📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
𑌗𑍀𑌤𑌗𑍋𑌵𑌿𑌨𑍍𑌦𑌂 𑌦𑍍𑌵𑌿𑌤𑍀𑌯𑌃 𑌸𑌰𑍍𑌗𑌃 - 𑌅𑌕𑍍𑌲𑍇𑌶 𑌕𑍇𑌶𑌵𑌃
Gitagovindam Dvitiyah Sargah - Aklesha Keshavah
Vishnu Gita Jayadeva Grantha
॥ 𑌦𑍍𑌵𑌿𑌤𑍀𑌯𑌃 𑌸𑌰𑍍𑌗𑌃 ॥
॥ 𑌅𑌕𑍍𑌲𑍇𑌶𑌕𑍇𑌶𑌵𑌃 ॥
𑌵𑌿𑌹𑌰𑌤𑌿 𑌵𑌨𑍇 𑌰𑌾𑌧𑌾 𑌸𑌾𑌧𑌾𑌰𑌣𑌪𑍍𑌰𑌣𑌯𑍇 𑌹𑌰𑍗 𑌵𑌿𑌗𑌲𑌿𑌤𑌨𑌿𑌜𑍋𑌤𑍍𑌕𑌰𑍍𑌷𑌾𑌦𑍀𑌰𑍍𑌷𑍍𑌯𑌾𑌵𑌶𑍇𑌨 𑌗𑌤𑌾𑌨𑍍𑌯𑌤𑌃 ।
𑌕𑍍𑌵𑌚𑌿𑌦𑌪𑌿 𑌲𑌤𑌾𑌕𑍁𑌞𑍍𑌜𑍇 𑌗𑍁𑌞𑍍𑌜𑌨𑍍𑌮𑌧𑍁𑌵𑍍𑌰𑌤𑌮𑌣𑍍𑌡𑌲𑍀-𑌮𑍁𑌖𑌰𑌶𑌿𑌖𑌰𑍇 𑌲𑍀𑌨𑌾 𑌦𑍀𑌨𑌾𑌪𑍍𑌯𑍁𑌵𑌾𑌚 𑌰𑌹𑌃 𑌸𑌖𑍀𑌮𑍍 ॥ 14 ॥
॥ 𑌗𑍀𑌤𑌂 5 ॥
𑌸𑌞𑍍𑌚𑌰𑌦𑌧𑌰𑌸𑍁𑌧𑌾𑌮𑌧𑍁𑌰𑌧𑍍𑌵𑌨𑌿𑌮𑍁𑌖𑌰𑌿𑌤𑌮𑍋𑌹𑌨𑌵𑌂𑌶𑌮𑍍 ।
𑌚𑌲𑌿𑌤𑌦𑍃𑌗𑌞𑍍𑌚𑌲𑌚𑌞𑍍𑌚𑌲𑌮𑍗𑌲𑌿𑌕𑌪𑍋𑌲𑌵𑌿𑌲𑍋𑌲𑌵𑌤𑌂𑌸𑌮𑍍 ॥
𑌰𑌾𑌸𑍇 𑌹𑌰𑌿𑌮𑌿𑌹 𑌵𑌿𑌹𑌿𑌤𑌵𑌿𑌲𑌾𑌸𑌂 𑌸𑍍𑌮𑌰𑌤𑌿 𑌮𑌨𑍋 𑌮𑌮 𑌕𑍃𑌤𑌪𑌰𑌿𑌹𑌾𑌸𑌮𑍍 ॥ 1 ॥
𑌚𑌨𑍍𑌦𑍍𑌰𑌕𑌚𑌾𑌰𑍁𑌮𑌯𑍂𑌰𑌶𑌿𑌖𑌣𑍍𑌡𑌕𑌮𑌣𑍍𑌡𑌲𑌵𑌲𑌯𑌿𑌤𑌕𑍇𑌶𑌮𑍍 ।
𑌪𑍍𑌰𑌚𑍁𑌰𑌪𑍁𑌰𑌨𑍍𑌦𑌰𑌧𑌨𑍁𑌰𑌨𑍁𑌰𑌞𑍍𑌜𑌿𑌤𑌮𑍇𑌦𑍁𑌰𑌮𑍁𑌦𑌿𑌰𑌸𑍁𑌵𑍇𑌶𑌮𑍍 ॥ 2 ॥
𑌗𑍋𑌪𑌕𑌦𑌮𑍍𑌬𑌨𑌿𑌤𑌮𑍍𑌬𑌵𑌤𑍀𑌮𑍁𑌖𑌚𑍁𑌮𑍍𑌬𑌨𑌲𑌮𑍍𑌭𑌿𑌤𑌲𑍋𑌭𑌮𑍍 ।
𑌬𑌨𑍍𑌧𑍁𑌜𑍀𑌵𑌮𑌧𑍁𑌰𑌾𑌧𑌰𑌪𑌲𑍍𑌲𑌵𑌮𑍁𑌲𑍍𑌲𑌸𑌿𑌤𑌸𑍍𑌮𑌿𑌤𑌶𑍋𑌭𑌮𑍍 ॥ 3 ॥
𑌵𑌿𑌪𑍁𑌲𑌪𑍁𑌲𑌕𑌭𑍁𑌜𑌪𑌲𑍍𑌲𑌵𑌵𑌲𑌯𑌿𑌤𑌵𑌲𑍍𑌲𑌵𑌯𑍁𑌵𑌤𑌿𑌸𑌹𑌸𑍍𑌰𑌮𑍍 ।
𑌕𑌰𑌚𑌰𑌣𑍋𑌰𑌸𑌿 𑌮𑌣𑌿𑌗𑌣𑌭𑍂𑌷𑌣𑌕𑌿𑌰𑌣𑌵𑌿𑌭𑌿𑌨𑍍𑌨𑌤𑌮𑌿𑌸𑍍𑌰𑌮𑍍 ॥ 4 ॥
𑌜𑌲𑌦𑌪𑌟𑌲𑌵𑌲𑌦𑌿𑌨𑍍𑌦𑍁𑌵𑌿𑌨𑌨𑍍𑌦𑌕𑌚𑌨𑍍𑌦𑌨𑌤𑌿𑌲𑌕𑌲𑌲𑌾𑌟𑌮𑍍 ।
𑌪𑍀𑌨𑌪𑌯𑍋𑌧𑌰𑌪𑌰𑌿𑌸𑌰𑌮𑌰𑍍𑌦𑌨𑌨𑌿𑌰𑍍𑌦𑌯𑌹𑍃𑌦𑌯𑌕𑌵𑌾𑌟𑌮𑍍 ॥ 5 ॥
𑌮𑌣𑌿𑌮𑌯𑌮𑌕𑌰𑌮𑌨𑍋𑌹𑌰𑌕𑍁𑌣𑍍𑌡𑌲𑌮𑌣𑍍𑌡𑌿𑌤𑌗𑌣𑍍𑌡𑌮𑍁𑌦𑌾𑌰𑌮𑍍 ।
𑌪𑍀𑌤𑌵𑌸𑌨𑌮𑌨𑍁𑌗𑌤𑌮𑍁𑌨𑌿𑌮𑌨𑍁𑌜𑌸𑍁𑌰𑌾𑌸𑍁𑌰𑌵𑌰𑌪𑌰𑌿𑌵𑌾𑌰𑌮𑍍 ॥ 6 ॥
𑌵𑌿𑌶𑌦𑌕𑌦𑌮𑍍𑌬𑌤𑌲𑍇 𑌮𑌿𑌲𑌿𑌤𑌂 𑌕𑌲𑌿𑌕𑌲𑍁𑌷𑌭𑌯𑌂 𑌶𑌮𑌯𑌨𑍍𑌤𑌮𑍍 ।
𑌮𑌾𑌮𑌪𑌿 𑌕𑌿𑌮𑌪𑌿 𑌤𑌰𑌙𑍍𑌗𑌦𑌨𑌙𑍍𑌗𑌦𑍃𑌶𑌾 𑌮𑌨𑌸𑌾 𑌰𑌮𑌯𑌨𑍍𑌤𑌮𑍍 ॥ 7 ॥
𑌶𑍍𑌰𑍀𑌜𑌯𑌦𑍇𑌵𑌭𑌣𑌿𑌤𑌮𑌤𑌿𑌸𑍁𑌨𑍍𑌦𑌰𑌮𑍋𑌹𑌨𑌮𑌧𑍁𑌰𑌿𑌪𑍁𑌰𑍂𑌪𑌮𑍍 ।
𑌹𑌰𑌿𑌚𑌰𑌣𑌸𑍍𑌮𑌰𑌣𑌂 𑌪𑍍𑌰𑌤𑌿 𑌸𑌮𑍍𑌪𑍍𑌰𑌤𑌿 𑌪𑍁𑌣𑍍𑌯𑌵𑌤𑌾𑌮𑌨𑍁𑌰𑍂𑌪𑌮𑍍 ॥ 8 ॥
𑌗𑌣𑌯𑌤𑌿 𑌗𑍁𑌣𑌗𑍍𑌰𑌾𑌮𑌂 𑌭𑌾𑌮𑌂 𑌭𑍍𑌰𑌮𑌾𑌦𑌪𑌿 𑌨𑍇𑌹𑌤𑍇 𑌵𑌹𑌤𑌿 𑌚 𑌪𑌰𑌿𑌤𑍋𑌷𑌂 𑌦𑍋𑌷𑌂 𑌵𑌿𑌮𑍁𑌞𑍍𑌚𑌤𑌿 𑌦𑍂𑌰𑌤𑌃 ।
𑌯𑍁𑌵𑌤𑌿𑌷𑍁 𑌵𑌲𑌸𑍍𑌤𑍃𑌷𑍍𑌣𑍇 𑌕𑍃𑌷𑍍𑌣𑍇 𑌵𑌿𑌹𑌾𑌰𑌿𑌣𑌿 𑌮𑌾𑌂 𑌵𑌿𑌨𑌾 𑌪𑍁𑌨𑌰𑌪𑌿 𑌮𑌨𑍋 𑌵𑌾𑌮𑌂 𑌕𑌾𑌮𑌂 𑌕𑌰𑍋𑌤𑌿 𑌕𑌰𑍋𑌮𑌿 𑌕𑌿𑌮𑍍 ॥ 15 ॥
॥ 𑌗𑍀𑌤𑌂 6 ॥
𑌨𑌿𑌭𑍃𑌤𑌨𑌿𑌕𑍁𑌞𑍍𑌜𑌗𑍃𑌹𑌂 𑌗𑌤𑌯𑌾 𑌨𑌿𑌶𑌿 𑌰𑌹𑌸𑌿 𑌨𑌿𑌲𑍀𑌯 𑌵𑌸𑌨𑍍𑌤𑌮𑍍 ।
𑌚𑌕𑌿𑌤𑌵𑌿𑌲𑍋𑌕𑌿𑌤𑌸𑌕𑌲𑌦𑌿𑌶𑌾 𑌰𑌤𑌿𑌰𑌭𑌸𑌰𑌸𑍇𑌨 𑌹𑌸𑌨𑍍𑌤𑌮𑍍 ॥
𑌸𑌖𑌿 𑌹𑍇 𑌕𑍇𑌶𑌿𑌮𑌥𑌨𑌮𑍁𑌦𑌾𑌰𑌂 𑌰𑌮𑌯 𑌮𑌯𑌾 𑌸𑌹 𑌮𑌦𑌨𑌮𑌨𑍋𑌰𑌥𑌭𑌾𑌵𑌿𑌤𑌯𑌾 𑌸𑌵𑌿𑌕𑌾𑌰𑌮𑍍 ॥ 1 ॥
𑌪𑍍𑌰𑌥𑌮𑌸𑌮𑌾𑌗𑌮𑌲𑌜𑍍𑌜𑌿𑌤𑌯𑌾 𑌪𑌟𑍁𑌚𑌾𑌟𑍁𑌶𑌤𑍈𑌰𑌨𑍁𑌕𑍂𑌲𑌮𑍍 ।
𑌮𑍃𑌦𑍁𑌮𑌧𑍁𑌰𑌸𑍍𑌮𑌿𑌤𑌭𑌾𑌷𑌿𑌤𑌯𑌾 𑌶𑌿𑌥𑌿𑌲𑍀𑌕𑍃𑌤𑌜𑌘𑌨𑌦𑍁𑌕𑍂𑌲𑌮𑍍 ॥ 2 ॥
𑌕𑌿𑌸𑌲𑌯𑌶𑌯𑌨𑌨𑌿𑌵𑍇𑌶𑌿𑌤𑌯𑌾 𑌚𑌿𑌰𑌮𑍁𑌰𑌸𑌿 𑌮𑌮𑍈𑌵 𑌶𑌯𑌾𑌨𑌮𑍍 ।
𑌕𑍃𑌤𑌪𑌰𑌿𑌰𑌮𑍍𑌭𑌣𑌚𑍁𑌮𑍍𑌬𑌨𑌯𑌾 𑌪𑌰𑌿𑌰𑌭𑍍𑌯 𑌕𑍃𑌤𑌾𑌧𑌰𑌪𑌾𑌨𑌮𑍍 ॥ 3 ॥
𑌅𑌲𑌸𑌨𑌿𑌮𑍀𑌲𑌿𑌤𑌲𑍋𑌚𑌨𑌯𑌾 𑌪𑍁𑌲𑌕𑌾𑌵𑌲𑌿𑌲𑌲𑌿𑌤𑌕𑌪𑍋𑌲𑌮𑍍 ।
𑌶𑍍𑌰𑌮𑌜𑌲𑌸𑌕𑌲𑌕𑌲𑍇𑌵𑌰𑌯𑌾 𑌵𑌰𑌮𑌦𑌨𑌮𑌦𑌾𑌦𑌤𑌿𑌲𑍋𑌲𑌮𑍍 ॥ 4 ॥
𑌕𑍋𑌕𑌿𑌲𑌕𑌲𑌰𑌵𑌕𑍂𑌜𑌿𑌤𑌯𑌾 𑌜𑌿𑌤𑌮𑌨𑌸𑌿𑌜𑌤𑌨𑍍𑌤𑍍𑌰𑌵𑌿𑌚𑌾𑌰𑌮𑍍 ।
𑌶𑍍𑌲𑌥𑌕𑍁𑌸𑍁𑌮𑌾𑌕𑍁𑌲𑌕𑍁𑌨𑍍𑌤𑌲𑌯𑌾 𑌨𑌖𑌲𑌿𑌖𑌿𑌤𑌘𑌨𑌸𑍍𑌤𑌨𑌭𑌾𑌰𑌮𑍍 ॥ 5 ॥
𑌚𑌰𑌣𑌰𑌣𑌿𑌤𑌮𑌨𑌿𑌨𑍂𑌪𑍁𑌰𑌯𑌾 𑌪𑌰𑌿𑌪𑍂𑌰𑌿𑌤𑌸𑍁𑌰𑌤𑌵𑌿𑌤𑌾𑌨𑌮𑍍 ।
𑌮𑍁𑌖𑌰𑌵𑌿𑌶𑍃𑌙𑍍𑌖𑌲𑌮𑍇𑌖𑌲𑌯𑌾 𑌸𑌕𑌚𑌗𑍍𑌰𑌹𑌚𑍁𑌮𑍍𑌬𑌨𑌦𑌾𑌨𑌮𑍍 ॥ 6 ॥
𑌰𑌤𑌿𑌸𑍁𑌖𑌸𑌮𑌯𑌰𑌸𑌾𑌲𑌸𑌯𑌾 𑌦𑌰𑌮𑍁𑌕𑍁𑌲𑌿𑌤𑌨𑌯𑌨𑌸𑌰𑍋𑌜𑌮𑍍 ।
𑌨𑌿𑌃𑌸𑌹𑌨𑌿𑌪𑌤𑌿𑌤𑌤𑌨𑍁𑌲𑌤𑌯𑌾 𑌮𑌧𑍁𑌸𑍂𑌦𑌨𑌮𑍁𑌦𑌿𑌤𑌮𑌨𑍋𑌜𑌮𑍍 ॥ 7 ॥
𑌶𑍍𑌰𑍀𑌜𑌯𑌦𑍇𑌵𑌭𑌣𑌿𑌤𑌮𑌿𑌦𑌮𑌤𑌿𑌶𑌯𑌮𑌧𑍁𑌰𑌿𑌪𑍁𑌨𑌿𑌧𑍁𑌵𑌨𑌶𑍀𑌲𑌮𑍍 ।
𑌸𑍁𑌖𑌮𑍁𑌤𑍍𑌕𑌣𑍍𑌠𑌿𑌤𑌗𑍋𑌪𑌵𑌧𑍂𑌕𑌥𑌿𑌤𑌂 𑌵𑌿𑌤𑌨𑍋𑌤𑍁 𑌸𑌲𑍀𑌲𑌮𑍍 ॥ 8 ॥
𑌹𑌸𑍍𑌤𑌸𑍍𑌰𑌸𑍍𑌤𑌵𑌿𑌲𑌾𑌸𑌵𑌂𑌶𑌮𑌨𑍃𑌜𑍁𑌭𑍍𑌰𑍂𑌵𑌲𑍍𑌲𑌿𑌮𑌦𑍍𑌬𑌲𑍍𑌲𑌵𑍀-𑌵𑍃𑌨𑍍𑌦𑍋𑌤𑍍𑌸𑌾𑌰𑌿𑌦𑍃𑌗𑌨𑍍𑌤𑌵𑍀𑌕𑍍𑌷𑌿𑌤𑌮𑌤𑌿𑌸𑍍𑌵𑍇𑌦𑌾𑌰𑍍𑌦𑍍𑌰𑌗𑌣𑍍𑌡𑌸𑍍𑌥𑌲𑌮𑍍 ।
𑌮𑌾𑌮𑍁𑌦𑍍𑌵𑍀𑌕𑍍𑌷𑍍𑌯 𑌵𑌿𑌲𑌕𑍍𑌷𑌿𑌤𑌂 𑌸𑍍𑌮𑌿𑌤𑌸𑍁𑌧𑌾𑌮𑍁𑌗𑍍𑌧𑌾𑌨𑌨𑌂 𑌕𑌾𑌨𑌨𑍇 𑌗𑍋𑌵𑌿𑌨𑍍𑌦𑌂 𑌵𑍍𑌰𑌜𑌸𑍁𑌨𑍍𑌦𑌰𑍀𑌗𑌣𑌵𑍃𑌤𑌂 𑌪𑌶𑍍𑌯𑌾𑌮𑌿 𑌹𑍃𑌷𑍍𑌯𑌾𑌮𑌿 𑌚 ॥ 16 ॥
𑌦𑍁𑌰𑌾𑌲𑍋𑌕𑌸𑍍𑌤𑍋𑌕𑌸𑍍𑌤𑌬𑌕𑌨𑌵𑌕𑌾𑌶𑍋𑌕𑌲𑌤𑌿𑌕𑌾-𑌵𑌿𑌕𑌾𑌸𑌃 𑌕𑌾𑌸𑌾𑌰𑍋𑌪𑌵𑌨𑌪𑌵𑌨𑍋𑌽𑌪𑌿 𑌵𑍍𑌯𑌥𑌯𑌤𑌿 ।
𑌅𑌪𑌿 𑌭𑍍𑌰𑌾𑌮𑍍𑌯𑌦𑍍𑌭𑍃𑌙𑍍𑌗𑍀𑌰𑌣𑌿𑌤𑌰𑌮𑌣𑍀𑌯𑌾 𑌨 𑌮𑍁𑌕𑍁𑌲-𑌪𑍍𑌰𑌸𑍂𑌤𑌿𑌶𑍍𑌚𑍂𑌤𑌾𑌨𑌾𑌂 𑌸𑌖𑌿 𑌶𑌿𑌖𑌰𑌿𑌣𑍀𑌯𑌂 𑌸𑍁𑌖𑌯𑌤𑌿 ॥ 17 ॥
॥ 𑌇𑌤𑌿 𑌗𑍀𑌤𑌗𑍋𑌵𑌿𑌨𑍍𑌦𑍇 𑌅𑌕𑍍𑌲𑍇𑌶𑌕𑍇𑌶𑌵𑍋 𑌨𑌾𑌮 𑌦𑍍𑌵𑌿𑌤𑍀𑌯𑌃 𑌸𑌰𑍍𑌗𑌃 ॥
Roman (IAST) Transliteration
|| dvitīyaḥ sargaḥ ||
|| akleśakeśavaḥ ||
viharati vane rādhā sādhāraṇapraṇaye harau vigalitanijotkarṣādīrṣyāvaśena gatānyataḥ |
kvacidapi latākuñje guñjanmadhuvratamaṇḍalī-mukharaśikhare līnā dīnāpyuvāca rahaḥ sakhīm || 14 ||
|| gītaṃ 5 ||
sañcaradadharasudhāmadhuradhvanimukharitamohanavaṃśam |
calitadṛgañcalacañcalamaulikapolavilolavataṃsam ||
rāse harimiha vihitavilāsaṃ smarati mano mama kṛtaparihāsam || 1 ||
candrakacārumayūraśikhaṇḍakamaṇḍalavalayitakeśam |
pracurapurandaradhanuranurañjitameduramudirasuveśam || 2 ||
gopakadambanitambavatīmukhacumbanalambhitalobham |
bandhujīvamadhurādharapallavamullasitasmitaśobham || 3 ||
vipulapulakabhujapallavavalayitavallavayuvatisahasram |
karacaraṇorasi maṇigaṇabhūṣaṇakiraṇavibhinnatamisram || 4 ||
jaladapaṭalavaladinduvinandakacandanatilakalalāṭam |
pīnapayodharaparisaramardananirdayahṛdayakavāṭam || 5 ||
maṇimayamakaramanoharakuṇḍalamaṇḍitagaṇḍamudāram |
pītavasanamanugatamunimanujasurāsuravaraparivāram || 6 ||
viśadakadambatale militaṃ kalikaluṣabhayaṃ śamayantam |
māmapi kimapi taraṅgadanaṅgadṛśā manasā ramayantam || 7 ||
śrījayadevabhaṇitamatisundaramohanamadhuripurūpam |
haricaraṇasmaraṇaṃ prati samprati puṇyavatāmanurūpam || 8 ||
gaṇayati guṇagrāmaṃ bhāmaṃ bhramādapi nehate vahati ca paritoṣaṃ doṣaṃ vimuñcati dūrataḥ |
yuvatiṣu valastṛṣṇe kṛṣṇe vihāriṇi māṃ vinā punarapi mano vāmaṃ kāmaṃ karoti karomi kim || 15 ||
|| gītaṃ 6 ||
nibhṛtanikuñjagṛhaṃ gatayā niśi rahasi nilīya vasantam |
cakitavilokitasakaladiśā ratirabhasarasena hasantam ||
sakhi he keśimathanamudāraṃ ramaya mayā saha madanamanorathabhāvitayā savikāram || 1 ||
prathamasamāgamalajjitayā paṭucāṭuśatairanukūlam |
mṛdumadhurasmitabhāṣitayā śithilīkṛtajaghanadukūlam || 2 ||
kisalayaśayananiveśitayā ciramurasi mamaiva śayānam |
kṛtaparirambhaṇacumbanayā parirabhya kṛtādharapānam || 3 ||
alasanimīlitalocanayā pulakāvalilalitakapolam |
śramajalasakalakalevarayā varamadanamadādatilolam || 4 ||
kokilakalaravakūjitayā jitamanasijatantravicāram |
ślathakusumākulakuntalayā nakhalikhitaghanastanabhāram || 5 ||
caraṇaraṇitamaninūpurayā paripūritasuratavitānam |
mukharaviśṛṅkhalamekhalayā sakacagrahacumbanadānam || 6 ||
ratisukhasamayarasālasayā daramukulitanayanasarojam |
niḥsahanipatitatanulatayā madhusūdanamuditamanojam || 7 ||
śrījayadevabhaṇitamidamatiśayamadhuripunidhuvanaśīlam |
sukhamutkaṇṭhitagopavadhūkathitaṃ vitanotu salīlam || 8 ||
hastasrastavilāsavaṃśamanṛjubhrūvallimadballavī-vṛndotsāridṛgantavīkṣitamatisvedārdragaṇḍasthalam |
māmudvīkṣya vilakṣitaṃ smitasudhāmugdhānanaṃ kānane govindaṃ vrajasundarīgaṇavṛtaṃ paśyāmi hṛṣyāmi ca || 16 ||
durālokastokastabakanavakāśokalatikā-vikāsaḥ kāsāropavanapavano'pi vyathayati |
api bhrāmyadbhṛṅgīraṇitaramaṇīyā na mukula-prasūtiścūtānāṃ sakhi śikhariṇīyaṃ sukhayati || 17 ||
|| iti gītagovinde akleśakeśavo nāma dvitīyaḥ sargaḥ ||
InfoLyter.in — Sacred Vedic Knowledge Portal · Free forever