📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
3.37 𑌅𑌰𑌣𑍍𑌯𑌕𑌾𑌣𑍍𑌡 - 𑌸𑌪𑍍𑌤𑌤𑍍𑌰𑌿𑌂𑌶 𑌸𑌰𑍍𑌗𑌃
3.37 Aranyakanda - Saptatrimsha Sargah
Valmiki Grantha
𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌣𑍍𑌡𑌮𑍍 ।
𑌅𑌥 𑌸𑌪𑍍𑌤𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌚𑍍𑌛𑍃𑌤𑍍𑌵𑌾 𑌰𑌾𑌕𑍍𑌷𑌸𑍇𑌨𑍍𑌦𑍍𑌰𑌸𑍍𑌯 𑌵𑌾𑌕𑍍𑌯𑌂 𑌵𑌾𑌕𑍍𑌯𑌵𑌿𑌶𑌾𑌰𑌦𑌃 ।
𑌪𑍍𑌰𑌤𑍍𑌯𑍁𑌵𑌾𑌚 𑌮𑌹𑌾𑌪𑍍𑌰𑌾𑌜𑍍𑌞𑍋 𑌮𑌾𑌰𑍀𑌚𑍋 𑌰𑌾𑌕𑍍𑌷𑌸𑍇𑌶𑍍𑌵𑌰𑌮𑍍 ॥ 1 ॥
𑌸𑍁𑌲𑌭𑌾𑌃 𑌪𑍁𑌰𑍁𑌷𑌾 𑌰𑌾𑌜𑌨𑍍𑌸𑌤𑌤𑌂 𑌪𑍍𑌰𑌿𑌯𑌵𑌾𑌦𑌿𑌨𑌃 ।
𑌅𑌪𑍍𑌰𑌿𑌯𑌸𑍍𑌯 𑌤𑍁 𑌪𑌥𑍍𑌯𑌸𑍍𑌯 𑌵𑌕𑍍𑌤𑌾 𑌶𑍍𑌰𑍋𑌤𑌾 𑌚 𑌦𑍁𑌰𑍍𑌲𑌭𑌃 ॥ 2 ॥
𑌨 𑌨𑍂𑌨𑌂 𑌬𑍁𑌧𑍍𑌯𑌸𑍇 𑌰𑌾𑌮𑌂 𑌮𑌹𑌾𑌵𑍀𑌰𑍍𑌯𑌂 𑌗𑍁𑌣𑍋𑌨𑍍𑌨𑌤𑌮𑍍 ।
𑌅𑌯𑍁𑌕𑍍𑌤𑌚𑌾𑌰𑌶𑍍𑌚𑌪𑌲𑍋 𑌮𑌹𑍇𑌨𑍍𑌦𑍍𑌰𑌵𑌰𑍁𑌣𑍋𑌪𑌮𑌮𑍍 ॥ 3 ॥
𑌅𑌪𑌿 𑌸𑍍𑌵𑌸𑍍𑌤𑌿 𑌭𑌵𑍇𑌤𑍍𑌤𑌾𑌤 𑌸𑌰𑍍𑌵𑍇𑌷𑌾𑌂 𑌭𑍁𑌵𑌿 𑌰𑌕𑍍𑌷𑌸𑌾𑌮𑍍 ।
𑌅𑌪𑌿 𑌰𑌾𑌮𑍋 𑌨𑌾𑌸𑌙𑍍𑌕𑍍𑌰𑍁𑌦𑍍𑌧𑌃 𑌕𑍁𑌰𑍍𑌯𑌾𑌲𑍍𑌲𑍋𑌕𑌮𑌰𑌾𑌕𑍍𑌷𑌸𑌮𑍍 ॥ 4 ॥
𑌅𑌪𑌿 𑌤𑍇 𑌜𑍀𑌵𑌿𑌤𑌾𑌨𑍍𑌤𑌾𑌯 𑌨𑍋𑌤𑍍𑌪𑌨𑍍𑌨𑌾 𑌜𑌨𑌕𑌾𑌤𑍍𑌮𑌜𑌾 ।
𑌅𑌪𑌿 𑌸𑍀𑌤𑌾𑌨𑌿𑌮𑌿𑌤𑍍𑌤𑌂 𑌚 𑌨 𑌭𑌵𑍇𑌦𑍍𑌵𑍍𑌯𑌸𑌨𑌂 𑌮𑌮 ॥ 5 ॥
𑌅𑌪𑌿 𑌤𑍍𑌵𑌾𑌮𑍀𑌶𑍍𑌵𑌰𑌂 𑌪𑍍𑌰𑌾𑌪𑍍𑌯 𑌕𑌾𑌮𑌵𑍃𑌤𑍍𑌤𑌂 𑌨𑌿𑌰𑌙𑍍𑌕𑍁𑌶𑌮𑍍 ।
𑌨 𑌵𑌿𑌨𑌶𑍍𑌯𑍇𑌤𑍍𑌪𑍁𑌰𑍀 𑌲𑌙𑍍𑌕𑌾 𑌤𑍍𑌵𑌯𑌾 𑌸𑌹 𑌸𑌰𑌾𑌕𑍍𑌷𑌸𑌾 ॥ 6 ॥
𑌤𑍍𑌵𑌦𑍍𑌵𑌿𑌧𑌃 𑌕𑌾𑌮𑌵𑍃𑌤𑍍𑌤𑍋 𑌹𑌿 𑌦𑍁𑌶𑍍𑌶𑍀𑌲𑌃 𑌪𑌾𑌪𑌮𑌨𑍍𑌤𑍍𑌰𑌿𑌤𑌃 ।
𑌆𑌤𑍍𑌮𑌾𑌨𑌂 𑌸𑍍𑌵𑌜𑌨𑌂 𑌰𑌾𑌷𑍍𑌟𑍍𑌰𑌂 𑌸 𑌰𑌾𑌜𑌾 𑌹𑌨𑍍𑌤𑌿 𑌦𑍁𑌰𑍍𑌮𑌤𑌿𑌃 ॥ 7 ॥
𑌨 𑌚 𑌪𑌿𑌤𑍍𑌰𑌾 𑌪𑌰𑌿𑌤𑍍𑌯𑌕𑍍𑌤𑍋 𑌨𑌾𑌮𑌰𑍍𑌯𑌾𑌦𑌃 𑌕𑌥𑌞𑍍𑌚𑌨 ।
𑌨 𑌲𑍁𑌬𑍍𑌧𑍋 𑌨 𑌚 𑌦𑍁𑌶𑍍𑌶𑍀𑌲𑍋 𑌨 𑌚 𑌕𑍍𑌷𑌤𑍍𑌰𑌿𑌯𑌪𑌾𑌂𑌸𑌨𑌃 ॥ 8 ॥
𑌨 𑌚 𑌧𑌰𑍍𑌮𑌗𑍁𑌣𑍈𑌰𑍍𑌹𑍀𑌨𑌃 𑌕𑍗𑌸𑌲𑍍𑌯𑌾𑌨𑌨𑍍𑌦𑌵𑌰𑍍𑌧𑌨𑌃 ।
𑌨 𑌤𑍀𑌕𑍍𑌷𑍍𑌣𑍋 𑌨 𑌚 𑌭𑍂𑌤𑌾𑌨𑌾𑌂 𑌸𑌰𑍍𑌵𑍇𑌷𑌾𑌮𑌹𑌿𑌤𑍇 𑌰𑌤𑌃 ॥ 9 ॥
𑌵𑌞𑍍𑌚𑌿𑌤𑌂 𑌪𑌿𑌤𑌰𑌂 𑌦𑍃𑌷𑍍𑌟𑍍𑌵𑌾 𑌕𑍈𑌕𑍇𑌯𑍍𑌯𑌾 𑌸𑌤𑍍𑌯𑌵𑌾𑌦𑌿𑌨𑌮𑍍 ।
𑌕𑌰𑌿𑌷𑍍𑌯𑌾𑌮𑍀𑌤𑌿 𑌧𑌰𑍍𑌮𑌾𑌤𑍍𑌮𑌾 𑌤𑌾𑌤 𑌪𑍍𑌰𑌵𑍍𑌰𑌜𑌿𑌤𑍋 𑌵𑌨𑌮𑍍 ॥ 10 ॥
𑌕𑍈𑌕𑍇𑌯𑍍𑌯𑌾𑌃 𑌪𑍍𑌰𑌿𑌯𑌕𑌾𑌮𑌾𑌰𑍍𑌥𑌂 𑌪𑌿𑌤𑍁𑌰𑍍𑌦𑌶𑌰𑌥𑌸𑍍𑌯 𑌚 ।
𑌹𑌿𑌤𑍍𑌵𑌾 𑌰𑌾𑌜𑍍𑌯𑌂 𑌚 𑌭𑍋𑌗𑌾𑌂𑌶𑍍𑌚 𑌪𑍍𑌰𑌵𑌿𑌷𑍍𑌟𑍋 𑌦𑌣𑍍𑌡𑌕𑌾𑌵𑌨𑌮𑍍 ॥ 11 ॥
𑌨 𑌰𑌾𑌮𑌃 𑌕𑌰𑍍𑌕𑌶𑌸𑍍𑌤𑌾𑌤 𑌨𑌾𑌵𑌿𑌦𑍍𑌵𑌾𑌨𑍍𑌨𑌾𑌜𑌿𑌤𑍇𑌨𑍍𑌦𑍍𑌰𑌿𑌯𑌃 ।
𑌅𑌨𑍃𑌤𑌂 𑌦𑍁𑌶𑍍𑌶𑍍𑌰𑍁𑌤𑌂 𑌚𑍈𑌵 𑌨𑍈𑌵 𑌤𑍍𑌵𑌂 𑌵𑌕𑍍𑌤𑍁𑌮𑌰𑍍𑌹𑌸𑌿 ॥ 12 ॥
𑌰𑌾𑌮𑍋 𑌵𑌿𑌗𑍍𑌰𑌹𑌵𑌾𑌨𑍍 𑌧𑌰𑍍𑌮𑌸𑍍𑌸𑌾𑌧𑍁𑌸𑍍𑌸𑌤𑍍𑌯𑌪𑌰𑌾𑌕𑍍𑌰𑌮𑌃 ।
𑌰𑌾𑌜𑌾 𑌸𑌰𑍍𑌵𑌸𑍍𑌯 𑌲𑍋𑌕𑌸𑍍𑌯 𑌦𑍇𑌵𑌾𑌨𑌾𑌂 𑌮𑌘𑌵𑌾𑌨𑌿𑌵 ॥ 13 ॥
𑌕𑌥𑌂 𑌤𑍍𑌵𑌂 𑌤𑌸𑍍𑌯 𑌵𑍈𑌦𑍇𑌹𑍀𑌂 𑌰𑌕𑍍𑌷𑌿𑌤𑌾𑌂 𑌸𑍍𑌵𑍇𑌨 𑌤𑍇𑌜𑌸𑌾 ।
𑌇𑌚𑍍𑌛𑌸𑌿 𑌪𑍍𑌰𑌸𑌭𑌂 𑌹𑌰𑍍𑌤𑍁𑌂 𑌪𑍍𑌰𑌭𑌾𑌮𑌿𑌵 𑌵𑌿𑌵𑌸𑍍𑌵𑌤𑌃 ॥ 14 ॥
𑌶𑌰𑌾𑌰𑍍𑌚𑌿𑌷𑌮𑌾𑌧𑍃𑌷𑍍𑌯𑌂 𑌚𑌾𑌪𑌖𑌙𑍍𑌗𑍇𑌨𑍍𑌧𑌨𑌂 𑌰𑌣𑍇 ।
𑌰𑌾𑌮𑌾𑌗𑍍𑌨𑌿𑌂 𑌸𑌹𑌸𑌾 𑌦𑍀𑌪𑍍𑌤𑌂 𑌨 𑌪𑍍𑌰𑌵𑍇𑌷𑍍𑌟𑍁𑌂 𑌤𑍍𑌵𑌮𑌰𑍍𑌹𑌸𑌿 ॥ 15 ॥
𑌧𑌨𑍁𑌰𑍍𑌵𑍍𑌯𑌾𑌦𑌿𑌤𑌦𑍀𑌪𑍍𑌤𑌾𑌸𑍍𑌯𑌂 𑌶𑌰𑌾𑌰𑍍𑌚𑌿𑌷𑌮𑌮𑌰𑍍𑌷𑌣𑌮𑍍 ।
𑌚𑌾𑌪𑌬𑌾𑌣𑌧𑌰𑌂 𑌤𑍀𑌕𑍍𑌷𑍍𑌣𑌂 𑌶𑌤𑍍𑌰𑍁𑌸𑍈𑌨𑍍𑌯𑌪𑍍𑌰𑌹𑌾𑌰𑌿𑌣𑌮𑍍 ॥ 16 ॥
𑌰𑌾𑌜𑍍𑌯𑌂 𑌸𑍁𑌖𑌂 𑌚 𑌸𑌨𑍍𑌤𑍍𑌯𑌜𑍍𑌯 𑌜𑍀𑌵𑌿𑌤𑌂 𑌚𑍇𑌷𑍍𑌟𑌮𑌾𑌤𑍍𑌮𑌨𑌃 ।
𑌨𑌾𑌤𑍍𑌯𑌾𑌸𑌾𑌦𑌯𑌿𑌤𑍁𑌂 𑌤𑌾𑌤 𑌰𑌾𑌮𑌾𑌨𑍍𑌤𑌕𑌮𑌿𑌹𑌾𑌰𑍍𑌹𑌸𑌿 ॥ 17 ॥
𑌅𑌪𑍍𑌰𑌮𑍇𑌯𑌂 𑌹𑌿 𑌤𑌤𑍍𑌤𑍇𑌜𑍋 𑌯𑌸𑍍𑌯 𑌸𑌾 𑌜𑌨𑌕𑌾𑌤𑍍𑌮𑌜𑌾 ।
𑌨 𑌤𑍍𑌵𑌂 𑌸𑌮𑌰𑍍𑌥𑌸𑍍𑌤𑌾𑌂 𑌹𑌰𑍍𑌤𑍁𑌂 𑌰𑌾𑌮𑌚𑌾𑌪𑌾𑌶𑍍𑌰𑌯𑌂 𑌵𑌨𑍇 ॥ 18 ॥
𑌤𑌸𑍍𑌯 𑌸𑌾 𑌨𑌰𑌸𑌿𑌂𑌹𑌸𑍍𑌯 𑌸𑌿𑌂𑌹𑍋𑌰𑌸𑍍𑌕𑌸𑍍𑌯 𑌭𑌾𑌮𑌿𑌨𑍀 ।
𑌪𑍍𑌰𑌾𑌣𑍇𑌭𑍍𑌯𑍋𑌽𑌪𑌿 𑌪𑍍𑌰𑌿𑌯𑌤𑌰𑌾 𑌭𑌾𑌰𑍍𑌯𑌾 𑌨𑌿𑌤𑍍𑌯𑌮𑌨𑍁𑌵𑍍𑌰𑌤𑌾 ॥ 19 ॥
𑌨 𑌸𑌾 𑌧𑌰𑍍𑌷𑌯𑌿𑌤𑍁𑌂 𑌶𑌕𑍍𑌯𑌾 𑌮𑍈𑌥𑌿𑌲𑍍𑌯𑍋𑌜𑌸𑍍𑌵𑌿𑌨𑌃 𑌪𑍍𑌰𑌿𑌯𑌾 ।
𑌦𑍀𑌪𑍍𑌤𑌸𑍍𑌯𑍇𑌵 𑌹𑍁𑌤𑌾𑌶𑌸𑍍𑌯 𑌶𑌿𑌖𑌾 𑌸𑍀𑌤𑌾 𑌸𑍁𑌮𑌧𑍍𑌯𑌮𑌾 ॥ 20 ॥
𑌕𑌿𑌮𑍁𑌦𑍍𑌯𑌮𑌮𑌿𑌮𑌂 𑌵𑍍𑌯𑌰𑍍𑌥𑌂 𑌕𑍃𑌤𑍍𑌵𑌾 𑌤𑍇 𑌰𑌾𑌕𑍍𑌷𑌸𑌾𑌧𑌿𑌪 ।
𑌦𑍃𑌷𑍍𑌟𑌶𑍍𑌚𑍇𑌤𑍍𑌵𑌂 𑌰𑌣𑍇 𑌤𑍇𑌨 𑌤𑌦𑌨𑍍𑌤𑌂 𑌤𑌵 𑌜𑍀𑌵𑌿𑌤𑌮𑍍 ॥ 21 ॥
𑌜𑍀𑌵𑌿𑌤𑌂 𑌚 𑌸𑍁𑌖𑌂 𑌚𑍈𑌵 𑌰𑌾𑌜𑍍𑌯𑌂 𑌚𑍈𑌵 𑌸𑍁𑌦𑍁𑌰𑍍𑌲𑌭𑌮𑍍 ।
𑌯𑌦𑍀𑌚𑍍𑌛𑌸𑌿 𑌚𑌿𑌰𑌂 𑌭𑍋𑌕𑍍𑌤𑍁𑌂 𑌮𑌾 𑌕𑍃𑌥𑌾 𑌰𑌾𑌮𑌵𑌿𑌪𑍍𑌰𑌿𑌯𑌮𑍍 ॥ 22 ॥
𑌸 𑌸𑌰𑍍𑌵𑍈𑌸𑍍𑌸𑌚𑌿𑌵𑍈𑌸𑍍𑌸𑌾𑌰𑍍𑌧𑌂 𑌵𑌿𑌭𑍀𑌷𑌣𑌪𑍁𑌰𑍋𑌗𑌮𑍈𑌃 ।
𑌮𑌨𑍍𑌤𑍍𑌰𑌯𑌿𑌤𑍍𑌵𑌾 𑌤𑍁 𑌧𑌰𑍍𑌮𑌿𑌷𑍍𑌠𑍈𑌃 𑌕𑍃𑌤𑍍𑌵𑌾 𑌨𑌿𑌶𑍍𑌚𑌯𑌮𑌾𑌤𑍍𑌮𑌨𑌃 ॥ 23 ॥
𑌦𑍋𑌷𑌾𑌣𑌾𑌂 𑌚 𑌗𑍁𑌣𑌾𑌨𑌾𑌂 𑌚 𑌸𑌮𑍍𑌪𑍍𑌰𑌧𑌾𑌰𑍍𑌯 𑌬𑌲𑌾𑌬𑌲𑌮𑍍 ।
𑌆𑌤𑍍𑌮𑌨𑌶𑍍𑌚 𑌬𑌲𑌂 𑌜𑍍𑌞𑌾𑌤𑍍𑌵𑌾 𑌰𑌾𑌘𑌵𑌸𑍍𑌯 𑌚 𑌤𑌤𑍍𑌵𑌤𑌃 ॥ 24 ॥
𑌹𑌿𑌤𑌾𑌹𑌿𑌤𑌂 𑌵𑌿𑌨𑌿𑌶𑍍𑌚𑌿𑌤𑍍𑌯 𑌕𑍍𑌷𑌮𑌂 𑌤𑍍𑌵𑌂 𑌕𑌰𑍍𑌤𑍁𑌮𑌰𑍍𑌹𑌸𑌿 ।
𑌅𑌹𑌂 𑌤𑍁 𑌮𑌨𑍍𑌯𑍇 𑌤𑌵 𑌨 𑌕𑍍𑌷𑌮𑌂 𑌰𑌣𑍇 𑌸𑌮𑌾𑌗𑌮𑌂 𑌕𑍋𑌸𑌲𑌰𑌾𑌜𑌸𑍂𑌨𑍁𑌨𑌾 ।
𑌇𑌦𑌂 𑌹𑌿 𑌭𑍂𑌯𑌶𑍍𑌶𑍃𑌣𑍁 𑌵𑌾𑌕𑍍𑌯𑌮𑍁𑌤𑍍𑌤𑌮𑌂 𑌕𑍍𑌷𑌮𑌂 𑌚 𑌯𑍁𑌕𑍍𑌤𑌂 𑌚 𑌨𑌿𑌶𑌾𑌚𑌰𑍇𑌶𑍍𑌵𑌰 ॥ 25 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌣𑍍𑌡𑍇 𑌸𑌪𑍍𑌤𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha saptatriṃśassargaḥ |
tacchṛtvā rākṣasendrasya vākyaṃ vākyaviśāradaḥ |
pratyuvāca mahāprājño mārīco rākṣaseśvaram || 1 ||
sulabhāḥ puruṣā rājansatataṃ priyavādinaḥ |
apriyasya tu pathyasya vaktā śrotā ca durlabhaḥ || 2 ||
na nūnaṃ budhyase rāmaṃ mahāvīryaṃ guṇonnatam |
ayuktacāraścapalo mahendravaruṇopamam || 3 ||
api svasti bhavettāta sarveṣāṃ bhuvi rakṣasām |
api rāmo nāsaṅkruddhaḥ kuryāllokamarākṣasam || 4 ||
api te jīvitāntāya notpannā janakātmajā |
api sītānimittaṃ ca na bhavedvyasanaṃ mama || 5 ||
api tvāmīśvaraṃ prāpya kāmavṛttaṃ niraṅkuśam |
na vinaśyetpurī laṅkā tvayā saha sarākṣasā || 6 ||
tvadvidhaḥ kāmavṛtto hi duśśīlaḥ pāpamantritaḥ |
ātmānaṃ svajanaṃ rāṣṭraṃ sa rājā hanti durmatiḥ || 7 ||
na ca pitrā parityakto nāmaryādaḥ kathañcana |
na lubdho na ca duśśīlo na ca kṣatriyapāṃsanaḥ || 8 ||
na ca dharmaguṇairhīnaḥ kausalyānandavardhanaḥ |
na tīkṣṇo na ca bhūtānāṃ sarveṣāmahite rataḥ || 9 ||
vañcitaṃ pitaraṃ dṛṣṭvā kaikeyyā satyavādinam |
kariṣyāmīti dharmātmā tāta pravrajito vanam || 10 ||
kaikeyyāḥ priyakāmārthaṃ piturdaśarathasya ca |
hitvā rājyaṃ ca bhogāṃśca praviṣṭo daṇḍakāvanam || 11 ||
na rāmaḥ karkaśastāta nāvidvānnājitendriyaḥ |
anṛtaṃ duśśrutaṃ caiva naiva tvaṃ vaktumarhasi || 12 ||
rāmo vigrahavān dharmassādhussatyaparākramaḥ |
rājā sarvasya lokasya devānāṃ maghavāniva || 13 ||
kathaṃ tvaṃ tasya vaidehīṃ rakṣitāṃ svena tejasā |
icchasi prasabhaṃ hartuṃ prabhāmiva vivasvataḥ || 14 ||
śarārciṣamādhṛṣyaṃ cāpakhaṅgendhanaṃ raṇe |
rāmāgniṃ sahasā dīptaṃ na praveṣṭuṃ tvamarhasi || 15 ||
dhanurvyāditadīptāsyaṃ śarārciṣamamarṣaṇam |
cāpabāṇadharaṃ tīkṣṇaṃ śatrusainyaprahāriṇam || 16 ||
rājyaṃ sukhaṃ ca santyajya jīvitaṃ ceṣṭamātmanaḥ |
nātyāsādayituṃ tāta rāmāntakamihārhasi || 17 ||
aprameyaṃ hi tattejo yasya sā janakātmajā |
na tvaṃ samarthastāṃ hartuṃ rāmacāpāśrayaṃ vane || 18 ||
tasya sā narasiṃhasya siṃhoraskasya bhāminī |
prāṇebhyo'pi priyatarā bhāryā nityamanuvratā || 19 ||
na sā dharṣayituṃ śakyā maithilyojasvinaḥ priyā |
dīptasyeva hutāśasya śikhā sītā sumadhyamā || 20 ||
kimudyamamimaṃ vyarthaṃ kṛtvā te rākṣasādhipa |
dṛṣṭaścetvaṃ raṇe tena tadantaṃ tava jīvitam || 21 ||
jīvitaṃ ca sukhaṃ caiva rājyaṃ caiva sudurlabham |
yadīcchasi ciraṃ bhoktuṃ mā kṛthā rāmavipriyam || 22 ||
sa sarvaissacivaissārdhaṃ vibhīṣaṇapurogamaiḥ |
mantrayitvā tu dharmiṣṭhaiḥ kṛtvā niścayamātmanaḥ || 23 ||
doṣāṇāṃ ca guṇānāṃ ca sampradhārya balābalam |
ātmanaśca balaṃ jñātvā rāghavasya ca tatvataḥ || 24 ||
hitāhitaṃ viniścitya kṣamaṃ tvaṃ kartumarhasi |
ahaṃ tu manye tava na kṣamaṃ raṇe samāgamaṃ kosalarājasūnunā |
idaṃ hi bhūyaśśṛṇu vākyamuttamaṃ kṣamaṃ ca yuktaṃ ca niśācareśvara || 25 ||
ityārṣe śrīmadrāmāyaṇe vālmīkīya ādikāvye araṇyakāṇḍe saptatriṃśassargaḥ ||
InfoLyter.in — Sacred Vedic Knowledge Portal · Free forever