📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.73 𑌬𑌾𑌲𑌕𑌾𑌣𑍍𑌡 - 𑌤𑍍𑌰𑌿𑌸𑌪𑍍𑌤𑌤𑌿𑌤𑌮 𑌸𑌰𑍍𑌗𑌃
1.73 Balakanda - Trisaptatitama Sargah
Valmiki Grantha
𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌣𑍍𑌡𑌮𑍍 ।
𑌅𑌥 𑌤𑍍𑌰𑌿𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌯𑌸𑍍𑌮𑌿𑌂𑌸𑍍𑌤𑍁 𑌦𑌿𑌵𑌸𑍇 𑌰𑌾𑌜𑌾 𑌚𑌕𑍍𑌰𑍇 𑌗𑍋𑌦𑌾𑌨𑌮𑍁𑌤𑍍𑌤𑌮𑌮𑍍 ।
𑌤𑌸𑍍𑌮𑌿𑌂 𑌸𑍍𑌤𑍁 𑌦𑌿𑌵𑌸𑍇 𑌶𑍂𑌰𑍋 𑌯𑍁𑌧𑌾𑌜𑌿𑌤𑍍𑌸𑌮𑍁𑌪𑍇𑌯𑌿𑌵𑌾𑌨𑍍 ॥ 1 ॥
𑌪𑍁𑌤𑍍𑌰𑌃 𑌕𑍇𑌕𑌯𑌰𑌾𑌜𑌸𑍍𑌯 𑌸𑌾𑌕𑍍𑌷𑌾𑌦𑍍𑌭𑌰𑌤𑌮𑌾𑌤𑍁𑌲𑌃 ।
𑌦𑍃𑌷𑍍𑌟𑍍𑌵𑌾 𑌪𑍃𑌷𑍍𑌟𑍍𑌵𑌾 𑌚 𑌕𑍁𑌶𑌲𑌂 𑌰𑌾𑌜𑌾𑌨𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 2 ॥
𑌕𑍇𑌕𑌯𑌾𑌧𑌿𑌪𑌤𑍀 𑌰𑌾𑌜𑌾 𑌸𑍍𑌨𑍇𑌹𑌾𑌤𑍍 𑌕𑍁𑌶𑌲𑌮𑌬𑍍𑌰𑌵𑍀𑌤𑍍 ।
𑌯𑍇𑌷𑌾𑌂 𑌕𑍁𑌶𑌲𑌕𑌾𑌮𑍋𑌽𑌸𑌿 𑌤𑍇𑌷𑌾𑌂 𑌸𑌮𑍍𑌪𑍍𑌰𑌤𑍍𑌯𑌨𑌾𑌮𑌯𑌮𑍍 ॥ 3 ॥
𑌸𑍍𑌵𑌸𑍍𑌰𑍀𑌯𑌂 𑌮𑌮 𑌰𑌾𑌜𑍇𑌨𑍍𑌦𑍍𑌰 𑌦𑍍𑌰𑌷𑍍𑌟𑍁𑌕𑌾𑌮𑍋 𑌮𑌹𑍀𑌪𑌤𑌿𑌃 ।
𑌤𑌦𑌰𑍍𑌥𑌮𑍁𑌪𑌯𑌾𑌤𑍋𑌽𑌹𑌮𑌯𑍋𑌧𑍍𑌯𑌾𑌂 𑌰𑌘𑍁𑌨𑌨𑍍𑌦𑌨 ॥ 4 ॥
𑌶𑍍𑌰𑍁𑌤𑍍𑌵𑌾 𑌤𑍍𑌵𑌹𑌮𑌯𑍋𑌧𑍍𑌯𑌾𑌯𑌾𑌂 𑌵𑌿𑌵𑌾𑌹𑌾𑌰𑍍𑌥𑌂 𑌤𑌵𑌾𑌤𑍍𑌮𑌜𑌾𑌨𑍍 ।
𑌮𑌿𑌥𑌿𑌲𑌾𑌮𑍁𑌪𑌯𑌾𑌤𑌾𑌂𑌸𑍍𑌤𑍁 𑌤𑍍𑌵𑌯𑌾 𑌸𑌹 𑌮𑌹𑍀𑌪𑌤𑍇 ॥ 5 ॥
𑌤𑍍𑌵𑌰𑌯𑌾𑌭𑍍𑌯𑍁𑌪𑌯𑌾𑌤𑍋𑌽𑌹𑌂 𑌦𑍍𑌰𑌷𑍍𑌟𑍁𑌕𑌾𑌮 𑌸𑍍𑌸𑍍𑌵𑌸𑍁𑌸𑍍𑌸𑍁𑌤𑌮𑍍 ।
𑌅𑌥 𑌰𑌾𑌜𑌾 𑌦𑌶𑌰𑌥𑌃 𑌪𑍍𑌰𑌿𑌯𑌾𑌤𑌿𑌥𑌿𑌮𑍁𑌪𑌸𑍍𑌥𑌿𑌤𑌮𑍍 ॥ 6 ॥
𑌦𑍃𑌷𑍍𑌟𑍍𑌵𑌾 𑌪𑌰𑌮𑌸𑌤𑍍𑌕𑌾𑌰𑍈𑌃 𑌪𑍂𑌜𑌾𑌰𑍍𑌹𑌂 𑌸𑌮𑌪𑍂𑌜𑌯𑌤𑍍 ।
𑌤𑌤𑌸𑍍𑌤𑌾𑌮𑍁𑌷𑌿𑌤𑍋 𑌰𑌾𑌤𑍍𑌰𑌿𑌂 𑌸𑌹 𑌪𑍁𑌤𑍍𑌰𑍈𑌰𑍍𑌮𑌹𑌾𑌤𑍍𑌮𑌭𑌿𑌃 ॥ 7 ॥
𑌪𑍍𑌰𑌭𑌾𑌤𑍇 𑌪𑍁𑌨𑌰𑍁𑌤𑍍𑌥𑌾𑌯 𑌕𑍃𑌤𑍍𑌵𑌾 𑌕𑌰𑍍𑌮𑌾𑌣𑌿 𑌕𑌰𑍍𑌮𑌵𑌿𑌤𑍍 ।
𑌋𑌷𑍀𑌂𑌸𑍍𑌤𑌦𑌾 𑌪𑍁𑌰𑌸𑍍𑌕𑍃𑌤𑍍𑌯 𑌯𑌜𑍍𑌞𑌵𑌾𑌟𑌮𑍁𑌪𑌾𑌗𑌮𑌤𑍍 ॥ 8 ॥
𑌯𑍁𑌕𑍍𑌤𑍇 𑌮𑍁𑌹𑍂𑌰𑍍𑌤𑍇 𑌵𑌿𑌜𑌯𑍇 𑌸𑌰𑍍𑌵𑌾𑌭𑌰𑌣𑌭𑍂𑌷𑌿𑌤𑍈𑌃 ।
𑌭𑍍𑌰𑌾𑌤𑍃𑌭𑌿𑌸𑍍𑌸𑌹𑌿𑌤𑍋 𑌰𑌾𑌮𑌃 𑌕𑍃𑌤𑌕𑍗𑌤𑍁𑌕𑌮𑌙𑍍𑌗𑌲𑌃 ॥ 9 ॥
𑌵𑌸𑌿𑌷𑍍𑌠𑌂 𑌪𑍁𑌰𑌤𑌃 𑌕𑍃𑌤𑍍𑌵𑌾 𑌮𑌹𑌰𑍍𑌷𑍀𑌨𑌪𑌰𑌾𑌨𑌪𑌿 ।
𑌪𑌿𑌤𑍁 𑌸𑍍𑌸𑌮𑍀𑌪𑌮𑌾𑌶𑍍𑌰𑌿𑌤𑍍𑌯 𑌤𑌸𑍍𑌥𑍗 𑌭𑍍𑌰𑌾𑌤𑍃𑌭𑌿𑌰𑌾𑌵𑍃𑌤𑌃 ॥ 10 ॥
𑌵𑌸𑌿𑌷𑍍𑌠𑍋 𑌭𑌗𑌵𑌾𑌨𑍇𑌤𑍍𑌯 𑌵𑍈𑌦𑍇𑌹𑌮𑌿𑌦𑌮𑌬𑍍𑌰𑌵𑍀𑌤𑍍 ।
𑌰𑌾𑌜𑌾 𑌦𑌶𑌰𑌥𑍋 𑌰𑌾𑌜𑌨𑍍 𑌕𑍃𑌤𑌕𑍗𑌤𑍁𑌕𑌮𑌙𑍍𑌗𑌲𑍈𑌃 ॥ 11 ॥
𑌪𑍁𑌤𑍍𑌰𑍈𑌰𑍍𑌨𑌰𑌵𑌰 𑌶𑍍𑌰𑍇𑌷𑍍𑌠 𑌦𑌾𑌤𑌾𑌰𑌮𑌭𑌿𑌕𑌾𑌙𑍍𑌕𑍍𑌷𑌤𑍇 ।
𑌦𑌾𑌤𑍃𑌪𑍍𑌰𑌤𑌿𑌗𑍍𑌰𑌹𑍀𑌤𑍃𑌭𑍍𑌯𑌾𑌂 𑌸𑌰𑍍𑌵𑌾𑌰𑍍𑌥𑌾𑌃 𑌪𑍍𑌰𑌭𑌵𑌨𑍍𑌤𑌿 𑌹𑌿 ॥ 12 ॥
𑌸𑍍𑌵𑌧𑌰𑍍𑌮𑌂 𑌪𑍍𑌰𑌤𑌿𑌪𑌦𑍍𑌯𑌸𑍍𑌵 𑌕𑍃𑌤𑍍𑌵𑌾 𑌵𑍈𑌵𑌾𑌹𑍍𑌯𑌮𑍁𑌤𑍍𑌤𑌮𑌮𑍍 ।
𑌇𑌤𑍍𑌯𑍁𑌕𑍍𑌤𑌃 𑌪𑌰𑌮𑍋𑌦𑌾𑌰𑍋 𑌵𑌸𑌿𑌷𑍍𑌠𑍇𑌨 𑌮𑌹𑌾𑌤𑍍𑌮𑌨𑌾 ॥ 13 ॥
𑌪𑍍𑌰𑌤𑍍𑌯𑍁𑌵𑌾𑌚 𑌮𑌹𑌾𑌤𑍇𑌜𑌾 𑌵𑌾𑌕𑍍𑌯𑌂 𑌪𑌰𑌮𑌧𑌰𑍍𑌮𑌵𑌿𑌤𑍍 ।
𑌕𑌸𑍍𑌸𑍍𑌥𑌿𑌤𑌃 𑌪𑍍𑌰𑌤𑌿𑌹𑌾𑌰𑍋 𑌮𑍇 𑌕𑌸𑍍𑌯𑌾𑌜𑍍𑌞𑌾 𑌸𑌮𑍍𑌪𑍍𑌰𑌤𑍀𑌕𑍍𑌷𑍍𑌯𑌤𑍇 ॥ 14 ॥
𑌸𑍍𑌵𑌗𑍃𑌹𑍇 𑌕𑍋 𑌵𑌿𑌚𑌾𑌰𑍋𑌽𑌸𑍍𑌤𑌿 𑌯𑌥𑌾 𑌰𑌾𑌜𑍍𑌯𑌮𑌿𑌦𑌂 𑌤𑌵 ।
𑌕𑍃𑌤𑌕𑍗𑌤𑍁𑌕𑌸𑌰𑍍𑌵𑌸𑍍𑌵𑌾 𑌵𑍇𑌦𑌿𑌮𑍂𑌲𑌮𑍁𑌪𑌾𑌗𑌤𑌾𑌃 ॥ 15 ॥
𑌮𑌮 𑌕𑌨𑍍𑌯𑌾 𑌮𑍁𑌨𑌿𑌶𑍍𑌰𑍇𑌷𑍍𑌠 𑌦𑍀𑌪𑍍𑌤𑌾 𑌵𑌹𑍍𑌨𑍇𑌰𑌿𑌵𑌾𑌰𑍍𑌚𑌿𑌷𑌃 ।
𑌸𑌜𑍍𑌜𑍋𑌽𑌹𑌂 𑌤𑍍𑌵𑌤𑍍𑌪𑍍𑌰𑌤𑍀𑌕𑍍𑌷𑍋𑌽𑌸𑍍𑌮𑌿 𑌵𑍇𑌦𑍍𑌯𑌾𑌮𑌸𑍍𑌯𑌾𑌂 𑌪𑍍𑌰𑌤𑌿𑌷𑍍𑌠𑌿𑌤𑌃 ॥ 16 ॥
𑌅𑌵𑌿𑌘𑍍𑌨𑌂 𑌕𑍁𑌰𑍁𑌤𑌾𑌂 𑌰𑌾𑌜𑌾 𑌕𑌿𑌮𑌰𑍍𑌥𑌮𑌵𑌲𑌮𑍍𑌬𑌤𑍇 ।
𑌤𑌦𑍍𑌵𑌾𑌕𑍍𑌯𑌂 𑌜𑌨𑌕𑍇𑌨𑍋𑌕𑍍𑌤𑌂 𑌶𑍍𑌰𑍁𑌤𑍍𑌵𑌾 𑌦𑌶𑌰𑌥𑌸𑍍𑌤𑌦𑌾 ।
𑌪𑍍𑌰𑌵𑍇𑌶𑌯𑌾𑌮𑌾𑌸 𑌸𑍁𑌤𑌾𑌨𑍍 𑌸𑌰𑍍𑌵𑌾𑌨𑍃𑌷𑌿𑌗𑌣𑌾𑌨𑌪𑌿 ॥ 17 ॥
𑌤𑌤𑍋 𑌰𑌾𑌜𑌾 𑌵𑌿𑌦𑍇𑌹𑌾𑌨𑌾𑌂 𑌵𑌸𑌿𑌷𑍍𑌠𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 18 ॥
𑌕𑌾𑌰𑌯𑌸𑍍𑌵 𑌋𑌷𑍇 𑌸𑌰𑍍𑌵𑌮𑍃𑌷𑌿𑌭𑌿𑌃 𑌸𑌹 𑌧𑌾𑌰𑍍𑌮𑌿𑌕 ।
𑌰𑌾𑌮𑌸𑍍𑌯 𑌲𑍋𑌕𑌰𑌾𑌮𑌸𑍍𑌯 𑌕𑍍𑌰𑌿𑌯𑌾𑌂 𑌵𑍈𑌵𑌾𑌹𑌿𑌕𑍀𑌂 𑌵𑌿𑌭𑍋 ॥ 19 ॥
𑌤𑌥𑍇𑌤𑍍𑌯𑍁𑌕𑍍𑌤𑍍𑌵𑌾 𑌤𑍁 𑌜𑌨𑌕𑌂 𑌵𑌸𑌿𑌷𑍍𑌠𑍋 𑌭𑌗𑌵𑌾𑌨𑍃𑌷𑌿𑌃 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌂 𑌪𑍁𑌰𑌸𑍍𑌕𑍃𑌤𑍍𑌯 𑌶𑌤𑌾𑌨𑌨𑍍𑌦𑌂 𑌚 𑌧𑌾𑌰𑍍𑌮𑌿𑌕𑌮𑍍 ॥ 20 ॥
𑌪𑍍𑌰𑌪𑌾𑌮𑌧𑍍𑌯𑍇 𑌤𑍁 𑌵𑌿𑌧𑌿𑌵𑌤𑍍𑌵𑍇𑌦𑌿𑌂 𑌕𑍃𑌤𑍍𑌵𑌾 𑌮𑌹𑌾𑌤𑌪𑌾𑌃 ।
𑌅𑌲𑌞𑍍𑌚𑌕𑌾𑌰 𑌤𑌾𑌂 𑌵𑍇𑌦𑌿𑌂 𑌗𑌨𑍍𑌧𑌪𑍁𑌷𑍍𑌪𑍈 𑌸𑍍𑌸𑌮𑌨𑍍𑌤𑌤𑌃 ॥ 21 ॥
𑌸𑍁𑌵𑌰𑍍𑌣𑌪𑌾𑌲𑌿𑌕𑌾𑌭𑌿𑌶𑍍𑌚 𑌛𑌿𑌦𑍍𑌰𑌕𑍁𑌮𑍍𑌭𑍈𑌶𑍍𑌚 𑌸𑌾𑌙𑍍𑌕𑍁𑌰𑍈𑌃 ।
𑌅𑌙𑍍𑌕𑍁𑌰𑌾𑌢𑍍𑌯𑍈𑌶𑍍𑌶𑌰𑌾𑌵𑍈𑌶𑍍𑌚 𑌧𑍂𑌪𑌪𑌾𑌤𑍍𑌰𑍈 𑌸𑍍𑌸𑌧𑍂𑌪𑌕𑍈𑌃 ॥ 22 ॥
𑌶𑌙𑍍𑌖𑌪𑌾𑌤𑍍𑌰𑍈 𑌸𑍍𑌸𑍍𑌰𑍁𑌵𑍈 𑌸𑍍𑌸𑍍𑌰𑍁𑌗𑍍𑌭𑌿𑌃 𑌪𑌾𑌤𑍍𑌰𑍈𑌰𑌰𑍍𑌘𑍍𑌯𑌾𑌭𑌿𑌪𑍂𑌰𑌿𑌤𑍈𑌃 ।
𑌲𑌾𑌜𑌪𑍂𑌰𑍍𑌣𑍈𑌶𑍍𑌚 𑌪𑌾𑌤𑍍𑌰𑍀𑌭𑌿𑌰𑌕𑍍𑌷𑌤𑍈𑌰𑌭𑌿𑌸𑌂𑌸𑍍𑌕𑍃𑌤𑍈𑌃 ॥ 23 ॥
𑌦𑌰𑍍𑌭𑍈𑌸𑍍𑌸𑌮𑍈𑌸𑍍𑌸𑌮𑌾𑌸𑍍𑌤𑍀𑌰𑍍𑌯 𑌵𑌿𑌧𑌿𑌵𑌨𑍍𑌮𑌨𑍍𑌤𑍍𑌰𑌪𑍂𑌰𑍍𑌵𑌕𑌮𑍍 ।
𑌅𑌗𑍍𑌨𑌿𑌮𑌾𑌦𑌾𑌯 𑌵𑍇𑌦𑍍𑌯𑌾𑌂 𑌤𑍁 𑌵𑌿𑌧𑌿𑌮𑌨𑍍𑌤𑍍𑌰𑌪𑍁𑌰𑌸𑍍𑌕𑍃𑌤𑌮𑍍 ॥ 24 ॥
𑌜𑍁𑌹𑌾𑌵𑌾𑌗𑍍𑌨𑍗 𑌮𑌹𑌾𑌤𑍇𑌜𑌾 𑌵𑌸𑌿𑌷𑍍𑌠𑍋 𑌭𑌗𑌵𑌾𑌨𑍃𑌷𑌿𑌃 ।
𑌤𑌤𑌸𑍍𑌸𑍀𑌤𑌾𑌂 𑌸𑌮𑌾𑌨𑍀𑌯 𑌸𑌰𑍍𑌵𑌾𑌭𑌰𑌣𑌭𑍂𑌷𑌿𑌤𑌾𑌮𑍍 ॥ 25 ॥
𑌸𑌮𑌕𑍍𑌷𑌮𑌗𑍍𑌨𑍇 𑌸𑍍𑌸𑌂𑌸𑍍𑌥𑌾𑌪𑍍𑌯 𑌰𑌾𑌘𑌵𑌾𑌭𑌿𑌮𑍁𑌖𑍇 𑌤𑌦𑌾 ।
𑌅𑌬𑍍𑌰𑌵𑍀𑌜𑍍𑌜𑌨𑌕𑍋 𑌰𑌾𑌜𑌾 𑌕𑍗𑌸𑌲𑍍𑌯𑌾𑌨𑌨𑍍𑌦𑌵𑌰𑍍𑌧𑌨𑌮𑍍 ॥ 26 ॥
𑌇𑌯𑌂 𑌸𑍀𑌤𑌾 𑌮𑌮 𑌸𑍁𑌤𑌾 𑌸𑌹𑌧𑌰𑍍𑌮𑌚𑌰𑍀 𑌤𑌵 ।
𑌪𑍍𑌰𑌤𑍀𑌚𑍍𑌛 𑌚𑍈𑌨𑌾𑌂 𑌭𑌦𑍍𑌰𑌂 𑌤𑍇 𑌪𑌾𑌣𑌿𑌂 𑌗𑍃𑌹𑍍𑌣𑍀𑌷𑍍𑌵 𑌪𑌾𑌣𑌿𑌨𑌾 ॥ 27 ॥
𑌪𑌤𑌿𑌵𑍍𑌰𑌤𑌾 𑌮𑌹𑌾𑌭𑌾𑌗𑌾 𑌛𑌾𑌯𑍇𑌵𑌾𑌨𑍁𑌗𑌤𑌾 𑌸𑌦𑌾 ।
𑌇𑌤𑍍𑌯𑍁𑌕𑍍𑌤𑍍𑌵𑌾 𑌪𑍍𑌰𑌾𑌕𑍍𑌷𑌿𑌪𑌦𑍍𑌰𑌾𑌜𑌾 𑌮𑌨𑍍𑌤𑍍𑌰𑌪𑍂𑌤𑌂 𑌜𑌲𑌂 𑌤𑌦𑌾 ॥ 28 ॥
𑌸𑌾𑌧𑍁 𑌸𑌾𑌧𑍍𑌵𑌿𑌤𑌿 𑌦𑍇𑌵𑌾𑌨𑌾 𑌮𑍃𑌷𑍀𑌣𑌾𑌂 𑌵𑌦𑌤𑌾𑌂 𑌤𑌦𑌾 ।
𑌦𑍇𑌵𑌦𑍁𑌨𑍍𑌦𑍁𑌭𑌿𑌰𑍍𑌨𑌿𑌰𑍍𑌘𑍋𑌷𑌃 𑌪𑍁𑌷𑍍𑌪𑌵𑌰𑍍𑌷𑍋 𑌮𑌹𑌾𑌨𑌭𑍂𑌤𑍍 ॥ 29 ॥
𑌏𑌵𑌂 𑌦𑌤𑍍𑌤𑍍𑌵𑌾 𑌤𑌦𑌾 𑌸𑍀𑌤𑌾𑌂 𑌮𑌨𑍍𑌤𑍍𑌰𑍋𑌦𑌕𑌪𑍁𑌰𑌸𑍍𑌕𑍃𑌤𑌾𑌮𑍍 ।
𑌅𑌬𑍍𑌰𑌵𑍀𑌜𑍍𑌜𑌨𑌕𑍋 𑌰𑌾𑌜𑌾 𑌹𑌰𑍍𑌷𑍇𑌣𑌾𑌭𑌿𑌪𑌰𑌿𑌪𑍍𑌲𑍁𑌤𑌃 ॥ 30 ॥
𑌲𑌕𑍍𑌷𑍍𑌮𑌣𑌾𑌗𑌚𑍍𑌛 𑌭𑌦𑍍𑌰𑌂 𑌤𑍇 𑌊𑌰𑍍𑌮𑌿𑌲𑌾𑌮𑍁𑌦𑍍𑌯𑌤𑌾𑌂 𑌮𑌯𑌾 ।
𑌪𑍍𑌰𑌤𑍀𑌚𑍍𑌛 𑌪𑌾𑌣𑌿𑌂 𑌗𑍃𑌹𑍍𑌣𑍀𑌷𑍍𑌵 𑌮𑌾𑌭𑍂𑌤𑍍𑌕𑌾𑌲𑌸𑍍𑌯 𑌪𑌰𑍍𑌯𑌯𑌃 ॥ 31 ॥
𑌤𑌮𑍇𑌵𑌮𑍁𑌕𑍍𑌤𑍍𑌵𑌾 𑌜𑌨𑌕𑍋 𑌭𑌰𑌤𑌂 𑌚𑌾𑌭𑍍𑌯𑌭𑌾𑌷𑌤 ।
𑌗𑍃𑌹𑌾𑌣 𑌪𑌾𑌣𑌿𑌂 𑌮𑌾𑌣𑍍𑌡𑌵𑍍𑌯𑌾𑌃 𑌪𑌾𑌣𑌿𑌨𑌾 𑌰𑌘𑍁𑌨𑌨𑍍𑌦𑌨 ॥ 32 ॥
𑌶𑌤𑍍𑌰𑍁𑌘𑍍𑌨𑌂 𑌚𑌾𑌪𑌿 𑌧𑌰𑍍𑌮𑌾𑌤𑍍𑌮𑌾 𑌅𑌬𑍍𑌰𑌵𑍀𑌜𑍍𑌜𑌨𑌕𑍇𑌶𑍍𑌵𑌰𑌃 ।
𑌶𑍍𑌰𑍁𑌤𑌕𑍀𑌰𑍍𑌤𑍍𑌯𑌾 𑌮𑌹𑌾𑌬𑌾𑌹𑍋 𑌪𑌾𑌣𑌿𑌂 𑌗𑍃𑌹𑍍𑌣𑍀𑌷𑍍𑌵 𑌪𑌾𑌣𑌿𑌨𑌾 ॥ 33 ॥
𑌸𑌰𑍍𑌵𑍇 𑌭𑌵𑌨𑍍𑌤𑌸𑍍𑌸𑍗𑌮𑍍𑌯𑌾𑌶𑍍𑌚 𑌸𑌰𑍍𑌵𑍇 𑌸𑍁𑌚𑌰𑌿𑌤𑌵𑍍𑌰𑌤𑌾𑌃 ।
𑌪𑌤𑍍𑌨𑍀𑌭𑌿𑌸𑍍𑌸𑌨𑍍𑌤𑍁 𑌕𑌾𑌕𑍁𑌤𑍍𑌸𑍍𑌥𑌾 𑌮𑌾𑌭𑍂𑌤𑍍𑌕𑌾𑌲𑌸𑍍𑌯 𑌪𑌰𑍍𑌯𑌯𑌃 ॥ 34 ॥
𑌜𑌨𑌕𑌸𑍍𑌯 𑌵𑌚 𑌶𑍍𑌶𑍃𑌤𑍍𑌵𑌾 𑌪𑌾𑌣𑍀𑌨𑍍 𑌪𑌾𑌣𑌿𑌭𑌿𑌰𑌾𑌸𑍍𑌪𑍃𑌶𑌨𑍍 ।
𑌚𑌤𑍍𑌵𑌾𑌰𑌸𑍍𑌤𑍇 𑌚𑌤𑌸𑍃𑌣𑌾𑌂 𑌵𑌸𑌿𑌷𑍍𑌠𑌸𑍍𑌯 𑌮𑌤𑍇 𑌸𑍍𑌥𑌿𑌤𑌾𑌃 ॥ 35 ॥
𑌅𑌗𑍍𑌨𑌿𑌂 𑌪𑍍𑌰𑌦𑌕𑍍𑌷𑌿𑌣𑍀𑌕𑍃𑌤𑍍𑌯 𑌵𑍇𑌦𑌿𑌂 𑌰𑌾𑌜𑌾𑌨𑌮𑍇𑌵 𑌚 ।
𑌋𑌷𑍀𑌂𑌶𑍍𑌚𑍈𑌵 𑌮𑌹𑌾𑌤𑍍𑌮𑌾𑌨𑌸𑍍𑌸𑌭𑌾𑌰𑍍𑌯𑌾 𑌰𑌘𑍁𑌸𑌤𑍍𑌤𑌮𑌾𑌃 ॥ 36 ॥
𑌯𑌥𑍋𑌕𑍍𑌤𑍇𑌨 𑌤𑌦𑌾 𑌚𑌕𑍍𑌰𑍁𑌰𑍍𑌵𑌿𑌵𑌾𑌹𑌂 𑌵𑌿𑌧𑌿𑌪𑍂𑌰𑍍𑌵𑌕𑌮𑍍 ।
𑌕𑌾𑌕𑍁𑌤𑍍𑌸𑍍𑌥𑍈𑌶𑍍𑌚 𑌗𑍃𑌹𑍀𑌤𑍇𑌷𑍁 𑌲𑌲𑌿𑌤𑍇𑌷𑍁 𑌚 𑌪𑌾𑌣𑌿𑌷𑍁 ॥ 37 ॥
𑌪𑍁𑌷𑍍𑌪𑌵𑍃𑌷𑍍𑌟𑌿𑌰𑍍𑌮𑌹𑌤𑍍𑌯𑌾𑌸𑍀𑌦𑌨𑍍𑌤𑌰𑌿𑌕𑍍𑌷𑌾𑌤𑍍𑌸𑍁𑌭𑌾𑌸𑍍𑌵𑌰𑌾 ।
𑌦𑌿𑌵𑍍𑌯𑌦𑍁𑌨𑍍𑌦𑍁𑌭𑌿𑌨𑌿𑌰𑍍𑌘𑍋𑌷𑍈𑌰𑍍𑌗𑍀𑌤𑌵𑌾𑌦𑌿𑌤𑍍𑌰𑌨𑌿𑌸𑍍𑌵𑌨𑍈𑌃 ॥ 38 ॥
𑌨𑌨𑍃𑌤𑍁𑌶𑍍𑌚𑌾𑌪𑍍𑌸𑌰𑌸𑍍𑌸𑌙𑍍𑌘𑌾 𑌗𑌨𑍍𑌧𑌰𑍍𑌵𑌾𑌶𑍍𑌚 𑌜𑌗𑍁𑌃 𑌕𑌲𑌮𑍍 ।
𑌵𑌿𑌵𑌾𑌹𑍇 𑌰𑌘𑍁𑌮𑍁𑌖𑍍𑌯𑌾𑌨𑌾𑌂 𑌤𑌦𑌦𑍍𑌭𑍁𑌤𑌮𑌦𑍃𑌶𑍍𑌯𑌤 ॥ 39 ॥
𑌈𑌦𑍃𑌶𑍇 𑌵𑌰𑍍𑌤𑌮𑌾𑌨𑍇 𑌤𑍁 𑌤𑍂𑌰𑍍𑌯𑍋𑌦𑍍𑌘𑍁𑌷𑍍𑌟𑌨𑌿𑌨𑌾𑌦𑌿𑌤𑍇 ।
𑌤𑍍𑌰𑌿𑌰𑌗𑍍𑌨𑌿𑌂 𑌤𑍇 𑌪𑌰𑌿𑌕𑍍𑌰𑌮𑍍𑌯 𑌊𑌹𑍁𑌰𑍍𑌭𑌾𑌰𑍍𑌯𑌾𑌂 𑌮𑌹𑍗𑌜𑌸𑌃 ॥ 40 ॥
𑌅𑌥𑍋𑌪𑌕𑌾𑌰𑍍𑌯𑌾𑌂 𑌜𑌗𑍍𑌮𑍁𑌸𑍍𑌤𑍇 𑌸𑌭𑌾𑌰𑍍𑌯𑌾 𑌰𑌘𑍁𑌨𑌨𑍍𑌦𑌨𑌾𑌃 ।
𑌰𑌾𑌜𑌾𑌽𑌪𑍍𑌯𑌨𑍁𑌯𑌯𑍗 𑌪𑌶𑍍𑌯𑌨𑍍𑌤𑍍𑌸𑌰𑍍𑌷𑌿𑌸𑌙𑍍𑌘 𑌸𑍍𑌸𑌬𑌾𑌨𑍍𑌧𑌵𑌃 ॥ 41 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌣𑍍𑌡𑍇 𑌤𑍍𑌰𑌿𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha trisaptatitamassargaḥ |
yasmiṃstu divase rājā cakre godānamuttamam |
tasmiṃ stu divase śūro yudhājitsamupeyivān || 1 ||
putraḥ kekayarājasya sākṣādbharatamātulaḥ |
dṛṣṭvā pṛṣṭvā ca kuśalaṃ rājānamidamabravīt || 2 ||
kekayādhipatī rājā snehāt kuśalamabravīt |
yeṣāṃ kuśalakāmo'si teṣāṃ sampratyanāmayam || 3 ||
svasrīyaṃ mama rājendra draṣṭukāmo mahīpatiḥ |
tadarthamupayāto'hamayodhyāṃ raghunandana || 4 ||
śrutvā tvahamayodhyāyāṃ vivāhārthaṃ tavātmajān |
mithilāmupayātāṃstu tvayā saha mahīpate || 5 ||
tvarayābhyupayāto'haṃ draṣṭukāma ssvasussutam |
atha rājā daśarathaḥ priyātithimupasthitam || 6 ||
dṛṣṭvā paramasatkāraiḥ pūjārhaṃ samapūjayat |
tatastāmuṣito rātriṃ saha putrairmahātmabhiḥ || 7 ||
prabhāte punarutthāya kṛtvā karmāṇi karmavit |
ṛṣīṃstadā puraskṛtya yajñavāṭamupāgamat || 8 ||
yukte muhūrte vijaye sarvābharaṇabhūṣitaiḥ |
bhrātṛbhissahito rāmaḥ kṛtakautukamaṅgalaḥ || 9 ||
vasiṣṭhaṃ purataḥ kṛtvā maharṣīnaparānapi |
pitu ssamīpamāśritya tasthau bhrātṛbhirāvṛtaḥ || 10 ||
vasiṣṭho bhagavānetya vaidehamidamabravīt |
rājā daśaratho rājan kṛtakautukamaṅgalaiḥ || 11 ||
putrairnaravara śreṣṭha dātāramabhikāṅkṣate |
dātṛpratigrahītṛbhyāṃ sarvārthāḥ prabhavanti hi || 12 ||
svadharmaṃ pratipadyasva kṛtvā vaivāhyamuttamam |
ityuktaḥ paramodāro vasiṣṭhena mahātmanā || 13 ||
pratyuvāca mahātejā vākyaṃ paramadharmavit |
kassthitaḥ pratihāro me kasyājñā sampratīkṣyate || 14 ||
svagṛhe ko vicāro'sti yathā rājyamidaṃ tava |
kṛtakautukasarvasvā vedimūlamupāgatāḥ || 15 ||
mama kanyā muniśreṣṭha dīptā vahnerivārciṣaḥ |
sajjo'haṃ tvatpratīkṣo'smi vedyāmasyāṃ pratiṣṭhitaḥ || 16 ||
avighnaṃ kurutāṃ rājā kimarthamavalambate |
tadvākyaṃ janakenoktaṃ śrutvā daśarathastadā |
praveśayāmāsa sutān sarvānṛṣigaṇānapi || 17 ||
tato rājā videhānāṃ vasiṣṭhamidamabravīt || 18 ||
kārayasva ṛṣe sarvamṛṣibhiḥ saha dhārmika |
rāmasya lokarāmasya kriyāṃ vaivāhikīṃ vibho || 19 ||
tathetyuktvā tu janakaṃ vasiṣṭho bhagavānṛṣiḥ |
viśvāmitraṃ puraskṛtya śatānandaṃ ca dhārmikam || 20 ||
prapāmadhye tu vidhivatvediṃ kṛtvā mahātapāḥ |
alañcakāra tāṃ vediṃ gandhapuṣpai ssamantataḥ || 21 ||
suvarṇapālikābhiśca chidrakumbhaiśca sāṅkuraiḥ |
aṅkurāḍhyaiśśarāvaiśca dhūpapātrai ssadhūpakaiḥ || 22 ||
śaṅkhapātrai ssruvai ssrugbhiḥ pātrairarghyābhipūritaiḥ |
lājapūrṇaiśca pātrībhirakṣatairabhisaṃskṛtaiḥ || 23 ||
darbhaissamaissamāstīrya vidhivanmantrapūrvakam |
agnimādāya vedyāṃ tu vidhimantrapuraskṛtam || 24 ||
juhāvāgnau mahātejā vasiṣṭho bhagavānṛṣiḥ |
tatassītāṃ samānīya sarvābharaṇabhūṣitām || 25 ||
samakṣamagne ssaṃsthāpya rāghavābhimukhe tadā |
abravījjanako rājā kausalyānandavardhanam || 26 ||
iyaṃ sītā mama sutā sahadharmacarī tava |
pratīccha caināṃ bhadraṃ te pāṇiṃ gṛhṇīṣva pāṇinā || 27 ||
pativratā mahābhāgā chāyevānugatā sadā |
ityuktvā prākṣipadrājā mantrapūtaṃ jalaṃ tadā || 28 ||
sādhu sādhviti devānā mṛṣīṇāṃ vadatāṃ tadā |
devadundubhirnirghoṣaḥ puṣpavarṣo mahānabhūt || 29 ||
evaṃ dattvā tadā sītāṃ mantrodakapuraskṛtām |
abravījjanako rājā harṣeṇābhipariplutaḥ || 30 ||
lakṣmaṇāgaccha bhadraṃ te ūrmilāmudyatāṃ mayā |
pratīccha pāṇiṃ gṛhṇīṣva mābhūtkālasya paryayaḥ || 31 ||
tamevamuktvā janako bharataṃ cābhyabhāṣata |
gṛhāṇa pāṇiṃ māṇḍavyāḥ pāṇinā raghunandana || 32 ||
śatrughnaṃ cāpi dharmātmā abravījjanakeśvaraḥ |
śrutakīrtyā mahābāho pāṇiṃ gṛhṇīṣva pāṇinā || 33 ||
sarve bhavantassaumyāśca sarve sucaritavratāḥ |
patnībhissantu kākutsthā mābhūtkālasya paryayaḥ || 34 ||
janakasya vaca śśṛtvā pāṇīn pāṇibhirāspṛśan |
catvāraste catasṛṇāṃ vasiṣṭhasya mate sthitāḥ || 35 ||
agniṃ pradakṣiṇīkṛtya vediṃ rājānameva ca |
ṛṣīṃścaiva mahātmānassabhāryā raghusattamāḥ || 36 ||
yathoktena tadā cakrurvivāhaṃ vidhipūrvakam |
kākutsthaiśca gṛhīteṣu laliteṣu ca pāṇiṣu || 37 ||
puṣpavṛṣṭirmahatyāsīdantarikṣātsubhāsvarā |
divyadundubhinirghoṣairgītavāditranisvanaiḥ || 38 ||
nanṛtuścāpsarassaṅghā gandharvāśca jaguḥ kalam |
vivāhe raghumukhyānāṃ tadadbhutamadṛśyata || 39 ||
īdṛśe vartamāne tu tūryodghuṣṭaninādite |
triragniṃ te parikramya ūhurbhāryāṃ mahaujasaḥ || 40 ||
athopakāryāṃ jagmuste sabhāryā raghunandanāḥ |
rājā'pyanuyayau paśyantsarṣisaṅgha ssabāndhavaḥ || 41 ||
ityārṣe śrīmadrāmāyaṇe vālmīkīya ādikāvye bālakāṇḍe trisaptatitamassargaḥ ||
InfoLyter.in — Sacred Vedic Knowledge Portal · Free forever