|| mūlamantram ||
|| oṃ hrīṃ śrīṃ klīṃ glauṃ gaṃ gaṇapataye varavarada
sarvajanaṃ me vaśamānaya svāhā ||
|| atha stotram||
oṃ ityetadajasya kaṇṭhavivaraṃ bhitvā bahirnirgataṃ
hyomityeva samastakarma ṛṣibhiḥ prārabhyate mānuṣaiḥ |
omityeva sadā japanti yatayaḥ svātamaikaniṣṭhāḥ paraṃ
1
hyoṅkārākṛtivaktraminduniṭilaṃ vighneśvaraṃ bhavāye || 1||
śrīmbījaṃ śramaduḥkhajanmamaraṇavyādhyādhibhīnāśakaṃ
mṛtyukrodhanaśāntibinduvilasadvarṇākṛtiśrīpradam |
svāntaḥsvātmaśarasya lakṣyamajarasvātmāvabodhapradaṃ
2
śrīśrīnāyakasevite bhavadanapremāspadaṃ bhāvaye || 2||
hrīmbījaṃ hṛdayatrikoṇavilasanmadhyāsanasthaṃ sadā
cākāśānalavāmalocananiśānāthārdhavarṇātmakam |
māyākāryajagatprakāśakamumārūpaṃ svaśaktipradaṃ
3
māyātītapadapradaṃ hṛdi bhaje lokeśvarārādhitam || 3||
klīmbījaṃ kalidhātuvatkalayatāṃ sarveṣṭadaṃ dehināṃ
dhātṛkṣmāyutaśāntibinduvilasadvarṇātmakaṃ kāmadam |
śrīkṛṣṇapriyamindirāsutamanaḥprītyekahetuṃ paraṃ
4
hṛtpadme kalaye sadā kaliharaṃ kālāriputrapriyam || 4||
glaumbījaṃ guṇarūpanirguṇaparabrahmādiśaktermahā-
haṅkārākṛtidaṇḍinīpriyamajaśrīnātharudreṣṭadam |
sarvākarṣiṇidevarājabhuvanārṇendvātmakaṃ śrīkaraṃ
5
citte vighnanivāraṇāya girijajātapriyaṃ bhāvaye || 5||
gaṅgāsutaṃ gandhamukhopacārapriyaṃ khagārohaṇabhāgineyam |
6
gaṅgāsutādyaṃ varagandhatattvamūlāmbujasthaṃ hṛdi bhāvaye'ham || 6||
gaṇapataye varaguṇanidhaye suragaṇapataye natajanatataye |
7
maṇigaṇabhūṣitacaraṇayugāśritamalaharaṇe caṇa te namaḥ || 7||
varābhaye modakamekadantaṃ karāmbujātaiḥ satataṃ dharantam |
8
varāṅgacandraṃ parabhaktisāndrairjanairbhajantaṃ kalaye sadā'ntaḥ || 8||
varada natajanānāṃ santataṃ vakratuṇḍa
svaramayanijagātra svātmabodhaikaheto |
karalasadamṛtāmbhopūrṇapatrādya mahyaṃ
9
garagalasuta śīghraṃ dehi madbodhamīḍyam || 9||
sarvajanaṃ paripālaya śarvaja
parvasudhākaragarvahara |
parvatanāthasutāsuta pālaya
10
kharvaṃ mā kuru dīnamimam || 10 ||
medo'sthimāṃsarudhirāntramaye śarīre
medinyabagnimarudambaralāsyamāne |
me dāruṇaṃ madamukhāghamumāja hṛtvā
11
medhāhvayāsanavare vasa dantivaktra || 11||
vaśaṃ kuru tvaṃ śivajāta māṃ te vaśīkṛtāśeṣasamastaloka |
12
vasārṇasaṃśobhitamūlapadmalasacchriyā'liṅtavāraṇāsya || 12||
ānayāśupadavārijāntikaṃ māṃ nayādiguṇavarjitaṃ tava |
13
hānihīnapadajāmṛtasya te pānayogyamibhavaktra māṃ kuru || 13||
svāhāsvarūpeṇa virājase tvaṃ sudhāśanānāṃ priyakarmaṇīḍyam |
14
svadhāsvarūpeṇa tu pitryakarmaṇyumāsutejyāmayaviśvamūrte || 14||
aṣṭāviṃśativarṇapatralasitaṃ hāraṃ gaṇeśapriyaṃ
kaṣṭā'niṣṭaharaṃ caturdaśapadaiḥ puṣpairmanohārakam |
tuṣṭyādipradasadguruttamapadāmbhoje cidānandadaṃ
15
śiṣṭeṣṭo'hamanantasūtrahṛdayā''baddhaṃ subhaktyā'rpaye || 15||
|| iti śrīanantānandakṛtaṃ śrīgurucidānandanāthasamarpitaṃ
śrīmahāgaṇapatimūlamantramālāstotram ||