jaṭādharaṃ pāṇḍurāṅgaṃ śūlahastaṃ kṛpānidhim |
1
sarvarogaharaṃ devaṃ dattātreyamahaṃ bhaje || 1 ||
asya śrīdattātreyastotramantrasya bhagavānnāradṛṣiḥ | anuṣṭup chandaḥ | śrīdattaḥ paramātmā devatā | śrīdattātreya prītyarthe jape viniyogaḥ ||
nārada uvāca |
jagadutpattikartre ca sthitisaṃhārahetave |
1
bhavapāśavimuktāya dattātreya namo'stu te || 1 ||
jarājanmavināśāya dehaśuddhikarāya ca |
2
digambara dayāmūrte dattātreya namo'stu te || 2 ||
karpūrakāntidehāya brahmamūrtidharāya ca |
3
vedaśāstraparijñāya dattātreya namo'stu te || 3 ||
hrasvadīrghakṛśasthūlanāmagotravivarjita |
4
pañcabhūtaikadīptāya dattātreya namo'stu te || 4 ||
yajñabhokte ca yajñāya yajñarūpadharāya ca |
5
yajñapriyāya siddhāya dattātreya namo'stu te || 5 ||
ādau brahmā harirmadhye hyante devassadāśivaḥ |
6
mūrtitrayasvarūpāya dattātreya namo'stu te || 6 ||
bhogālayāya bhogāya yogayogyāya dhāriṇe |
7
jitendriya jitajñāya dattātreya namo'stu te || 7 ||
digambarāya divyāya divyarūpadharāya ca |
8
sadoditaparabrahma dattātreya namo'stu te || 8 ||
jambūdvīpe mahākṣetre mātāpuranivāsine |
9
jayamāna satāṃ deva dattātreya namo'stu te || 9 ||
bhikṣāṭanaṃ gṛhe grāme pātraṃ hemamayaṃ kare |
10
nānāsvādamayī bhikṣā dattātreya namo'stu te || 10 ||
brahmajñānamayī mudrā vastre cākāśabhūtale |
11
prajñānaghanabodhāya dattātreya namo'stu te || 11 ||
avadhūta sadānanda parabrahmasvarūpiṇe |
12
videhadeharūpāya dattātreya namo'stu te || 12 ||
satyarūpa sadācāra satyadharmaparāyaṇa |
13
satyāśrayaparokṣāya dattātreya namo'stu te || 13 ||
śūlahastagadāpāṇe vanamālāsukandhara |
14
yajñasūtradhara brahman dattātreya namo'stu te || 14 ||
kṣarākṣarasvarūpāya parātparatarāya ca |
15
dattamuktiparastotra dattātreya namo'stu te || 15 ||
datta vidyāḍhya lakṣmīśa datta svātmasvarūpiṇe |
16
guṇanirguṇarūpāya dattātreya namo'stu te || 16 ||
śatrunāśakaraṃ stotraṃ jñānavijñānadāyakam |
17
sarvapāpaṃ śamaṃ yāti dattātreya namo'stu te || 17 ||
idaṃ stotraṃ mahaddivyaṃ dattapratyakṣakārakam |
18
dattātreyaprasādācca nāradena prakīrtitam || 18 ||
iti śrīnāradapurāṇe nāradaviracitaṃ śrī dattātreya stotram |