Ashtavakra Gita Shodasho'dhyayah

ॐ

𑌅𑌷𑍍𑌟𑌾𑌵𑌕𑍍𑌰 𑌗𑍀𑌤𑌾 𑌷𑍋𑌡𑌶𑍋𑌽𑌧𑍍𑌯𑌾𑌯𑌃

Gita Grantha

𑌅𑌷𑍍𑌟𑌾𑌵𑌕𑍍𑌰 𑌉𑌵𑌾𑌚 ॥

𑌆𑌚𑌕𑍍𑌷𑍍𑌵 𑌶𑍃𑌣𑍁 𑌵𑌾 𑌤𑌾𑌤 𑌨𑌾𑌨𑌾𑌶𑌾𑌸𑍍𑌤𑍍𑌰𑌾𑌣𑍍𑌯𑌨𑍇𑌕𑌶𑌃 ।

𑌤𑌥𑌾𑌪𑌿 𑌨 𑌤𑌵 𑌸𑍍𑌵𑌾𑌸𑍍𑌥𑍍𑌯𑌂 𑌸𑌰𑍍𑌵𑌵𑌿𑌸𑍍𑌮𑌰𑌣𑌾𑌦𑍃𑌤𑍇 ॥ 16-1॥

𑌭𑍋𑌗𑌂 𑌕𑌰𑍍𑌮 𑌸𑌮𑌾𑌧𑌿𑌂 𑌵𑌾 𑌕𑍁𑌰𑍁 𑌵𑌿𑌜𑍍𑌞 𑌤𑌥𑌾𑌪𑌿 𑌤𑍇 ।

𑌚𑌿𑌤𑍍𑌤𑌂 𑌨𑌿𑌰𑌸𑍍𑌤𑌸𑌰𑍍𑌵𑌾𑌶𑌮𑌤𑍍𑌯𑌰𑍍𑌥𑌂 𑌰𑍋𑌚𑌯𑌿𑌷𑍍𑌯𑌤𑌿 ॥ 16-2॥

𑌆𑌯𑌾𑌸𑌾𑌤𑍍𑌸𑌕𑌲𑍋 𑌦𑍁𑌃𑌖𑍀 𑌨𑍈𑌨𑌂 𑌜𑌾𑌨𑌾𑌤𑌿 𑌕𑌶𑍍𑌚𑌨 ।

𑌅𑌨𑍇𑌨𑍈𑌵𑍋𑌪𑌦𑍇𑌶𑍇𑌨 𑌧𑌨𑍍𑌯𑌃 𑌪𑍍𑌰𑌾𑌪𑍍𑌨𑍋𑌤𑌿 𑌨𑌿𑌰𑍍𑌵𑍃𑌤𑌿𑌮𑍍 ॥ 16-3॥

𑌵𑍍𑌯𑌾𑌪𑌾𑌰𑍇 𑌖𑌿𑌦𑍍𑌯𑌤𑍇 𑌯𑌸𑍍𑌤𑍁 𑌨𑌿𑌮𑍇𑌷𑍋𑌨𑍍𑌮𑍇𑌷𑌯𑍋𑌰𑌪𑌿 ।

𑌤𑌸𑍍𑌯𑌾𑌲𑌸𑍍𑌯 𑌧𑍁𑌰𑍀𑌣𑌸𑍍𑌯 𑌸𑍁𑌖𑌂 𑌨𑌾𑌨𑍍𑌯𑌸𑍍𑌯 𑌕𑌸𑍍𑌯𑌚𑌿𑌤𑍍 ॥ 16-4॥

𑌇𑌦𑌂 𑌕𑍃𑌤𑌮𑌿𑌦𑌂 𑌨𑍇𑌤𑌿 𑌦𑍍𑌵𑌨𑍍𑌦𑍍𑌵𑍈𑌰𑍍𑌮𑍁𑌕𑍍𑌤𑌂 𑌯𑌦𑌾 𑌮𑌨𑌃 ।

𑌧𑌰𑍍𑌮𑌾𑌰𑍍𑌥𑌕𑌾𑌮𑌮𑍋𑌕𑍍𑌷𑍇𑌷𑍁 𑌨𑌿𑌰𑌪𑍇𑌕𑍍𑌷𑌂 𑌤𑌦𑌾 𑌭𑌵𑍇𑌤𑍍 ॥ 16-5॥

𑌵𑌿𑌰𑌕𑍍𑌤𑍋 𑌵𑌿𑌷𑌯𑌦𑍍𑌵𑍇𑌷𑍍𑌟𑌾 𑌰𑌾𑌗𑍀 𑌵𑌿𑌷𑌯𑌲𑍋𑌲𑍁𑌪𑌃 ।

𑌗𑍍𑌰𑌹𑌮𑍋𑌕𑍍𑌷𑌵𑌿𑌹𑍀𑌨𑌸𑍍𑌤𑍁 𑌨 𑌵𑌿𑌰𑌕𑍍𑌤𑍋 𑌨 𑌰𑌾𑌗𑌵𑌾𑌨𑍍 ॥ 16-6॥

𑌹𑍇𑌯𑍋𑌪𑌾𑌦𑍇𑌯𑌤𑌾 𑌤𑌾𑌵𑌤𑍍𑌸𑌂𑌸𑌾𑌰𑌵𑌿𑌟𑌪𑌾𑌙𑍍𑌕𑍁𑌰𑌃 ।

𑌸𑍍𑌪𑍃𑌹𑌾 𑌜𑍀𑌵𑌤𑌿 𑌯𑌾𑌵𑌦𑍍 𑌵𑍈 𑌨𑌿𑌰𑍍𑌵𑌿𑌚𑌾𑌰𑌦𑌶𑌾𑌸𑍍𑌪𑌦𑌮𑍍 ॥ 16-7॥

𑌪𑍍𑌰𑌵𑍃𑌤𑍍𑌤𑍗 𑌜𑌾𑌯𑌤𑍇 𑌰𑌾𑌗𑍋 𑌨𑌿𑌰𑍍𑌵𑍃𑌤𑍍𑌤𑍗 𑌦𑍍𑌵𑍇𑌷 𑌏𑌵 𑌹𑌿 ।

𑌨𑌿𑌰𑍍𑌦𑍍𑌵𑌨𑍍𑌦𑍍𑌵𑍋 𑌬𑌾𑌲𑌵𑌦𑍍 𑌧𑍀𑌮𑌾𑌨𑍍 𑌏𑌵𑌮𑍇𑌵 𑌵𑍍𑌯𑌵𑌸𑍍𑌥𑌿𑌤𑌃 ॥ 16-8॥

𑌹𑌾𑌤𑍁𑌮𑌿𑌚𑍍𑌛𑌤𑌿 𑌸𑌂𑌸𑌾𑌰𑌂 𑌰𑌾𑌗𑍀 𑌦𑍁𑌃𑌖𑌜𑌿𑌹𑌾𑌸𑌯𑌾 ।

𑌵𑍀𑌤𑌰𑌾𑌗𑍋 𑌹𑌿 𑌨𑌿𑌰𑍍𑌦𑍁𑌃𑌖𑌸𑍍𑌤𑌸𑍍𑌮𑌿𑌨𑍍𑌨𑌪𑌿 𑌨 𑌖𑌿𑌦𑍍𑌯𑌤𑌿 ॥ 16-9॥

𑌯𑌸𑍍𑌯𑌾𑌭𑌿𑌮𑌾𑌨𑍋 𑌮𑍋𑌕𑍍𑌷𑍇𑌽𑌪𑌿 𑌦𑍇𑌹𑍇𑌽𑌪𑌿 𑌮𑌮𑌤𑌾 𑌤𑌥𑌾 ।

𑌨 𑌚 𑌜𑍍𑌞𑌾𑌨𑍀 𑌨 𑌵𑌾 𑌯𑍋𑌗𑍀 𑌕𑍇𑌵𑌲𑌂 𑌦𑍁𑌃𑌖𑌭𑌾𑌗𑌸𑍗 ॥ 16-10॥

𑌹𑌰𑍋 𑌯𑌦𑍍𑌯𑍁𑌪𑌦𑍇𑌷𑍍𑌟𑌾 𑌤𑍇 𑌹𑌰𑌿𑌃 𑌕𑌮𑌲𑌜𑍋𑌽𑌪𑌿 𑌵𑌾 ।

𑌤𑌥𑌾𑌪𑌿 𑌨 𑌤𑌵 𑌸𑍍𑌵𑌾𑌸𑍍𑌥𑍍𑌯𑌂 𑌸𑌰𑍍𑌵𑌵𑌿𑌸𑍍𑌮𑌰𑌣𑌾𑌦𑍃𑌤𑍇 ॥ 16-11॥

Roman (IAST) Transliteration

aṣṭāvakra uvāca ||

ācakṣva śṛṇu vā tāta nānāśāstrāṇyanekaśaḥ |

tathāpi na tava svāsthyaṃ sarvavismaraṇādṛte || 16-1||

bhogaṃ karma samādhiṃ vā kuru vijña tathāpi te |

cittaṃ nirastasarvāśamatyarthaṃ rocayiṣyati || 16-2||

āyāsātsakalo duḥkhī nainaṃ jānāti kaścana |

anenaivopadeśena dhanyaḥ prāpnoti nirvṛtim || 16-3||

vyāpāre khidyate yastu nimeṣonmeṣayorapi |

tasyālasya dhurīṇasya sukhaṃ nānyasya kasyacit || 16-4||

idaṃ kṛtamidaṃ neti dvandvairmuktaṃ yadā manaḥ |

dharmārthakāmamokṣeṣu nirapekṣaṃ tadā bhavet || 16-5||

virakto viṣayadveṣṭā rāgī viṣayalolupaḥ |

grahamokṣavihīnastu na virakto na rāgavān || 16-6||

heyopādeyatā tāvatsaṃsāraviṭapāṅkuraḥ |

spṛhā jīvati yāvad vai nirvicāradaśāspadam || 16-7||

pravṛttau jāyate rāgo nirvṛttau dveṣa eva hi |

nirdvandvo bālavad dhīmān evameva vyavasthitaḥ || 16-8||

hātumicchati saṃsāraṃ rāgī duḥkhajihāsayā |

vītarāgo hi nirduḥkhastasminnapi na khidyati || 16-9||

yasyābhimāno mokṣe'pi dehe'pi mamatā tathā |

na ca jñānī na vā yogī kevalaṃ duḥkhabhāgasau || 16-10||

haro yadyupadeṣṭā te hariḥ kamalajo'pi vā |

tathāpi na tava svāsthyaṃ sarvavismaraṇādṛte || 16-11||