2.50 Ayodhyakanda - Panchasha Sargah

ॐ

2.50 𑌅𑌯𑍋𑌧𑍍𑌯𑌾𑌕𑌾𑌣𑍍𑌡 - 𑌪𑌞𑍍𑌚𑌾𑌶 𑌸𑌰𑍍𑌗𑌃

Valmiki Grantha

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌣𑍍𑌡𑌮𑍍 ।

𑌅𑌥 𑌪𑌞𑍍𑌚𑌾𑌶𑌸𑍍𑌸𑌰𑍍𑌗𑌃 ।

𑌵𑌿𑌶𑌾𑌲𑌾𑌨𑍍 𑌕𑍋𑌸𑌲𑌾𑌨𑍍 𑌰𑌮𑍍𑌯𑌾𑌨𑍍 𑌯𑌾𑌤𑍍𑌵𑌾 𑌲𑌕𑍍𑌷𑍍𑌮𑌣𑌪𑍂𑌰𑍍𑌵𑌜𑌃 ।

𑌅𑌯𑍋𑌧𑍍𑌯𑌾𑌭𑌿𑌮𑍁𑌖𑍋 𑌧𑍀𑌮𑌾𑌨𑍍 𑌪𑍍𑌰𑌾𑌞𑍍𑌜𑌲𑌿𑌰𑍍𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 1 ॥

𑌆𑌪𑍃𑌚𑍍𑌛𑍇 𑌤𑍍𑌵𑌾𑌂 𑌪𑍁𑌰𑍀𑌶𑍍𑌰𑍇𑌷𑍍𑌠𑍇 𑌕𑌾𑌕𑍁𑌤𑍍𑌸𑍍𑌥𑌪𑌰𑌿𑌪𑌾𑌲𑌿𑌤𑍇 ।

𑌦𑍈𑌵𑌤𑌾𑌨𑌿 𑌚 𑌯𑌾𑌨𑌿 𑌤𑍍𑌵𑌾𑌂 𑌪𑌾𑌲𑌯𑌨𑍍𑌤𑌿 𑌵𑌸𑌨𑍍𑌤𑌿 𑌚 ॥ 2 ॥

𑌨𑌿𑌵𑍃𑌤𑍍𑌤𑌵𑌨𑌵𑌾𑌸𑌸𑍍𑌤𑍍𑌵𑌾𑌮𑌨𑍃𑌣𑍋 𑌜𑌗𑌤𑍀𑌪𑌤𑍇𑌃 ।

𑌪𑍁𑌨𑌰𑍍𑌦𑍍𑌰𑌕𑍍𑌷𑍍𑌯𑌾𑌮𑌿 𑌮𑌾𑌤𑍍𑌰𑌾 𑌚 𑌪𑌿𑌤𑍍𑌰𑌾 𑌚 𑌸𑌹 𑌸𑌙𑍍𑌗𑌤𑌃 ॥ 3 ॥

𑌤𑌤𑍋 𑌰𑍁𑌧𑌿𑌰𑌤𑌾𑌮𑍍𑌰𑌾𑌕𑍍𑌷𑍋 𑌭𑍁𑌜𑌮𑍁𑌦𑍍𑌯𑌮𑍍𑌯 𑌦𑌕𑍍𑌷𑌿𑌣𑌮𑍍 ।

𑌅𑌶𑍍𑌰𑍁𑌪𑍂𑌰𑍍𑌣𑌮𑍁𑌖𑍋 𑌦𑍀𑌨𑍋𑌽𑌬𑍍𑌰𑌵𑍀𑌜𑍍𑌜𑌾𑌨𑌪𑌦𑌂 𑌜𑌨𑌮𑍍 ॥ 4 ॥

𑌅𑌨𑍁𑌕𑍍𑌰𑍋𑌶𑍋 𑌦𑌯𑌾 𑌚𑍈𑌵 𑌯𑌥𑌾𑌰𑍍𑌹𑌂 𑌮𑌯𑌿 𑌵𑌃 𑌕𑍃𑌤𑌃 ।

𑌚𑌿𑌰𑌂 𑌦𑍁𑌃𑌖𑌸𑍍𑌯 𑌪𑌾𑌪𑍀𑌯𑍋 𑌗𑌮𑍍𑌯𑌤𑌾𑌮𑌰𑍍𑌥𑌸𑌿𑌦𑍍𑌧𑌯𑍇 ॥ 5 ॥

𑌤𑍇𑌽𑌭𑌿𑌵𑌾𑌦𑍍𑌯 𑌮𑌹𑌾𑌤𑍍𑌮𑌾𑌨𑌂 𑌕𑍃𑌤𑍍𑌵𑌾 𑌚𑌾𑌪𑌿 𑌪𑍍𑌰𑌦𑌕𑍍𑌷𑌿𑌣𑌮𑍍 ।

𑌵𑌿𑌲𑌪𑌨𑍍𑌤𑍋 𑌨𑌰𑌾 𑌘𑍋𑌰𑌂 𑌵𑍍𑌯𑌤𑌿𑌷𑍍𑌠𑌨𑍍𑌤 𑌕𑍍𑌵𑌚𑌿𑌤𑍍 𑌕𑍍𑌵𑌚𑌿𑌤𑍍 ॥ 6 ॥

𑌤𑌥𑌾 𑌵𑌿𑌲𑌪𑌤𑌾𑌂 𑌤𑍇𑌷𑌾𑌮𑌤𑍃𑌪𑍍𑌤𑌾𑌨𑌾𑌂 𑌚 𑌰𑌾𑌘𑌵𑌃 ।

𑌅𑌚𑌕𑍍𑌷𑍁𑌰𑍍𑌵𑌿𑌷𑌯𑌂 𑌪𑍍𑌰𑌾𑌯𑌾𑌦𑍍𑌯𑌥𑌾𑌰𑍍𑌕𑌃 𑌕𑍍𑌷𑌣𑌦𑌾𑌮𑍁𑌖𑍇 ॥ 7 ॥

𑌤𑌤𑍋 𑌧𑌾𑌨𑍍𑌯𑌧𑌨𑍋𑌪𑍇𑌤𑌾𑌨𑍍 𑌦𑌾𑌨𑌶𑍀𑌲𑌜𑌨𑌾𑌨𑍍 𑌶𑌿𑌵𑌾𑌨𑍍 ।

𑌅𑌕𑍁𑌤𑌶𑍍𑌚𑌿𑌦𑍍𑌭𑌯𑌾𑌨𑍍 𑌰𑌮𑍍𑌯𑌾𑌂𑌶𑍍𑌚𑍈𑌤𑍍𑌯𑌯𑍂𑌪𑌸𑌮𑌾𑌵𑍃𑌤𑌾𑌨𑍍 ॥ 8 ॥

𑌉𑌦𑍍𑌯𑌾𑌨𑌾𑌮𑍍𑌰𑌵𑌨𑍋𑌪𑍇𑌤𑌾𑌨𑍍 𑌸𑌮𑍍𑌪𑌨𑍍𑌨𑌸𑌲𑌿𑌲𑌾𑌶𑌯𑌾𑌨𑍍 ।

𑌤𑍁𑌷𑍍𑌟𑌪𑍁𑌷𑍍𑌟𑌜𑌨𑌾𑌕𑍀𑌰𑍍𑌣𑌾𑌨𑍍 𑌗𑍋𑌕𑍁𑌲𑌾𑌕𑍁𑌲𑌸𑍇𑌵𑌿𑌤𑌾𑌨𑍍 ॥ 9 ॥

𑌲𑌕𑍍𑌷𑌣𑍀𑌯𑌾𑌨𑍍𑌨𑌰𑍇𑌨𑍍𑌦𑍍𑌰𑌾𑌣𑌾𑌂 𑌬𑍍𑌰𑌹𑍍𑌮𑌘𑍋𑌷𑌾𑌭𑌿𑌨𑌾𑌦𑌿𑌤𑌾𑌨𑍍 ।

𑌰𑌥𑍇𑌨 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑌃 𑌕𑍋𑌸𑌲𑌾𑌨𑌤𑍍𑌯𑌵𑌰𑍍𑌤𑌤 ॥ 10 ॥

𑌮𑌧𑍍𑌯𑍇𑌨𑌮𑍁𑌦𑌿𑌤𑌂 𑌸𑍍𑌫𑍀𑌤𑌂 𑌰𑌮𑍍𑌯𑍋𑌦𑍍𑌯𑌾𑌨𑌸𑌮𑌾𑌕𑍁𑌲𑌮𑍍 ।

𑌰𑌾𑌜𑍍𑌯𑌂 𑌭𑍋𑌗𑍍𑌯𑌂 𑌨𑌰𑍇𑌨𑍍𑌦𑍍𑌰𑌾𑌣𑌾𑌂 𑌯𑌯𑍗 𑌧𑍃𑌤𑌿𑌮𑌤𑌾𑌂 𑌵𑌰𑌃 ॥ 11 ॥

𑌤𑌤 𑌸𑍍𑌤𑍍𑌰𑌿𑌪𑌥𑌗𑌾𑌂 𑌦𑌿𑌵𑍍𑌯𑌾𑌂 𑌶𑌿𑌵𑌤𑍋𑌯𑌾𑌮𑌶𑍈𑌵𑌲𑌾𑌮𑍍 ।

𑌦𑌦𑌰𑍍𑌶 𑌰𑌾𑌘𑌵𑍋 𑌗𑌙𑍍𑌗𑌾𑌂 𑌪𑍁𑌣𑍍𑌯𑌾𑌮𑍃𑌷𑌿𑌨𑌿𑌷𑍇𑌵𑌿𑌤𑌾𑌮𑍍 ॥ 12 ॥

𑌆𑌶𑍍𑌰𑌮𑍈𑌰𑌵𑌿𑌦𑍂𑌰𑌸𑍍𑌥𑍈𑌃 𑌶𑍍𑌰𑍀𑌮𑌦𑍍𑌭𑌿𑌸𑍍𑌸𑌮𑌲𑌙𑍍𑌕𑍃𑌤𑌾𑌮𑍍 ।

𑌕𑌾𑌲𑍇𑌽𑌪𑍍𑌸𑌰𑍋𑌭𑌿𑌰𑍍𑌹𑍃𑌷𑍍𑌟𑌾𑌭𑌿 𑌸𑍍𑌸𑍇𑌵𑌿𑌤𑌾𑌮𑍍𑌭𑍋𑌹𑍍𑌰𑌦𑌾𑌂 𑌶𑌿𑌵𑌾𑌮𑍍 ॥ 13 ॥

𑌦𑍇𑌵𑌦𑌾𑌨𑌵𑌗𑌨𑍍𑌧𑌰𑍍𑌵𑍈𑌃 𑌕𑌿𑌨𑍍𑌨𑌰𑍈𑌰𑍁𑌪𑌶𑍋𑌭𑌿𑌤𑌾𑌮𑍍 ।

𑌨𑌾𑌨𑌾𑌗𑌨𑍍𑌧𑌰𑍍𑌵𑌪𑌤𑍍𑌨𑍀𑌭𑌿 𑌸𑍍𑌸𑍇𑌵𑌿𑌤𑌾𑌂 𑌸𑌤𑌤𑌂 𑌶𑌿𑌵𑌾𑌮𑍍 ॥ 14 ॥

𑌦𑍇𑌵𑌾𑌽𑌽𑌕𑍍𑌰𑍀𑌡𑌶𑌤𑌾𑌕𑍀𑌰𑍍𑌣𑌾𑌂 𑌦𑍇𑌵𑍋𑌦𑍍𑌯𑌾𑌨𑌶𑌤𑌾𑌯𑍁𑌤𑌾𑌮𑍍 ।

𑌦𑍇𑌵𑌾𑌰𑍍𑌥𑌮𑌾𑌕𑌾𑌶𑌗𑌮𑌾𑌂 𑌵𑌿𑌖𑍍𑌯𑌾𑌤𑌾𑌂 𑌦𑍇𑌵𑌪𑌦𑍍𑌮𑌿𑌨𑍀𑌮𑍍 ॥ 15 ॥

𑌜𑌲𑌾𑌘𑌾𑌤𑌾𑌟𑍍𑌟𑌹𑌾𑌸𑍋𑌗𑍍𑌰𑌾𑌂 𑌫𑍇𑌨𑌨𑌿𑌰𑍍𑌮𑌲𑌹𑌾𑌸𑌿𑌨𑍀𑌮𑍍 ।

𑌕𑍍𑌵𑌚𑌿𑌦𑍍𑌵𑍇𑌣𑍀𑌕𑍃𑌤𑌜𑌲𑌾𑌂 𑌕𑍍𑌵𑌚𑌿𑌦𑌾𑌵𑌰𑍍𑌤𑌶𑍋𑌭𑌿𑌤𑌾𑌮𑍍 ॥ 16 ॥

𑌕𑍍𑌵𑌚𑌿𑌤𑍍 𑌸𑍍𑌤𑌿𑌮𑌿𑌤𑌗𑌮𑍍𑌭𑍀𑌰𑌾𑌂 𑌕𑍍𑌵𑌚𑌿𑌦𑍍𑌵𑍇𑌗𑌜𑌲𑌾𑌕𑍁𑌲𑌾𑌮𑍍 ।

𑌕𑍍𑌵𑌚𑌿𑌦𑍍𑌗𑌮𑍍𑌭𑍀𑌰𑌨𑌿𑌰𑍍𑌘𑍋𑌷𑌾𑌂 𑌕𑍍𑌵𑌚𑌿𑌦𑍍𑌭𑍈𑌰𑌵𑌨𑌿𑌸𑍍𑌵𑌨𑌾𑌮𑍍 ॥ 17 ॥

𑌦𑍇𑌵𑌸𑌙𑍍𑌘𑌾𑌪𑍍𑌲𑍁𑌤𑌜𑌲𑌾𑌂 𑌨𑌿𑌰𑍍𑌮𑌲𑍋𑌤𑍍𑌪𑌲𑌶𑍋𑌭𑌿𑌤𑌾𑌮𑍍 ।

𑌕𑍍𑌵𑌚𑌿𑌦𑌾𑌭𑍋𑌗𑌪𑍁𑌲𑌿𑌨𑌾𑌂 𑌕𑍍𑌵𑌚𑌿𑌨𑍍𑌨𑌿𑌰𑍍𑌮𑌲𑌵𑌾𑌲𑍁𑌕𑌾𑌮𑍍 ॥ 18 ॥

𑌹𑌂𑌸𑌸𑌾𑌰𑌸𑌸𑌙𑍍𑌘𑍁𑌷𑍍𑌟𑌾𑌂 𑌚𑌕𑍍𑌰𑌵𑌾𑌕𑍋𑌪𑌕𑍂𑌜𑌿𑌤𑌾𑌮𑍍 ।

𑌸𑌦𑌾 𑌮𑌦𑍈𑌶𑍍𑌚 𑌵𑌿𑌹𑌗𑍈𑌰𑌭𑌿𑌸𑌨𑍍𑌨𑌾𑌦𑌿𑌤𑌾𑌨𑍍𑌤𑌰𑌾𑌮𑍍 ॥ 19 ॥

𑌕𑍍𑌵𑌚𑌿𑌤𑍍𑌤𑍀𑌰𑌰𑍁𑌹𑍈𑌰𑍍𑌵𑍃𑌕𑍍𑌷𑍈𑌰𑍍𑌮𑌾𑌲𑌾𑌭𑌿𑌰𑌿𑌵𑌶𑍋𑌭𑌿𑌤𑌾𑌮𑍍 ।

𑌕𑍍𑌵𑌚𑌿𑌤𑍍𑌫𑍁𑌲𑍍𑌲𑍋𑌤𑍍𑌪𑌲𑌚𑍍𑌛𑌨𑍍𑌨𑌾𑌂 𑌕𑍍𑌵𑌚𑌿𑌤𑍍𑌪𑌦𑍍𑌮𑌵𑌨𑌾𑌕𑍁𑌲𑌾𑌮𑍍 ॥ 20 ॥

𑌕𑍍𑌵𑌚𑌿𑌤𑍍𑌕𑍁𑌮𑍁𑌦𑌷𑌣𑍍𑌡𑍈𑌶𑍍𑌚 𑌕𑍁𑌡𑍍𑌮𑌲𑍈𑌰𑍁𑌪𑌶𑍋𑌭𑌿𑌤𑌾𑌮𑍍 ।

𑌨𑌾𑌨𑌾𑌪𑍁𑌷𑍍𑌪𑌰𑌜𑍋𑌧𑍍𑌵𑌸𑍍𑌤𑌾𑌂 𑌸𑌮𑌦𑌾𑌮𑌿𑌵 𑌚 𑌕𑍍𑌵𑌚𑌿𑌤𑍍 ॥ 21 ॥

𑌵𑍍𑌯𑌪𑍇𑌤𑌮𑌲𑌸𑌙𑍍𑌘𑌾𑌤𑌾𑌂 𑌮𑌣𑌿𑌨𑌿𑌰𑍍𑌮𑌲𑌦𑌰𑍍𑌶𑌨𑌾𑌮𑍍 ।

𑌦𑌿𑌶𑌾𑌗𑌜𑍈𑌰𑍍𑌵𑌨𑌗𑌜𑍈 𑌰𑍍𑌮𑌤𑍍𑌤𑍈𑌶𑍍𑌚 𑌵𑌰𑌵𑌾𑌰𑌣𑍈𑌃 ॥ 22 ॥

𑌦𑍇𑌵𑍋𑌪𑌵𑌾𑌹𑍍𑌯𑍈𑌶𑍍𑌚 𑌮𑍁𑌹𑍁𑌸𑍍𑌸𑌨𑍍𑌨𑌾𑌦𑌿𑌤𑌵𑌨𑌾𑌨𑍍𑌤𑌰𑌾𑌮𑍍 ।

𑌪𑍍𑌰𑌮𑌦𑌾𑌮𑌿𑌵 𑌯𑌤𑍍𑌨𑍇𑌨 𑌭𑍂𑌷𑌿𑌤𑌾𑌂 𑌭𑍂𑌷𑌣𑍋𑌤𑍍𑌤𑌮𑍈𑌃 ॥ 23 ॥

𑌫𑌲𑍈𑌃 𑌪𑍁𑌷𑍍𑌪𑍈𑌃 𑌕𑌿𑌸𑌲𑌯𑍈𑌰𑍍𑌵𑍃𑌤𑌾𑌂 𑌗𑍁𑌲𑍍𑌮𑍈𑌰𑍍𑌦𑍍𑌵𑌿𑌜𑍈𑌸𑍍𑌤𑌥𑌾 ।

𑌶𑌿𑌂𑌶𑍁𑌮𑌾𑌰𑍈𑌶𑍍𑌚 𑌨𑌕𑍍𑌰𑍈𑌶𑍍𑌚 𑌭𑍁𑌜𑌙𑍍𑌗𑍈𑌶𑍍𑌚 𑌨𑌿𑌷𑍇𑌵𑌿𑌤𑌾𑌮𑍍 ॥ 24 ॥

𑌵𑌿𑌷𑍍𑌣𑍁𑌪𑌾𑌦𑌚𑍍𑌯𑍁𑌤𑌾𑌂 𑌦𑌿𑌵𑍍𑌯𑌾𑌮𑌪𑌾𑌪𑌾𑌂 𑌪𑌾𑌪𑌨𑌾𑌶𑌿𑌨𑍀𑌮𑍍 ।

𑌤𑌾𑌂 𑌶𑌙𑍍𑌕𑌰𑌜𑌟𑌾𑌜𑍂𑌟𑌾𑌦𑍍𑌭𑍍𑌰𑌷𑍍𑌟𑌾𑌂 𑌸𑌾𑌗𑌰𑌤𑍇𑌜𑌸𑌾 ॥ 25 ॥

𑌸𑌮𑍁𑌦𑍍𑌰𑌮𑌹𑌿𑌷𑍀𑌂 𑌗𑌙𑍍𑌗𑌾𑌂 𑌸𑌾𑌰𑌸𑌕𑍍𑌰𑍗𑌞𑍍𑌚𑌨𑌾𑌦𑌿𑌤𑌾𑌮𑍍 ।

𑌆𑌸𑌸𑌾𑌦 𑌮𑌹𑌾𑌬𑌾𑌹𑍁𑌃 𑌶𑍃𑌙𑍍𑌗𑌿𑌬𑍇𑌰𑌪𑍁𑌰𑌂 𑌪𑍍𑌰𑌤𑌿 ॥ 26 ॥

𑌤𑌾𑌮𑍂𑌰𑍍𑌮𑌿𑌕𑌲𑌿𑌲𑌾𑌵𑌰𑍍𑌤𑌾𑌮𑌨𑍍𑌵𑌵𑍇𑌕𑍍𑌷𑍍𑌯 𑌮𑌹𑌾𑌰𑌥𑌃 ।

𑌸𑍁𑌮𑌨𑍍𑌤𑍍𑌰𑌮𑌬𑍍𑌰𑌵𑍀𑌤𑍍𑌸𑍂𑌤𑌮𑌿𑌹𑍈𑌵𑌾𑌦𑍍𑌯 𑌵𑌸𑌾𑌮𑌹𑍇 ॥ 27 ॥

𑌅𑌵𑌿𑌦𑍂𑌰𑌾𑌦𑌯𑌂 𑌨𑌦𑍍𑌯𑌾 𑌬𑌹𑍁𑌪𑍁𑌷𑍍𑌪𑌪𑍍𑌰𑌵𑌾𑌲𑌵𑌾𑌨𑍍 ।

𑌸𑍁𑌮𑌹𑌾𑌨𑌿𑌙𑍍𑌗𑍁𑌦𑍀𑌵𑍃𑌕𑍍𑌷𑍋 𑌵𑌸𑌾𑌮𑍋𑌽𑌤𑍍𑌰𑍈𑌵 𑌸𑌾𑌰𑌥𑍇 ॥ 28 ॥

𑌦𑍍𑌰𑌕𑍍𑌷𑍍𑌯𑌾𑌮 𑌸𑍍𑌸𑌰𑌿𑌤𑌾𑌂 𑌶𑍍𑌰𑍇𑌷𑍍𑌠𑌾𑌂 𑌸𑌮𑍍𑌮𑌾𑌨𑍍𑌯𑌸𑌲𑌿𑌲𑌾𑌂 𑌶𑌿𑌵𑌾𑌮𑍍 ।

𑌦𑍇𑌵𑌦𑌾𑌨𑌵𑌗𑌨𑍍𑌧𑌰𑍍𑌵𑌮𑍃𑌗𑌮𑌾𑌨𑍁𑌷𑌪𑌕𑍍𑌷𑌿𑌣𑌾𑌮𑍍 ॥ 29 ॥

𑌲𑌕𑍍𑌷𑍍𑌮𑌣𑌶𑍍𑌚 𑌸𑍁𑌮𑌨𑍍𑌤𑍍𑌰𑌶𑍍𑌚 𑌬𑌾𑌢𑌮𑌿𑌤𑍍𑌯𑍇𑌵 𑌰𑌾𑌘𑌵𑌮𑍍 ।

𑌉𑌕𑍍𑌤𑍍𑌵𑌾 𑌤𑌮𑌿𑌙𑍍𑌗𑍁𑌦𑍀𑌵𑍃𑌕𑍍𑌷𑌂 𑌤𑌦𑍋𑌪𑌯𑌯𑌤𑍁𑌰𑍍𑌹𑌯𑍈𑌃 ॥ 30 ॥

𑌰𑌾𑌮𑍋𑌽𑌭𑌿𑌯𑌾𑌯 𑌤𑌂 𑌰𑌮𑍍𑌯𑌂 𑌵𑍃𑌕𑍍𑌷𑌮𑌿𑌕𑍍𑌷𑍍𑌵𑌾𑌕𑍁𑌨𑌨𑍍𑌦𑌨𑌃 ।

𑌰𑌥𑌾𑌦𑌵𑌾𑌤𑌰𑌤𑍍𑌤𑌸𑍍𑌮𑌾𑌤𑍍𑌸𑌭𑌾𑌰𑍍𑌯 𑌸𑍍𑌸𑌹𑌲𑌕𑍍𑌷𑍍𑌮𑌣𑌃 ॥ 31 ॥

𑌸𑍁𑌮𑌨𑍍𑌤𑍍𑌰𑍋𑌽𑌪𑍍𑌯𑌵𑌤𑍀𑌰𑍍𑌯𑌾𑌸𑍍𑌮𑌾𑌨𑍍𑌮𑍋𑌚𑌯𑌿𑌤𑍍𑌵𑌾 𑌹𑌯𑍋𑌤𑍍𑌤𑌮𑌾𑌨𑍍 ।

𑌵𑍃𑌕𑍍𑌷𑌮𑍂𑌲𑌗𑌤𑌂 𑌰𑌾𑌮𑌮𑍁𑌪𑌤𑌸𑍍𑌥𑍇 𑌕𑍃𑌤𑌾𑌞𑍍𑌜𑌲𑌿𑌃 ॥ 32 ॥

𑌤𑌤𑍍𑌰 𑌰𑌾𑌜𑌾 𑌗𑍁𑌹𑍋 𑌨𑌾𑌮 𑌰𑌾𑌮𑌸𑍍𑌯𑌾𑌤𑍍𑌮𑌸𑌮𑌸𑍍𑌸𑌖𑌾 ।

𑌨𑌿𑌷𑌾𑌦𑌜𑌾𑌤𑍍𑌯𑍋 𑌬𑌲𑌵𑌾𑌨𑍍 𑌸𑍍𑌥𑌪𑌤𑌿𑌶𑍍𑌚𑍇𑌤𑌿 𑌵𑌿𑌶𑍍𑌰𑍁𑌤𑌃 ॥ 33 ॥

𑌸 𑌶𑍃𑌤𑍍𑌵𑌾 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑌂 𑌰𑌾𑌮𑌂 𑌵𑌿𑌷𑌯𑌮𑌾𑌗𑌤𑌮𑍍 ।

𑌵𑍃𑌦𑍍𑌧𑍈𑌃 𑌪𑌰𑌿𑌵𑍃𑌤𑍋𑌽𑌮𑌾𑌤𑍍𑌯𑍈𑌃 𑌜𑍍𑌞𑌾𑌤𑌿𑌭𑌿𑌶𑍍𑌚𑌾𑌭𑍍𑌯𑍁𑌪𑌾𑌗𑌤𑌃 ॥ 34 ॥

𑌤𑌤𑍋 𑌨𑌿𑌷𑌾𑌦𑌾𑌧𑌿𑌪𑌤𑌿𑌂 𑌦𑍃𑌷𑍍𑌟𑍍𑌵𑌾 𑌦𑍂𑌰𑌾𑌦𑍁𑌪𑌸𑍍𑌥𑌿𑌤𑌮𑍍 ।

𑌸𑌹 𑌸𑍗𑌮𑌿𑌤𑍍𑌰𑌿𑌣𑌾 𑌰𑌾𑌮 𑌸𑍍𑌸𑌮𑌾𑌗𑌚𑍍𑌛𑌦𑍍𑌗𑍁𑌹𑍇𑌨 𑌸𑌃 ॥ 35 ॥

𑌤𑌮𑌾𑌰𑍍𑌤𑌸𑍍𑌸𑌮𑍍𑌪𑌰𑌿𑌷𑍍𑌵𑌜𑍍𑌯 𑌗𑍁𑌹𑍋 𑌰𑌾𑌘𑌵𑌮𑌬𑍍𑌰𑌵𑍀𑌤𑍍 ।

𑌯𑌥𑌾𑌽𑌯𑍋𑌧𑍍𑌯𑌾 𑌤𑌥𑍇𑌯𑌂 𑌤𑍇 𑌰𑌾𑌮 𑌕𑌿𑌂 𑌕𑌰𑌵𑌾𑌣𑌿 𑌤𑍇 ॥ 36 ॥

𑌈𑌦𑍃𑌶𑌂 𑌹𑌿 𑌮𑌹𑌾𑌬𑌾𑌹𑍋 𑌕𑌃 𑌪𑍍𑌰𑌾𑌪𑍍𑌸𑍍𑌯𑌤𑍍𑌯𑌤𑌿𑌥𑌿𑌂 𑌪𑍍𑌰𑌿𑌯𑌮𑍍 ।

𑌤𑌤𑍋 𑌗𑍁𑌣𑌵𑌦𑌨𑍍𑌨𑌾𑌦𑍍𑌯𑌮𑍁𑌪𑌾𑌦𑌾𑌯 𑌪𑍃𑌥𑌗𑍍𑌵𑌿𑌧𑌮𑍍 ॥ 37 ॥

𑌅𑌰𑍍𑌘𑍍𑌯𑌂 𑌚𑍋𑌪𑌾𑌨𑌯𑌤𑍍𑌕𑍍𑌷𑌿𑌪𑍍𑌰𑌂 𑌵𑌾𑌕𑍍𑌯𑌂 𑌚𑍇𑌦𑌮𑍁𑌵𑌾𑌚 𑌹 ।

𑌸𑍍𑌵𑌾𑌗𑌤𑌂 𑌤𑍇 𑌮𑌹𑌾𑌬𑌾𑌹𑍋 𑌤𑌵𑍇𑌯𑌮𑌖𑌿𑌲𑌾 𑌮𑌹𑍀 ॥ 38 ॥

𑌵𑌯𑌂 𑌪𑍍𑌰𑍇𑌷𑍍𑌯𑌾 𑌭𑌵𑌾𑌨𑍍𑌭𑌰𑍍𑌤𑌾 𑌸𑌾𑌧𑍁 𑌰𑌾𑌜𑍍𑌯𑌂 𑌪𑍍𑌰𑌶𑌾𑌧𑌿 𑌨𑌃 ।

𑌭𑌕𑍍𑌷𑍍𑌯𑌂 𑌭𑍋𑌜𑍍𑌯𑌂 𑌚 𑌪𑍇𑌯𑌂 𑌚 𑌲𑍇𑌹𑍍𑌯𑌞𑍍𑌚𑍇𑌦𑌮𑍁𑌪𑌸𑍍𑌥𑌿𑌤𑌮𑍍 ॥ 39 ॥

𑌶𑌯𑌨𑌾𑌨𑌿 𑌚 𑌮𑍁𑌖𑍍𑌯𑌾𑌨𑌿 𑌵𑌾𑌜𑌿𑌨𑌾𑌂 𑌖𑌾𑌦𑌨𑌂 𑌚 𑌤𑍇 ।

𑌏𑌵𑌂 𑌬𑍍𑌰𑍁𑌵𑌾𑌣𑌂 𑌤𑍁 𑌗𑍁𑌹𑌂 𑌰𑌾𑌘𑌵𑌃 𑌪𑍍𑌰𑌤𑍍𑌯𑍁𑌵𑌾𑌚 𑌹 ॥ 40 ॥

𑌅𑌰𑍍𑌚𑌿𑌤𑌾𑌶𑍍𑌚𑍈𑌵 𑌹𑍃𑌷𑍍𑌟𑌾𑌶𑍍𑌚 𑌭𑌵𑌤𑌾 𑌸𑌰𑍍𑌵𑌥𑌾 𑌵𑌯𑌮𑍍 ।

𑌪𑌦𑍍𑌭𑍍𑌯𑌾𑌮𑌭𑌿𑌗𑌮𑌾𑌚𑍍𑌚𑍈𑌵 𑌸𑍍𑌨𑍇𑌹𑌸𑌨𑍍𑌦𑌰𑍍𑌶𑌨𑍇𑌨 𑌚 ॥ 41 ॥

𑌭𑍁𑌜𑌾𑌭𑍍𑌯𑌾𑌂 𑌸𑌾𑌧𑍁 𑌪𑍀𑌨𑌾𑌭𑍍𑌯𑌾𑌂 𑌪𑍀𑌡𑌯𑌨𑍍𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।

𑌦𑌿𑌷𑍍𑌟𑍍𑌯𑌾 𑌤𑍍𑌵𑌾𑌂 𑌗𑍁𑌹 𑌪𑌶𑍍𑌯𑌾𑌮𑌿 𑌹𑍍𑌯𑌰𑍋𑌗𑌂 𑌸𑌹 𑌬𑌾𑌨𑍍𑌧𑌵𑍈𑌃 ।

𑌅𑌪𑌿 𑌤𑍇 𑌕𑍁𑌶𑌲𑌂 𑌰𑌾𑌷𑍍𑌟𑍍𑌰𑍇 𑌮𑌿𑌤𑍍𑌰𑍇𑌷𑍁 𑌚 𑌧𑌨𑍇𑌷𑍁 𑌚 ॥ 42 ॥

𑌯𑌤𑍍𑌤𑍍𑌵𑌿𑌦𑌂 𑌭𑌵𑌤𑌾 𑌕𑌿𑌞𑍍𑌚𑌿𑌤𑍍𑌪𑍍𑌰𑍀𑌤𑍍𑌯𑌾 𑌸𑌮𑍁𑌪𑌕𑌲𑍍𑌪𑌿𑌤𑌮𑍍 ।

𑌸𑌰𑍍𑌵𑌂 𑌤𑌦𑌨𑍁𑌜𑌾𑌨𑌾𑌮𑌿 𑌨 𑌹𑌿 𑌵𑌰𑍍𑌤𑍇 𑌪𑍍𑌰𑌤𑌿𑌗𑍍𑌰𑌹𑍇 ॥ 43 ॥

𑌕𑍁𑌶𑌚𑍀𑌰𑌾𑌜𑌿𑌨𑌧𑌰𑌂 𑌫𑌲𑌮𑍂𑌲𑌾𑌶𑌿𑌨𑌂 𑌚 𑌮𑌾𑌮𑍍 ।

𑌵𑌿𑌦𑍍𑌧𑌿 𑌪𑍍𑌰𑌣𑌿𑌹𑌿𑌤𑌂 𑌧𑌰𑍍𑌮𑍇 𑌤𑌾𑌪𑌸𑌂 𑌵𑌨𑌗𑍋𑌚𑌰𑌮𑍍 ॥ 44 ॥

𑌅𑌶𑍍𑌵𑌾𑌨𑌾𑌂 𑌖𑌾𑌦𑌨𑍇𑌨𑌾𑌹𑌮𑌰𑍍𑌥𑍀 𑌨𑌾𑌨𑍍𑌯𑍇𑌨 𑌕𑍇𑌨𑌚𑌿𑌤𑍍 ।

𑌏𑌤𑌾𑌵𑌤𑌾𑌽𑌤𑍍𑌰 𑌭𑌵𑌤𑌾 𑌭𑌵𑌿𑌷𑍍𑌯𑌾𑌮𑌿 𑌸𑍁𑌪𑍂𑌜𑌿𑌤𑌃 ॥ 45 ॥

𑌏𑌤𑍇 𑌹𑌿 𑌦𑌯𑌿𑌤𑌾 𑌰𑌾𑌜𑍍𑌞𑌃 𑌪𑌿𑌤𑍁𑌰𑍍𑌦𑌶𑌰𑌥𑌸𑍍𑌯 𑌮𑍇 ।

𑌏𑌤𑍈𑌸𑍍𑌸𑍁𑌵𑌿𑌹𑌿𑌤𑍈𑌰𑌶𑍍𑌵𑍈 𑌭𑌵𑌿𑌷𑍍𑌯𑌾𑌮𑍍𑌯𑌹𑌮𑌰𑍍𑌚𑌿𑌤𑌃 ॥ 46 ॥

𑌅𑌶𑍍𑌵𑌾𑌨𑌾𑌂 𑌪𑍍𑌰𑌤𑌿𑌪𑌾𑌨𑌂 𑌚 𑌖𑌾𑌦𑌨𑌂 𑌚𑍈𑌵 𑌸𑍋𑌽𑌨𑍍𑌵𑌶𑌾𑌤𑍍 ।

𑌗𑍁𑌹𑌸𑍍𑌤𑌤𑍍𑌰𑍈𑌵 𑌪𑍁𑌰𑍁𑌷𑌾𑌂 𑌸𑍍𑌤𑍍𑌵𑌰𑌿𑌤𑌂 𑌦𑍀𑌯𑌤𑌾𑌮𑌿𑌤𑌿 ॥ 47 ॥

𑌤𑌤𑌶𑍍𑌚𑍀𑌰𑍋𑌤𑍍𑌤𑌰𑌾𑌸𑌙𑍍𑌗𑌃 𑌸𑌨𑍍𑌧𑍍𑌯𑌾𑌮𑌨𑍍𑌵𑌾𑌸𑍍𑌯 𑌪𑌶𑍍𑌚𑌿𑌮𑌾𑌮𑍍 ।

𑌜𑌲𑌮𑍇𑌵𑌾𑌦𑌦𑍇 𑌭𑍋𑌜𑍍𑌯𑌂 𑌲𑌕𑍍𑌷𑍍𑌮𑌣𑍇𑌨𑌾𑌽𑌽𑌹𑍃𑌤𑌂 𑌸𑍍𑌵𑌯𑌮𑍍 ॥ 48 ॥

𑌤𑌸𑍍𑌯 𑌭𑍂𑌮𑍗 𑌶𑌯𑌾𑌨𑌸𑍍𑌯 𑌪𑌾𑌦𑍗 𑌪𑍍𑌰𑌕𑍍𑌷𑌾𑌲𑍍𑌯 𑌲𑌕𑍍𑌷𑍍𑌮𑌣𑌃 ।

𑌸𑌭𑌾𑌰𑍍𑌯𑌸𑍍𑌯 𑌤𑌤𑍋𑌽𑌭𑍍𑌯𑍇𑌤𑍍𑌯 𑌤𑌸𑍍𑌥𑍗 𑌵𑍃𑌕𑍍𑌷𑌮𑍁𑌪𑌾𑌶𑍍𑌰𑌿𑌤𑌃 ॥ 49 ॥

𑌗𑍁𑌹𑍋𑌽𑌪𑌿 𑌸𑌹 𑌸𑍂𑌤𑍇𑌨 𑌸𑍗𑌮𑌿𑌤𑍍𑌰𑌿𑌮𑌨𑍁𑌭𑌾𑌷𑌯𑌨𑍍 ।

𑌅𑌨𑍍𑌵𑌜𑌾𑌗𑍍𑌰𑌤𑍍𑌤𑌤𑍋 𑌰𑌾𑌮𑌮𑌪𑍍𑌰𑌮𑌤𑍍𑌤𑍋 𑌧𑌨𑍁𑌰𑍍𑌧𑌰𑌃 ॥ 50 ॥

𑌤𑌥𑌾 𑌶𑌯𑌾𑌨𑌸𑍍𑌯 𑌤𑌤𑍋𑌽𑌸𑍍𑌯 𑌧𑍀𑌮𑌤𑍋 𑌯𑌶𑌸𑍍𑌵𑌿𑌨𑍋 𑌦𑌾𑌶𑌰𑌥𑍇𑌰𑍍𑌮𑌹𑌾𑌤𑍍𑌮𑌨𑌃 ।

𑌅𑌦𑍃𑌷𑍍𑌟𑌦𑍁𑌃𑌖𑌸𑍍𑌯 𑌸𑍁𑌖𑍋𑌚𑌿𑌤𑌸𑍍𑌯 𑌸𑌾 𑌤𑌦𑌾𑌵𑍍𑌯𑌤𑍀𑌯𑌾𑌯 𑌚𑌿𑌰𑍇𑌣 𑌶𑌰𑍍𑌵𑌰𑍀 ॥ 51 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌣𑍍𑌡𑍇 𑌪𑌞𑍍𑌚𑌾𑌶𑌸𑍍𑌸𑌰𑍍𑌗𑌃 ॥

Roman (IAST) Transliteration

śrīmadvālmīkīya rāmāyaṇe ayodhyākāṇḍam |

atha pañcāśassargaḥ |

viśālān kosalān ramyān yātvā lakṣmaṇapūrvajaḥ |

ayodhyābhimukho dhīmān prāñjalirvākyamabravīt || 1 ||

āpṛcche tvāṃ purīśreṣṭhe kākutsthaparipālite |

daivatāni ca yāni tvāṃ pālayanti vasanti ca || 2 ||

nivṛttavanavāsastvāmanṛṇo jagatīpateḥ |

punardrakṣyāmi mātrā ca pitrā ca saha saṅgataḥ || 3 ||

tato rudhiratāmrākṣo bhujamudyamya dakṣiṇam |

aśrupūrṇamukho dīno'bravījjānapadaṃ janam || 4 ||

anukrośo dayā caiva yathārhaṃ mayi vaḥ kṛtaḥ |

ciraṃ duḥkhasya pāpīyo gamyatāmarthasiddhaye || 5 ||

te'bhivādya mahātmānaṃ kṛtvā cāpi pradakṣiṇam |

vilapanto narā ghoraṃ vyatiṣṭhanta kvacit kvacit || 6 ||

tathā vilapatāṃ teṣāmatṛptānāṃ ca rāghavaḥ |

acakṣurviṣayaṃ prāyādyathārkaḥ kṣaṇadāmukhe || 7 ||

tato dhānyadhanopetān dānaśīlajanān śivān |

akutaścidbhayān ramyāṃścaityayūpasamāvṛtān || 8 ||

udyānāmravanopetān sampannasalilāśayān |

tuṣṭapuṣṭajanākīrṇān gokulākulasevitān || 9 ||

lakṣaṇīyānnarendrāṇāṃ brahmaghoṣābhināditān |

rathena puruṣavyāghraḥ kosalānatyavartata || 10 ||

madhyenamuditaṃ sphītaṃ ramyodyānasamākulam |

rājyaṃ bhogyaṃ narendrāṇāṃ yayau dhṛtimatāṃ varaḥ || 11 ||

tata stripathagāṃ divyāṃ śivatoyāmaśaivalām |

dadarśa rāghavo gaṅgāṃ puṇyāmṛṣiniṣevitām || 12 ||

āśramairavidūrasthaiḥ śrīmadbhissamalaṅkṛtām |

kāle'psarobhirhṛṣṭābhi ssevitāmbhohradāṃ śivām || 13 ||

devadānavagandharvaiḥ kinnarairupaśobhitām |

nānāgandharvapatnībhi ssevitāṃ satataṃ śivām || 14 ||

devā''krīḍaśatākīrṇāṃ devodyānaśatāyutām |

devārthamākāśagamāṃ vikhyātāṃ devapadminīm || 15 ||

jalāghātāṭṭahāsogrāṃ phenanirmalahāsinīm |

kvacidveṇīkṛtajalāṃ kvacidāvartaśobhitām || 16 ||

kvacit stimitagambhīrāṃ kvacidvegajalākulām |

kvacidgambhīranirghoṣāṃ kvacidbhairavanisvanām || 17 ||

devasaṅghāplutajalāṃ nirmalotpalaśobhitām |

kvacidābhogapulināṃ kvacinnirmalavālukām || 18 ||

haṃsasārasasaṅghuṣṭāṃ cakravākopakūjitām |

sadā madaiśca vihagairabhisannāditāntarām || 19 ||

kvacittīraruhairvṛkṣairmālābhirivaśobhitām |

kvacitphullotpalacchannāṃ kvacitpadmavanākulām || 20 ||

kvacitkumudaṣaṇḍaiśca kuḍmalairupaśobhitām |

nānāpuṣparajodhvastāṃ samadāmiva ca kvacit || 21 ||

vyapetamalasaṅghātāṃ maṇinirmaladarśanām |

diśāgajairvanagajai rmattaiśca varavāraṇaiḥ || 22 ||

devopavāhyaiśca muhussannāditavanāntarām |

pramadāmiva yatnena bhūṣitāṃ bhūṣaṇottamaiḥ || 23 ||

phalaiḥ puṣpaiḥ kisalayairvṛtāṃ gulmairdvijaistathā |

śiṃśumāraiśca nakraiśca bhujaṅgaiśca niṣevitām || 24 ||

viṣṇupādacyutāṃ divyāmapāpāṃ pāpanāśinīm |

tāṃ śaṅkarajaṭājūṭādbhraṣṭāṃ sāgaratejasā || 25 ||

samudramahiṣīṃ gaṅgāṃ sārasakrauñcanāditām |

āsasāda mahābāhuḥ śṛṅgiberapuraṃ prati || 26 ||

tāmūrmikalilāvartāmanvavekṣya mahārathaḥ |

sumantramabravītsūtamihaivādya vasāmahe || 27 ||

avidūrādayaṃ nadyā bahupuṣpapravālavān |

sumahāniṅgudīvṛkṣo vasāmo'traiva sārathe || 28 ||

drakṣyāma ssaritāṃ śreṣṭhāṃ sammānyasalilāṃ śivām |

devadānavagandharvamṛgamānuṣapakṣiṇām || 29 ||

lakṣmaṇaśca sumantraśca bāḍhamityeva rāghavam |

uktvā tamiṅgudīvṛkṣaṃ tadopayayaturhayaiḥ || 30 ||

rāmo'bhiyāya taṃ ramyaṃ vṛkṣamikṣvākunandanaḥ |

rathādavātarattasmātsabhārya ssahalakṣmaṇaḥ || 31 ||

sumantro'pyavatīryāsmānmocayitvā hayottamān |

vṛkṣamūlagataṃ rāmamupatasthe kṛtāñjaliḥ || 32 ||

tatra rājā guho nāma rāmasyātmasamassakhā |

niṣādajātyo balavān sthapatiśceti viśrutaḥ || 33 ||

sa śṛtvā puruṣavyāghraṃ rāmaṃ viṣayamāgatam |

vṛddhaiḥ parivṛto'mātyaiḥ jñātibhiścābhyupāgataḥ || 34 ||

tato niṣādādhipatiṃ dṛṣṭvā dūrādupasthitam |

saha saumitriṇā rāma ssamāgacchadguhena saḥ || 35 ||

tamārtassampariṣvajya guho rāghavamabravīt |

yathā'yodhyā tatheyaṃ te rāma kiṃ karavāṇi te || 36 ||

īdṛśaṃ hi mahābāho kaḥ prāpsyatyatithiṃ priyam |

tato guṇavadannādyamupādāya pṛthagvidham || 37 ||

arghyaṃ copānayatkṣipraṃ vākyaṃ cedamuvāca ha |

svāgataṃ te mahābāho taveyamakhilā mahī || 38 ||

vayaṃ preṣyā bhavānbhartā sādhu rājyaṃ praśādhi naḥ |

bhakṣyaṃ bhojyaṃ ca peyaṃ ca lehyañcedamupasthitam || 39 ||

śayanāni ca mukhyāni vājināṃ khādanaṃ ca te |

evaṃ bruvāṇaṃ tu guhaṃ rāghavaḥ pratyuvāca ha || 40 ||

arcitāścaiva hṛṣṭāśca bhavatā sarvathā vayam |

padbhyāmabhigamāccaiva snehasandarśanena ca || 41 ||

bhujābhyāṃ sādhu pīnābhyāṃ pīḍayanvākyamabravīt |

diṣṭyā tvāṃ guha paśyāmi hyarogaṃ saha bāndhavaiḥ |

api te kuśalaṃ rāṣṭre mitreṣu ca dhaneṣu ca || 42 ||

yattvidaṃ bhavatā kiñcitprītyā samupakalpitam |

sarvaṃ tadanujānāmi na hi varte pratigrahe || 43 ||

kuśacīrājinadharaṃ phalamūlāśinaṃ ca mām |

viddhi praṇihitaṃ dharme tāpasaṃ vanagocaram || 44 ||

aśvānāṃ khādanenāhamarthī nānyena kenacit |

etāvatā'tra bhavatā bhaviṣyāmi supūjitaḥ || 45 ||

ete hi dayitā rājñaḥ piturdaśarathasya me |

etaissuvihitairaśvai bhaviṣyāmyahamarcitaḥ || 46 ||

aśvānāṃ pratipānaṃ ca khādanaṃ caiva so'nvaśāt |

guhastatraiva puruṣāṃ stvaritaṃ dīyatāmiti || 47 ||

tataścīrottarāsaṅgaḥ sandhyāmanvāsya paścimām |

jalamevādade bhojyaṃ lakṣmaṇenā''hṛtaṃ svayam || 48 ||

tasya bhūmau śayānasya pādau prakṣālya lakṣmaṇaḥ |

sabhāryasya tato'bhyetya tasthau vṛkṣamupāśritaḥ || 49 ||

guho'pi saha sūtena saumitrimanubhāṣayan |

anvajāgrattato rāmamapramatto dhanurdharaḥ || 50 ||

tathā śayānasya tato'sya dhīmato yaśasvino dāśarathermahātmanaḥ |

adṛṣṭaduḥkhasya sukhocitasya sā tadāvyatīyāya cireṇa śarvarī || 51 ||

ityārṣe śrīmadrāmāyaṇe vālmīkīya ādikāvye ayodhyākāṇḍe pañcāśassargaḥ ||