4.30 Kishkindhakanda - Trimsha Sargah

ॐ

4.30 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡 - 𑌤𑍍𑌰𑌿𑌂𑌶 𑌸𑌰𑍍𑌗𑌃

Valmiki Grantha

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡𑌮𑍍 ।

𑌅𑌥 𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।

𑌗𑍁𑌹𑌂 𑌪𑍍𑌰𑌵𑌿𑌷𑍍𑌟𑍇 𑌸𑍁𑌗𑍍𑌰𑍀𑌵𑍇 𑌵𑌿𑌮𑍁𑌕𑍍𑌤𑍇 𑌗𑌗𑌨𑍇 𑌘𑌨𑍈𑌃 ।

𑌵𑌰𑍍𑌷𑌰𑌾𑌤𑍍𑌰𑍋𑌷𑌿𑌤𑍋 𑌰𑌾𑌮𑌃 𑌕𑌾𑌮𑌶𑍋𑌕𑌾𑌭𑌿𑌪𑍀𑌡𑌿𑌤𑌃 ॥ 1 ॥

𑌪𑌾𑌣𑍍𑌡𑍁𑌰𑌂 𑌗𑌗𑌨𑌂 𑌦𑍃𑌷𑍍𑌟𑍍𑌵𑌾 𑌵𑌿𑌮𑌲𑌂 𑌚𑌨𑍍𑌦𑍍𑌰𑌮𑌣𑍍𑌡𑌲𑌮𑍍 ।

𑌶𑌾𑌰𑌦𑍀𑌂 𑌰𑌜𑌨𑍀𑌂 𑌚𑍈𑌵 𑌦𑍃𑌷𑍍𑌟𑍍𑌵𑌾 𑌜𑍍𑌯𑍋𑌤𑍍𑌸𑍍𑌨𑌾𑌨𑍁𑌲𑍇𑌪𑌨𑌾𑌮𑍍 ॥ 2 ॥

𑌕𑌾𑌮𑌵𑍃𑌤𑍍𑌤𑌂 𑌚 𑌸𑍁𑌗𑍍𑌰𑍀𑌵𑌂 𑌨𑌷𑍍𑌟𑌾𑌂 𑌚 𑌜𑌨𑌕𑌾𑌤𑍍𑌮𑌜𑌾𑌮𑍍 ।

𑌬𑍁𑌦𑍍𑌧𑍍𑌵𑌾 𑌕𑌾𑌲𑌮𑌤𑍀𑌤𑌂 𑌚 𑌮𑍁𑌮𑍋𑌹 𑌪𑌰𑌮𑌾𑌤𑍁𑌰𑌃 ॥ 3 ॥

𑌸 𑌤𑍁 𑌸𑌞𑍍𑌜𑍍𑌞𑌾𑌮𑍁𑌪𑌾𑌗𑌮𑍍𑌯 𑌮𑍁𑌹𑍂𑌰𑍍𑌤𑌾𑌨𑍍𑌮𑌤𑌿𑌮𑌾𑌨𑍍𑌪𑍁𑌨𑌃 ।

𑌮𑌨𑌸𑍍𑌸𑍍𑌥𑌾𑌮𑌪𑌿 𑌵𑍈𑌦𑍇𑌹𑍀𑌂 𑌚𑌿𑌨𑍍𑌤𑌯𑌾𑌮𑌾𑌸 𑌰𑌾𑌘𑌵𑌃 ॥ 4 ॥

𑌆𑌸𑍀𑌨𑌃 𑌪𑌰𑍍𑌵𑌤𑌸𑍍𑌯𑌾𑌗𑍍𑌰𑍇 𑌹𑍇𑌮𑌧𑌾𑌤𑍁𑌵𑌿𑌭𑍂𑌷𑌿𑌤𑍇 ।

𑌶𑌾𑌰𑌦𑌂 𑌗𑌗𑌨𑌂 𑌦𑍃𑌷𑍍𑌟𑍍𑌵𑌾 𑌜𑌗𑌾𑌮 𑌮𑌨𑌸𑌾 𑌪𑍍𑌰𑌿𑌯𑌾𑌮𑍍 ॥ 5 ॥

𑌦𑍃𑌷𑍍𑌟𑍍𑌵𑌾 𑌚 𑌵𑌿𑌮𑌲𑌂 𑌵𑍍𑌯𑍋𑌮 𑌗𑌤𑌵𑌿𑌦𑍍𑌯𑍁𑌦𑍍𑌵𑌲𑌾𑌹𑌕𑌮𑍍 ।

𑌸𑌾𑌰𑌸𑌾𑌰𑌾𑌵𑌸𑌙𑍍𑌘𑍁𑌷𑍍𑌠𑌂 𑌵𑌿𑌲𑌲𑌾𑌪𑌾𑌰𑍍𑌤𑌯𑌾 𑌗𑌿𑌰𑌾 ॥ 6 ॥

𑌸𑌾𑌰𑌸𑌾𑌰𑌾𑌵𑌸𑌨𑍍𑌨𑌾𑌦𑍈𑌸𑍍𑌸𑌾𑌰𑌸𑌾𑌰𑌵𑌨𑌾𑌦𑌿𑌨𑍀 ।

𑌯𑌾𑌽𑌽𑌶𑍍𑌰𑌮𑍇 𑌰𑌮𑌤𑍇 𑌬𑌾𑌲𑌾 𑌸𑌾𑌽𑌦𑍍𑌯 𑌮𑍇 𑌰𑌮𑌤𑍇 𑌕𑌥𑌮𑍍 ॥ 7 ॥

𑌪𑍁𑌷𑍍𑌪𑌿𑌤𑌾𑌂𑌶𑍍𑌚𑌾𑌸𑌨𑌾𑌨𑍍 𑌦𑍃𑌷𑍍𑌟𑍍𑌵𑌾 𑌕𑌾𑌞𑍍𑌚𑌨𑌾𑌨𑌿𑌵 𑌨𑌿𑌰𑍍𑌮𑌲𑌾𑌨𑍍 ।

𑌕𑌥𑌂 𑌸𑌾 𑌰𑌮𑌤𑍇 𑌬𑌾𑌲𑌾 𑌪𑌶𑍍𑌯𑌨𑍍𑌤𑍀 𑌮𑌾𑌮𑌪𑌶𑍍𑌯𑌤𑍀 ॥ 8 ॥

𑌯𑌾 𑌪𑍁𑌰𑌾 𑌕𑌲𑌹𑌂𑌸𑌾𑌨𑌾𑌂 𑌸𑍍𑌵𑌰𑍇𑌣 𑌕𑌲𑌭𑌾𑌷𑌿𑌣𑍀 ।

𑌬𑍁𑌧𑍍𑌯𑌤𑍇 𑌚𑌾𑌰𑍁𑌸𑌰𑍍𑌵𑌾𑌙𑍍𑌗𑍀 𑌸𑌾𑌽𑌦𑍍𑌯 𑌮𑍇 𑌬𑍁𑌦𑍍𑌧𑍍𑌯𑌤𑍇 𑌕𑌥𑌮𑍍 ॥ 9 ॥

𑌨𑌿𑌸𑍍𑌵𑌨𑌂 𑌚𑌕𑍍𑌰𑌵𑌾𑌕𑌾𑌨𑌾𑌂 𑌨𑌿𑌶𑌮𑍍𑌯 𑌨𑌹𑌚𑌾𑌰𑌿𑌣𑌾𑌮𑍍 ।

𑌪𑍁𑌣𑍍𑌡𑌰𑍀𑌕𑌵𑌿𑌶𑌾𑌲𑌾𑌕𑍍𑌷𑍀 𑌕𑌥𑌮𑍇𑌷𑌾 𑌭𑌵𑌿𑌷𑍍𑌯𑌤𑌿 ॥ 10 ॥

𑌸𑌰𑌾𑌂𑌸𑌿 𑌸𑌰𑌿𑌤𑍋 𑌵𑌾𑌪𑍀𑌃 𑌕𑌾𑌨𑌨𑌾𑌨𑌿 𑌵𑌨𑌾𑌨𑌿 𑌚 ।

𑌤𑌾𑌂 𑌵𑌿𑌨𑌾 𑌮𑍃𑌗𑌶𑌾𑌬𑌾𑌕𑍍𑌷𑍀𑌂 𑌚𑌰𑌨𑍍𑌨𑌾𑌦𑍍𑌯 𑌸𑍁𑌖𑌂 𑌲𑌭𑍇 ॥ 11 ॥

𑌅𑌪𑌿 𑌤𑌾𑌂 𑌮𑌦𑍍𑌵𑌿𑌯𑍋𑌗𑌾𑌚𑍍𑌛 𑌸𑍗𑌕𑍁𑌮𑌾𑌰𑍍𑌯𑌾𑌚𑍍𑌚 𑌭𑌾𑌮𑌿𑌨𑍀𑌮𑍍 ।

𑌸𑍁𑌦𑍂𑌰𑌂 𑌪𑍀𑌡𑌯𑍇𑌤𑍍𑌕𑌾𑌮𑌶𑍍𑌶𑌰𑌦𑍍𑌗𑍁𑌣𑌨𑌿𑌰𑌨𑍍𑌤𑌰𑌃 ॥ 12 ॥

𑌏𑌵𑌮𑌾𑌦𑌿 𑌨𑌰𑌶𑍍𑌰𑍇𑌷𑍍𑌠𑍋 𑌵𑌿𑌲𑌲𑌾𑌪 𑌨𑍃𑌪𑌾𑌤𑍍𑌮𑌜𑌃 ।

𑌵𑌿𑌹𑌙𑍍𑌗 𑌇𑌵 𑌸𑌾𑌰𑌙𑍍𑌗𑌸𑍍𑌸𑌲𑌿𑌲𑌂 𑌤𑍍𑌰𑌿𑌦𑌶𑍇𑌶𑍍𑌵𑌰𑌾𑌤𑍍 ॥ 13 ॥

𑌤𑌤𑌶𑍍𑌚𑌞𑍍𑌚𑍂𑌰𑍍𑌯 𑌰𑌮𑍍𑌯𑍇𑌷𑍁 𑌫𑌲𑌾𑌰𑍍𑌥𑍀 𑌗𑌿𑌰𑌿𑌸𑌾𑌨𑍁𑌷𑍁 ।

𑌦𑌦𑌰𑍍𑌶 𑌪𑌰𑍍𑌯𑍁𑌪𑌾𑌵𑍃𑌤𑍍𑌤𑍋 𑌲𑌕𑍍𑌷𑍍𑌮𑍀𑌵𑌾𑌨𑍍𑌲𑌕𑍍𑌷𑍍𑌮𑌣𑍋𑌽𑌗𑍍𑌰𑌜𑌮𑍍 ॥ 14 ॥

𑌤𑌂 𑌚𑌿𑌨𑍍𑌤𑌯𑌾 𑌦𑍁𑌸𑍍𑌸𑌹𑌯𑌾 𑌪𑌰𑍀𑌤𑌂 𑌵𑌿𑌸𑌞𑍍𑌜𑍍𑌞𑌮𑍇𑌕𑌂 𑌵𑌿𑌜𑌨𑍇 𑌮𑌨𑌸𑍍𑌵𑍀 ।

𑌭𑍍𑌰𑌾𑌤𑍁𑌰𑍍𑌵𑌿𑌷𑌾𑌦𑌾𑌤𑍍𑌪𑌰𑌿𑌤𑌾𑌪𑌦𑍀𑌨𑌃 𑌸𑌮𑍀𑌕𑍍𑌷𑍍𑌯 𑌸𑍗𑌮𑌿𑌤𑍍𑌰𑌿𑌰𑍁𑌵𑌾𑌚 𑌰𑌾𑌮𑌮𑍍 ॥ 15 ॥

𑌕𑌿𑌮𑌾𑌰𑍍𑌯 𑌕𑌾𑌮𑌸𑍍𑌯 𑌵𑌶𑌙𑍍𑌗𑌤𑍇𑌨 𑌕𑌿𑌮𑌾𑌤𑍍𑌮𑌪𑍗𑌰𑍁𑌷𑍍𑌯𑌪𑌰𑌾𑌭𑌵𑍇𑌨 ।

𑌅𑌯𑌂 𑌸𑌦𑌾 𑌸𑌂𑌹𑍍𑌰𑌿𑌯𑌤𑍇 𑌸𑌮𑌾𑌧𑌿𑌃 𑌕𑌿𑌮𑌤𑍍𑌰 𑌯𑍋𑌗𑍇𑌨 𑌨𑌿𑌵𑌰𑍍𑌤𑌿𑌤𑍇𑌨 ॥ 16 ॥

𑌕𑍍𑌰𑌿𑌯𑌾𑌭𑌿𑌯𑍋𑌗𑌂 𑌮𑌨𑌸𑌃 𑌪𑍍𑌰𑌸𑌾𑌦𑌂 𑌸𑌮𑌾𑌧𑌿𑌯𑍋𑌗𑌾𑌨𑍁𑌗𑌤𑌂 𑌚 𑌕𑌾𑌲𑌮𑍍 ।

𑌸𑌹𑌾𑌯𑌸𑌾𑌮𑌰𑍍𑌥𑍍𑌯𑌮𑌦𑍀𑌨𑌸𑌤𑍍𑌤𑍍𑌵𑌃 𑌸𑍍𑌵𑌕𑌰𑍍𑌮 𑌹𑍇𑌤𑍁𑌂 𑌚 𑌕𑍁𑌰𑍁𑌷𑍍𑌵 𑌹𑍇𑌤𑍁𑌮𑍍 ॥ 17 ॥

𑌨 𑌜𑌾𑌨𑌕𑍀 𑌮𑌾𑌨𑌵 𑌵𑌂𑌶𑌨𑌾𑌥 𑌤𑍍𑌵𑌯𑌾 𑌸𑌨𑌾𑌥𑌾 𑌸𑍁𑌲𑌭𑌾 𑌪𑌰𑍇𑌣 ।

𑌨 𑌚𑌾𑌗𑍍𑌨𑌿𑌚𑍂𑌡𑌾𑌂 𑌜𑍍𑌵𑌲𑌿𑌤𑌾𑌮𑍁𑌪𑍇𑌤𑍍𑌯 𑌨 𑌦𑌹𑍍𑌯𑌤𑍇 𑌵𑍀𑌰 𑌵𑌰𑌾𑌰𑍍𑌹 𑌕𑌚𑍍𑌛𑌿𑌤𑍍 ॥ 18 ॥

𑌸𑌲𑌕𑍍𑌷𑌣𑌂 𑌲𑌕𑍍𑌷𑍍𑌮𑌣𑌮𑌪𑍍𑌰𑌧𑍃𑌷𑍍𑌯𑌂 𑌸𑍍𑌵𑌭𑌾𑌵𑌜𑌂 𑌵𑌾𑌕𑍍𑌯𑌮𑍁𑌵𑌾𑌚 𑌰𑌾𑌮𑌃 ।

𑌹𑌿𑌤𑌂 𑌚 𑌪𑌥𑍍𑌯𑌂 𑌚 𑌨𑌯𑌪𑍍𑌰𑌸𑌕𑍍𑌤𑌂 𑌸𑌸𑌾𑌮 𑌧𑌰𑍍𑌮𑌾𑌰𑍍𑌥𑌸𑌮𑌾𑌹𑌿𑌤𑌂 𑌚 ॥ 19 ॥

𑌨𑌿𑌸𑍍𑌸𑌂𑌶𑌯𑌂 𑌕𑌾𑌰𑍍𑌯𑌮𑌵𑍇𑌕𑍍𑌷𑌿𑌤𑌵𑍍𑌯𑌂 𑌕𑍍𑌰𑌿𑌯𑌾𑌵𑌿𑌶𑍇𑌷𑍋𑌽𑌹𑍍𑌯𑌨𑍁𑌵𑌰𑍍𑌤𑌿𑌤𑌵𑍍𑌯𑌃 ।

𑌨𑌨𑍁 𑌪𑍍𑌰𑌵𑍃𑌤𑍍𑌤𑌸𑍍𑌯 𑌦𑍁𑌰𑌾𑌸𑌦𑌸𑍍𑌯 𑌕𑍁𑌮𑌾𑌰 𑌕𑌾𑌰𑍍𑌯𑌸𑍍𑌯 𑌫𑌲𑌂 𑌚 𑌚𑌿𑌨𑍍𑌤𑍍𑌯𑌮𑍍 ॥ 20 ॥

𑌅𑌥 𑌪𑌦𑍍𑌮𑌪𑌲𑌾𑌶𑌾𑌕𑍍𑌷𑍀𑌂 𑌮𑍈𑌥𑌿𑌲𑍀𑌮𑌨𑍁𑌚𑌿𑌨𑍍𑌤𑌯𑌨𑍍 ।

𑌉𑌵𑌾𑌚 𑌲𑌕𑍍𑌷𑍍𑌮𑌣𑌂 𑌰𑌾𑌮𑍋 𑌮𑍁𑌖𑍇𑌨 𑌪𑌰𑌿𑌶𑍁𑌷𑍍𑌯𑌤𑌾 ॥ 21 ॥

𑌤𑌰𑍍𑌪𑌯𑌿𑌤𑍍𑌵𑌾 𑌸𑌹𑌸𑍍𑌰𑌾𑌕𑍍𑌷𑌸𑍍𑌸𑌲𑌿𑌲𑍇𑌨 𑌵𑌸𑍁𑌨𑍍𑌧𑌰𑌾𑌮𑍍 ।

𑌨𑌿𑌰𑍍𑌵𑌰𑍍𑌤𑌯𑌿𑌤𑍍𑌵𑌾 𑌸𑌸𑍍𑌯𑌾𑌨𑌿 𑌕𑍃𑌤𑌕𑌰𑍍𑌮𑌾 𑌵𑍍𑌯𑌵𑌸𑍍𑌥𑌿𑌤𑌃 ॥ 22 ॥

𑌸𑍍𑌨𑌿𑌗𑍍𑌧𑌗𑌮𑍍𑌭𑍀𑌰𑌨𑌿𑌰𑍍𑌘𑍋𑌷𑌾𑌶𑍍𑌶𑍈𑌲𑌦𑍍𑌰𑍁𑌮𑌪𑍁𑌰𑍋𑌗𑌮𑌾𑌃 ।

𑌵𑌿𑌸𑍃𑌜𑍍𑌯 𑌸𑌲𑌿𑌲𑌂 𑌮𑍇𑌘𑌾𑌃 𑌪𑌰𑌿𑌶𑍍𑌰𑌾𑌨𑍍𑌤𑌾 𑌨𑍃𑌪𑌾𑌤𑍍𑌮𑌜 ॥ 23 ॥

𑌨𑍀𑌲𑍋𑌤𑍍𑌪𑌲𑌦𑌲𑌶𑍍𑌯𑌾𑌮𑌾𑌶𑍍𑌶𑍍𑌯𑌾𑌮𑍀𑌕𑍃𑌤𑍍𑌵𑌾 𑌦𑌿𑌶𑍋 𑌦𑌶 ।

𑌵𑌿𑌮𑌦𑌾 𑌇𑌵 𑌮𑌾𑌤𑌙𑍍𑌗𑌾𑌶𑍍𑌶𑌾𑌨𑍍𑌤𑌵𑍇𑌗𑌾𑌃 𑌪𑌯𑍋𑌧𑌰𑌾𑌃 ॥ 24 ॥

𑌜𑌲𑌗𑌰𑍍𑌭𑌾 𑌮𑌹𑌾𑌮𑍇𑌘𑌾 𑌕𑍁𑌟𑌜𑌾𑌰𑍍𑌜𑍁𑌨𑌗𑌨𑍍𑌧𑌿𑌨𑌃 ।

𑌚𑌰𑌿𑌤𑍍𑌵𑌾 𑌵𑌿𑌰𑌤𑌾𑌸𑍍𑌸𑍗𑌮𑍍𑌯 𑌵𑍃𑌷𑍍𑌟𑌿𑌵𑌾𑌤𑌾𑌸𑍍𑌸𑌮𑍁𑌦𑍍𑌯𑌤𑌾𑌃 ॥ 25 ॥

𑌘𑌨𑌾𑌨𑌾𑌂 𑌵𑌾𑌰𑌣𑌾𑌨𑌾𑌂 𑌚 𑌮𑌯𑍂𑌰𑌾𑌣𑌾𑌂 𑌚 𑌲𑌕𑍍𑌷𑍍𑌮𑌣 ।

𑌨𑌾𑌦𑌃 𑌪𑍍𑌰𑌸𑍍𑌰𑌵𑌣𑌾𑌨𑌾𑌂 𑌚 𑌪𑍍𑌰𑌶𑌾𑌨𑍍𑌤𑌸𑍍𑌸𑌹𑌸𑌾𑌽𑌨𑌘 ॥ 26 ॥

𑌅𑌭𑌿𑌵𑍃𑌷𑍍𑌟𑌾 𑌮𑌹𑌾𑌮𑍇𑌘𑍈𑌰𑍍𑌨𑌿𑌰𑍍𑌮𑌲𑌾𑌶𑍍𑌚𑌿𑌤𑍍𑌰𑌸𑌾𑌨𑌵𑌃 ।

𑌅𑌨𑍁𑌲𑌿𑌪𑍍𑌤𑌾 𑌇𑌵𑌾𑌽𑌭𑌾𑌨𑍍𑌤𑌿 𑌗𑌿𑌰𑌯𑌶𑍍𑌚𑌿𑌤𑍍𑌰𑌦𑍀𑌪𑍍𑌤𑌿𑌭𑌿𑌃 ॥ 27 ॥

𑌶𑌾𑌖𑌾𑌸𑍁 𑌸𑌪𑍍𑌤𑌚𑍍𑌛𑌦𑌪𑌾𑌦𑌪𑌾𑌨𑌾𑌂 𑌪𑍍𑌰𑌭𑌾𑌸𑍁 𑌤𑌾𑌰𑌾𑌰𑍍𑌕𑌨𑌿𑌶𑌾𑌕𑌰𑌾𑌣𑌾𑌮𑍍 ।

𑌲𑍀𑌲𑌾𑌸𑍁 𑌚𑍈𑌵𑍋𑌤𑍍𑌤𑌮 𑌵𑌾𑌰𑌣𑌾𑌨𑌾𑌂 𑌶𑍍𑌰𑌿𑌯𑌂 𑌵𑌿𑌭𑌜𑍍𑌯𑌾𑌦𑍍𑌯 𑌶𑌰𑌤𑍍𑌪𑍍𑌰𑌵𑍃𑌤𑍍𑌤𑌾 ॥ 28 ॥

𑌸𑌮𑍍𑌪𑍍𑌰𑌤𑍍𑌯𑌨𑍇𑌕𑌾𑌶𑍍𑌰𑌯 𑌚𑌿𑌤𑍍𑌰𑌶𑍋𑌭𑌾 𑌲𑌕𑍍𑌷𑍍𑌮𑍀𑌶𑍍𑌶𑌰𑌤𑍍𑌕𑌾𑌲𑌗𑍁𑌣𑍋𑌪𑌨𑍀𑌤𑌾 ।

𑌸𑍂𑌰𑍍𑌯𑌾𑌗𑍍𑌰𑌹𑌸𑍍𑌤𑌪𑍍𑌰𑌤𑌿𑌬𑍋𑌧𑌿𑌤𑍇𑌷𑍁 𑌪𑌦𑍍𑌮𑌾𑌕𑌰𑍇𑌷𑍍𑌵𑌭𑍍𑌯𑌧𑌿𑌕𑌂 𑌵𑌿𑌭𑌾𑌤𑌿 ॥ 29 ॥

𑌸𑌪𑍍𑌤𑌚𑍍𑌛𑌦𑌾𑌨𑌾𑌂 𑌕𑍁𑌸𑍁𑌮𑍋𑌪𑌗𑌨𑍍𑌧𑍀 𑌷𑌟𑍍𑌪𑌾𑌦𑌬𑍃𑌨𑍍𑌦𑍈𑌰𑌨𑍁𑌗𑍀𑌯𑌮𑌾𑌨𑌃 ।

𑌮𑌤𑍍𑌤𑌦𑍍𑌵𑌿𑌪𑌾𑌨𑌾𑌂 𑌪𑌵𑌨𑍋𑌽𑌨𑍁𑌸𑌾𑌰𑍀 𑌦𑌰𑍍𑌪𑌂 𑌵𑌿𑌨𑍇𑌷𑍍𑌯𑌨𑍍𑌨𑌧𑌿𑌕𑌂 𑌕𑌰𑍋𑌤𑌿 ॥ 30 ॥

𑌅𑌭𑍍𑌯𑌾𑌗𑌤𑍈𑌶𑍍𑌚𑌾𑌰𑍁𑌵𑌿𑌶𑌾𑌲𑌪𑌕𑍍𑌷𑍈 𑌸𑍍𑌸𑌰𑌃𑌪𑍍𑌰𑌿𑌯𑍈𑌃 𑌪𑌦𑍍𑌮𑌰𑌜𑍋𑌵𑌕𑍀𑌰𑍍𑌣𑍈𑌃 ।

𑌮𑌹𑌾𑌨𑌦𑍀𑌨𑌾𑌂 𑌪𑍁𑌲𑌿𑌨𑍋𑌪𑌯𑌾𑌤𑍈𑌃 𑌕𑍍𑌰𑍀𑌡𑌨𑍍𑌤𑌿 𑌹𑌂𑌸𑌾𑌸𑍍𑌸𑌹 𑌚𑌕𑍍𑌰𑌵𑌾𑌕𑍈𑌃 ॥ 31 ॥

𑌮𑌦𑌪𑍍𑌰𑌗𑌲𑍍𑌭𑍇𑌷𑍁 𑌚 𑌵𑌾𑌰𑌣𑍇𑌷𑍁 𑌗𑌵𑌾𑌂 𑌸𑌮𑍂𑌹𑍇𑌷𑍁 𑌚 𑌦𑌰𑍍𑌪𑌿𑌤𑍇𑌷𑍁 ।

𑌪𑍍𑌰𑌸𑌨𑍍𑌨𑌤𑍋𑌯𑌾𑌸𑍁 𑌚 𑌨𑌿𑌮𑍍𑌨𑌗𑌾𑌸𑍁 𑌵𑌿𑌭𑌾𑌤𑌿 𑌲𑌕𑍍𑌷𑍍𑌮𑍀𑌰𑍍𑌬𑌹𑍁𑌧𑌾 𑌵𑌿𑌭𑌕𑍍𑌤𑌾 ॥ 32 ॥

𑌨𑌭𑌸𑍍𑌸𑌮𑍀𑌕𑍍𑌷𑍍𑌯𑌾𑌮𑍍𑌬𑍁𑌧𑌰𑍈𑌰𑍍𑌵𑌿𑌮𑍁𑌕𑍍𑌤𑌂 𑌵𑌿𑌮𑍁𑌕𑍍𑌤𑌬𑌰𑍍𑌹𑌾𑌭𑌰𑌣𑌾 𑌵𑌨𑍇𑌷𑍁 ।

𑌪𑍍𑌰𑌿𑌯𑌾𑌸𑍍𑌵𑌸𑌕𑍍𑌤𑌾 𑌵𑌿𑌨𑌿𑌵𑍃𑌤𑍍𑌤𑌶𑍋𑌭𑌾 𑌗𑌤𑍋𑌤𑍍𑌸𑌵𑌾 𑌧𑍍𑌯𑌾𑌨𑌪𑌰𑌾 𑌮𑌯𑍂𑌰𑌾𑌃 ॥ 33 ॥

𑌮𑌨𑍋𑌜𑍍𑌞𑌗𑌨𑍍𑌧𑍈𑌃 𑌪𑍍𑌰𑌿𑌯𑌕𑍈𑌰𑌨𑌲𑍍𑌪𑍈𑌃 𑌪𑍁𑌷𑍍𑌪𑌾𑌤𑌿𑌭𑌾𑌰𑌾𑌵𑌨𑌤𑌾𑌗𑍍𑌰𑌶𑌾𑌖𑍈𑌃 ।

𑌸𑍁𑌵𑌰𑍍𑌣𑌗𑍗𑌰𑍈𑌰𑍍𑌨𑌯𑌨𑌾𑌭𑌿𑌰𑌾𑌮𑍈 𑌰𑍁𑌦𑍍𑌯𑍋𑌤𑌿𑌤𑌾𑌨𑍀𑌵 𑌵𑌨𑌾𑌨𑍍𑌤𑌰𑌾𑌣𑌿 ॥ 34 ॥

𑌪𑍍𑌰𑌿𑌯𑌾𑌨𑍍𑌵𑌿𑌤𑌾𑌨𑌾𑌂 𑌨𑌲𑌿𑌨𑍀𑌪𑍍𑌰𑌿𑌯𑌾𑌣𑌾𑌂 𑌵𑌨𑍇 𑌰𑌤𑌾𑌨𑌾𑌂 𑌕𑍁𑌸𑍁𑌮𑍋𑌦𑍍𑌧𑌤𑌾𑌨𑌾𑌮𑍍 ।

𑌮𑌦𑍋𑌤𑍍𑌕𑌟𑌾𑌨𑌾𑌂 𑌮𑌦𑌲𑌾𑌲𑌸𑌾𑌨𑌾𑌂 𑌗𑌜𑍋𑌤𑍍𑌤𑌮𑌾𑌨𑌾𑌂 𑌗𑌤𑌯𑍋𑌽𑌦𑍍𑌯 𑌮𑌨𑍍𑌦𑌾𑌃 ॥ 35 ॥

𑌵𑍍𑌯𑌭𑍍𑌰𑌂 𑌨𑌭𑌶𑍍𑌶𑌸𑍍𑌤𑍍𑌰𑌵𑌿𑌧𑍗𑌤𑌵𑌰𑍍𑌣𑌂 𑌕𑍃𑌶𑌪𑍍𑌰𑌵𑌾𑌹𑌾𑌨𑌿 𑌨𑌦𑍀𑌜𑌲𑌾𑌨𑌿 ।

𑌕𑌹𑍍𑌲𑌾𑌰𑌶𑍀𑌤𑌾𑌃 𑌪𑌵𑌨𑌾𑌃 𑌪𑍍𑌰𑌵𑌾𑌨𑍍𑌤𑌿 𑌤𑌮𑍋𑌵𑌿𑌮𑍁𑌕𑍍𑌤𑌾𑌶𑍍𑌚 𑌦𑌿𑌶𑌃 𑌪𑍍𑌰𑌕𑌾𑌶𑌾𑌃 ॥ 36 ॥

𑌸𑍂𑌰𑍍𑌯𑌾𑌤𑌪𑌕𑍍𑌰𑌾𑌮𑌣𑌨𑌷𑍍𑌟𑌪𑌙𑍍𑌕𑌾 𑌭𑍂𑌮𑌿𑌶𑍍𑌚𑌿𑌰𑍋𑌦𑌧𑌾𑌟𑌿𑌤𑌸𑌾𑌨𑍍𑌦𑍍𑌰𑌰𑍇𑌣𑍁𑌃 ।

𑌅𑌨𑍍𑌯𑍋𑌨𑍍𑌯𑌵𑍈𑌰𑍇𑌣𑌸𑌮𑌾𑌯𑍁𑌤𑌾𑌨𑌾 𑌮𑍁𑌦𑍍𑌯𑍋𑌗𑌕𑌾𑌲𑍋𑌽𑌦𑍍𑌯 𑌨𑌰𑌾𑌧𑌿𑌪𑌾𑌨𑌾𑌮𑍍 ॥ 37 ॥

𑌶𑌰𑌦𑍍𑌗𑍁𑌣𑌾𑌪𑍍𑌯𑌾𑌯𑌿𑌤𑌰𑍂𑌪𑌶𑍋𑌭𑌾𑌃 𑌪𑍍𑌰𑌹𑌰𑍍𑌷𑌿𑌤𑌾𑌃 𑌪𑌾𑌂𑌶𑍁𑌸𑌮𑍁𑌤𑍍𑌕𑍍𑌷𑌿𑌤𑌾𑌙𑍍𑌗𑌾𑌃 ।

𑌮𑌦𑍋𑌤𑍍𑌕𑌟𑌾𑌸𑍍𑌸𑌮𑍍𑌪𑍍𑌰𑌤𑌿 𑌯𑍁𑌦𑍍𑌧𑌲𑍁𑌬𑍍𑌧𑌾 𑌵𑍃𑌷𑌾 𑌗𑌵𑌾𑌂 𑌮𑌧𑍍𑌯𑌗𑌤𑌾 𑌨𑌦𑌨𑍍𑌤𑌿 ॥ 38 ॥

𑌸𑌮𑌨𑍍𑌮𑌥𑌂 𑌤𑍀𑌵𑍍𑌰𑌗𑌤𑌾𑌨𑍁𑌰𑌾𑌗𑌾𑌃 𑌕𑍁𑌲𑌾𑌨𑍍𑌵𑌿𑌤𑌾 𑌮𑌨𑍍𑌦𑌗𑌤𑌿𑌂 𑌕𑌰𑌿𑌣𑍍𑌯𑌃 ।

𑌮𑌦𑌾𑌨𑍍𑌵𑌿𑌤𑌂 𑌸𑌮𑍍𑌪𑌰𑌿𑌵𑌾𑌰𑍍𑌯 𑌯𑌾𑌨𑍍𑌤𑌂 𑌵𑌨𑍇𑌷𑍁 𑌭𑌰𑍍𑌤𑌾𑌰𑌮𑌨𑍁𑌪𑍍𑌰𑌯𑌾𑌨𑍍𑌤𑌿 ॥ 39 ॥

𑌤𑍍𑌯𑌕𑍍𑌤𑍍𑌵𑌾 𑌵𑌰𑌾𑌣𑍍𑌯𑌾𑌤𑍍𑌮𑌵𑌿𑌭𑍂𑌷𑌣𑌾𑌨𑌿 𑌬𑌰𑍍𑌹𑌾𑌣𑌿 𑌤𑍀𑌰𑍋𑌪𑌗𑌤𑌾 𑌨𑌦𑍀𑌨𑌾𑌮𑍍 ।

𑌨𑌿𑌰𑍍𑌭𑌰𑍍𑌤𑍍𑌸𑍍𑌯𑌮𑌾𑌨𑌾 𑌇𑌵 𑌸𑌾𑌰𑌸𑍗𑌘𑍈𑌃 𑌪𑍍𑌰𑌯𑌾𑌨𑍍𑌤𑌿 𑌦𑍀𑌨𑌾 𑌵𑌿𑌮𑌦𑌾 𑌮𑌯𑍂𑌰𑌾𑌃 ॥ 40 ॥

𑌵𑌿𑌤𑍍𑌰𑌾𑌸𑍍𑌯 𑌕𑌾𑌰𑌣𑍍𑌡𑌵𑌚𑌕𑍍𑌰𑌵𑌾𑌕𑌾 𑌨𑍍𑌮𑌹𑌾𑌰𑌵𑍈𑌰𑍍𑌭𑌿𑌨𑍍𑌨𑌕𑌟𑌾 𑌗𑌜𑍇𑌨𑍍𑌦𑍍𑌰𑌾𑌃 ।

𑌸𑌰𑌸𑍍𑌸𑍁 𑌬𑌦𑍍𑌧𑌾𑌮𑍍𑌬𑍁𑌜𑌭𑍂𑌷𑌣𑍇𑌷𑍁 𑌵𑌿𑌕𑍍𑌷𑍋𑌭𑍍𑌯 𑌵𑌿𑌕𑍍𑌷𑍋𑌭𑍍𑌯 𑌜𑌲𑌂 𑌪𑌿𑌬𑌨𑍍𑌤𑌿 ॥ 41 ॥

𑌵𑍍𑌯𑌪𑍇𑌤𑌪𑌙𑍍𑌕𑌾𑌸𑍁 𑌸𑌵𑌾𑌲𑍁𑌕𑌾𑌸𑍁 𑌪𑍍𑌰𑌸𑌨𑍍𑌨𑌤𑍋𑌯𑌾𑌸𑍁 𑌸𑌗𑍋𑌕𑍁𑌲𑌾𑌸𑍁 ।

𑌸𑌸𑌾𑌰𑌸𑌾𑌰𑌾𑌵𑌨𑌿𑌨𑌾𑌦𑌿𑌤𑌾𑌸𑍁 𑌨𑌦𑍀𑌷𑍁 𑌹𑍃𑌷𑍍𑌟𑌾 𑌨𑌿𑌪𑌤𑌨𑍍𑌤𑌿 𑌹𑌂𑌸𑌾𑌃 ॥ 42 ॥

𑌨𑌦𑍀𑌘𑌨𑌪𑍍𑌰𑌸𑍍𑌰𑌵𑌣𑍋𑌦𑌕𑌾𑌨𑌾 𑌮𑌤𑌿𑌪𑍍𑌰𑌵𑍃𑌦𑍍𑌧𑌾𑌨𑌿𑌲𑌬𑌰𑍍𑌹𑌿𑌣𑌾𑌨𑌾𑌮𑍍 ।

𑌪𑍍𑌲𑌵𑌙𑍍𑌗𑌮𑌾𑌨𑌾𑌂 𑌚 𑌗𑌤𑍋𑌤𑍍𑌸𑌵𑌾𑌨𑌾𑌂 𑌦𑍍𑌰𑍁𑌤𑌂 𑌰𑌵𑌾𑌸𑍍𑌸𑌮𑍍𑌪𑍍𑌰𑌤𑌿 𑌸𑌮𑍍𑌪𑍍𑌰𑌣𑌷𑍍𑌟𑌾𑌃 ॥ 43 ॥

𑌅𑌨𑍇𑌕𑌵𑌰𑍍𑌣𑌾𑌸𑍍𑌸𑍁𑌵𑌿𑌨𑌷𑍍𑌟𑌕𑌾𑌯𑌾 𑌨𑌵𑍋𑌦𑌿𑌤𑍇𑌷𑍍𑌵𑌮𑍍𑌬𑍁𑌧𑌰𑍇𑌷𑍁 𑌨𑌷𑍍𑌟𑌾𑌃 ।

𑌕𑍍𑌷𑍁𑌧𑌾𑌰𑍍𑌦𑌿𑌤𑌾 𑌘𑍋𑌰𑌵𑌿𑌷𑌾 𑌬𑌿𑌲𑍇𑌭𑍍𑌯 𑌶𑍍𑌚𑌿𑌰𑍋𑌷𑌿𑌤𑌾 𑌵𑌿𑌪𑍍𑌰𑌸𑌰𑌨𑍍𑌤𑌿 𑌸𑌰𑍍𑌪𑌾𑌃 ॥ 44 ॥

𑌚𑌞𑍍𑌚𑌚𑍍𑌚𑌨𑍍𑌦𑍍𑌰𑌕𑌰𑌸𑍍𑌪𑌰𑍍𑌶𑌹𑌰𑍍𑌷𑍋𑌨𑍍𑌮𑍀𑌲𑌿𑌤𑌤𑌾𑌰𑌕𑌾 ।

𑌅𑌹𑍋 𑌰𑌾𑌗𑌵𑌤𑍀 𑌸𑌨𑍍𑌧𑍍𑌯𑌾 𑌜𑌹𑌾𑌤𑌿 𑌸𑍍𑌵𑌯𑌮𑌮𑍍𑌬𑌰𑌮𑍍 ॥ 45 ॥

𑌰𑌾𑌤𑍍𑌰𑌿𑌶𑍍𑌶𑌶𑌾𑌙𑍍𑌕𑍋𑌦𑌿𑌤𑌸𑍗𑌮𑍍𑌯𑌵𑌕𑍍𑌤𑍍𑌰𑌾 𑌤𑌾𑌰𑌾𑌗𑌣𑍋𑌨𑍍𑌮𑍀𑌲𑌿𑌤𑌚𑌾𑌰𑍁𑌨𑍇𑌤𑍍𑌰𑌾 ।

𑌜𑍍𑌯𑍋𑌤𑍍𑌸𑍍𑌨𑌾𑌂𑌶𑍁𑌕𑌪𑍍𑌰𑌾𑌵𑌰𑌣𑌾 𑌵𑌿𑌭𑌾𑌤𑌿 𑌨𑌾𑌰𑍀𑌵 𑌶𑍁𑌕𑍍𑌲𑌾𑌂𑌶𑍁𑌕𑌸𑌂𑌵𑍃𑌤𑌾𑌙𑍍𑌗𑍀 ॥ 46 ॥

𑌵𑌿𑌪𑌕𑍍𑌵𑌶𑌾𑌲𑌿𑌪𑍍𑌰𑌸𑌵𑌾𑌨𑌿 𑌭𑍁𑌕𑍍𑌤𑍍𑌵𑌾 𑌪𑍍𑌰𑌹𑌰𑍍𑌷𑌿𑌤𑌾 𑌸𑌾𑌰𑌸𑌚𑌾𑌰𑍁𑌪𑌙𑍍𑌕𑍍𑌤𑌿𑌃 ।

𑌨𑌭𑌸𑍍𑌸𑌮𑌾𑌕𑍍𑌰𑌾𑌮𑌤𑌿 𑌶𑍀𑌘𑍍𑌰𑌵𑍇𑌗𑌾𑌃 𑌵𑌾𑌤𑌾𑌵𑌧𑍂𑌤𑌾 𑌗𑍍𑌰𑌥𑌿𑌤𑍇𑌵 𑌮𑌾𑌲𑌾 ॥ 47 ॥

𑌸𑍁𑌪𑍍𑌤𑍈𑌕𑌹𑌂𑌸𑌂 𑌕𑍁𑌮𑍁𑌦𑍈𑌰𑍁𑌪𑍇𑌤𑌂 𑌮𑌹𑌾𑌹𑍍𑌰𑌦𑌸𑍍𑌥𑌂 𑌸𑌲𑌿𑌲𑌂 𑌵𑌿𑌭𑌾𑌤𑌿 ।

𑌘𑌨𑍈𑌰𑍍𑌵𑌿𑌮𑍁𑌕𑍍𑌤𑌂 𑌨𑌿𑌶𑌿 𑌪𑍂𑌰𑍍𑌣𑌚𑌨𑍍𑌦𑍍𑌰𑌂 𑌤𑌾𑌰𑌾𑌗𑌣𑌾𑌕𑍀𑌰𑍍𑌣𑌮𑌿𑌵𑌾𑌨𑍍𑌤𑌰𑌿𑌕𑍍𑌷𑌮𑍍 ॥ 48 ॥

𑌪𑍍𑌰𑌕𑍀𑌰𑍍𑌣𑌹𑌂𑌸𑌾𑌕𑍁𑌲𑌮𑍇𑌖𑌲𑌾𑌨𑌾𑌂 𑌪𑍍𑌰𑌬𑍁𑌦𑍍𑌧𑌪𑌦𑍍𑌮𑍋𑌤𑍍𑌪𑌲𑌮𑌾𑌲𑌿𑌨𑍀𑌨𑌾𑌮𑍍 ।

𑌵𑌾𑌪𑍍𑌯𑍁𑌤𑍍𑌤𑌮𑌾𑌨𑌾𑌮𑌧𑌿𑌕𑌾𑌽𑌦𑍍𑌯 𑌲𑌕𑍍𑌷𑍍𑌮𑍀 𑌰𑍍𑌵𑌰𑌾𑌙𑍍𑌗𑌨𑌾𑌨𑌾𑌮𑌿𑌵 𑌭𑍂𑌷𑌿𑌤𑌾𑌨𑌾𑌮𑍍 ॥ 49 ॥

𑌵𑍇𑌣𑍁𑌸𑍍𑌵𑌨𑌵𑍍𑌯𑌞𑍍𑌜𑌿𑌤𑌤𑍂𑌰𑍍𑌯𑌮𑌿𑌶𑍍𑌰𑌃 𑌪𑍍𑌰𑌤𑍍𑌯𑍂𑌷𑌕𑌾𑌲𑌾𑌨𑌿𑌲𑌸𑌮𑍍𑌪𑍍𑌰𑌵𑍃𑌦𑍍𑌧𑌃 ।

𑌸𑌮𑍍𑌮𑍂𑌰𑍍𑌛𑌿𑌤𑍋 𑌗𑌰𑍍𑌗𑌰𑌗𑍋𑌵𑍃𑌷𑌾𑌣𑌾 𑌮𑌨𑍍𑌯𑍋𑌨𑍍𑌯𑌮𑌾𑌪𑍂𑌰𑌯𑌤𑍀𑌵 𑌶𑌬𑍍𑌦𑌃 ॥ 50 ॥

𑌨𑌵𑍈𑌰𑍍𑌨𑌦𑍀𑌨𑌾𑌂 𑌕𑍁𑌸𑍁𑌮𑌪𑍍𑌰𑌭𑌾𑌸𑍈 𑌰𑍍𑌵𑍍𑌯𑌾𑌧𑍂𑌯𑌮𑌾𑌨𑍈𑌰𑍍𑌮𑍃𑌦𑍁𑌮𑌾𑌰𑍁𑌤𑍇𑌨 ।

𑌧𑍗𑌤𑌾𑌮𑌲𑌕𑍍𑌷𑍗𑌮𑌪𑌟𑌪𑍍𑌰𑌕𑌾𑌶𑍈𑌃 𑌕𑍂𑌲𑌾𑌨𑌿 𑌕𑌾𑌶𑍈𑌰𑍁𑌪𑌶𑍋𑌭𑌿𑌤𑌾𑌨𑌿 ॥ 51 ॥

𑌵𑌨𑌪𑍍𑌰𑌚𑌣𑍍𑌡𑌾 𑌮𑌧𑍁𑌪𑌾𑌨𑌶𑍗𑌣𑍍𑌡𑌾𑌃 𑌪𑍍𑌰𑌿𑌯𑌾𑌨𑍍𑌵𑌿𑌤𑌾𑌷𑍍𑌷𑌟𑍍𑌚𑌰𑌣𑌾𑌃 𑌪𑍍𑌰𑌹𑍍𑌰𑍃𑌷𑍍𑌟𑌾𑌃 ।

𑌵𑌨𑍇𑌷𑍁 𑌮𑌤𑍍𑌤𑌾𑌃 𑌪𑌵𑌨𑌾𑌨𑍁𑌯𑌾𑌤𑍍𑌰𑌾𑌂 𑌕𑍁𑌰𑍍𑌵𑌨𑍍𑌤𑌿 𑌪𑌦𑍍𑌮𑌾𑌸𑌨𑌰𑍇𑌣𑍁𑌗𑍗𑌰𑌾𑌃 ॥ 52 ॥

𑌜𑌲𑌂 𑌪𑍍𑌰𑌸𑌨𑍍𑌨𑌂 𑌕𑍁𑌮𑍁𑌦𑌂 𑌪𑍍𑌰𑌭𑌾𑌸𑌂 𑌕𑍍𑌰𑍗𑌞𑍍𑌚𑌸𑍍𑌵𑌨𑌶𑍍𑌶𑌾𑌲𑌿𑌵𑌨𑌂 𑌵𑌿𑌪𑌕𑍍𑌵𑌮𑍍 ।

𑌮𑍃𑌦𑍁𑌶𑍍𑌚 𑌵𑌾𑌯𑍁𑌰𑍍𑌵𑌿𑌮𑌲𑌶𑍍𑌚 𑌚𑌨𑍍𑌦𑍍𑌰 𑌶𑍍𑌶𑌂𑌸𑌨𑍍𑌤𑌿 𑌵𑌰𑍍𑌷𑌵𑍍𑌯𑌪𑌨𑍀𑌤𑌕𑌾𑌲𑌮𑍍 ॥ 53 ॥

𑌮𑍀𑌨𑍋𑌪𑌸𑌨𑍍𑌦𑌰𑍍𑌶𑌿𑌤𑌮𑍇𑌖𑌲𑌾𑌨𑌾𑌂 𑌨𑌦𑍀𑌵𑌧𑍂𑌨𑌾𑌂 𑌗𑌤𑌯𑍋𑌽𑌦𑍍𑌯 𑌮𑌨𑍍𑌦𑌾𑌃 ।

𑌕𑌾𑌨𑍍𑌤𑍋𑌪𑌭𑍁𑌕𑍍𑌤𑌾𑌲𑌸𑌗𑌾𑌮𑌿𑌨𑍀𑌨𑌾𑌂 𑌪𑍍𑌰𑌭𑌾𑌤𑌕𑌾𑌲𑍇𑌷𑍍𑌵𑌿𑌵 𑌕𑌾𑌮𑌿𑌨𑍀𑌨𑌾𑌮𑍍 ॥ 54 ॥

𑌸𑌚𑌕𑍍𑌰𑌵𑌾𑌕𑌾𑌨𑌿 𑌸𑌶𑍈𑌵𑌲𑌾𑌨𑌿 𑌕𑌾𑌶𑍈𑌰𑍍𑌦𑍁𑌕𑍂𑌲𑍈𑌰𑌿𑌵 𑌸𑌂𑌵𑍃𑌤𑌾𑌨𑌿 ।

𑌸𑌪𑌤𑍍𑌰𑌲𑍇𑌖𑌾𑌨𑌿 𑌸𑌰𑍋𑌚𑌨𑌾𑌨𑌿 𑌵𑌧𑍂𑌮𑍁𑌖𑌾𑌨𑍀𑌵 𑌨𑌦𑍀𑌮𑍁𑌖𑌾𑌨𑌿 ॥ 55 ॥

𑌪𑍍𑌰𑌫𑍁𑌲𑍍𑌲𑌬𑌾𑌣𑌾𑌸𑌨𑌚𑌿𑌤𑍍𑌰𑌿𑌤𑍇𑌷𑍁 𑌪𑍍𑌰𑌹𑍃𑌷𑍍𑌟𑌷𑌟𑍍𑌪𑌾𑌦𑌨𑌿𑌕𑍂𑌜𑌿𑌤𑍇𑌷𑍁 ।

𑌗𑍃𑌹𑍀𑌤𑌚𑌾𑌪𑍋𑌦𑍍𑌯𑌤𑌚𑌣𑍍𑌡𑌦𑌣𑍍𑌡𑌃 𑌪𑍍𑌰𑌚𑌣𑍍𑌡𑌚𑌾𑌰𑍋𑌽𑌦𑍍𑌯 𑌵𑌨𑍇𑌷𑍁 𑌕𑌾𑌮𑌃 ॥ 56 ॥

𑌲𑍋𑌕𑌂 𑌸𑍁𑌵𑍃𑌷𑍍𑌟𑍍𑌯𑌾 𑌪𑌰𑌿𑌤𑍋𑌷𑌯𑌿𑌤𑍍𑌵𑌾 𑌨𑌦𑍀𑌸𑍍𑌤𑌟𑌾𑌕𑌾𑌨𑌿 𑌚 𑌪𑍂𑌰𑌯𑌿𑌤𑍍𑌵𑌾 ।

𑌨𑌿𑌷𑍍𑌪𑌨𑍍𑌨𑌸𑌸𑍍𑌯𑌾𑌂 𑌵𑌸𑍁𑌧𑌾𑌂 𑌚 𑌕𑍃𑌤𑍍𑌵𑌾 𑌤𑍍𑌯𑌕𑍍𑌤𑍍𑌵𑌾 𑌨𑌭𑌸𑍍𑌤𑍋𑌯𑌧𑌰𑌾𑌃 𑌪𑍍𑌰𑌣𑌷𑍍𑌟𑌾𑌃 ॥ 57 ॥

𑌦𑌰𑍍𑌶𑌯𑌨𑍍𑌤𑌿 𑌶𑌰𑌨𑍍𑌨𑌦𑍍𑌯𑌃 𑌪𑍁𑌲𑌿𑌨𑌾𑌨𑌿 𑌶𑌨𑍈𑌃 𑌶𑌨𑍈𑌃 ।

𑌨𑌵𑌸𑌙𑍍𑌗𑌮𑌸𑌵𑍍𑌰𑍀𑌡𑌾 𑌜𑌘𑌨𑌾𑌨𑍀𑌵 𑌯𑍋𑌷𑌿𑌤𑌃 ॥ 58 ॥

𑌪𑍍𑌰𑌸𑌨𑍍𑌨𑌸𑌲𑌿𑌲𑌾𑌸𑍍𑌸𑍗𑌮𑍍𑌯 𑌕𑍁𑌰𑌰𑍀𑌭𑌿𑌰𑍍𑌵𑌿𑌨𑌾𑌦𑌿𑌤𑌾𑌃 ।

𑌚𑌕𑍍𑌰𑌵𑌾𑌕𑌗𑌣𑌾𑌕𑍀𑌰𑍍𑌣𑌾 𑌵𑌿𑌭𑌾𑌨𑍍𑌤𑌿 𑌸𑌲𑌿𑌲𑌾𑌶𑌯𑌾𑌃 ॥ 59 ॥

𑌅𑌸𑌨𑌾𑌸𑍍𑌸𑌪𑍍𑌤𑌪𑌰𑍍𑌣𑌾𑌶𑍍𑌚 𑌕𑍋𑌵𑌿𑌦𑌾𑌰𑌾𑌶𑍍𑌚 𑌪𑍁𑌷𑍍𑌪𑌿𑌤𑌾𑌃 ।

𑌦𑍃𑌶𑍍𑌯𑌨𑍍𑌤𑍇 𑌬𑌨𑍍𑌧𑍁𑌜𑍀𑌵𑌾𑌶𑍍𑌚 𑌶𑍍𑌯𑌾𑌮𑌾𑌶𑍍𑌚 𑌗𑌿𑌰𑌿𑌸𑌾𑌨𑍁𑌷𑍁 ॥ 60 ॥

𑌹𑌂𑌸𑌸𑌾𑌰𑌸𑌚𑌕𑍍𑌰𑌾𑌹𑍍𑌵𑍈𑌃 𑌕𑍁𑌰𑌰𑍈𑌶𑍍𑌚 𑌸𑌮𑌨𑍍𑌤𑌤𑌃 ।

𑌪𑍁𑌲𑌿𑌨𑌾𑌨𑍍𑌯𑌵𑌕𑍀𑌰𑍍𑌣𑌾𑌨𑌿 𑌨𑌦𑍀𑌨𑌾𑌂 𑌪𑌶𑍍𑌯 𑌲𑌕𑍍𑌷𑍍𑌮𑌣 ॥ 61 ॥

𑌅𑌨𑍍𑌯𑍋𑌨𑍍𑌯𑌬𑌦𑍍𑌧𑌵𑍈𑌰𑌾𑌣𑌾𑌂 𑌜𑌿𑌗𑍀𑌷𑍂𑌣𑌾𑌂 𑌨𑍃𑌪𑌾𑌤𑍍𑌮𑌜 ।

𑌉𑌦𑍍𑌯𑍋𑌗𑌸𑌮𑌯𑌸𑍍𑌸𑍗𑌮𑍍𑌯 𑌪𑌾𑌰𑍍𑌥𑌿𑌵𑌾𑌨𑌾𑌮𑍁𑌪𑌸𑍍𑌥𑌿𑌤𑌃 ॥ 62 ॥

𑌇𑌯𑌂 𑌸𑌾 𑌪𑍍𑌰𑌥𑌮𑌾 𑌯𑌾𑌤𑍍𑌰𑌾 𑌪𑌾𑌰𑍍𑌥𑌿𑌵𑌾𑌨𑌾𑌂 𑌨𑍃𑌪𑌾𑌤𑍍𑌮𑌜 𑌨 𑌚 𑌪𑌶𑍍𑌯𑌾𑌮𑌿 𑌸𑍁𑌗𑍍𑌰𑍀𑌵𑌮𑍁𑌦𑍍𑌯𑍋𑌗𑌂 𑌵𑌾 𑌤𑌥𑌾𑌵𑌿𑌧𑌮𑍍 ॥ 63 ॥

𑌚𑌤𑍍𑌵𑌾𑌰𑍋 𑌵𑌾𑌰𑍍𑌷𑌿𑌕𑌾 𑌮𑌾𑌸𑌾 𑌗𑌤𑌾 𑌵𑌰𑍍𑌷𑌶𑌤𑍋𑌪𑌮𑌾𑌃 ।

𑌮𑌮 𑌶𑍋𑌕𑌾𑌭𑌿𑌭𑍂𑌤𑌸𑍍𑌯 𑌸𑍗𑌮𑍍𑌯 𑌸𑍀𑌤𑌾𑌮𑌪𑌶𑍍𑌯𑌤𑌃 ॥ 64 ॥

𑌚𑌕𑍍𑌰𑌵𑌾𑌕𑍀𑌵 𑌭𑌰𑍍𑌤𑌾𑌰𑌂 𑌪𑍃𑌷𑍍𑌠𑌤𑍋𑌽𑌨𑍁𑌗𑌤𑌾 𑌵𑌨𑌮𑍍 ।

𑌵𑌿𑌷𑌮𑌂 𑌦𑌣𑍍𑌡𑌕𑌾𑌰𑌣𑍍𑌯𑌮𑍁𑌦𑍍𑌯𑌾𑌨𑌮𑌿𑌵 𑌯𑌾𑌽𑌗𑌤𑌾 ॥ 65 ॥

𑌪𑍍𑌰𑌿𑌯𑌾𑌵𑌿𑌹𑍀𑌨𑍇 𑌦𑍁𑌃𑌖𑌾𑌰𑍍𑌤𑍇 𑌹𑍃𑌤𑌰𑌾𑌜𑍍𑌯𑍇 𑌵𑌿𑌵𑌾𑌸𑌿𑌤𑍇 ।

𑌕𑍃𑌪𑌾𑌂 𑌨 𑌕𑍁𑌰𑍁𑌤𑍇 𑌰𑌾𑌜𑌾 𑌸𑍁𑌗𑍍𑌰𑍀𑌵𑍋 𑌮𑌯𑌿 𑌲𑌕𑍍𑌷𑍍𑌮𑌣 ॥ 66 ॥

𑌅𑌨𑌾𑌥𑍋 𑌹𑍃𑌤𑌰𑌾𑌜𑍍𑌯𑍋𑌽𑌯𑌂 𑌰𑌾𑌵𑌣𑍇𑌨 𑌚 𑌧𑌰𑍍𑌷𑌿𑌤𑌃 ।

𑌦𑍀𑌨𑍋 𑌦𑍂𑌰𑌗𑍃𑌹𑌃 𑌕𑌾𑌮𑍀 𑌮𑌾𑌂 𑌚𑍈𑌵 𑌶𑌰𑌣𑌂 𑌗𑌤𑌃 ॥ 67 ॥

𑌇𑌤𑍍𑌯𑍇𑌤𑍈𑌃 𑌕𑌾𑌰𑌣𑍈𑌸𑍍𑌸𑍗𑌮𑍍𑌯 𑌸𑍁𑌗𑍍𑌰𑍀𑌵𑌸𑍍𑌯 𑌦𑍁𑌰𑌾𑌤𑍍𑌮𑌨𑌃 ।

𑌅𑌹𑌂 𑌵𑌾𑌨𑌰𑌰𑌾𑌜𑌸𑍍𑌯 𑌪𑌰𑌿𑌭𑍂𑌤𑌃 𑌪𑌰𑌨𑍍𑌤𑌪 ॥ 68 ॥

𑌸 𑌕𑌾𑌲𑌂 𑌪𑌰𑌿𑌸𑌙𑍍𑌖𑍍𑌯𑌾𑌯 𑌸𑍀𑌤𑌾𑌯𑌾𑌃 𑌪𑌰𑌿𑌮𑌾𑌰𑍍𑌗𑌣𑍇 ।

𑌕𑍃𑌤𑌾𑌰𑍍𑌥𑌸𑍍𑌸𑌮𑌯𑌂 𑌕𑍃𑌤𑍍𑌵𑌾 𑌦𑍁𑌰𑍍𑌮𑌤𑌿𑌰𑍍𑌨𑌾𑌵𑌬𑍁𑌧𑍍𑌯𑌤𑍇 ॥ 69 ॥

𑌤𑍍𑌵𑌂 𑌚 𑌕𑌿𑌷𑍍𑌕𑌿𑌨𑍍𑌧𑌾𑌂 𑌪𑍍𑌰𑌵𑌿𑌶𑍍𑌯 𑌬𑍍𑌰𑍂𑌹𑌿 𑌵𑌾𑌨𑌰𑌪𑍁𑌙𑍍𑌗𑌵𑌮𑍍 ।

𑌮𑍂𑌰𑍍𑌖𑌂 𑌗𑍍𑌰𑌾𑌮𑍍𑌯𑌸𑍁𑌖𑍇 𑌸𑌕𑍍𑌤𑌂 𑌸𑍁𑌗𑍍𑌰𑍀𑌵𑌂 𑌵𑌚𑌨𑌾𑌨𑍍𑌮𑌮 ॥ 70 ॥

𑌅𑌰𑍍𑌥𑌿𑌨𑌾𑌮𑍁𑌪𑌪𑌨𑍍𑌨𑌾𑌨𑌾𑌂 𑌪𑍂𑌰𑍍𑌵𑌂 𑌚𑌾𑌪𑍍𑌯𑍁𑌪𑌕𑌾𑌰𑌿𑌣𑌾𑌮𑍍 ।

𑌆𑌶𑌾𑌂 𑌸𑌂𑌶𑍍𑌰𑍁𑌤𑍍𑌯 𑌯𑍋 𑌹𑌨𑍍𑌤𑌿 𑌸 𑌲𑍋𑌕𑍇 𑌪𑍁𑌰𑍁𑌷𑌾𑌧𑌮𑌃 ॥ 71 ॥

𑌶𑍁𑌭𑌂 𑌵𑌾 𑌯𑌦𑌿 𑌵𑌾 𑌪𑌾𑌪𑌂 𑌯𑍋 𑌹𑌿 𑌵𑌾𑌕𑍍𑌯𑌮𑍁𑌦𑍀𑌰𑌿𑌤𑌮𑍍 ।

𑌸𑌤𑍍𑌯𑍇𑌨 𑌪𑍍𑌰𑌤𑌿𑌗𑍃𑌹𑍍𑌣𑌾𑌤𑌿 𑌸 𑌵𑍀𑌰𑌃 𑌪𑍁𑌰𑍁𑌷𑍋𑌤𑍍𑌤𑌮𑌃 ॥ 72 ॥

𑌕𑍃𑌤𑌾𑌰𑍍𑌥𑌾 𑌹𑍍𑌯𑌕𑍃𑌤𑌾𑌰𑍍𑌥𑌾𑌨𑌾𑌂 𑌮𑌿𑌤𑍍𑌰𑌾𑌣𑌾𑌂 𑌨 𑌭𑌵𑌨𑍍𑌤𑌿 𑌯𑍇 ।

𑌤𑌾𑌨𑍍𑌮𑍃𑌤𑌾𑌨𑌪𑌿 𑌕𑍍𑌰𑌵𑍍𑌯𑌾𑌦𑌾𑌃 𑌕𑍃𑌤𑌘𑍍𑌨𑌾𑌨𑍍𑌨𑍋𑌪𑌭𑍁𑌞𑍍𑌜𑌤𑍇 ॥ 73 ॥

𑌨𑍂𑌨𑌂 𑌕𑌾𑌞𑍍𑌚𑌨𑌪𑍃𑌷𑍍𑌠𑌸𑍍𑌯 𑌵𑌿𑌕𑍃𑌷𑍍𑌟𑌸𑍍𑌯 𑌮𑌯𑌾 𑌰𑌣𑍇 ।

𑌦𑍍𑌰𑌷𑍍𑌟𑍁𑌮𑌿𑌚𑍍𑌛𑌤𑌿 𑌚𑌾𑌪𑌸𑍍𑌯 𑌰𑍂𑌪𑌂 𑌵𑌿𑌦𑍍𑌯𑍁𑌦𑍍𑌗𑌣𑍋𑌪𑌮𑌮𑍍 ॥ 74 ॥

𑌘𑍋𑌰𑌂 𑌜𑍍𑌯𑌾𑌤𑌲𑌨𑌿𑌰𑍍𑌘𑍋𑌷𑌂 𑌕𑍍𑌰𑍁𑌦𑍍𑌧𑌸𑍍𑌯 𑌮𑌮 𑌸𑌂𑌯𑍁𑌗𑍇 ।

𑌨𑌿𑌰𑍍𑌘𑍋𑌷𑌮𑌿𑌵 𑌵𑌜𑍍𑌰𑌸𑍍𑌯 𑌪𑍁𑌨𑌸𑍍𑌸𑌂𑌶𑍍𑌰𑍋𑌤𑍁𑌮𑌿𑌚𑍍𑌛𑌸𑌿 ॥ 75 ॥

𑌕𑌾𑌮𑌮𑍇𑌵𑌙𑍍𑌗𑌤𑍇𑌽𑌪𑍍𑌯𑌸𑍍𑌯 𑌪𑌰𑌿𑌜𑍍𑌞𑌾𑌤𑍇 𑌪𑌰𑌾𑌕𑍍𑌰𑌮𑍇 ।

𑌤𑍍𑌵𑌤𑍍𑌸𑌹𑌾𑌯𑌸𑍍𑌯 𑌮𑍇 𑌵𑍀𑌰 𑌨 𑌚𑌿𑌨𑍍𑌤𑌾 𑌸𑍍𑌯𑌾𑌨𑍍𑌨𑍃𑌪𑌾𑌤𑍍𑌮𑌜 ॥ 76 ॥

𑌯𑌦𑌰𑍍𑌥𑌮𑌯𑌮𑌾𑌰𑌮𑍍𑌭𑌃 𑌕𑍃𑌤𑌃 𑌪𑌰𑌪𑍁𑌰𑌞𑍍𑌜𑌯𑌃 ।

𑌸𑌮𑌯𑌂 𑌨𑌾𑌭𑌿𑌜𑌾𑌨𑌾𑌤𑌿 𑌕𑍃𑌤𑌾𑌰𑍍𑌥𑌃 𑌪𑍍𑌲𑌵𑌗𑍇𑌶𑍍𑌵𑌰𑌃 ॥ 77 ॥

𑌵𑌰𑍍𑌷𑌾𑌸𑌮𑌯𑌕𑌾𑌲𑌂 𑌤𑍁 𑌪𑍍𑌰𑌤𑌿𑌜𑍍𑌞𑌾𑌯 𑌹𑌰𑍀𑌶𑍍𑌵𑌰𑌃 ।

𑌵𑍍𑌯𑌤𑍀𑌤𑌾𑌂𑌶𑍍𑌚𑌤𑍁𑌰𑍋 𑌮𑌾𑌸𑌾𑌨𑍍𑌵𑌿𑌹𑌰𑌨𑍍𑌨𑌾𑌵𑌬𑍁𑌧𑍍𑌯𑌤𑍇 ॥ 78 ॥

𑌸𑌾𑌮𑌾𑌤𑍍𑌯𑌪𑌰𑌿𑌷𑌤𑍍𑌕𑍍𑌰𑍀𑌡𑌨𑍍𑌪𑌾𑌨𑌮𑍇𑌵𑍋𑌪𑌸𑍇𑌵𑌤𑍇 ।

𑌶𑍋𑌕𑌦𑍀𑌨𑍇𑌷𑍁 𑌨𑌾𑌸𑍍𑌮𑌾𑌸𑍁 𑌸𑍁𑌗𑍍𑌰𑍀𑌵𑌃 𑌕𑍁𑌰𑍁𑌤𑍇 𑌦𑌯𑌾𑌮𑍍 ॥ 79 ॥

𑌉𑌚𑍍𑌯𑌤𑌾𑌂 𑌗𑌚𑍍𑌛 𑌸𑍁𑌗𑍍𑌰𑍀𑌵𑌸𑍍𑌤𑍍𑌵𑌯𑌾 𑌵𑌤𑍍𑌸 𑌮𑌹𑌾𑌬𑌲 ।

𑌮𑌮 𑌰𑍋𑌷𑌸𑍍𑌯 𑌯𑌦𑍍𑌰𑍂𑌪𑌂 𑌬𑍍𑌰𑍂𑌯𑌾𑌶𑍍𑌚𑍈𑌵𑌮𑌿𑌦𑌂 𑌵𑌚𑌃 ॥ 80 ॥

𑌨 𑌚 𑌸𑌙𑍍𑌕𑍁𑌚𑌿𑌤𑌃 𑌪𑌨𑍍𑌥𑌾 𑌯𑍇𑌨 𑌵𑌾𑌲𑍀 𑌹𑌤𑍋 𑌗𑌤𑌃 ।

𑌸𑌮𑌯𑍇 𑌤𑌿𑌷𑍍𑌠 𑌸𑍁𑌗𑍍𑌰𑍀𑌵 𑌮𑌾 𑌵𑌾𑌲𑌿𑌪𑌥𑌮𑌨𑍍𑌵𑌗𑌾𑌃 ॥ 81 ॥

𑌏𑌕 𑌏𑌵 𑌰𑌣𑍇 𑌵𑌾𑌲𑍀 𑌶𑌰𑍇𑌣 𑌨𑌿𑌹𑌤𑍋 𑌮𑌯𑌾 ।

𑌤𑍍𑌵𑌾𑌂 𑌤𑍁 𑌸𑌤𑍍𑌯𑌾𑌦𑌤𑌿𑌕𑍍𑌰𑌾𑌨𑍍𑌤𑌂 𑌹𑌨𑌿𑌷𑍍𑌯𑌾𑌮𑌿 𑌸𑌬𑌾𑌨𑍍𑌧𑌵𑌮𑍍 ॥ 82 ॥

𑌤𑌦𑍇𑌵𑌂 𑌵𑌿𑌹𑌿𑌤𑍇 𑌕𑌾𑌰𑍍𑌯𑍇 𑌯𑌦𑍍𑌧𑌿𑌤𑌂 𑌪𑍁𑌰𑍁𑌷𑌰𑍍𑌷𑌭 ।

𑌤𑌤𑍍𑌤𑌦𑍍𑌭𑍍𑌰𑍂𑌹𑌿 𑌨𑌰𑌶𑍍𑌰𑍇𑌷𑍍𑌠𑌤𑍍𑌵𑌰 𑌕𑌾𑌲𑌵𑍍𑌯𑌤𑌿𑌕𑍍𑌰𑌮𑌃 ॥ 83 ॥

𑌕𑍁𑌰𑍁𑌷𑍍𑌵 𑌸𑌤𑍍𑌯𑌂 𑌮𑌯𑌿 𑌵𑌾𑌨𑌰𑍇𑌶𑍍𑌵𑌰 𑌪𑍍𑌰𑌤𑌿𑌶𑍍𑌰𑍁𑌤𑌂 𑌧𑌰𑍍𑌮𑌮𑌵𑍇𑌕𑍍𑌷𑍍𑌯 𑌶𑌾𑌶𑍍𑌵𑌤𑌮𑍍 ।

𑌮𑌾 𑌵𑌾𑌲𑌿𑌨𑌂 𑌪𑍍𑌰𑍇𑌤𑍍𑌯 𑌗𑌤𑍋 𑌯𑌮𑌕𑍍𑌷𑌯𑌂 𑌤𑍍𑌵𑌮𑌦𑍍𑌯 𑌪𑌶𑍍𑌯𑍇𑌰𑍍𑌮𑌮 𑌚𑍋𑌦𑌿𑌤𑍈𑌶𑍍𑌶𑌰𑍈𑌃 ॥ 84 ॥

𑌸 𑌪𑍂𑌰𑍍𑌵𑌜𑌂 𑌤𑍀𑌵𑍍𑌰𑌵𑌿𑌵𑍃𑌦𑍍𑌧𑌕𑍋𑌪𑌂 𑌲𑌾𑌲𑌪𑍍𑌯𑌮𑌾𑌨𑌂 𑌪𑍍𑌰𑌸𑌮𑍀𑌕𑍍𑌷𑍍𑌯 𑌦𑍀𑌨𑌮𑍍 ।

𑌚𑌕𑌾𑌰 𑌤𑍀𑌵𑍍𑌰𑌾𑌂 𑌮𑌤𑌿𑌮𑍁𑌗𑍍𑌰𑌤𑍇𑌜𑌾 𑌹𑌰𑍀𑌶𑍍𑌵𑌰𑍇 𑌮𑌾𑌨𑌵𑌵𑌂𑌶𑌨𑌾𑌥𑌃 ॥ 85 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡𑍇 𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥

Roman (IAST) Transliteration

śrīmadvālmīkīya rāmāyaṇe kiṣkindhākāṇḍam |

atha triṃśassargaḥ |

guhaṃ praviṣṭe sugrīve vimukte gagane ghanaiḥ |

varṣarātroṣito rāmaḥ kāmaśokābhipīḍitaḥ || 1 ||

pāṇḍuraṃ gaganaṃ dṛṣṭvā vimalaṃ candramaṇḍalam |

śāradīṃ rajanīṃ caiva dṛṣṭvā jyotsnānulepanām || 2 ||

kāmavṛttaṃ ca sugrīvaṃ naṣṭāṃ ca janakātmajām |

buddhvā kālamatītaṃ ca mumoha paramāturaḥ || 3 ||

sa tu sañjñāmupāgamya muhūrtānmatimānpunaḥ |

manassthāmapi vaidehīṃ cintayāmāsa rāghavaḥ || 4 ||

āsīnaḥ parvatasyāgre hemadhātuvibhūṣite |

śāradaṃ gaganaṃ dṛṣṭvā jagāma manasā priyām || 5 ||

dṛṣṭvā ca vimalaṃ vyoma gatavidyudvalāhakam |

sārasārāvasaṅghuṣṭhaṃ vilalāpārtayā girā || 6 ||

sārasārāvasannādaissārasāravanādinī |

yā''śrame ramate bālā sā'dya me ramate katham || 7 ||

puṣpitāṃścāsanān dṛṣṭvā kāñcanāniva nirmalān |

kathaṃ sā ramate bālā paśyantī māmapaśyatī || 8 ||

yā purā kalahaṃsānāṃ svareṇa kalabhāṣiṇī |

budhyate cārusarvāṅgī sā'dya me buddhyate katham || 9 ||

nisvanaṃ cakravākānāṃ niśamya nahacāriṇām |

puṇḍarīkaviśālākṣī kathameṣā bhaviṣyati || 10 ||

sarāṃsi sarito vāpīḥ kānanāni vanāni ca |

tāṃ vinā mṛgaśābākṣīṃ carannādya sukhaṃ labhe || 11 ||

api tāṃ madviyogāccha saukumāryācca bhāminīm |

sudūraṃ pīḍayetkāmaśśaradguṇanirantaraḥ || 12 ||

evamādi naraśreṣṭho vilalāpa nṛpātmajaḥ |

vihaṅga iva sāraṅgassalilaṃ tridaśeśvarāt || 13 ||

tataścañcūrya ramyeṣu phalārthī girisānuṣu |

dadarśa paryupāvṛtto lakṣmīvānlakṣmaṇo'grajam || 14 ||

taṃ cintayā dussahayā parītaṃ visañjñamekaṃ vijane manasvī |

bhrāturviṣādātparitāpadīnaḥ samīkṣya saumitriruvāca rāmam || 15 ||

kimārya kāmasya vaśaṅgatena kimātmapauruṣyaparābhavena |

ayaṃ sadā saṃhriyate samādhiḥ kimatra yogena nivartitena || 16 ||

kriyābhiyogaṃ manasaḥ prasādaṃ samādhiyogānugataṃ ca kālam |

sahāyasāmarthyamadīnasattvaḥ svakarma hetuṃ ca kuruṣva hetum || 17 ||

na jānakī mānava vaṃśanātha tvayā sanāthā sulabhā pareṇa |

na cāgnicūḍāṃ jvalitāmupetya na dahyate vīra varārha kacchit || 18 ||

salakṣaṇaṃ lakṣmaṇamapradhṛṣyaṃ svabhāvajaṃ vākyamuvāca rāmaḥ |

hitaṃ ca pathyaṃ ca nayaprasaktaṃ sasāma dharmārthasamāhitaṃ ca || 19 ||

nissaṃśayaṃ kāryamavekṣitavyaṃ kriyāviśeṣo'hyanuvartitavyaḥ |

nanu pravṛttasya durāsadasya kumāra kāryasya phalaṃ ca cintyam || 20 ||

atha padmapalāśākṣīṃ maithilīmanucintayan |

uvāca lakṣmaṇaṃ rāmo mukhena pariśuṣyatā || 21 ||

tarpayitvā sahasrākṣassalilena vasundharām |

nirvartayitvā sasyāni kṛtakarmā vyavasthitaḥ || 22 ||

snigdhagambhīranirghoṣāśśailadrumapurogamāḥ |

visṛjya salilaṃ meghāḥ pariśrāntā nṛpātmaja || 23 ||

nīlotpaladalaśyāmāśśyāmīkṛtvā diśo daśa |

vimadā iva mātaṅgāśśāntavegāḥ payodharāḥ || 24 ||

jalagarbhā mahāmeghā kuṭajārjunagandhinaḥ |

caritvā viratāssaumya vṛṣṭivātāssamudyatāḥ || 25 ||

ghanānāṃ vāraṇānāṃ ca mayūrāṇāṃ ca lakṣmaṇa |

nādaḥ prasravaṇānāṃ ca praśāntassahasā'nagha || 26 ||

abhivṛṣṭā mahāmeghairnirmalāścitrasānavaḥ |

anuliptā ivā'bhānti girayaścitradīptibhiḥ || 27 ||

śākhāsu saptacchadapādapānāṃ prabhāsu tārārkaniśākarāṇām |

līlāsu caivottama vāraṇānāṃ śriyaṃ vibhajyādya śaratpravṛttā || 28 ||

sampratyanekāśraya citraśobhā lakṣmīśśaratkālaguṇopanītā |

sūryāgrahastapratibodhiteṣu padmākareṣvabhyadhikaṃ vibhāti || 29 ||

saptacchadānāṃ kusumopagandhī ṣaṭpādabṛndairanugīyamānaḥ |

mattadvipānāṃ pavano'nusārī darpaṃ vineṣyannadhikaṃ karoti || 30 ||

abhyāgataiścāruviśālapakṣai ssaraḥpriyaiḥ padmarajovakīrṇaiḥ |

mahānadīnāṃ pulinopayātaiḥ krīḍanti haṃsāssaha cakravākaiḥ || 31 ||

madapragalbheṣu ca vāraṇeṣu gavāṃ samūheṣu ca darpiteṣu |

prasannatoyāsu ca nimnagāsu vibhāti lakṣmīrbahudhā vibhaktā || 32 ||

nabhassamīkṣyāmbudharairvimuktaṃ vimuktabarhābharaṇā vaneṣu |

priyāsvasaktā vinivṛttaśobhā gatotsavā dhyānaparā mayūrāḥ || 33 ||

manojñagandhaiḥ priyakairanalpaiḥ puṣpātibhārāvanatāgraśākhaiḥ |

suvarṇagaurairnayanābhirāmai rudyotitānīva vanāntarāṇi || 34 ||

priyānvitānāṃ nalinīpriyāṇāṃ vane ratānāṃ kusumoddhatānām |

madotkaṭānāṃ madalālasānāṃ gajottamānāṃ gatayo'dya mandāḥ || 35 ||

vyabhraṃ nabhaśśastravidhautavarṇaṃ kṛśapravāhāni nadījalāni |

kahlāraśītāḥ pavanāḥ pravānti tamovimuktāśca diśaḥ prakāśāḥ || 36 ||

sūryātapakrāmaṇanaṣṭapaṅkā bhūmiścirodadhāṭitasāndrareṇuḥ |

anyonyavaireṇasamāyutānā mudyogakālo'dya narādhipānām || 37 ||

śaradguṇāpyāyitarūpaśobhāḥ praharṣitāḥ pāṃśusamutkṣitāṅgāḥ |

madotkaṭāssamprati yuddhalubdhā vṛṣā gavāṃ madhyagatā nadanti || 38 ||

samanmathaṃ tīvragatānurāgāḥ kulānvitā mandagatiṃ kariṇyaḥ |

madānvitaṃ samparivārya yāntaṃ vaneṣu bhartāramanuprayānti || 39 ||

tyaktvā varāṇyātmavibhūṣaṇāni barhāṇi tīropagatā nadīnām |

nirbhartsyamānā iva sārasaughaiḥ prayānti dīnā vimadā mayūrāḥ || 40 ||

vitrāsya kāraṇḍavacakravākā nmahāravairbhinnakaṭā gajendrāḥ |

sarassu baddhāmbujabhūṣaṇeṣu vikṣobhya vikṣobhya jalaṃ pibanti || 41 ||

vyapetapaṅkāsu savālukāsu prasannatoyāsu sagokulāsu |

sasārasārāvanināditāsu nadīṣu hṛṣṭā nipatanti haṃsāḥ || 42 ||

nadīghanaprasravaṇodakānā matipravṛddhānilabarhiṇānām |

plavaṅgamānāṃ ca gatotsavānāṃ drutaṃ ravāssamprati sampraṇaṣṭāḥ || 43 ||

anekavarṇāssuvinaṣṭakāyā navoditeṣvambudhareṣu naṣṭāḥ |

kṣudhārditā ghoraviṣā bilebhya ściroṣitā viprasaranti sarpāḥ || 44 ||

cañcaccandrakarasparśaharṣonmīlitatārakā |

aho rāgavatī sandhyā jahāti svayamambaram || 45 ||

rātriśśaśāṅkoditasaumyavaktrā tārāgaṇonmīlitacārunetrā |

jyotsnāṃśukaprāvaraṇā vibhāti nārīva śuklāṃśukasaṃvṛtāṅgī || 46 ||

vipakvaśāliprasavāni bhuktvā praharṣitā sārasacārupaṅktiḥ |

nabhassamākrāmati śīghravegāḥ vātāvadhūtā grathiteva mālā || 47 ||

suptaikahaṃsaṃ kumudairupetaṃ mahāhradasthaṃ salilaṃ vibhāti |

ghanairvimuktaṃ niśi pūrṇacandraṃ tārāgaṇākīrṇamivāntarikṣam || 48 ||

prakīrṇahaṃsākulamekhalānāṃ prabuddhapadmotpalamālinīnām |

vāpyuttamānāmadhikā'dya lakṣmī rvarāṅganānāmiva bhūṣitānām || 49 ||

veṇusvanavyañjitatūryamiśraḥ pratyūṣakālānilasampravṛddhaḥ |

sammūrchito gargaragovṛṣāṇā manyonyamāpūrayatīva śabdaḥ || 50 ||

navairnadīnāṃ kusumaprabhāsai rvyādhūyamānairmṛdumārutena |

dhautāmalakṣaumapaṭaprakāśaiḥ kūlāni kāśairupaśobhitāni || 51 ||

vanapracaṇḍā madhupānaśauṇḍāḥ priyānvitāṣṣaṭcaraṇāḥ prahrṛṣṭāḥ |

vaneṣu mattāḥ pavanānuyātrāṃ kurvanti padmāsanareṇugaurāḥ || 52 ||

jalaṃ prasannaṃ kumudaṃ prabhāsaṃ krauñcasvanaśśālivanaṃ vipakvam |

mṛduśca vāyurvimalaśca candra śśaṃsanti varṣavyapanītakālam || 53 ||

mīnopasandarśitamekhalānāṃ nadīvadhūnāṃ gatayo'dya mandāḥ |

kāntopabhuktālasagāminīnāṃ prabhātakāleṣviva kāminīnām || 54 ||

sacakravākāni saśaivalāni kāśairdukūlairiva saṃvṛtāni |

sapatralekhāni sarocanāni vadhūmukhānīva nadīmukhāni || 55 ||

praphullabāṇāsanacitriteṣu prahṛṣṭaṣaṭpādanikūjiteṣu |

gṛhītacāpodyatacaṇḍadaṇḍaḥ pracaṇḍacāro'dya vaneṣu kāmaḥ || 56 ||

lokaṃ suvṛṣṭyā paritoṣayitvā nadīstaṭākāni ca pūrayitvā |

niṣpannasasyāṃ vasudhāṃ ca kṛtvā tyaktvā nabhastoyadharāḥ praṇaṣṭāḥ || 57 ||

darśayanti śarannadyaḥ pulināni śanaiḥ śanaiḥ |

navasaṅgamasavrīḍā jaghanānīva yoṣitaḥ || 58 ||

prasannasalilāssaumya kurarībhirvināditāḥ |

cakravākagaṇākīrṇā vibhānti salilāśayāḥ || 59 ||

asanāssaptaparṇāśca kovidārāśca puṣpitāḥ |

dṛśyante bandhujīvāśca śyāmāśca girisānuṣu || 60 ||

haṃsasārasacakrāhvaiḥ kuraraiśca samantataḥ |

pulinānyavakīrṇāni nadīnāṃ paśya lakṣmaṇa || 61 ||

anyonyabaddhavairāṇāṃ jigīṣūṇāṃ nṛpātmaja |

udyogasamayassaumya pārthivānāmupasthitaḥ || 62 ||

iyaṃ sā prathamā yātrā pārthivānāṃ nṛpātmaja na ca paśyāmi sugrīvamudyogaṃ vā tathāvidham || 63 ||

catvāro vārṣikā māsā gatā varṣaśatopamāḥ |

mama śokābhibhūtasya saumya sītāmapaśyataḥ || 64 ||

cakravākīva bhartāraṃ pṛṣṭhato'nugatā vanam |

viṣamaṃ daṇḍakāraṇyamudyānamiva yā'gatā || 65 ||

priyāvihīne duḥkhārte hṛtarājye vivāsite |

kṛpāṃ na kurute rājā sugrīvo mayi lakṣmaṇa || 66 ||

anātho hṛtarājyo'yaṃ rāvaṇena ca dharṣitaḥ |

dīno dūragṛhaḥ kāmī māṃ caiva śaraṇaṃ gataḥ || 67 ||

ityetaiḥ kāraṇaissaumya sugrīvasya durātmanaḥ |

ahaṃ vānararājasya paribhūtaḥ parantapa || 68 ||

sa kālaṃ parisaṅkhyāya sītāyāḥ parimārgaṇe |

kṛtārthassamayaṃ kṛtvā durmatirnāvabudhyate || 69 ||

tvaṃ ca kiṣkindhāṃ praviśya brūhi vānarapuṅgavam |

mūrkhaṃ grāmyasukhe saktaṃ sugrīvaṃ vacanānmama || 70 ||

arthināmupapannānāṃ pūrvaṃ cāpyupakāriṇām |

āśāṃ saṃśrutya yo hanti sa loke puruṣādhamaḥ || 71 ||

śubhaṃ vā yadi vā pāpaṃ yo hi vākyamudīritam |

satyena pratigṛhṇāti sa vīraḥ puruṣottamaḥ || 72 ||

kṛtārthā hyakṛtārthānāṃ mitrāṇāṃ na bhavanti ye |

tānmṛtānapi kravyādāḥ kṛtaghnānnopabhuñjate || 73 ||

nūnaṃ kāñcanapṛṣṭhasya vikṛṣṭasya mayā raṇe |

draṣṭumicchati cāpasya rūpaṃ vidyudgaṇopamam || 74 ||

ghoraṃ jyātalanirghoṣaṃ kruddhasya mama saṃyuge |

nirghoṣamiva vajrasya punassaṃśrotumicchasi || 75 ||

kāmamevaṅgate'pyasya parijñāte parākrame |

tvatsahāyasya me vīra na cintā syānnṛpātmaja || 76 ||

yadarthamayamārambhaḥ kṛtaḥ parapurañjayaḥ |

samayaṃ nābhijānāti kṛtārthaḥ plavageśvaraḥ || 77 ||

varṣāsamayakālaṃ tu pratijñāya harīśvaraḥ |

vyatītāṃścaturo māsānviharannāvabudhyate || 78 ||

sāmātyapariṣatkrīḍanpānamevopasevate |

śokadīneṣu nāsmāsu sugrīvaḥ kurute dayām || 79 ||

ucyatāṃ gaccha sugrīvastvayā vatsa mahābala |

mama roṣasya yadrūpaṃ brūyāścaivamidaṃ vacaḥ || 80 ||

na ca saṅkucitaḥ panthā yena vālī hato gataḥ |

samaye tiṣṭha sugrīva mā vālipathamanvagāḥ || 81 ||

eka eva raṇe vālī śareṇa nihato mayā |

tvāṃ tu satyādatikrāntaṃ haniṣyāmi sabāndhavam || 82 ||

tadevaṃ vihite kārye yaddhitaṃ puruṣarṣabha |

tattadbhrūhi naraśreṣṭhatvara kālavyatikramaḥ || 83 ||

kuruṣva satyaṃ mayi vānareśvara pratiśrutaṃ dharmamavekṣya śāśvatam |

mā vālinaṃ pretya gato yamakṣayaṃ tvamadya paśyermama coditaiśśaraiḥ || 84 ||

sa pūrvajaṃ tīvravivṛddhakopaṃ lālapyamānaṃ prasamīkṣya dīnam |

cakāra tīvrāṃ matimugratejā harīśvare mānavavaṃśanāthaḥ || 85 ||

ityārṣe śrīmadrāmāyaṇe vālmīkīya ādikāvye kiṣkindhākāṇḍe triṃśassargaḥ ||