📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
2.119 𑌅𑌯𑍋𑌧𑍍𑌯𑌾𑌕𑌾𑌣𑍍𑌡 - 𑌏𑌕𑍋𑌨𑌵𑌿𑌂𑌶𑌤𑍍𑌯𑌧𑌿𑌕𑌶𑌤𑌤𑌮 𑌸𑌰𑍍𑌗𑌃
2.119 Ayodhyakanda - Ekonavimshatyadhikashatatama Sargah
Valmiki Grantha
𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌣𑍍𑌡𑌮𑍍 ।
𑌅𑌥 𑌏𑌕𑍋𑌨𑌵𑌿𑌂𑌶𑌤𑍍𑌯𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ।
𑌅𑌨𑌸𑍂𑌯𑌾 𑌤𑍁 𑌧𑌰𑍍𑌮𑌜𑍍𑌞𑌾 𑌶𑍍𑌰𑍁𑌤𑍍𑌵𑌾 𑌤𑌾𑌂 𑌮𑌹𑌤𑍀𑌂 𑌕𑌥𑌾𑌮𑍍 ।
𑌪𑌰𑍍𑌯𑌷𑍍𑌵𑌜𑌤 𑌬𑌾𑌹𑍁𑌭𑍍𑌯𑌾𑌂 𑌶𑌿𑌰𑌸𑍍𑌯𑌾𑌘𑍍𑌰𑌾𑌯 𑌮𑍈𑌥𑌿𑌲𑍀𑌮𑍍 ॥ 1 ॥
𑌵𑍍𑌯𑌕𑍍𑌤𑌾𑌕𑍍𑌷𑌰𑌪𑌦𑌂 𑌚𑌿𑌤𑍍𑌰𑌂 𑌭𑌾𑌷𑌿𑌤𑌂 𑌮𑌧𑍁𑌰𑌂 𑌤𑍍𑌵𑌯𑌾 ।
𑌯𑌥𑌾 𑌸𑍍𑌵𑌯𑌂𑌵𑌰𑌂 𑌵𑍃𑌤𑍍𑌤𑌂 𑌤𑌤𑍍𑌸𑌰𑍍𑌵𑌂 𑌹𑌿 𑌶𑍍𑌰𑍁𑌤𑌂 𑌮𑌯𑌾 ॥ 2 ॥
𑌰𑌮𑍇𑌽𑌹𑌂 𑌕𑌥𑌯𑌾 𑌤𑍇 𑌤𑍁 𑌦𑍃𑌢𑌂 𑌮𑌧𑍁𑌰𑌭𑌾𑌷𑌿𑌣𑌿 ।
𑌰𑌵𑌿𑌰𑌸𑍍𑌤𑌙𑍍𑌗𑌤𑌶𑍍𑌶𑍍𑌰𑍀𑌮𑌾𑌨𑍁𑌪𑍋𑌹𑍍𑌯 𑌰𑌜𑌨𑍀𑌂 𑌶𑌿𑌵𑌾𑌮𑍍 ॥ 3 ॥
𑌦𑌿𑌵𑌸𑌂 𑌪𑍍𑌰𑌤𑌿𑌕𑍀𑌰𑍍𑌣𑌾𑌨𑌾𑌮𑌾𑌹𑌾𑌰𑌾𑌰𑍍𑌥𑌂 𑌪𑌤𑌤𑍍𑌰𑌿𑌣𑌾𑌮𑍍 ।
𑌸𑌨𑍍𑌧𑍍𑌯𑌾𑌕𑌾𑌲𑍇 𑌨𑌿𑌲𑍀𑌨𑌾𑌨𑌾𑌂 𑌨𑌿𑌦𑍍𑌰𑌾𑌰𑍍𑌥𑌂 𑌶𑍍𑌰𑍂𑌯𑌤𑍇 𑌧𑍍𑌵𑌨𑌿𑌃 ॥ 4 ॥
𑌏𑌤𑍇 𑌚𑌾𑌪𑍍𑌯𑌭𑌿𑌷𑍇𑌕𑌾𑌰𑍍𑌦𑍍𑌰𑌾 𑌮𑍁𑌨𑌯𑌃 𑌕𑌲𑌶𑍋𑌦𑍍𑌯𑌤𑌾𑌃 ।
𑌸𑌹𑌿𑌤𑌾 𑌉𑌪𑌵𑌰𑍍𑌤𑌨𑍍𑌤𑍇 𑌸𑌲𑌿𑌲𑌾𑌪𑍍𑌲𑍁𑌤𑌵𑌲𑍍𑌕𑌲𑌾𑌃 ॥ 5 ॥
𑌋𑌷𑍀𑌣𑌾𑌮𑌗𑍍𑌨𑌿𑌹𑍋𑌤𑍍𑌰𑍇𑌷𑍁 𑌹𑍁𑌤𑍇𑌷𑍁 𑌵𑌿𑌧𑌿𑌪𑍂𑌰𑍍𑌵𑌕𑌮𑍍 ।
𑌕𑌪𑍋𑌤𑌾𑌙𑍍𑌗𑌾𑌰𑍁𑌣𑍋 𑌧𑍂𑌮𑍋 𑌦𑍃𑌶𑍍𑌯𑌤𑍇 𑌪𑌵𑌨𑍋𑌦𑍍𑌧𑌤𑌃 ॥ 6 ॥
𑌅𑌲𑍍𑌪𑌪𑌰𑍍𑌣𑌾 𑌹𑌿 𑌤𑌰𑌵𑍋 𑌘𑌨𑍀𑌭𑍂𑌤𑌾𑌸𑍍𑌸𑌮𑌨𑍍𑌤𑌤𑌃 ।
𑌵𑌿𑌪𑍍𑌰𑌕𑍃𑌷𑍍𑌟𑍇𑌨𑍍𑌦𑍍𑌰𑌿𑌯𑍇 𑌦𑍇𑌶𑍇𑌽𑌸𑍍𑌮𑌿𑌨𑍍𑌨 𑌪𑍍𑌰𑌕𑌾𑌶𑌨𑍍𑌤𑌿 𑌵𑍈 𑌦𑌿𑌶𑌃 ॥ 7 ॥
𑌰𑌜𑌨𑍀𑌚𑌰𑌸𑌤𑍍𑌤𑍍𑌵𑌾𑌨𑌿 𑌪𑍍𑌰𑌚𑌰𑌨𑍍𑌤𑌿 𑌸𑌮𑌨𑍍𑌤𑌤𑌃 ।
𑌤𑌪𑍋𑌵𑌨𑌮𑍃𑌗𑌾 𑌹𑍍𑌯𑍇𑌤𑍇 𑌵𑍇𑌦𑌿𑌤𑍀𑌰𑍍𑌥𑍇𑌷𑍁 𑌶𑍇𑌰𑌤𑍇 ॥ 8 ॥
𑌸𑌮𑍍𑌪𑍍𑌰𑌵𑍃𑌤𑍍𑌤𑌾𑌨𑌿𑌶𑌾 𑌸𑍀𑌤𑍇 𑌨𑌕𑍍𑌷𑌤𑍍𑌰𑌸𑌮𑌲𑌙𑍍𑌕𑍃𑌤𑌾 ।
𑌜𑍍𑌯𑍋𑌤𑍍𑌸𑍍𑌨𑌾𑌪𑍍𑌰𑌾𑌵𑌰𑌣𑌶𑍍𑌚𑌨𑍍𑌦𑍍𑌰𑍋 𑌦𑍃𑌶𑍍𑌯𑌤𑍇𑌽𑌭𑍍𑌯𑍁𑌦𑌿𑌤𑍋𑌽𑌮𑍍𑌬𑌰𑍇 ॥ 9 ॥
𑌗𑌮𑍍𑌯𑌤𑌾𑌮𑌨𑍁𑌜𑌾𑌨𑌾𑌮𑌿 𑌰𑌾𑌮𑌸𑍍𑌯𑌾𑌨𑍁𑌚𑌰𑍀 𑌭𑌵 ।
𑌕𑌥𑌾𑌯𑌨𑍍𑌤𑍍𑌯𑌾 𑌹𑌿 𑌮𑌧𑍁𑌰𑌂 𑌤𑍍𑌵𑌯𑌾𑌽𑌹𑌂 𑌪𑌰𑌿𑌤𑍋𑌷𑌿𑌤𑌾 ॥ 10 ॥
𑌅𑌲𑌙𑍍𑌕𑍁𑌰𑍁 𑌚 𑌤𑌾𑌵𑌤𑍍𑌤𑍍𑌵𑌂 𑌪𑍍𑌰𑌤𑍍𑌯𑌕𑍍𑌷𑌂 𑌮𑌮 𑌮𑍈𑌥𑌿𑌲𑌿 ।
𑌪𑍍𑌰𑍀𑌤𑌿𑌂 𑌜𑌨𑌯 𑌮𑍇 𑌵𑌤𑍍𑌸𑍇 𑌦𑌿𑌵𑍍𑌯𑌾𑌲𑌙𑍍𑌕𑌾𑌰𑌶𑍋𑌭𑌿𑌤𑌾 ॥ 11 ॥
𑌸𑌾 𑌤𑌥𑌾 𑌸𑌮𑌲𑌙𑍍𑌕𑍃𑌤𑍍𑌯 𑌸𑍀𑌤𑌾 𑌸𑍁𑌰𑌸𑍁𑌤𑍋𑌪𑌮𑌾 ।
𑌪𑍍𑌰𑌣𑌮𑍍𑌯 𑌶𑌿𑌰𑌸𑌾 𑌤𑌸𑍍𑌯𑍈 𑌰𑌾𑌮𑌂 𑌤𑍍𑌵𑌭𑌿𑌮𑍁𑌖𑍀 𑌯𑌯𑍗 ॥ 12 ॥
𑌤𑌥𑌾 𑌤𑍁 𑌭𑍂𑌷𑌿𑌤𑌾𑌂 𑌸𑍀𑌤𑌾𑌂 𑌦𑌦𑌰𑍍𑌶 𑌵𑌦𑌤𑌾𑌂 𑌵𑌰𑌃 ।
𑌰𑌾𑌘𑌵𑌃 𑌪𑍍𑌰𑍀𑌤𑌿𑌦𑌾𑌨𑍇𑌨 𑌤𑌪𑌸𑍍𑌵𑌿𑌨𑍍𑌯𑌾 𑌜𑌹𑌰𑍍𑌷 𑌚 ॥ 13 ॥
𑌨𑍍𑌯𑌵𑍇𑌦𑌯𑌤𑍍𑌤𑌤𑌸𑍍𑌸𑌰𑍍𑌵𑌂 𑌸𑍀𑌤𑌾 𑌰𑌾𑌮𑌾𑌯 𑌮𑍈𑌥𑌿𑌲𑍀 ।
𑌪𑍍𑌰𑍀𑌤𑌿𑌦𑌾𑌨𑌂 𑌤𑌪𑌸𑍍𑌵𑌿𑌨𑍍𑌯𑌾 𑌵𑌸𑌨𑌾𑌭𑌰𑌣𑌸𑍍𑌰𑌜𑌮𑍍 ॥ 14 ॥
𑌪𑍍𑌰𑌹𑍃𑌷𑍍𑌟𑌸𑍍𑌤𑍍𑌵𑌭𑌵𑌦𑍍𑌰𑌾𑌮𑍋 𑌲𑌕𑍍𑌷𑍍𑌮𑌣𑌶𑍍𑌚 𑌮𑌹𑌾𑌰𑌥𑌃 ।
𑌮𑍈𑌥𑌿𑌲𑍍𑌯𑌾𑌸𑍍𑌸𑌤𑍍𑌕𑍍𑌰𑌿𑌯𑌾𑌂 𑌦𑍃𑌷𑍍𑌟𑍍𑌵𑌾 𑌮𑌾𑌨𑍁𑌷𑍇𑌷𑍁 𑌸𑍁𑌦𑍁𑌰𑍍𑌲𑌭𑌾𑌮𑍍 ॥ 15 ॥
𑌤𑌤𑌸𑍍𑌤𑌾𑌂 𑌶𑌰𑍍𑌵𑌰𑍀𑌂 𑌪𑍍𑌰𑍀𑌤𑌃 𑌪𑍁𑌣𑍍𑌯𑌾𑌂 𑌶𑌶𑌿𑌨𑌿𑌭𑌾𑌨𑌨𑌃 ।
𑌅𑌰𑍍𑌚𑌿𑌤𑌸𑍍𑌤𑌾𑌪𑌸𑍈 𑌸𑍍𑌸𑌿𑌦𑍍𑌧𑍈𑌰𑍁𑌵𑌾𑌸 𑌰𑌘𑍁𑌨𑌨𑍍𑌦𑌨𑌃 ॥ 16 ॥
𑌤𑌸𑍍𑌯𑌾𑌂 𑌰𑌾𑌤𑍍𑌰𑍍𑌯𑌾𑌂 𑌵𑍍𑌯𑌤𑍀𑌤𑌾𑌯𑌾𑌮𑌭𑌿𑌷𑌿𑌚𑍍𑌯 𑌹𑍁𑌤𑌾𑌗𑍍𑌨𑌿𑌕𑌾𑌨𑍍 ।
𑌆𑌪𑍃𑌚𑍍𑌛𑍇𑌤𑌾𑌂 𑌨𑌰𑌵𑍍𑌯𑌾𑌘𑍍𑌰𑍗 𑌤𑌾𑌪𑌸𑌾𑌨𑍍𑌵𑌨𑌗𑍋𑌚𑌰𑌾𑌨𑍍 ॥ 17 ॥
𑌤𑌾𑌵𑍂𑌚𑍁𑌸𑍍𑌤𑍇 𑌵𑌨𑌚𑌰𑌾𑌸𑍍𑌤𑌾𑌪𑌸𑌾 𑌧𑌰𑍍𑌮𑌚𑌾𑌰𑌿𑌣𑌃 ।
𑌵𑌨𑌸𑍍𑌯 𑌤𑌸𑍍𑌯 𑌸𑌞𑍍𑌚𑌾𑌰𑌂 𑌰𑌾𑌕𑍍𑌷𑌸𑍈𑌸𑍍𑌸𑌮𑌭𑌿𑌪𑍍𑌲𑍁𑌤𑌮𑍍 ॥ 18 ॥
𑌰𑌕𑍍𑌷𑌾𑌂𑌸𑌿 𑌪𑍁𑌰𑍁𑌷𑌾𑌦𑌾𑌨𑌿 𑌨𑌾𑌨𑌾𑌰𑍂𑌪𑌾𑌣𑌿 𑌰𑌾𑌘𑌵 ।
𑌵𑌸𑌨𑍍𑌤𑍍𑌯𑌸𑍍𑌮𑌿𑌨𑍍𑌮𑌹𑌾𑌰𑌣𑍍𑌯𑍇 𑌵𑍍𑌯𑌾𑌲𑌾𑌶𑍍𑌚 𑌰𑍁𑌧𑌿𑌰𑌾𑌶𑌨𑌾𑌃 ॥ 19 ॥
𑌉𑌚𑍍𑌛𑌿𑌷𑍍𑌟𑌂 𑌵𑌾 𑌪𑍍𑌰𑌮𑌤𑍍𑌤𑌂 𑌵𑌾 𑌤𑌾𑌪𑌸𑌂 𑌧𑌰𑍍𑌮𑌚𑌾𑌰𑌿𑌣𑌮𑍍 ।
𑌅𑌦𑌨𑍍𑌤𑍍𑌯𑌸𑍍𑌮𑌿𑌨𑍍𑌮𑌹𑌾𑌰𑌣𑍍𑌯𑍇 𑌤𑌾𑌨𑍍𑌨𑌿𑌵𑌾𑌰𑌯 𑌰𑌾𑌘𑌵 ॥ 20 ॥
𑌏𑌷 𑌪𑌨𑍍𑌥𑌾 𑌮𑌹𑌰𑍍𑌷𑍀𑌣𑌾𑌂 𑌫𑌲𑌾𑌨𑍍𑌯𑌾𑌹𑌰𑌤𑌾𑌂 𑌵𑌨𑍇 ।
𑌅𑌨𑍇𑌨 𑌤𑍁 𑌵𑌨𑌂 𑌦𑍁𑌰𑍍𑌗𑌂 𑌗𑌨𑍍𑌤𑍁𑌂 𑌰𑌾𑌘𑌵 𑌤𑍇 𑌕𑍍𑌷𑌮𑌮𑍍 ॥ 21 ॥
𑌇𑌤𑍀𑌵 𑌤𑍈𑌃 𑌪𑍍𑌰𑌾𑌞𑍍𑌜𑌲𑌿𑌭𑌿𑌸𑍍𑌤𑌪𑌸𑍍𑌵𑌿𑌭𑌿𑌰𑍍𑌦𑍍𑌵𑌿𑌜𑍈𑌃 𑌕𑍃𑌤𑌸𑍍𑌵𑌸𑍍𑌤𑍍𑌯𑌯𑌨𑌃 𑌪𑌰𑌨𑍍𑌤𑌪𑌃 ।
𑌵𑌨𑌂 𑌸𑌭𑌾𑌰𑍍𑌯𑌃 𑌪𑍍𑌰𑌵𑌿𑌵𑍇𑌶 𑌰𑌾𑌘𑌵𑌸𑍍𑌸𑌲𑌕𑍍𑌷𑍍𑌮𑌣𑌸𑍍𑌸𑍂𑌰𑍍𑌯 𑌇𑌵𑌾𑌭𑍍𑌰𑌮𑌣𑍍𑌡𑌲𑌮𑍍 ॥ 22 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌣𑍍𑌡𑍇 𑌏𑌕𑍋𑌨𑌵𑌿𑌂𑌶𑌤𑍍𑌯𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe ayodhyākāṇḍam |
atha ekonaviṃśatyadhikaśatatamassargaḥ |
anasūyā tu dharmajñā śrutvā tāṃ mahatīṃ kathām |
paryaṣvajata bāhubhyāṃ śirasyāghrāya maithilīm || 1 ||
vyaktākṣarapadaṃ citraṃ bhāṣitaṃ madhuraṃ tvayā |
yathā svayaṃvaraṃ vṛttaṃ tatsarvaṃ hi śrutaṃ mayā || 2 ||
rame'haṃ kathayā te tu dṛḍhaṃ madhurabhāṣiṇi |
ravirastaṅgataśśrīmānupohya rajanīṃ śivām || 3 ||
divasaṃ pratikīrṇānāmāhārārthaṃ patatriṇām |
sandhyākāle nilīnānāṃ nidrārthaṃ śrūyate dhvaniḥ || 4 ||
ete cāpyabhiṣekārdrā munayaḥ kalaśodyatāḥ |
sahitā upavartante salilāplutavalkalāḥ || 5 ||
ṛṣīṇāmagnihotreṣu huteṣu vidhipūrvakam |
kapotāṅgāruṇo dhūmo dṛśyate pavanoddhataḥ || 6 ||
alpaparṇā hi taravo ghanībhūtāssamantataḥ |
viprakṛṣṭendriye deśe'sminna prakāśanti vai diśaḥ || 7 ||
rajanīcarasattvāni pracaranti samantataḥ |
tapovanamṛgā hyete veditīrtheṣu śerate || 8 ||
sampravṛttāniśā sīte nakṣatrasamalaṅkṛtā |
jyotsnāprāvaraṇaścandro dṛśyate'bhyudito'mbare || 9 ||
gamyatāmanujānāmi rāmasyānucarī bhava |
kathāyantyā hi madhuraṃ tvayā'haṃ paritoṣitā || 10 ||
alaṅkuru ca tāvattvaṃ pratyakṣaṃ mama maithili |
prītiṃ janaya me vatse divyālaṅkāraśobhitā || 11 ||
sā tathā samalaṅkṛtya sītā surasutopamā |
praṇamya śirasā tasyai rāmaṃ tvabhimukhī yayau || 12 ||
tathā tu bhūṣitāṃ sītāṃ dadarśa vadatāṃ varaḥ |
rāghavaḥ prītidānena tapasvinyā jaharṣa ca || 13 ||
nyavedayattatassarvaṃ sītā rāmāya maithilī |
prītidānaṃ tapasvinyā vasanābharaṇasrajam || 14 ||
prahṛṣṭastvabhavadrāmo lakṣmaṇaśca mahārathaḥ |
maithilyāssatkriyāṃ dṛṣṭvā mānuṣeṣu sudurlabhām || 15 ||
tatastāṃ śarvarīṃ prītaḥ puṇyāṃ śaśinibhānanaḥ |
arcitastāpasai ssiddhairuvāsa raghunandanaḥ || 16 ||
tasyāṃ rātryāṃ vyatītāyāmabhiṣicya hutāgnikān |
āpṛcchetāṃ naravyāghrau tāpasānvanagocarān || 17 ||
tāvūcuste vanacarāstāpasā dharmacāriṇaḥ |
vanasya tasya sañcāraṃ rākṣasaissamabhiplutam || 18 ||
rakṣāṃsi puruṣādāni nānārūpāṇi rāghava |
vasantyasminmahāraṇye vyālāśca rudhirāśanāḥ || 19 ||
ucchiṣṭaṃ vā pramattaṃ vā tāpasaṃ dharmacāriṇam |
adantyasminmahāraṇye tānnivāraya rāghava || 20 ||
eṣa panthā maharṣīṇāṃ phalānyāharatāṃ vane |
anena tu vanaṃ durgaṃ gantuṃ rāghava te kṣamam || 21 ||
itīva taiḥ prāñjalibhistapasvibhirdvijaiḥ kṛtasvastyayanaḥ parantapaḥ |
vanaṃ sabhāryaḥ praviveśa rāghavassalakṣmaṇassūrya ivābhramaṇḍalam || 22 ||
ityārṣe śrīmadrāmāyaṇe vālmīkīya ādikāvye ayodhyākāṇḍe ekonaviṃśatyadhikaśatatamassargaḥ ||
InfoLyter.in — Sacred Vedic Knowledge Portal · Free forever