agre kurūṇāmatha pāṇḍavānāṃ
duḥśāsanenāhṛtavastrakeśā |
kṛṣṇā tadākrośadananyanāthā
1
govinda dāmodara mādhaveti || 1||
śrīkṛṣṇa viṣṇo madhukaiṭabhāre
bhaktānukampin bhagavan murāre |
trāyasva māṃ keśava lokanātha
2
govinda dāmodara mādhaveti || 2||
vikretukāmā kila gopakanyā
murāripādārpitacittavṛttiḥ |
dadhyādikaṃ mohavaśādavocad
3
govinda dāmodara mādhaveti || 3||
ulūkhale sambhṛtataṇḍulāṃśca
saṅghaṭṭayantyo musalaiḥ pramugdhāḥ |
gāyanti gopyo janitānurāgā
4
govinda dāmodara mādhaveti || 4||
kācitkarāmbhojapuṭe niṣaṇṇaṃ
krīḍāśukaṃ kiṃśukaraktatuṇḍam |
adhyāpayāmāsa saroruhākṣī
5
govinda dāmodara mādhaveti || 5||
gṛhe gṛhe gopavadhūsamūhaḥ
pratikṣaṇaṃ piñjarasārikāṇām |
skhaladgirāṃ vācayituṃ pravṛtto
6
govinda dāmodara mādhaveti || 6||
paryyaṅkikābhājamalaṃ kumāraṃ
prasvāpayantyo'khilagopakanyāḥ |
jaguḥ prabandhaṃ svaratālabandhaṃ
7
govinda dāmodara mādhaveti || 7||
rāmānujaṃ vīkṣaṇakelilolaṃ
gopī gṛhītvā navanītagolam |
ābālakaṃ bālakamājuhāva
8
govinda dāmodara mādhaveti || 8||
vicitravarṇābharaṇābhirāme-
'bhidhehi vaktrāmbujarājahaṃsi |
sadā madīye rasane'graraṅge
9
govinda dāmodara mādhaveti || 9||
aṅkādhirūḍhaṃ śiśugopagūḍhaṃ
stanaṃ dhayantaṃ kamalaikakāntam |
sambodhayāmāsa mudā yaśodā
10
govinda dāmodara mādhaveti || 10||
krīḍantamantarvrajamātmajaṃ svaṃ
samaṃ vayasyaiḥ paśupālabālaiḥ |
premṇā yaśodā prajuhāva kṛṣṇaṃ
11
govinda dāmodara mādhaveti || 11||
yaśodayā gāḍhamulūkhalena
gokaṇṭhapāśena nibadhyamānaḥ |
ruroda mandaṃ navanītabhojī
12
govinda dāmodara mādhaveti || 12||
nijāṅgaṇe kaṅkaṇakelilolaṃ
gopī gṛhītvā navanītagolam |
āmardayatpāṇitalena netre
13
govinda dāmodara mādhaveti || 13||
gṛhe gṛhe gopavadhūkadambāḥ
sarve militvā samavāyayoge |
puṇyāni nāmāni paṭhanti nityaṃ
14
govinda dāmodara mādhaveti || 14||
mandāramūle vadanābhirāmaṃ
bimbādhare pūritaveṇunādam |
gogopagopījanamadhyasaṃsthaṃ
15
govinda dāmodara mādhaveti || 15||
utthāya gopyo¶rātrabhāge
smṛtvā yaśodāsutabālakelim |
gāyanti proccairdadhi manthayantyo
16
govinda dāmodara mādhaveti || 16||
jagdho'tha datto navanītapiṇḍo
gṛhe yaśodā vicikitsayantī |
uvāca satyaṃ vada he murāre
17
govinda dāmodara mādhaveti || 17||
abhyarcya gehaṃ yuvatiḥ pravṛddha-
premapravāhā dadhi nirmamantha |
gāyanti gopyo'tha sakhīsametā
18
govinda dāmodara mādhaveti || 18||
kvacit prabhāte dadhipūrṇapātre
nikṣipya manthaṃ yuvatī mukundam |
ālokya gānaṃ vividhaṃ karoti
19
govinda dāmodara mādhaveti || 19||
krīḍāparaṃ bhojanamajjanārthaṃ
hitaiṣiṇī strī tanujaṃ yaśodā |
ājūhavat premapariplutākṣī
20
govinda dāmodara mādhaveti || 20||
sukhaṃ śayānaṃ nilaye ca viṣṇuṃ
devarṣimukhyā munayaḥ prapannāḥ |
tenācyute tanmayatāṃ vrajanti
21
govinda dāmodara mādhaveti || 21||
vihāya nidrāmaruṇodaye ca
vidhāya kṛtyāni ca vipramukhyāḥ |
vedāvasāne prapaṭhanti nityaṃ
22
govinda dāmodara mādhaveti || 22||
vṛndāvane gopagaṇāśca gopyo
vilokya govindaviyogakhinnām |
rādhāṃ jaguḥ sāśruvilocanābhyāṃ
23
govinda dāmodara mādhaveti || 23||
prabhātasañcāragatā nu gāvas-
tadrakṣaṇārthaṃ tanayaṃ yaśodā |
prābodhayat pāṇitalena mandaṃ
24
govinda dāmodara mādhaveti || 24||
pravālaśobhā iva dīrghakeśā
vātāmbuparṇāśanapūtadehāḥ |
mūle tarūṇāṃ munayaḥ paṭhanti
25
govinda dāmodara mādhaveti || 25||
evaṃ bruvāṇā virahāturā bhṛśaṃ
vrajastriyaḥ kṛṣṇaviṣaktamānasāḥ |
visṛjya lajjāṃ ruruduḥ sma susvaraṃ
26
govinda dāmodara mādhaveti || 26||
gopī kadācinmaṇipañjarasthaṃ
śukaṃ vaco vācayituṃ pravṛttā |
ānandakanda vrajacandra kṛṣṇa
27
govinda dāmodara mādhaveti || 27||
govatsabālaiḥ śiśukākapakṣaṃ
badhnantamambhojadalāyatākṣam |
uvāca mātā cibukaṃ gṛhītvā
28
govinda dāmodara mādhaveti || 28||
prabhātakāle varavallavaughā
gorakṣaṇārthaṃ dhṛtavetradaṇḍāḥ |
ākārayāmāsuranantamādyaṃ
29
govinda dāmodara mādhaveti || 29||
jalāśaye kāliyamardanāya
yadā kadambādapatanmurāriḥ |
gopāṅganāścukruśuretya gopā
30
govinda dāmodara mādhaveti || 30||
akrūramāsādya yadā mukundaś-
cāpotsavārthaṃ mathurāṃ praviṣṭaḥ |
tadā sa paurairjayasītyabhāṣi
31
govinda dāmodara mādhaveti || 31||
kaṃsasya dūtena yadaiva nītau
vṛndāvanāntād vasudevasūnū | (sūnau)
ruroda gopī bhavanasya madhye
32
govinda dāmodara mādhaveti || 32||
sarovare kāliyanāgabaddhaṃ
śiśuṃ yaśodātanayaṃ niśamya |
cakrurluṭhantyaḥ pathi gopabālā
33
govinda dāmodara mādhaveti || 33||
akrūrayāne yaduvaṃśanāthaṃ
saṅgacchamānaṃ mathurāṃ nirīkṣya |
ūcurviyogat kila gopabālā
34
govinda dāmodara mādhaveti || 34||
cakranda gopī nalinīvanānte
kṛṣṇena hīnā kusume śayānā |
praphullanīlotpalalocanābhyāṃ
35
govinda dāmodara mādhaveti || 35||
mātāpitṛbhyāṃ parivāryamāṇā
gehaṃ praviṣṭā vilalāpa gopī |
āgatya māṃ pālaya viśvanātha
36
govinda dāmodara mādhaveti || 36||
vṛndāvanasthaṃ harimāśu buddhvā
gopī gatā kāpi vanaṃ niśāyām |
tatrāpyadṛṣṭvā'tibhayādavocad
37
govinda dāmodara mādhaveti || 37||
sukhaṃ śayānā nilaye nije'pi
nāmāni viṣṇoḥ pravadanti martyāḥ |
te niścitaṃ tanmayatāṃ vrajanti
38
govinda dāmodara mādhaveti || 38||
sā nīrajākṣīmavalokya rādhāṃ
ruroda govindaviyogakhinnām |
sakhī praphullotpalalocanābhyāṃ
39
govinda dāmodara mādhaveti || 39||
jihve rasajñe madhurapriyā tvaṃ
satyaṃ hitaṃ tvāṃ paramaṃ vadāmi |
āvarṇayethā madhurākṣarāṇi
40
govinda dāmodara mādhaveti || 40||
ātyantikavyādhiharaṃ janānāṃ
cikitsakaṃ vedavido vadanti |
saṃsāratāpatrayanāśabījaṃ
41
govinda dāmodara mādhaveti || 41||
tātājñayā gacchati rāmacandre
salakṣmaṇe'raṇyacaye sasīte |
cakranda rāmasya nijā janitrī
42
govinda dāmodara mādhaveti || 42||
ekākinī daṇḍakakānanāntāt
sā nīyamānā daśakandhareṇa |
sītā tadākrandadananyanāthā
43
govinda dāmodara mādhaveti || 43||
rāmādviyuktā janakātmajā sā
vicintayantī hṛdi rāmarūpam |
ruroda sītā raghunātha pāhi
44
govinda dāmodara mādhaveti || 44||
prasīda viṣṇo raghuvaṃśanātha
surāsurāṇāṃ sukhaduḥkhaheto |
ruroda sītā tu samudramadhye
45
govinda dāmodara mādhaveti || 45||
antarjale grāhagṛhītapādo
visṛṣṭavikliṣṭasamastabandhuḥ |
tadā gajendro nitarāṃ jagāda
46
govinda dāmodara mādhaveti || 46||
haṃsadhvajaḥ śaṅkhayuto dadarśa
putraṃ kaṭāhe pratapantamenam |
puṇyāni nāmāni harerjapantaṃ
47
govinda dāmodara mādhaveti || 47||
durvāsaso vākyamupetya kṛṣṇā
sā cābravīt kānanavāsinīśam |
antaḥ praviṣṭaṃ manasā juhāva
48
govinda dāmodara mādhaveti || 48||
dhyeyaḥ sadā yogibhiraprameyaḥ
cintāharaścintitapārijātaḥ |
kastūrikākalpitanīlavarṇo
49
govinda dāmodara mādhaveti || 49||
saṃsārakūpe patito'tyagādhe
mohāndhapūrṇe viṣayābhitapte |
karāvalambaṃ mama dehi viṣṇo
50
govinda dāmodara mādhaveti || 50||
bhajasva mantraṃ bhavabandhamuktyai
jihve rasajñe sulabhaṃ manojñam |
dvaipāyanādyairmunibhiḥ prajaptaṃ
51
govinda dāmodara mādhaveti || 51||
tvāmeva yāce mama dehi jihve
samāgate daṇḍadhare kṛtānte |
vaktavyamevaṃ madhuraṃ subhaktyā
52
govinda dāmodara mādhaveti || 52||
gopāla vaṃśīdhara rūpasindho
lokeśa nārāyaṇa dīnabandho |
uccasvaraistvaṃ vada sarvadaiva
53
govinda dāmodara mādhaveti || 53||
jihve sadaivaṃ bhaja sundarāṇi
nāmāni kṛṣṇasya manoharāṇi |
samastabhaktārtivināśanāni
54
govinda dāmodara mādhaveti || 54||
govinda govinda hare murāre
govinda govinda mukunda kṛṣṇa |
govinda govinda rathāṅgapāṇe
55
govinda dāmodara mādhaveti || 55||
sukhāvasāne tvidameva sāraṃ
duḥkhāvasāne tvidameva geyam |
dehāvasāne tvidameva jāpyaṃ
56
govinda dāmodara mādhaveti || 56||
durvāravākyaṃ parigṛhya kṛṣṇā
mṛgīva bhītā tu kathaṃ kathañcit |
sabhāṃ praviṣṭā manasā juhāva
57
govinda dāmodara mādhaveti || 57||
śrīkṛṣṇa rādhāvara gokuleśa
gopāla govardhana nātha viṣṇo |
jihve pibasvāmṛtametadeva
58
govinda dāmodara mādhaveti || 58||
śrīnātha viśveśvara viśvamūrte
śrīdevakīnandana daityaśatro |
jihve pibasvāmṛtametadeva
59
govinda dāmodara mādhaveti || 59||
gopīpate kaṃsaripo mukunda
lakṣmīpate keśava vāsudeva |
jihve pibasvāmṛtametadeva
60
govinda dāmodara mādhaveti || 60||
gopījanāhlādakara vrajeśa
gocāraṇāraṇyakṛtapraveśa |
jihve pibasvāmṛtametadeva
61
govinda dāmodara mādhaveti || 61||
prāṇeśa viśvambhara kaiṭabhāre
vaikuṇṭha nārāyaṇa cakrapāṇe |
jihve pibasvāmṛtametadeva
62
govinda dāmodara mādhaveti || 62||
hare murāre madhusūdanādya
śrīrāma sītāvara rāvaṇāre |
jihve pibasvāmṛtametadeva
63
govinda dāmodara mādhaveti || 63||
śrīyādavendrādridharāmbujākṣa
gogopagopīsukhadānadakṣa |
jihve pibasvāmṛtametadeva
64
govinda dāmodara mādhaveti || 64||
dharābharottāraṇagopaveṣa
vihāralīlākṛtabandhuśeṣa |
jihve pibasvāmṛtametadeva
65
govinda dāmodara mādhaveti || 65||
bakībakāghāsuradhenukāre
keśītṛṇāvartavighātadakṣa |
jihve pibasvāmṛtametadeva
66
govinda dāmodara mādhaveti || 66||
śrījānakījīvana rāmacandra
niśācarāre bharatāgrajeśa |
jihve pibasvāmṛtametadeva
67
govinda dāmodara mādhaveti || 67||
nārāyaṇānanta hare nṛsiṃha
prahlādabādhāhara he kṛpālo |
jihve pibasvāmṛtametadeva
68
govinda dāmodara mādhaveti || 68||
līlāmanuṣyākṛtirāmarūpa
pratāpadāsīkṛtasarvabhūpa |
jihve pibasvāmṛtametadeva
69
govinda dāmodara mādhaveti || 69||
śrīkṛṣṇa govinda hare murāre
he nātha nārāyaṇa vāsudeva |
jihve pibasvāmṛtametadeva
70
govinda dāmodara mādhaveti || 70||
vaktuṃ samartho'pi na vakti kaścid-
aho janānāṃ vyasanābhimukhyam |
jihve pibasvāmṛtametadeva
71
govinda dāmodara mādhaveti || 71||
iti śrībilvamaṅgalācāryaviracitaṃ śrīgovindadāmodarastotraṃ sampūrṇam |