bījāpūragadekṣukārmukarujā cakrābjapāśotpala-
-vrīhyagrasvaviṣāṇaratnakalaśaprodyatkarāmbhoruhaḥ |
dhyeyo vallabhayā sapadmakarayāśliṣṭojjvaladbhūṣayā
1
viśvotpattivipattisaṃsthitikaro vighneśa iṣṭārthadaḥ || 1 ||
namaste siddhilakṣmīśa gaṇādhipa mahāprabho |
2
vighneśvara jagannātha gaurīputra jagatprabho || 2 ||
jaya vighneśvara vibho vināyaka maheśvara |
3
lambodara mahābāho sarvadā tvaṃ prasīda me || 3 ||
mahādeva jagatsvāmin mūṣikārūḍha śaṅkara |
4
viśālākṣa mahākāya māṃ trāhi parameśvara || 4 ||
kuñjarāsya surādhīśa maheśa karuṇānidhe |
5
mātuluṅgadhara svāmin gadācakrasamanvita || 5 ||
daśabāho mahārāja gajavaktra caturbhuja |
6
śūrpakarṇa mahākarṇa gaṇanātha prasīda me || 6 ||
śaṅkhaśūlasamāyukta bījāpūrasamanvita |
7
ikṣukārmukasaṃyukta padmahasta prasīda me || 7 ||
nānābharaṇasaṃyukta ratnakumbhakara prabho |
8
sargasthitilayādhīśa paramātman jaya prabho || 8 ||
anāthanātha viśveśa vighnasaṅghavināśana |
9
trayīmūrte surapate brahmaviṣṇuśivātmaka || 9 ||
trayīguṇa mahādeva pāhi māṃ sarvapālaka |
10
aṇimādiguṇādhāra lakṣmīśrīviṣṇupūjita || 10 ||
gaurīśaṅkarasampūjya jaya tvaṃ gaṇanāyaka |
11
ratimanmathasaṃsevya mahībhūdārasaṃstuta || 11 ||
ṛddhyāmodādisaṃsevya mahāgaṇapate jaya |
12
śaṅkhapadmādisaṃsevya nirālamba nirīśvara || 12 ||
niṣkalaṅka nirādhāra pāhi māṃ nityamavyaya |
13
anādya jagatāmādya pitāmahasupūjita || 13 ||
dhūmaketo gaṇādhyakṣa mahāmūṣakavāhana |
14
anantaparamānanda jaya vighneśvareśvara || 14 ||
ratnasiṃhāsanāsīna kirīṭena suśobhita |
15
parātpara pareśāna parapūruṣa pāhi mām || 15 ||
nirdvandva nirguṇābhāsa japāpuṣpasamaprabha |
16
sarvapramathasaṃstutya trāhi māṃ vighnanāyaka || 16 ||
kumārasya guro deva sarvaiśvaryapradāyaka |
17
sarvābhīṣṭaprada svāmin sarvapratyūhanāśaka || 17 ||
śaraṇya sarvalokānāṃ śaraṇāgatavatsala |
18
mahāgaṇapate nityaṃ māṃ pālaya kṛpānidhe || 18 ||
evaṃ śrīgaṇanāthasya stavarājamanuttamam |
19
yaḥ paṭhecchṛṇuyānnityaṃ pratyūhaiḥ sa vimucyate || 19 ||
aśvamedhasamaṃ puṇyaphalaṃ prāpnotyanuttamam |
20
vaśīkaroti trailokyaṃ prāpya saubhāgyamuttamam || 20 ||
sarvābhīṣṭamavāpnoti śīghrameva sudurlabham |
21
mahāgaṇeśasānnidhyaṃ prāpnotyeva na saṃśayaḥ || 21 ||
iti śrīrudrayāmale śrīvināyakastavarājaḥ sampūrṇam |