📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
2.85 𑌅𑌯𑍋𑌧𑍍𑌯𑌾𑌕𑌾𑌣𑍍𑌡 - 𑌪𑌞𑍍𑌚𑌾𑌶𑍀𑌤𑌿𑌤𑌮 𑌸𑌰𑍍𑌗𑌃
2.85 Ayodhyakanda - Panchashititama Sargah
Valmiki Grantha
𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌣𑍍𑌡𑌮𑍍 ।
𑌅𑌥 𑌪𑌞𑍍𑌚𑌾𑌶𑍀𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌏𑌵𑌮𑍁𑌕𑍍𑌤𑌸𑍍𑌤𑍁 𑌭𑌰𑌤𑍋 𑌨𑌿𑌷𑌾𑌦𑌾𑌧𑌿𑌪𑌤𑌿𑌂 𑌗𑍁𑌹𑌮𑍍 ।
𑌪𑍍𑌰𑌤𑍍𑌯𑍁𑌵𑌾𑌚 𑌮𑌹𑌾𑌪𑍍𑌰𑌾𑌜𑍍𑌞𑍋 𑌵𑌾𑌕𑍍𑌯𑌂 𑌹𑍇𑌤𑍍𑌵𑌰𑍍𑌥𑌸𑌂𑌹𑌿𑌤𑌮𑍍 ॥ 1 ॥
𑌊𑌰𑍍𑌜𑌿𑌤𑌃 𑌖𑌲𑍁 𑌤𑍇 𑌕𑌾𑌮𑌃 𑌕𑍃𑌤𑍋 𑌮𑌮 𑌗𑍁𑌰𑍋𑌸𑍍𑌸𑌖𑍇 ।
𑌯𑍋 𑌮𑍇 𑌤𑍍𑌵𑌮𑍀𑌦𑍃𑌶𑍀𑌂 𑌸𑍇𑌨𑌾𑌮𑍇𑌕𑍋𑌽𑌭𑍍𑌯𑌰𑍍𑌚𑌿𑌤𑍁𑌮𑌿𑌚𑍍𑌛𑌸𑌿 ॥ 2 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌤𑍁 𑌮𑌹𑌾𑌤𑍇𑌜𑌾 𑌗𑍁𑌹𑌂 𑌵𑌚𑌨𑌮𑍁𑌤𑍍𑌤𑌮𑌮𑍍 ।
𑌅𑌬𑍍𑌰𑌵𑍀𑌦𑍍𑌭𑌰𑌤 𑌶𑍍𑌶𑍍𑌰𑍀𑌮𑌾𑌨𑌨𑌿𑌷𑌾𑌦𑌾𑌧𑌿𑌪𑌤𑌿𑌂 𑌪𑍁𑌨𑌃 ॥ 3 ॥
𑌕𑌤𑌰𑍇𑌣 𑌗𑌮𑌿𑌷𑍍𑌯𑌾𑌮𑌿 𑌭𑌰𑌦𑍍𑌵𑌾𑌜𑌾𑌶𑍍𑌰𑌮𑌂 𑌗𑍁𑌹 ।
𑌗𑌹𑌨𑍋𑌽𑌯𑌂 𑌭𑍃𑌶𑌂 𑌦𑍇𑌶𑍋 𑌗𑌙𑍍𑌗𑌾𑌽𑌨𑍂𑌪𑍋 𑌦𑍁𑌰𑌤𑍍𑌯𑌯𑌃 ॥ 4 ॥
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌰𑌾𑌜𑌪𑍁𑌤𑍍𑌰𑌸𑍍𑌯 𑌧𑍀𑌮𑌤𑌃 ।
𑌅𑌬𑍍𑌰𑌵𑍀𑌤𑍍𑌪𑍍𑌰𑌾𑌞𑍍𑌜𑌲𑌿𑌰𑍍𑌵𑌾𑌕𑍍𑌯𑌂 𑌗𑍁𑌹𑍋 𑌗𑌹𑌨𑌗𑍋𑌚𑌰𑌃 ॥ 5 ॥
𑌦𑌾𑌶𑌾𑌸𑍍𑌤𑍍𑌵𑌾𑌽𑌨𑍁𑌽𑌗𑌮𑌿𑌷𑍍𑌯𑌨𑍍𑌤𑌿 𑌧𑌨𑍍𑌵𑌿𑌨𑌸𑍍𑌸𑍁𑌸𑌮𑌾𑌹𑌿𑌤𑌾𑌃 ।
𑌅𑌹𑌂 𑌤𑍍𑌵𑌾𑌨𑍁𑌗𑌮𑌿𑌷𑍍𑌯𑌾𑌮𑌿 𑌰𑌾𑌜𑌪𑍁𑌤𑍍𑌰 𑌮𑌹𑌾𑌯𑌶𑌃 ॥ 6 ॥
𑌕𑌚𑍍𑌛𑌿𑌨𑍍𑌨𑌦𑍁𑌷𑍍𑌟𑍋 𑌵𑍍𑌰𑌜𑌸𑌿 𑌰𑌾𑌮𑌸𑍍𑌯𑌾𑌕𑍍𑌲𑌿𑌷𑍍𑌟𑌕𑌰𑍍𑌮𑌣𑌃 ।
𑌇𑌯𑌂 𑌤𑍇 𑌮𑌹𑌤𑍀 𑌸𑍇𑌨𑌾 𑌶𑌙𑍍𑌕𑌾𑌂 𑌜𑌨𑌯𑌤𑍀𑌵 𑌮𑍇 ॥ 7 ॥
𑌤𑌮𑍇𑌵𑌮𑌭𑌿𑌭𑌾𑌷𑌨𑍍𑌤𑌮𑌾𑌕𑌾𑌶 𑌇𑌵 𑌨𑌿𑌰𑍍𑌮𑌲𑌃 ।
𑌭𑌰𑌤𑌶𑍍𑌶𑍍𑌲𑌕𑍍𑌷𑍍𑌣𑌯𑌾 𑌵𑌾𑌚𑌾 𑌗𑍁𑌹𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 8 ॥
𑌮𑌾𑌭𑍂𑌤𑍍𑌸 𑌕𑌾𑌲𑍋 𑌯𑌤𑍍𑌕𑌷𑍍𑌟𑌂 𑌨 𑌮𑌾𑌂 𑌶𑌙𑍍𑌕𑌿𑌤𑍁𑌮𑌰𑍍𑌹𑌸𑌿 ।
𑌰𑌾𑌘𑌵 𑌸𑍍𑌸𑌹𑌿 𑌮𑍇 𑌭𑍍𑌰𑌾𑌤𑌾 𑌜𑍍𑌯𑍇𑌷𑍍𑌠𑌃 𑌪𑌿𑌤𑍁𑌸𑌮𑍋 𑌮𑌤𑌃 ॥ 9 ॥
𑌤𑌂 𑌨𑌿𑌵𑌰𑍍𑌤𑌯𑌿𑌤𑍁𑌂 𑌯𑌾𑌮𑌿 𑌕𑌾𑌕𑍁𑌤𑍍𑌸𑍍𑌥𑌂 𑌵𑌨𑌵𑌾𑌸𑌿𑌨𑌮𑍍 ।
𑌬𑍁𑌦𑍍𑌧𑌿𑌰𑌨𑍍𑌯𑌾 𑌨 𑌤𑍇 𑌕𑌾𑌰𑍍𑌯𑌾 𑌗𑍁𑌹 𑌸𑌤𑍍𑌯𑌂 𑌬𑍍𑌰𑌵𑍀𑌮𑌿 𑌤𑍇 ॥ 10 ॥
𑌸 𑌤𑍁 𑌸𑌂𑌹𑍃𑌷𑍍𑌟𑌵𑌦𑌨 𑌶𑍍𑌶𑍍𑌰𑍁𑌤𑍍𑌵𑌾 𑌭𑌰𑌤𑌭𑌾𑌷𑌿𑌤𑌮𑍍 ।
𑌪𑍁𑌨𑌰𑍇𑌵𑌾𑌬𑍍𑌰𑌵𑍀𑌦𑍍𑌵𑌾𑌕𑍍𑌯𑌂 𑌭𑌰𑌤𑌂 𑌪𑍍𑌰𑌤𑌿 𑌹𑌰𑍍𑌷𑌿𑌤𑌃 ॥ 11 ॥
𑌧𑌨𑍍𑌯𑌸𑍍𑌤𑍍𑌵𑌂 𑌨 𑌤𑍍𑌵𑌯𑌾 𑌤𑍁𑌲𑍍𑌯𑌂 𑌪𑌶𑍍𑌯𑌾𑌮𑌿 𑌜𑌗𑌤𑍀𑌤𑌲𑍇 ।
𑌅𑌯𑌤𑍍𑌨𑌾𑌦𑌾𑌗𑌤𑌂 𑌰𑌾𑌜𑍍𑌯𑌂 𑌯𑌸𑍍𑌤𑍍𑌵𑌂 𑌤𑍍𑌯𑌕𑍍𑌤𑍁𑌮𑌿𑌹𑍇𑌚𑍍𑌛𑌸𑌿 ॥ 12 ॥
𑌶𑌾𑌶𑍍𑌵𑌤𑍀 𑌖𑌲𑍁 𑌤𑍇 𑌕𑍀𑌰𑍍𑌤𑌿𑌰𑍍𑌲𑍋𑌕𑌾𑌨𑌨𑍁𑌚𑌰𑌿𑌷𑍍𑌯𑌤𑌿 ।
𑌯𑌸𑍍𑌤𑍍𑌵𑌂 𑌕𑍃𑌚𑍍𑌛𑍍𑌰𑌗𑌤𑌂 𑌰𑌾𑌮𑌂 𑌪𑍍𑌰𑌤𑍍𑌯𑌾𑌨𑌯𑌿𑌤𑍁𑌮𑌿𑌚𑍍𑌛𑌸𑌿 ॥ 13 ॥
𑌏𑌵𑌂 𑌸𑌮𑍍𑌭𑌾𑌷𑌮𑌾𑌣𑌸𑍍𑌯 𑌗𑍁𑌹𑌸𑍍𑌯 𑌭𑌰𑌤𑌂 𑌤𑌦𑌾 ।
𑌬𑌭𑍗 𑌨𑌷𑍍𑌟𑌪𑍍𑌰𑌭𑌸𑍍𑌸𑍂𑌰𑍍𑌯𑍋 𑌰𑌜𑌨𑍀 𑌚𑌾𑌭𑍍𑌯𑌵𑌰𑍍𑌤𑌤 ॥ 14 ॥
𑌸𑌨𑍍𑌨𑌿𑌵𑍇𑌶𑍍𑌯 𑌸 𑌤𑌾𑌂 𑌸𑍇𑌨𑌾𑌂 𑌗𑍁𑌹𑍇𑌨 𑌪𑌰𑌿𑌤𑍋𑌷𑌿𑌤𑌃 ।
𑌶𑌤𑍍𑌰𑍁𑌘𑍍𑌨𑍇𑌨 𑌸𑌹 𑌶𑍍𑌰𑍀𑌮𑌾𑌞𑍍𑌛𑌯𑌨𑌂 𑌸𑌮𑍁𑌪𑌾𑌗𑌮𑌤𑍍 ॥ 15 ॥
𑌰𑌾𑌮𑌚𑌿𑌨𑍍𑌤𑌾𑌮𑌯 𑌶𑍍𑌶𑍋𑌕𑍋 𑌭𑌰𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌉𑌪𑌸𑍍𑌥𑌿𑌤𑍋 𑌹𑍍𑌯𑌨𑌰𑍍𑌹𑌸𑍍𑌯 𑌧𑌰𑍍𑌮𑌪𑍍𑌰𑍇𑌕𑍍𑌷𑌸𑍍𑌯 𑌤𑌾𑌦𑍃𑌶𑌃 ॥ 16 ॥
𑌅𑌨𑍍𑌤𑌰𑍍𑌦𑌾𑌹𑍇𑌨 𑌦𑌹𑌨𑌸𑍍𑌸𑌨𑍍𑌤𑌾𑌪𑌯𑌤𑌿 𑌰𑌾𑌘𑌵𑌮𑍍 ।
𑌵𑌨𑌦𑌾𑌹𑌾𑌭𑌿𑌸𑌨𑍍𑌤𑌪𑍍𑌤𑌂 𑌗𑍂𑌢𑍋𑌽𑌗𑍍𑌨𑌿𑌰𑌿𑌵 𑌪𑌾𑌦𑌪𑌮𑍍 ॥ 17 ॥
𑌪𑍍𑌰𑌸𑍃𑌤𑌸𑍍𑌸𑌰𑍍𑌵𑌗𑌾𑌤𑍍𑌰𑍇𑌭𑍍𑌯𑌸𑍍𑌸𑍍𑌵𑍇𑌦𑌂 𑌶𑍋𑌕𑌾𑌗𑍍𑌨𑌿𑌸𑌮𑍍𑌭𑌵𑌮𑍍 ।
𑌯𑌥𑌾 𑌸𑍂𑌰𑍍𑌯𑌾𑌂𑌶𑍁𑌸𑌨𑍍𑌤𑌪𑍍𑌤𑍋 𑌹𑌿𑌮𑌵𑌾𑌨𑍍 𑌪𑍍𑌰𑌸𑍃𑌤𑍋𑌹𑌿𑌮𑌮𑍍 ॥ 18 ॥
𑌧𑍍𑌯𑌾𑌨𑌨𑌿𑌰𑍍𑌧𑌰𑌶𑍈𑌲𑍇𑌨 𑌵𑌿𑌨𑌿𑌶𑍍𑌶𑍍𑌵𑌸𑌿𑌤𑌧𑌾𑌤𑍁𑌨𑌾 ।
𑌦𑍈𑌨𑍍𑌯𑌪𑌾𑌦𑌪𑌸𑌙𑍍𑌘𑍇𑌨 𑌶𑍋𑌕𑌾𑌯𑌾𑌸𑌾𑌧𑌿𑌶𑍃𑌙𑍍𑌗𑌿𑌣𑌾 ॥ 19 ॥
𑌪𑍍𑌰𑌮𑍋𑌹𑌾𑌨𑌨𑍍𑌤𑌸𑌤𑍍𑌤𑍍𑌵𑍇𑌨 𑌸𑌨𑍍𑌤𑌾𑌪𑍗𑌷𑌧𑌿𑌵𑍇𑌣𑍁𑌨𑌾 ।
𑌆𑌕𑍍𑌰𑌾𑌨𑍍𑌤𑍋 𑌦𑍁𑌃𑌖𑌶𑍈𑌲𑍇𑌨 𑌮𑌹𑌤𑌾 𑌕𑍈𑌕𑌯𑍀𑌸𑍁𑌤𑌃 ॥ 20 ॥
𑌵𑌿𑌨𑌿𑌶𑍍𑌶𑍍𑌵𑌸𑌨𑍍𑌵𑍈 𑌭𑍃𑌶𑌦𑍁𑌰𑍍𑌮𑌨𑌾𑌸𑍍𑌤𑌤𑌃 𑌪𑍍𑌰𑌮𑍂𑌢𑌸𑌞𑍍𑌜𑍍𑌞𑌃 𑌪𑌰𑌮𑌾𑌪𑌦𑌂 𑌗𑌤𑌃 ।
𑌶𑌮𑌂 𑌨 𑌲𑍇𑌭𑍇 𑌹𑍃𑌦𑌯𑌜𑍍𑌵𑌰𑌾𑌰𑍍𑌦𑌿𑌤𑍋 𑌨𑌰𑌰𑍍𑌷𑌭𑍋 𑌯𑍂𑌥𑌹𑌤𑍋 𑌯𑌥𑌰𑍍𑌷𑌭𑌃 ॥ 21 ॥
𑌗𑍁𑌹𑍇𑌨 𑌸𑌾𑌰𑍍𑌧𑌂 𑌭𑌰𑌤𑌸𑍍𑌸𑌮𑌾𑌗𑌤𑍋 𑌮𑌹𑌾𑌨𑍁𑌭𑌾𑌵𑌸𑍍𑌸𑌜𑌨𑌸𑍍𑌸𑌮𑌾𑌹𑌿𑌤𑌃 ।
𑌸𑍁𑌦𑍁𑌰𑍍𑌮𑌨𑌾𑌸𑍍𑌤𑌂 𑌭𑌰𑌤𑌂 𑌤𑌦𑌾 𑌪𑍁𑌨𑌰𑍍𑌗𑍁𑌹 𑌸𑍍𑌸𑌮𑌾𑌶𑍍𑌵𑌾𑌸𑌯𑌦𑌗𑍍𑌰𑌜𑌂 𑌪𑍍𑌰𑌤𑌿 ॥ 22 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌣𑍍𑌡𑍇 𑌪𑌞𑍍𑌚𑌾𑌶𑍀𑌤𑌿𑌤𑌮𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe ayodhyākāṇḍam |
atha pañcāśītitamassargaḥ |
evamuktastu bharato niṣādādhipatiṃ guham |
pratyuvāca mahāprājño vākyaṃ hetvarthasaṃhitam || 1 ||
ūrjitaḥ khalu te kāmaḥ kṛto mama gurossakhe |
yo me tvamīdṛśīṃ senāmeko'bhyarcitumicchasi || 2 ||
ityuktvā tu mahātejā guhaṃ vacanamuttamam |
abravīdbharata śśrīmānaniṣādādhipatiṃ punaḥ || 3 ||
katareṇa gamiṣyāmi bharadvājāśramaṃ guha |
gahano'yaṃ bhṛśaṃ deśo gaṅgā'nūpo duratyayaḥ || 4 ||
tasya tadvacanaṃ śrutvā rājaputrasya dhīmataḥ |
abravītprāñjalirvākyaṃ guho gahanagocaraḥ || 5 ||
dāśāstvā'nu'gamiṣyanti dhanvinassusamāhitāḥ |
ahaṃ tvānugamiṣyāmi rājaputra mahāyaśaḥ || 6 ||
kacchinnaduṣṭo vrajasi rāmasyākliṣṭakarmaṇaḥ |
iyaṃ te mahatī senā śaṅkāṃ janayatīva me || 7 ||
tamevamabhibhāṣantamākāśa iva nirmalaḥ |
bharataśślakṣṇayā vācā guhaṃ vacanamabravīt || 8 ||
mābhūtsa kālo yatkaṣṭaṃ na māṃ śaṅkitumarhasi |
rāghava ssahi me bhrātā jyeṣṭhaḥ pitusamo mataḥ || 9 ||
taṃ nivartayituṃ yāmi kākutsthaṃ vanavāsinam |
buddhiranyā na te kāryā guha satyaṃ bravīmi te || 10 ||
sa tu saṃhṛṣṭavadana śśrutvā bharatabhāṣitam |
punarevābravīdvākyaṃ bharataṃ prati harṣitaḥ || 11 ||
dhanyastvaṃ na tvayā tulyaṃ paśyāmi jagatītale |
ayatnādāgataṃ rājyaṃ yastvaṃ tyaktumihecchasi || 12 ||
śāśvatī khalu te kīrtirlokānanucariṣyati |
yastvaṃ kṛcchragataṃ rāmaṃ pratyānayitumicchasi || 13 ||
evaṃ sambhāṣamāṇasya guhasya bharataṃ tadā |
babhau naṣṭaprabhassūryo rajanī cābhyavartata || 14 ||
sanniveśya sa tāṃ senāṃ guhena paritoṣitaḥ |
śatrughnena saha śrīmāñchayanaṃ samupāgamat || 15 ||
rāmacintāmaya śśoko bharatasya mahātmanaḥ |
upasthito hyanarhasya dharmaprekṣasya tādṛśaḥ || 16 ||
antardāhena dahanassantāpayati rāghavam |
vanadāhābhisantaptaṃ gūḍho'gniriva pādapam || 17 ||
prasṛtassarvagātrebhyassvedaṃ śokāgnisambhavam |
yathā sūryāṃśusantapto himavān prasṛtohimam || 18 ||
dhyānanirdharaśailena viniśśvasitadhātunā |
dainyapādapasaṅghena śokāyāsādhiśṛṅgiṇā || 19 ||
pramohānantasattvena santāpauṣadhiveṇunā |
ākrānto duḥkhaśailena mahatā kaikayīsutaḥ || 20 ||
viniśśvasanvai bhṛśadurmanāstataḥ pramūḍhasañjñaḥ paramāpadaṃ gataḥ |
śamaṃ na lebhe hṛdayajvarārdito nararṣabho yūthahato yatharṣabhaḥ || 21 ||
guhena sārdhaṃ bharatassamāgato mahānubhāvassajanassamāhitaḥ |
sudurmanāstaṃ bharataṃ tadā punarguha ssamāśvāsayadagrajaṃ prati || 22 ||
ityārṣe śrīmadrāmāyaṇe vālmīkīya ādikāvye ayodhyākāṇḍe pañcāśītitamassargaḥ ||
InfoLyter.in — Sacred Vedic Knowledge Portal · Free forever