𑍍𑌪𑍍𑌰𑌾𑌞𑍍𑌜𑌲𑌿𑌰𑍍𑌵𑌾𑌕𑍍𑌯𑌮𑌭𑌿𑌗𑌮𑍍𑌯 𑌪𑍍𑌰𑌣𑌮𑍍𑌯 𑌚 ॥ 2 ॥

𑌮𑌰𑍀𑌚𑌿𑌪𑍁𑌤𑍍𑌰𑌂 𑌮𑌾𑌰𑍀𑌚𑌮𑌰𑍍𑌚𑌿𑌷𑍍𑌮𑌨𑍍𑌤𑌂 𑌮𑌹𑌾𑌕𑌪𑌿𑌮𑍍 ।

𑌵𑍃𑌤𑌂 𑌕𑌪𑌿𑌵𑌰𑍈 𑌶𑍍𑌶𑍂𑌰𑍈𑌰𑍍𑌮𑌹𑍇𑌨𑍍𑌦𑍍𑌰𑌸𑌦𑍃𑌶𑌦𑍍𑌯𑍁𑌤𑌿𑌮𑍍 ॥ 3 ॥

𑌬𑍁𑌦𑍍𑌧𑌿𑌵𑌿𑌕𑍍𑌰𑌮𑌸𑌮𑍍𑌪𑌨𑍍𑌨𑌂 𑌵𑍈𑌨𑌤𑍇𑌯𑌸𑌮𑌦𑍍𑌯𑍁𑌤𑌿𑌮𑍍 ।

𑌮𑌰𑍀𑌚𑌿𑌪𑍁𑌤𑍍𑌰𑌾𑌨𑍍𑌮𑌾𑌰𑍀𑌚𑌾𑌨𑌰𑍍𑌚𑌿𑌰𑍍𑌮𑌾𑌲𑌾𑌨𑍍𑌮𑌹𑌾𑌬𑌲𑌾𑌨𑍍 ॥ 4 ॥

𑌋𑌷𑌿𑌪𑍁𑌤𑍍𑌰𑌾𑌂𑌶𑍍𑌚𑌤𑌾𑌨𑍍𑌤𑍍𑌸𑌰𑍍𑌵𑌾𑌨𑍍𑌪𑍍𑌰𑌤𑍀𑌚𑍀𑌮𑌾𑌦𑌿𑌶𑌦𑍍𑌦𑌿𑌶𑌮𑍍 ।

𑌦𑍍𑌵𑌾𑌭𑍍𑌯𑌾𑌂 𑌶𑌤𑌸𑌹𑌸𑍍𑌰𑌾𑌭𑍍𑌯𑌾𑌂 𑌕𑌪𑍀𑌨𑌾𑌂 𑌕𑌪𑌿𑌸𑌤𑍍𑌤𑌮𑌾𑌃 ॥ 5 ॥

𑌸𑍁𑌷𑍇𑌣𑌪𑍍𑌰𑌮𑍁𑌖𑌾 𑌯𑍂𑌯𑌂 𑌵𑍈𑌦𑍇𑌹𑍀𑌂 𑌪𑌰𑌿𑌮𑌾𑌰𑍍𑌗𑌤𑌃 ।

𑌸𑍁𑌰𑌾𑌷𑍍𑌟𑍍𑌰𑌾𑌨𑍍𑌸𑌹𑌬𑌾𑌹𑍍𑌲𑍀𑌕𑌾𑌨𑍍 𑌶𑍍𑌚𑌨𑍍𑌦𑍍𑌰𑌚𑌿𑌤𑍍𑌰𑌾𑌂𑌸𑍍𑌤𑌥𑍈𑌵 𑌚 ॥ 6 ॥

𑌸𑍍𑌫𑍀𑌤𑌾𑌞𑍍𑌜𑌨𑌪𑌦𑌾𑌨𑍍𑌰𑌮𑍍𑌯𑌾𑌨𑍍𑌵𑌿𑌪𑍁𑌲𑌾𑌨𑌿 𑌪𑍁𑌰𑌾𑌣𑌿 𑌚 ।

𑌪𑍁𑌨𑍍𑌨𑌾𑌗𑌗𑌹𑌨𑌂 𑌕𑍁𑌕𑍍𑌷𑌿𑌂 𑌵𑌕𑍁𑌲𑍋𑌦𑍍𑌦𑌾𑌲𑌕𑌾𑌕𑍁𑌲𑌮𑍍 ॥ 7 ॥

𑌤𑌥𑌾 𑌕𑍇𑌤𑌕𑌷𑌣𑍍𑌡𑌾𑌂𑌶𑍍𑌚 𑌮𑌾𑌰𑍍𑌗𑌧𑍍𑌵𑌂 𑌹𑌰𑌿𑌯𑍂𑌥𑌪𑌾𑌃 ।

𑌪𑍍𑌰𑌤𑍍𑌯𑌕𑍍𑌸𑍍𑌰𑍋𑌤𑍋𑌗𑌮𑌾𑌶𑍍𑌚𑍈𑌵 𑌨𑌦𑍍𑌯𑌶𑍍𑌶𑍀𑌤𑌜𑌲𑌾𑌶𑍍𑌶𑌿𑌵𑌾𑌃 ॥ 8 ॥

𑌤𑌾𑌪𑌸𑌾𑌨𑌾𑌮𑌰𑌣𑍍𑌯𑌾𑌨𑌿 𑌕𑌾𑌨𑍍𑌤𑌾𑌰𑌾 𑌗𑌿𑌰𑌯𑌶𑍍𑌚 𑌯𑍇 ।

𑌤𑌤𑍍𑌰𑌸𑍍𑌥𑌲𑍀𑌂 𑌮𑌰𑍁𑌪𑍍𑌰𑌾𑌯𑌾𑌮𑌤𑍍𑌯𑍁𑌚𑍍𑌚𑌶𑌿𑌰𑌸𑌶𑍍𑌶𑌿𑌲𑌾𑌃 ॥ 9 ॥

𑌗𑌿𑌰𑌿𑌜𑌾𑌲𑌾𑌵𑍃𑌤𑌾𑌂 𑌦𑍁𑌰𑍍𑌗𑌾𑌂 𑌮𑌾𑌰𑍍𑌗𑌿𑌤𑍍𑌵𑌾 𑌪𑌶𑍍𑌚𑌿𑌮𑌾𑌂 𑌦𑌿𑌶𑌮𑍍 ।

𑌤𑌤𑌃 𑌪𑌶𑍍𑌚𑌿𑌮𑌮𑌾𑌸𑌾𑌦𑍍𑌯 𑌸𑌮𑍁𑌦𑍍𑌰𑌂 𑌦𑍍𑌰𑌷𑍍𑌟𑍁𑌮𑌰𑍍𑌹𑌥 ॥ 10 ॥

𑌤𑌿𑌮𑌿𑌨𑌕𑍍𑌰𑌾𑌯𑍁𑌤𑌜𑌲𑌮𑌕𑍍𑌷𑍋𑌭𑍍𑌯𑌮𑌥 𑌵𑌾𑌨𑌰𑌾𑌃 ।

𑌤𑌤𑌃 𑌕𑍇𑌤𑌕𑌷𑌣𑍍𑌡𑍇𑌷𑍁 𑌤𑌮𑌾𑌲𑌗𑌹𑌨𑍇𑌷𑍁 𑌚 ॥ 11 ॥

𑌕𑌪𑌯𑍋 𑌵𑌿𑌹𑌰𑌿𑌷𑍍𑌯𑌨𑍍𑌤𑌿 𑌨𑌾𑌰𑌿𑌕𑍇𑌲𑌵𑌨𑍇𑌷𑍁 𑌚 ।

𑌤𑌤𑍍𑌰 𑌸𑍀𑌤𑌾𑌂 𑌚 𑌮𑌾𑌰𑍍𑌗𑌧𑍍𑌵𑌂 𑌨𑌿𑌲𑌯𑌂 𑌰𑌾𑌵𑌣𑌸𑍍𑌯 𑌚 ॥ 12 ॥

𑌵𑍇𑌲𑌾𑌤𑌲𑌨𑌿𑌵𑌿𑌷𑍍𑌟𑍇𑌷𑍁 𑌪𑌰𑍍𑌵𑌤𑍇𑌷𑍁 𑌵𑌨𑍇𑌷𑍁 𑌚 ।

𑌮𑍁𑌰𑌚𑍀𑌪𑌤𑍍𑌤𑌨𑌂 𑌚𑍈𑌵 𑌰𑌮𑍍𑌯𑌂 𑌚𑍈𑌵 𑌜𑌟𑍀𑌪𑍁𑌰𑌮𑍍 ॥ 13 ॥

𑌅𑌵𑌨𑍍𑌤𑍀𑌮𑌙𑍍𑌗𑌲𑍋𑌪𑌾𑌂 𑌚 𑌤𑌥𑌾 𑌚𑌾𑌲𑌕𑍍𑌷𑌿𑌤𑌂 𑌵𑌨𑌮𑍍 ।

𑌰𑌾𑌷𑍍𑌟𑍍𑌰𑌾𑌣𑌿 𑌚 𑌵𑌿𑌶𑌾𑌲𑌾𑌨𑌿 𑌪𑌤𑍍𑌤𑌨𑌾𑌨𑌿 𑌤𑌤𑌸𑍍𑌤𑌤𑌃 ॥ 14 ॥

𑌸𑌿𑌨𑍍𑌧𑍁𑌸𑌾𑌗𑌰𑌯𑍋𑌶𑍍𑌚𑍈𑌵 𑌸𑌙𑍍𑌗𑌮𑍇 𑌤𑌤𑍍𑌰 𑌪𑌰𑍍𑌵𑌤𑌃 ।

𑌮𑌹𑌾𑌨𑍍𑌹𑍇𑌮𑌗𑌿𑌰𑌿𑌰𑍍𑌨𑌾𑌮 𑌶𑌤𑌶𑍃𑌙𑍍𑌗𑍋 𑌮𑌹𑌾𑌦𑍍𑌰𑍁𑌮𑌃 ॥ 15 ॥

𑌤𑌸𑍍𑌯 𑌪𑍍𑌰𑌸𑍍𑌥𑍇𑌷𑍁 𑌰𑌮𑍍𑌯𑍇𑌷𑍁 𑌸𑌿𑌂𑌹𑌾𑌃 𑌪𑌕𑍍𑌷𑌗𑌮𑌾𑌃 𑌸𑍍𑌥𑌿𑌤𑌾𑌃 ।

𑌤𑌿𑌮𑌿𑌮𑌤𑍍𑌸𑍍𑌯𑌗𑌜𑌾𑌂𑌶𑍍𑌚𑍈𑌵 𑌨𑍀𑌡𑌾𑌨𑍍𑌯𑌾𑌰𑍋𑌪𑌯𑌨𑍍𑌤𑌿 𑌤𑍇 ॥ 16 ॥

𑌤𑌾𑌨𑌿 𑌨𑍀𑌡𑌾𑌨𑌿 𑌸𑌿𑌂𑌹𑌾𑌨𑌾𑌂 𑌗𑌿𑌰𑌿𑌶𑍃𑌙𑍍𑌗𑌗𑌤𑌾𑌶𑍍𑌚 𑌯𑍇 ।

𑌦𑍃𑌪𑍍𑌤𑌾𑌸𑍍𑌤𑍃𑌪𑍍𑌤𑌾𑌶𑍍𑌚 𑌮𑌾𑌤𑌙𑍍𑌗𑌾𑌸𑍍𑌤𑍋𑌯𑌦𑌸𑍍𑌵𑌨𑌨𑌿𑌸𑍍𑌵𑌨𑌾𑌃 ॥ 17 ॥

𑌵𑌿𑌚𑌰𑌨𑍍𑌤𑌿 𑌵𑌿𑌶𑌾𑌲𑍇𑌽𑌸𑍍𑌮𑌿𑌂𑌸𑍍𑌤𑍋𑌯𑌪𑍂𑌰𑍍𑌣𑍇 𑌸𑌮𑌨𑍍𑌤𑌤𑌃 ।

𑌤𑌸𑍍𑌯 𑌶𑍃𑌙𑍍𑌗𑌂 𑌦𑌿𑌵𑌸𑍍𑌪𑌰𑍍𑌶𑌂 𑌕𑌾𑌞𑍍𑌚𑌨𑌂 𑌚𑌿𑌤𑍍𑌰𑌪𑌾𑌦𑌪𑌮𑍍 ॥ 18 ॥

𑌸𑌰𑍍𑌵𑌮𑌾𑌶𑍁 𑌵𑌿𑌚𑍇𑌤𑌵𑍍𑌯𑌂 𑌕𑌪𑌿𑌭𑌿𑌃 𑌕𑌾𑌮𑌰𑍂𑌪𑌿𑌭𑌿𑌃 ।

𑌕𑍋𑌟𑌿𑌂 𑌤𑌤𑍍𑌰 𑌸𑌮𑍁𑌦𑍍𑌰𑍇 𑌤𑍁 𑌕𑌾𑌞𑍍𑌚𑌨𑍀𑌂 𑌶𑌤𑌯𑍋𑌜𑌨𑌾𑌮𑍍 ॥ 19 ॥

𑌦𑍁𑌰𑍍𑌦𑌰𑍍𑌶𑌾𑌂 𑌪𑌾𑌰𑌿𑌯𑌾𑌤𑍍𑌰𑌸𑍍𑌯 𑌗𑌤𑌾𑌂 𑌦𑍍𑌰𑌕𑍍𑌷𑍍𑌯𑌥 𑌵𑌾𑌨𑌰𑌾𑌃 ।

𑌕𑍋𑌟𑍍𑌯𑌸𑍍𑌤𑌤𑍍𑌰 𑌚𑌤𑍁𑌰𑍍𑌵𑌿𑌂𑌶𑌦𑍍𑌗𑌨𑍍𑌧𑌰𑍍𑌵𑌾𑌣𑌾𑌂 𑌤𑌪𑌸𑍍𑌵𑌿𑌨𑌾𑌮𑍍 ॥ 20 ॥

𑌵𑌸𑌨𑍍𑌤𑍍𑌯𑌗𑍍𑌨𑌿𑌨𑌿𑌕𑌾𑌶𑌾𑌨𑌾𑌂 𑌘𑍋𑌰𑌾𑌣𑌾𑌂 𑌕𑌾𑌮𑌰𑍂𑌪𑌿𑌣𑌾𑌮𑍍 ।

𑌪𑌾𑌵𑌕𑌾𑌰𑍍𑌚𑌿𑌃 𑌪𑍍𑌰𑌤𑍀𑌕𑌾𑌶𑌾𑌸𑍍𑌸𑌮𑌵𑍇𑌤𑌾𑌸𑍍𑌸𑌹𑌸𑍍𑌰𑌶𑌃 ॥ 21 ॥

𑌨𑌾𑌤𑍍𑌯𑌾𑌸𑌾𑌦𑌯𑌿𑌤𑌵𑍍𑌯𑌾𑌸𑍍𑌤𑍇 𑌵𑌾𑌨𑌰𑍈𑌰𑍍𑌭𑍀𑌮𑌵𑌿𑌕𑍍𑌰𑌮𑍈𑌃 ।

𑌨𑌾𑌦𑍇𑌯𑌂 𑌚 𑌫𑌲𑌂 𑌤𑌸𑍍𑌮𑌾𑌦𑍍𑌦𑍇𑌶𑌾𑌤𑍍𑌕𑌿𑌞𑍍𑌚𑌿𑌤𑍍 𑌪𑍍𑌲𑌵𑌙𑍍𑌗𑌮𑍈𑌃 ॥ 22 ॥

𑌦𑍁𑌰𑌾𑌸𑌦𑌾 𑌹𑌿 𑌤𑍇 𑌵𑍀𑌰𑌾 𑌸𑍍𑌸𑌤𑍍𑌤𑍍𑌵𑌵𑌨𑍍𑌤𑍋 𑌮𑌹𑌾𑌬𑌲𑌾𑌃 ।

𑌫𑌲𑌮𑍂𑌲𑌾𑌨𑌿 𑌤𑍇 𑌤𑌤𑍍𑌰 𑌰𑌕𑍍𑌷𑌨𑍍𑌤𑍇 𑌭𑍀𑌮𑌵𑌿𑌕𑍍𑌰𑌮𑌾𑌃 ॥ 23 ॥

𑌤𑌤𑍍𑌰 𑌯𑌤𑍍𑌨𑌶𑍍𑌚 𑌕𑌰𑍍𑌤𑌵𑍍𑌯𑍋 𑌮𑌾𑌰𑍍𑌗𑌿𑌤𑌵𑍍𑌯𑌾 𑌚 𑌜𑌾𑌨𑌕𑍀 ।

𑌨 𑌹𑌿 𑌤𑍇𑌭𑍍𑌯𑍋 𑌭𑌯𑌂 𑌕𑌿𑌞𑍍𑌚𑌿𑌤𑍍𑌕𑌪𑌿𑌤𑍍𑌵𑌮𑌨𑍁𑌵𑌰𑍍𑌤𑌤𑌾𑌮𑍍 ॥ 24 ॥

𑌤𑌤𑍍𑌰 𑌵𑍈𑌢𑍂𑌰𑍍𑌯𑌵𑌰𑍍𑌣𑌾𑌭𑍋 𑌵𑌜𑍍𑌰𑌸𑌂𑌸𑍍𑌥𑌾𑌨𑌸𑌂𑌸𑍍𑌥𑌿𑌤𑌃 ।

𑌨𑌾𑌨𑌾𑌦𑍍𑌰𑍁𑌮𑌲𑌤𑌾𑌕𑍀𑌰𑍍𑌣𑍋 𑌵𑌜𑍍𑌰𑍋 𑌨𑌾𑌮 𑌮𑌹𑌾𑌗𑌿𑌰𑌿𑌃 ॥ 25 ॥

𑌶𑍍𑌰𑍀𑌮𑌾𑌨𑍍𑌸𑌮𑍁𑌦𑌿𑌤𑌸𑍍𑌤𑌤𑍍𑌰 𑌯𑍋𑌜𑌨𑌾𑌨𑌾𑌂 𑌶𑌤𑌂 𑌸𑌮𑌮𑍍 ।

𑌗𑍁𑌹𑌾𑌸𑍍𑌤𑌤𑍍𑌰 𑌵𑌿𑌚𑍇𑌤𑌵𑍍𑌯𑌾 𑌪𑍍𑌰𑌯𑌤𑍍𑌨𑍇𑌨 𑌪𑍍𑌲𑌵𑌙𑍍𑌗𑌮𑌾𑌃 ॥ 26 ॥

𑌚𑌤𑍁𑌰𑍍𑌭𑌾𑌗𑍇 𑌸𑌮𑍁𑌦𑍍𑌰𑌸𑍍𑌯 𑌚𑌕𑍍𑌰𑌵𑌾𑌨𑍍𑌨𑌾𑌮 𑌪𑌰𑍍𑌵𑌤𑌃 ।

𑌤𑌤𑍍𑌰 𑌚𑌕𑍍𑌰𑌂 𑌸𑌹𑌸𑍍𑌰𑌾𑌰𑌂 𑌨𑌿𑌰𑍍𑌮𑌿𑌤𑌂 𑌵𑌿𑌶𑍍𑌵𑌕𑌰𑍍𑌮𑌣𑌾 ॥ 27 ॥

𑌤𑌤𑍍𑌰 𑌪𑌞𑍍𑌚𑌜𑌨𑌂 𑌹𑌤𑍍𑌵𑌾 𑌹𑌯𑌗𑍍𑌰𑍀𑌵𑌂 𑌚 𑌦𑌾𑌨𑌵𑌮𑍍 ।

𑌆𑌜𑌹𑌾𑌰 𑌤𑌤𑌶𑍍𑌚𑌕𑍍𑌰𑌂 𑌶𑌙𑍍𑌖𑌂 𑌚 𑌪𑍁𑌰𑍁𑌷𑍋𑌤𑍍𑌤𑌮𑌃 ॥ 28 ॥

𑌤𑌸𑍍𑌯 𑌸𑌾𑌨𑍁𑌷𑍁 𑌚𑌿𑌤𑍍𑌰𑍇𑌷𑍁 𑌵𑌿𑌶𑌾𑌲𑌾𑌸𑍁 𑌗𑍁𑌹𑌾𑌸𑍁 𑌚 ।

𑌰𑌾𑌵𑌣 𑌸𑍍𑌸𑌹 𑌵𑍈𑌦𑍇𑌹𑍍𑌯𑌾 𑌮𑌾𑌰𑍍𑌗𑌿𑌤𑌵𑍍𑌯𑌸𑍍𑌤𑌤 𑌸𑍍𑌤𑌤𑌃 ॥ 29 ॥

𑌯𑍋𑌜𑌨𑌾𑌨𑌾𑌂 𑌚𑌤𑍁𑌷𑍍𑌷𑌷𑍍𑌟𑌿𑌰𑍍𑌵𑌰𑌾𑌹𑍋 𑌨𑌾𑌮 𑌪𑌰𑍍𑌵𑌤𑌃 ।

𑌸𑍁𑌵𑌰𑍍𑌣𑌶𑍃𑌙𑍍𑌗𑌸𑍍𑌸𑍁𑌶𑍍𑌰𑍀𑌮𑌾 𑌨𑌗𑌾𑌧𑍇 𑌵𑌰𑍁𑌣𑌾𑌲𑌯𑍇 ॥ 30 ॥

𑌤𑌤𑍍𑌰 𑌪𑍍𑌰𑌾𑌗𑍍𑌜𑍍𑌯𑍋𑌤𑌿𑌷𑌂 𑌨𑌾𑌮 𑌜𑌾𑌤𑌰𑍂𑌪𑌮𑌯𑌂 𑌪𑍁𑌰𑌮𑍍 ।

𑌯𑌸𑍍𑌮𑌿𑌨𑍍𑌵𑌸𑌤𑌿 𑌦𑍁𑌷𑍍𑌟𑌾𑌤𑍍𑌮𑌾 𑌨𑌰𑌕𑍋 𑌨𑌾𑌮 𑌦𑌾𑌨𑌵𑌃 ॥ 31 ॥

𑌤𑌤𑍍𑌰 𑌸𑌾𑌨𑍁𑌷𑍁 𑌚𑌿𑌤𑍍𑌰𑍇𑌷𑍁 𑌵𑌿𑌶𑌾𑌲𑌾𑌸𑍁 𑌗𑍁𑌹𑌾𑌸𑍁 𑌚 ।

𑌰𑌾𑌵𑌣𑌸𑍍𑌸𑌹 𑌵𑍈𑌦𑍇𑌹𑍍𑌯𑌾 𑌮𑌾𑌰𑍍𑌗𑌿𑌤𑌵𑍍𑌯𑌸𑍍𑌤𑌤𑌸𑍍𑌤𑌤𑌃 ॥ 32 ॥

𑌤𑌮𑌤𑌿𑌕𑍍𑌰𑌮𑍍𑌯 𑌶𑍈𑌲𑍇𑌨𑍍𑌦𑍍𑌰𑌂 𑌕𑌾𑌞𑍍𑌚𑌨𑌾𑌨𑍍𑌤𑌰𑌨𑌿𑌰𑍍𑌦𑌰𑌃 ।

𑌪𑌰𑍍𑌵𑌤 𑌸𑍍𑌸𑌰𑍍𑌵𑌸𑍗𑌵𑌰𑍍𑌣𑍋 𑌧𑌾𑌰𑌾𑌪𑍍𑌰𑌸𑍍𑌰𑌵𑌣𑌾𑌯𑍁𑌤𑌃 ॥ 33 ॥

𑌤𑌂 𑌗𑌜𑌾𑌶𑍍𑌚 𑌵𑌰𑌾𑌹𑌾𑌶𑍍𑌚 𑌸𑌿𑌂𑌹 𑌵𑍍𑌯𑌾𑌘𑍍𑌰𑌾𑌶𑍍𑌚 𑌸𑌰𑍍𑌵𑌤𑌃 ।

𑌅𑌭𑌿𑌗𑌰𑍍𑌜𑌨𑍍𑌤𑌿 𑌸𑌤𑌤𑌂 𑌤𑍇𑌨 𑌶𑌬𑍍𑌦𑍇𑌨 𑌦𑌰𑍍𑌪𑌿𑌤𑌾𑌃 ॥ 34 ॥

𑌯𑌸𑍍𑌮𑌿𑌨𑍍𑌹𑌰𑌿𑌹𑌯𑍍𑌶𑍀𑌮𑌾𑌨𑍍𑌮𑌹𑍇𑌨𑍍𑌦𑍍𑌰𑌃 𑌪𑌾𑌕𑌶𑌾𑌸𑌨𑌃 ।

𑌅𑌭𑌿𑌷𑌿𑌕𑍍𑌤𑌃 𑌸𑍁𑌰𑍈 𑌰𑌾𑌜𑌾 𑌮𑍇𑌘𑌵𑌾𑌨𑍍𑌨𑌾𑌮 𑌪𑌰𑍍𑌵𑌤𑌃 ॥ 35 ॥

𑌤𑌮𑌤𑌿𑌕𑍍𑌰𑌮𑍍𑌯 𑌶𑍈𑌲𑍇𑌨𑍍𑌦𑍍𑌰𑌂 𑌮𑌹𑍇𑌨𑍍𑌦𑍍𑌰𑌪𑌰𑌿𑌪𑌾𑌲𑌿𑌤𑌮𑍍 ।

𑌷𑌷𑍍𑌟𑌿 𑌰𑍍𑌗𑌿𑌰𑌿𑌸𑌹𑌸𑍍𑌰𑌾𑌣𑌿 𑌕𑌾𑌞𑍍𑌚𑌨𑌾𑌨𑌿 𑌗𑌮𑌿𑌷𑍍𑌯𑌥 ॥ 36 ॥

𑌤𑌰𑍁𑌣𑌾𑌦𑌿𑌤𑍍𑌯𑌵𑌰𑍍𑌣𑌾𑌨𑌿 𑌭𑍍𑌰𑌾𑌜𑌮𑌾𑌨𑌾𑌨𑌿 𑌸𑌰𑍍𑌵𑌤𑌃 ।

𑌜𑌾𑌤𑌰𑍂𑌪𑌮𑌯𑍈𑌰𑍍𑌵𑍃𑌕𑍍𑌷𑍈 𑌶𑍋𑌭𑌿𑌤𑌾𑌨𑌿 𑌸𑍁𑌪𑍁𑌷𑍍𑌪𑌿𑌤𑍈𑌃 ॥ 37 ॥

𑌤𑍇𑌷𑌾𑌂 𑌮𑌧𑍍𑌯𑍇 𑌸𑍍𑌥𑌿𑌤𑍋 𑌰𑌾𑌜𑌾 𑌮𑍇𑌰𑍁𑌰𑍁𑌤𑍍𑌤𑌰𑌪𑌰𑍍𑌵𑌤𑌃 ।

𑌆𑌦𑌿𑌤𑍍𑌯𑍇𑌨 𑌪𑍍𑌰𑌸𑌨𑍍𑌨𑍇𑌨 𑌶𑍈𑌲𑍋 𑌦𑌤𑍍𑌤𑌵𑌰𑌃 𑌪𑍁𑌰𑌾 ॥ 38 ॥

𑌤𑍇𑌨𑍈𑌵 𑌮𑍁𑌕𑍍𑌤𑌶𑍍𑌶𑍈𑌲𑍇𑌨𑍍𑌦𑍍𑌰𑌸𑍍𑌸𑌰𑍍𑌵 𑌏𑌵 𑌤𑍍𑌵𑌦𑌾𑌶𑍍𑌰𑌯𑌾𑌃 ।

𑌮𑌤𑍍𑌪𑍍𑌰𑌸𑌾𑌦𑌾𑌦𑍍𑌭𑌵𑌿𑌷𑍍𑌯𑌨𑍍𑌤𑌿 𑌦𑌿𑌵𑌾 𑌰𑌾𑌤𑍍𑌰𑌂 𑌚 𑌕𑌾𑌞𑍍𑌚𑌨𑌾𑌃 ॥ 39 ॥

𑌤𑍍𑌵𑌯𑌿 𑌯𑍇 𑌚𑌾𑌪𑌿 𑌵𑌤𑍍𑌸𑍍𑌯𑌨𑍍𑌤𑌿 𑌦𑍇𑌵𑌗𑌨𑍍𑌧𑌰𑍍𑌵𑌦𑌾𑌨𑌵𑌾𑌃 ।

𑌤𑍇 𑌭𑌵𑌿𑌷𑍍𑌯𑌨𑍍𑌤𑌿 𑌰𑌕𑍍𑌤𑌾𑌶𑍍𑌚 𑌪𑍍𑌰𑌭𑌯𑌾 𑌕𑌾𑌞𑍍𑌚𑌨𑌪𑍍𑌰𑌭𑌾𑌃 ॥ 40 ॥

𑌵𑌿𑌶𑍍𑌵𑍇 𑌦𑍇𑌵𑌾𑌶𑍍𑌚 𑌮𑌰𑍂𑌤𑍋 𑌵𑌸𑌵𑌶𑍍𑌚 𑌦𑌿𑌵𑍗𑌕𑌸𑌃 ।

𑌆𑌗𑌮𑍍𑌯 𑌪𑌶𑍍𑌚𑌿𑌮𑌾𑌂 𑌸𑌨𑍍𑌧𑍍𑌯𑌾𑌂 𑌮𑍇𑌰𑍁𑌮𑍁𑌤𑍍𑌤𑌮𑌪𑌰𑍍𑌵𑌤𑌮𑍍 ॥ 41 ॥

𑌆𑌦𑌿𑌤𑍍𑌯𑌮𑍁𑌪𑌤𑌿𑌷𑍍𑌠𑌨𑍍𑌤𑌿 𑌤𑍈𑌶𑍍𑌚 𑌸𑍂𑌰𑍍𑌯𑍋𑌽𑌭𑌿𑌪𑍂𑌜𑌿𑌤𑌃 ।

𑌅𑌦𑍃𑌶𑍍𑌯𑌸𑍍𑌸𑌰𑍍𑌵𑌭𑍂𑌤𑌾𑌨𑌾𑌮𑌸𑍍𑌤𑌂 𑌗𑌚𑍍𑌛𑌤𑌿𑌪𑌰𑍍𑌵𑌤𑌮𑍍 ॥ 42 ॥

𑌯𑍋𑌜𑌨𑌾𑌨𑌾𑌂 𑌸𑌹𑌸𑍍𑌰𑌾𑌣𑌿 𑌦𑌶 𑌤𑌾𑌨𑌿 𑌦𑌿𑌵𑌾𑌕𑌰𑌃 ।

𑌮𑍁𑌹𑍂𑌰𑍍𑌤𑌾𑌰𑍍𑌧𑍇𑌨 𑌤𑌂 𑌶𑍀𑌘𑍍𑌰𑌮𑌭𑌿𑌯𑌾𑌤𑌿 𑌶𑌿𑌲𑍋𑌚𑍍𑌚𑌯𑌮𑍍 ॥ 43 ॥

𑌶𑍃𑌙𑍍𑌗𑍇 𑌤𑌸𑍍𑌯 𑌮𑌹𑌦𑍍𑌦𑌿𑌵𑍍𑌯𑌂 𑌭𑌵𑌨𑌂 𑌸𑍂𑌰𑍍𑌯𑌸𑌨𑍍𑌨𑌿𑌭𑌮𑍍 ।

𑌪𑍍𑌰𑌾𑌸𑌾𑌦𑌗𑌣𑌸𑌮𑍍𑌬𑌾𑌧𑌂 𑌵𑌿𑌹𑌿𑌤𑌂 𑌵𑌿𑌶𑍍𑌵𑌕𑌰𑍍𑌮𑌣𑌾 ॥ 44 ॥

𑌶𑍋𑌭𑌿𑌤𑌂 𑌤𑌰𑍁𑌭𑌿𑌶𑍍𑌚𑌿𑌤𑍍𑌰𑍈𑌰𑍍𑌨𑌾𑌨𑌾𑌪𑌕𑍍𑌷𑌿𑌸𑌮𑌾𑌕𑍁𑌲𑍈𑌃 ।

𑌨𑌿𑌕𑍇𑌤𑌂 𑌪𑌾𑌶𑌹𑌸𑍍𑌤𑌸𑍍𑌯 𑌵𑌰𑍁𑌣𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 45 ॥

𑌅𑌨𑍍𑌤𑌰𑌾 𑌮𑍇𑌰𑍁𑌮𑌸𑍍𑌤𑌂 𑌚 𑌤𑌾𑌲𑍋 𑌦𑌶𑌶𑌿𑌰𑌾 𑌮𑌹𑌾𑌨𑍍 ।

𑌜𑌾𑌤𑌰𑍂𑌪𑌮𑌯𑍍𑌶𑍀𑌮𑌾𑌨𑍍𑌭𑍍𑌰𑌾𑌜𑌤𑍇 𑌚𑌿𑌤𑍍𑌰𑌵𑍇𑌦𑌿𑌕𑌃 ॥ 46 ॥

𑌤𑍇𑌷𑍁 𑌸𑌰𑍍𑌵𑍇𑌷𑍁 𑌦𑍁𑌰𑍍𑌗𑍇𑌷𑍁 𑌸𑌰𑌸𑍍𑌸𑍁 𑌚 𑌸𑌰𑌿𑌤𑍍𑌸𑍁 𑌚 ।

𑌰𑌾𑌵𑌣𑌸𑍍𑌸𑌹 𑌵𑍈𑌦𑍇𑌹𑍍𑌯𑌾 𑌮𑌾𑌰𑍍𑌗𑌿𑌤𑌵𑍍𑌯𑌸𑍍𑌤𑌤 𑌸𑍍𑌤𑌤𑌃 ॥ 47 ॥

𑌯𑌤𑍍𑌰 𑌤𑌿𑌷𑍍𑌠𑌤𑌿 𑌧𑌰𑍍𑌮𑌜𑍍𑌞𑌸𑍍𑌤𑌪𑌸𑌾 𑌸𑍍𑌵𑍇𑌨 𑌭𑌾𑌵𑌿𑌤𑌃 ।

𑌮𑍇𑌰𑍁𑌸𑌾𑌵𑌰𑍍𑌣𑌿𑌰𑌿𑌤𑍍𑌯𑍇𑌵 𑌖𑍍𑌯𑌾𑌤𑍋 𑌵𑍈 𑌬𑍍𑌰𑌹𑍍𑌮𑌣𑌾 𑌸𑌮𑌃 ॥ 48 ॥

𑌪𑍍𑌰𑌷𑍍𑌟𑌵𑍍𑌯𑍋 𑌮𑍇𑌰𑍁𑌸𑌾𑌵𑌰𑍍𑌣𑌿𑌰𑍍𑌮𑌹𑌰𑍍𑌷𑌿𑌃 𑌸𑍂𑌰𑍍𑌯𑌸𑌨𑍍𑌨𑌿𑌭𑌃 ।

𑌪𑍍𑌰𑌣𑌮𑍍𑌯 𑌶𑌿𑌰𑌸𑌾 𑌭𑍂𑌮𑍗 𑌪𑍍𑌰𑌵𑍃𑌤𑍍𑌤𑌿𑌂 𑌮𑍈𑌥𑌿𑌲𑍀𑌂 𑌪𑍍𑌰𑌤𑌿 ॥ 49 ॥

𑌏𑌤𑌾𑌵 𑌜𑍍𑌜𑍀𑌵𑌲𑍋𑌕𑌸𑍍𑌯 𑌭𑌾𑌸𑍍𑌕𑌰𑍋 𑌰𑌜𑌨𑍀𑌕𑍍𑌷𑍍𑌯𑍇 ।

𑌕𑍃𑌤𑍍𑌵𑌾 𑌵𑌿𑌤𑌿𑌮𑌿𑌰𑌂 𑌸𑌰𑍍𑌵𑌮𑌸𑍍𑌤𑌂 𑌗𑌚𑍍𑌛𑌤𑌿 𑌪𑌰𑍍𑌵𑌤𑌮𑍍 ॥ 50 ॥

𑌏𑌤𑌾𑌵𑌦𑍍𑌵𑌾𑌨𑌰𑍈𑌶𑍍𑌶𑌕𑍍𑌯𑌂 𑌗𑌨𑍍𑌤𑍁𑌂 𑌵𑌾𑌨𑌰𑌪𑍁𑌙𑍍𑌗𑌵𑌾𑌃 ।

𑌅𑌭𑌾𑌸𑍍𑌕𑌰𑌮𑌮𑌰𑍍𑌯𑌾𑌦𑌂 𑌨 𑌜𑌾𑌨𑍀𑌮𑌸𑍍𑌤𑌤𑌃 𑌪𑌰𑌮𑍍 ॥ 51 ॥

𑌅𑌧𑌿𑌗𑌮𑍍𑌯 𑌤𑍁 𑌵𑍈𑌦𑍇𑌹𑍀𑌂 𑌨𑌿𑌲𑌯𑌂 𑌰𑌾𑌵𑌣𑌸𑍍𑌯 𑌚 ।

𑌅𑌸𑍍𑌤 𑌪𑌰𑍍𑌵𑌤𑌮𑌾𑌸𑌾𑌦𑍍𑌯 𑌪𑍂𑌰𑍍𑌣𑍇 𑌮𑌾𑌸𑍇 𑌨𑌿𑌵𑌰𑍍𑌤𑌤 ॥ 52 ॥

𑌊𑌰𑍍𑌧𑍍𑌵𑌂 𑌮𑌾𑌸𑌾𑌨𑍍𑌨 𑌵𑌸𑍍𑌤𑌵𑍍𑌯𑌂 𑌵𑌸𑌨𑍍 𑌵𑌧𑍍𑌯𑍋 𑌭𑌵𑍇𑌨𑍍𑌮𑌮 ।

𑌸𑌹𑍈𑌵 𑌶𑍂𑌰𑍋 𑌯𑍁𑌷𑍍𑌮𑌾𑌭𑌿𑌶𑍍𑌶𑍍𑌵𑌶𑍁𑌰𑍋 𑌮𑍇 𑌗𑌮𑌿𑌷𑍍𑌯𑌤𑌿 ॥ 53 ॥

𑌶𑍍𑌰𑍋𑌤𑌵𑍍𑌯𑌂 𑌸𑌰𑍍𑌵𑌮𑍇𑌤𑌸𑍍𑌯 𑌭𑌵𑌦𑍍𑌭𑌿𑌰𑍍𑌦𑌿𑌷𑍍𑌟𑌕𑌾𑌰𑌿𑌭𑌿𑌃 ।

𑌗𑍁𑌰𑍁𑌰𑍇𑌷 𑌮𑌹𑌾𑌬𑌾𑌹𑍁𑌶𑍍𑌶𑍍𑌵𑌶𑍁𑌰𑍋 𑌮𑍇 𑌮𑌹𑌾𑌬𑌲𑌃 ॥ 54 ॥

𑌭𑌵𑌨𑍍𑌤𑌶𑍍𑌚𑌾𑌪𑌿 𑌵𑌿𑌕𑍍𑌰𑌾𑌨𑍍𑌤𑌾𑌃 𑌪𑍍𑌰𑌮𑌾𑌣𑌂 𑌸𑌰𑍍𑌵 𑌕𑌰𑍍𑌮𑌸𑍁 ।

𑌪𑍍𑌰𑌮𑌾𑌣𑌮𑍇𑌨𑌂 𑌸𑌂𑌸𑍍𑌥𑌾𑌪𑍍𑌯 𑌪𑌶𑍍𑌯𑌧𑍍𑌵𑌂 𑌪𑌶𑍍𑌚𑌿𑌮𑌾𑌂 𑌦𑌿𑌶𑌮𑍍 ॥ 55 ॥

𑌦𑍃𑌷𑍍𑌟𑌾𑌯𑌾𑌂 𑌤𑍁 𑌨𑌰𑍇𑌨𑍍𑌦𑍍𑌰𑌸𑍍𑌯 𑌪𑌤𑍍𑌨𑍍𑌯𑌾𑌮𑌮𑌿𑌤𑌤𑍇𑌜𑌸𑌃 ।

𑌕𑍃𑌤𑌕𑍃𑌤𑍍𑌯𑌾 𑌭𑌵𑌿𑌷𑍍𑌯𑌾𑌮𑌃 𑌕𑍃𑌤𑌸𑍍𑌯 𑌪𑍍𑌰𑌤𑌿𑌕𑌰𑍍𑌮𑌣𑌾 ॥ 56 ॥

𑌅𑌤𑍋𑌽𑌨𑍍𑌯𑌦𑌪𑌿 𑌯𑌤𑍍𑌕𑌾𑌰𑍍𑌯𑌂 𑌕𑌾𑌰𑍍𑌯𑌸𑍍𑌯𑌾𑌸𑍍𑌯 𑌹𑌿𑌤𑌂 𑌭𑌵𑍇𑌤𑍍 ।

𑌸𑌮𑍍𑌪𑍍𑌰𑌧𑌾𑌰𑍍𑌯 𑌭𑌵𑌦𑍍𑌭𑌿𑌶𑍍𑌚 𑌦𑍇𑌶𑌕𑌾𑌲𑌾𑌰𑍍𑌥𑌸𑌂𑌹𑌿𑌤𑌮𑍍 ॥ 57 ॥

𑌤𑌤𑌃 𑌸𑍁𑌷𑍇𑌣𑌪𑍍𑌰𑌮𑍁𑌖𑌾𑌃 𑌪𑍍𑌲𑌵𑌙𑍍𑌗𑌾𑌮𑌾𑌃 𑌸𑍍𑌸𑍁𑌗𑍍𑌰𑍀𑌵 𑌵𑌾𑌕𑍍𑌯𑌂 𑌨𑌿𑌪𑍁𑌣𑌂 𑌨𑌿𑌶𑌮𑍍𑌯 ।

𑌆𑌮𑌨𑍍𑌤𑍍𑌯𑍍𑌰 𑌸𑌰𑍍𑌵𑍇 𑌪𑍍𑌲𑌵𑌗𑌾𑌧𑌿𑌪𑌂 𑌤𑍇 𑌜𑌗𑍍𑌮𑍁𑌰𑍍𑌦𑌿𑌶𑌂 𑌤𑌾𑌂 𑌵𑌰𑍁𑌣𑌾𑌭𑌿𑌗𑍁𑌪𑍍𑌤𑌾𑌮𑍍 ॥ 58 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡𑍇 𑌦𑍍𑌵𑌿𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥

Roman (IAST) Transliteration

śrīmadvālmīkīya rāmāyaṇe kiṣkindhākāṇḍam |

atha dvicatvāriṃśassargaḥ |

atha prasthāpya sugrīvastānharīndakṣiṇāṃ diśam |

abravīnmeghasaṅkāśaṃ suṣeṇaṃ nāma yūthapam || 1 ||

tārāyāḥ pitaraṃ rājā śvaśuraṃ bhīmavikramam |

abravītprāñjalirvākyamabhigamya praṇamya ca || 2 ||

marīciputraṃ mārīcamarciṣmantaṃ mahākapim |

vṛtaṃ kapivarai śśūrairmahendrasadṛśadyutim || 3 ||

buddhivikramasampannaṃ vainateyasamadyutim |

marīciputrānmārīcānarcirmālānmahābalān || 4 ||

ṛṣiputrāṃścatāntsarvānpratīcīmādiśaddiśam |

dvābhyāṃ śatasahasrābhyāṃ kapīnāṃ kapisattamāḥ || 5 ||

suṣeṇapramukhā yūyaṃ vaidehīṃ parimārgataḥ |

surāṣṭrānsahabāhlīkān ścandracitrāṃstathaiva ca || 6 ||

sphītāñjanapadānramyānvipulāni purāṇi ca |

punnāgagahanaṃ kukṣiṃ vakuloddālakākulam || 7 ||

tathā ketakaṣaṇḍāṃśca mārgadhvaṃ hariyūthapāḥ |

pratyaksrotogamāścaiva nadyaśśītajalāśśivāḥ || 8 ||

tāpasānāmaraṇyāni kāntārā girayaśca ye |

tatrasthalīṃ maruprāyāmatyuccaśirasaśśilāḥ || 9 ||

girijālāvṛtāṃ durgāṃ mārgitvā paścimāṃ diśam |

tataḥ paścimamāsādya samudraṃ draṣṭumarhatha || 10 ||

timinakrāyutajalamakṣobhyamatha vānarāḥ |

tataḥ ketakaṣaṇḍeṣu tamālagahaneṣu ca || 11 ||

kapayo vihariṣyanti nārikelavaneṣu ca |

tatra sītāṃ ca mārgadhvaṃ nilayaṃ rāvaṇasya ca || 12 ||

velātalaniviṣṭeṣu parvateṣu vaneṣu ca |

muracīpattanaṃ caiva ramyaṃ caiva jaṭīpuram || 13 ||

avantīmaṅgalopāṃ ca tathā cālakṣitaṃ vanam |

rāṣṭrāṇi ca viśālāni pattanāni tatastataḥ || 14 ||

sindhusāgarayoścaiva saṅgame tatra parvataḥ |

mahānhemagirirnāma śataśṛṅgo mahādrumaḥ || 15 ||

tasya prastheṣu ramyeṣu siṃhāḥ pakṣagamāḥ sthitāḥ |

timimatsyagajāṃścaiva nīḍānyāropayanti te || 16 ||

tāni nīḍāni siṃhānāṃ giriśṛṅgagatāśca ye |

dṛptāstṛptāśca mātaṅgāstoyadasvananisvanāḥ || 17 ||

vicaranti viśāle'smiṃstoyapūrṇe samantataḥ |

tasya śṛṅgaṃ divasparśaṃ kāñcanaṃ citrapādapam || 18 ||

sarvamāśu vicetavyaṃ kapibhiḥ kāmarūpibhiḥ |

koṭiṃ tatra samudre tu kāñcanīṃ śatayojanām || 19 ||

durdarśāṃ pāriyātrasya gatāṃ drakṣyatha vānarāḥ |

koṭyastatra caturviṃśadgandharvāṇāṃ tapasvinām || 20 ||

vasantyagninikāśānāṃ ghorāṇāṃ kāmarūpiṇām |

pāvakārciḥ pratīkāśāssamavetāssahasraśaḥ || 21 ||

nātyāsādayitavyāste vānarairbhīmavikramaiḥ |

nādeyaṃ ca phalaṃ tasmāddeśātkiñcit plavaṅgamaiḥ || 22 ||

durāsadā hi te vīrā ssattvavanto mahābalāḥ |

phalamūlāni te tatra rakṣante bhīmavikramāḥ || 23 ||

tatra yatnaśca kartavyo mārgitavyā ca jānakī |

na hi tebhyo bhayaṃ kiñcitkapitvamanuvartatām || 24 ||

tatra vaiḍhūryavarṇābho vajrasaṃsthānasaṃsthitaḥ |

nānādrumalatākīrṇo vajro nāma mahāgiriḥ || 25 ||

śrīmānsamuditastatra yojanānāṃ śataṃ samam |

guhāstatra vicetavyā prayatnena plavaṅgamāḥ || 26 ||

caturbhāge samudrasya cakravānnāma parvataḥ |

tatra cakraṃ sahasrāraṃ nirmitaṃ viśvakarmaṇā || 27 ||

tatra pañcajanaṃ hatvā hayagrīvaṃ ca dānavam |

ājahāra tataścakraṃ śaṅkhaṃ ca puruṣottamaḥ || 28 ||

tasya sānuṣu citreṣu viśālāsu guhāsu ca |

rāvaṇa ssaha vaidehyā mārgitavyastata stataḥ || 29 ||

yojanānāṃ catuṣṣaṣṭirvarāho nāma parvataḥ |

suvarṇaśṛṅgassuśrīmā nagādhe varuṇālaye || 30 ||

tatra prāgjyotiṣaṃ nāma jātarūpamayaṃ puram |

yasminvasati duṣṭātmā narako nāma dānavaḥ || 31 ||

tatra sānuṣu citreṣu viśālāsu guhāsu ca |

rāvaṇassaha vaidehyā mārgitavyastatastataḥ || 32 ||

tamatikramya śailendraṃ kāñcanāntaranirdaraḥ |

parvata ssarvasauvarṇo dhārāprasravaṇāyutaḥ || 33 ||

taṃ gajāśca varāhāśca siṃha vyāghrāśca sarvataḥ |

abhigarjanti satataṃ tena śabdena darpitāḥ || 34 ||

yasminharihayśīmānmahendraḥ pākaśāsanaḥ |

abhiṣiktaḥ surai rājā meghavānnāma parvataḥ || 35 ||

tamatikramya śailendraṃ mahendraparipālitam |

ṣaṣṭi rgirisahasrāṇi kāñcanāni gamiṣyatha || 36 ||

taruṇādityavarṇāni bhrājamānāni sarvataḥ |

jātarūpamayairvṛkṣai śobhitāni supuṣpitaiḥ || 37 ||

teṣāṃ madhye sthito rājā meruruttaraparvataḥ |

ādityena prasannena śailo dattavaraḥ purā || 38 ||

tenaiva muktaśśailendrassarva eva tvadāśrayāḥ |

matprasādādbhaviṣyanti divā rātraṃ ca kāñcanāḥ || 39 ||

tvayi ye cāpi vatsyanti devagandharvadānavāḥ |

te bhaviṣyanti raktāśca prabhayā kāñcanaprabhāḥ || 40 ||

viśve devāśca marūto vasavaśca divaukasaḥ |

āgamya paścimāṃ sandhyāṃ merumuttamaparvatam || 41 ||

ādityamupatiṣṭhanti taiśca sūryo'bhipūjitaḥ |

adṛśyassarvabhūtānāmastaṃ gacchatiparvatam || 42 ||

yojanānāṃ sahasrāṇi daśa tāni divākaraḥ |

muhūrtārdhena taṃ śīghramabhiyāti śiloccayam || 43 ||

śṛṅge tasya mahaddivyaṃ bhavanaṃ sūryasannibham |

prāsādagaṇasambādhaṃ vihitaṃ viśvakarmaṇā || 44 ||

śobhitaṃ tarubhiścitrairnānāpakṣisamākulaiḥ |

niketaṃ pāśahastasya varuṇasya mahātmanaḥ || 45 ||

antarā merumastaṃ ca tālo daśaśirā mahān |

jātarūpamayśīmānbhrājate citravedikaḥ || 46 ||

teṣu sarveṣu durgeṣu sarassu ca saritsu ca |

rāvaṇassaha vaidehyā mārgitavyastata stataḥ || 47 ||

yatra tiṣṭhati dharmajñastapasā svena bhāvitaḥ |

merusāvarṇirityeva khyāto vai brahmaṇā samaḥ || 48 ||

praṣṭavyo merusāvarṇirmaharṣiḥ sūryasannibhaḥ |

praṇamya śirasā bhūmau pravṛttiṃ maithilīṃ prati || 49 ||

etāva jjīvalokasya bhāskaro rajanīkṣye |

kṛtvā vitimiraṃ sarvamastaṃ gacchati parvatam || 50 ||

etāvadvānaraiśśakyaṃ gantuṃ vānarapuṅgavāḥ |

abhāskaramamaryādaṃ na jānīmastataḥ param || 51 ||

adhigamya tu vaidehīṃ nilayaṃ rāvaṇasya ca |

asta parvatamāsādya pūrṇe māse nivartata || 52 ||

ūrdhvaṃ māsānna vastavyaṃ vasan vadhyo bhavenmama |

sahaiva śūro yuṣmābhiśśvaśuro me gamiṣyati || 53 ||

śrotavyaṃ sarvametasya bhavadbhirdiṣṭakāribhiḥ |

gurureṣa mahābāhuśśvaśuro me mahābalaḥ || 54 ||

bhavantaścāpi vikrāntāḥ pramāṇaṃ sarva karmasu |

pramāṇamenaṃ saṃsthāpya paśyadhvaṃ paścimāṃ diśam || 55 ||

dṛṣṭāyāṃ tu narendrasya patnyāmamitatejasaḥ |

kṛtakṛtyā bhaviṣyāmaḥ kṛtasya pratikarmaṇā || 56 ||

ato'nyadapi yatkāryaṃ kāryasyāsya hitaṃ bhavet |

sampradhārya bhavadbhiśca deśakālārthasaṃhitam || 57 ||

tataḥ suṣeṇapramukhāḥ plavaṅgāmāḥ ssugrīva vākyaṃ nipuṇaṃ niśamya |

āmantyra sarve plavagādhipaṃ te jagmurdiśaṃ tāṃ varuṇābhiguptām || 58 ||

ityārṣe śrīmadrāmāyaṇe vālmīkīya ādikāvye kiṣkindhākāṇḍe dvicatvāriṃśassargaḥ ||