virāṭanagaraṃ ramyaṃ gacchamāno yudhiṣṭhiraḥ |
1
astuvanmanasā devīṃ durgāṃ tribhuvaneśvarīm || 1 ||
yaśodāgarbhasambhūtāṃ nārāyaṇavarapriyām |
2
nandagopakulejātāṃ maṅgalyāṃ kulavardhanīm || 2 ||
kaṃsavidrāvaṇakarīṃ asurāṇāṃ kṣayaṅkarīm |
3
śilātaṭavinikṣiptāṃ ākāśaṃ pratigāminīm || 3 ||
vāsudevasya bhaginīṃ divyamālya vibhūṣitām |
4
divyāmbaradharāṃ devīṃ khaḍgakheṭakadhāriṇīm || 4 ||
bhārāvataraṇe puṇye ye smaranti sadāśivām |
5
tānvai tārayate pāpāt paṅkegāmiva durbalām || 5 ||
stotuṃ pracakrame bhūyo vividhaiḥ stotrasambhavaiḥ |
6
āmantrya darśanākāṅkṣī rājā devīṃ sahānujaḥ || 6 ||
namo'stu varade kṛṣṇe kumāri brahmacāriṇi |
7
bālārka sadṛśākāre pūrṇacandranibhānane || 7 ||
caturbhuje caturvaktre pīnaśroṇipayodhare |
8
mayūrapiñchavalaye keyūrāṅgadadhāriṇi || 8 ||
bhāsi devi yadā padmā nārāyaṇaparigrahaḥ |
9
svarūpaṃ brahmacaryaṃ ca viśadaṃ tava khecari || 9 ||
kṛṣṇacchavisamā kṛṣṇā saṅkarṣaṇasamānanā |
10
bibhratī vipulau bāhū śakradhvajasamucchrayau || 10 ||
pātrī ca paṅkajī kaṇṭhī strī viśuddhā ca yā bhuvi |
11
pāśaṃ dhanurmahācakraṃ vividhānyāyudhāni ca || 11 ||
kuṇḍalābhyāṃ supūrṇābhyāṃ karṇābhyāṃ ca vibhūṣitā |
12
candravispārdhinā devi mukhena tvaṃ virājase || 12 ||
mukuṭena vicitreṇa keśabandhena śobhinā |
13
bhujaṅgā'bhogavāsena śroṇisūtreṇa rājatā || 13 ||
bhrājase cāvabaddhena bhogeneveha mandaraḥ |
14
dhvajena śikhipiñchānāṃ ucchritena virājase || 14 ||
kaumāraṃ vratamāsthāya tridivaṃ pāvitaṃ tvayā |
15
tena tvaṃ stūyase devi tridaśaiḥ pūjyase'pi ca || 15 ||
trailokya rakṣaṇārthāya mahiṣāsuranāśini |
16
prasannā me suraśreṣṭhe dayāṃ kuru śivā bhava || 16 ||
jayā tvaṃ vijayā caiva saṅgrāme ca jayapradā |
17
mamā'pi vijayaṃ dehi varadā tvaṃ ca sāmpratam || 17 ||
vindhye caiva nagaśreṣṭe tava sthānaṃ hi śāśvatam |
18
kāli kāli mahākāli sīdhumāṃsa paśupriye || 18 ||
kṛtānuyātrā bhūtaistvaṃ varadā kāmacāriṇi |
19
bhārāvatāre ye ca tvāṃ saṃsmariṣyanti mānavāḥ || 19 ||
praṇamanti ca ye tvāṃ hi prabhāte tu narā bhuvi |
20
na teṣāṃ durlabhaṃ kiñcit putrato dhanato'pi vā || 20 ||
durgāttārayase durge tatvaṃ durgā smṛtā janaiḥ |
21
kāntāreṣvavapannānāṃ magnānāṃ ca mahārṇave || 21 ||
(dasyubhirvā niruddhānāṃ tvaṃ gatiḥ paramā nṛṇāma)
jalaprataraṇe caiva kāntāreṣvaṭavīṣu ca |
22
ye smaranti mahādevīṃ na ca sīdanti te narāḥ || 22 ||
tvaṃ kīrtiḥ śrīrdhṛtiḥ siddhiḥ hrīrvidyā santatirmatiḥ |
23
sandhyā rātriḥ prabhā nidrā jyotsnā kāntiḥ kṣamā dayā || 23 ||
nṛṇāṃ ca bandhanaṃ mohaṃ putranāśaṃ dhanakṣayam |
24
vyādhiṃ mṛtyuṃ bhayaṃ caiva pūjitā nāśayiṣyasi || 24 ||
so'haṃ rājyātparibhraṣṭaḥ śaraṇaṃ tvāṃ prapannavān |
25
praṇataśca yathā mūrdhnā tava devi sureśvari || 25 ||
trāhi māṃ padmapatrākṣi satye satyā bhavasva naḥ |
26
śaraṇaṃ bhava me durge śaraṇye bhaktavatsale || 26 ||
evaṃ stutā hi sā devī darśayāmāsa pāṇḍavam |
27
upagamya tu rājānamidaṃ vacanamabravīt || 27 ||
śṛṇu rājan mahābāho madīyaṃ vacanaṃ prabho |
28
bhaviṣyatyacirādeva saṅgrāme vijayastava || 28 ||
mama prasādānnirjitya hatvā kaurava vāhinīm |
29
rājyaṃ niṣkaṇṭakaṃ kṛtvā bhokṣyase medinīṃ punaḥ || 29 ||
bhrātṛbhiḥ sahito rājan prītiṃ prāpsyasi puṣkalām |
30
matprasādācca te saukhyaṃ ārogyaṃ ca bhaviṣyati || 30 ||
ye ca saṅkīrtayiṣyanti loke vigatakalmaṣāḥ |
31
teṣāṃ tuṣṭā pradāsyāmi rājyamāyurvapussutam || 31 ||
pravāse nagare cāpi saṅgrāme śatrusaṅkaṭe |
32
aṭavyāṃ durgakāntāre sāgare gahane girau || 32 ||
ye smariṣyanti māṃ rājan yathāhaṃ bhavatā smṛtā |
33
na teṣāṃ durlabhaṃ kiñcidasmin loke bhaviṣyati || 33 ||
ya idaṃ paramastotraṃ bhaktyā śṛṇuyādvā paṭheta vā |
34
tasya sarvāṇi kāryāṇi sidhdhiṃ yāsyanti pāṇḍavāḥ || 34 ||
matprasādācca vassarvān virāṭanagare sthitān |
35
na prajñāsyanti kuravaḥ narā vā tannivāsinaḥ || 35 ||
ityuktvā varadā devī yudhiṣṭhiramarindamam |
38
rakṣāṃ kṛtvā ca pāṇḍūnāṃ tatraivāntaradhīyata || 38 ||