📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
3.37 অরণ্যকাণ্ড - সপ্তত্রিংশ সর্গঃ
3.37 Aranyakanda - Saptatrimsha Sargah
Valmiki Bengali
শ্রীমদ্বাল্মীকীয রামাযণে অরণ্যকাণ্ডম্ ।
অথ সপ্তত্রিংশস্সর্গঃ ।
তচ্ছৃত্বা রাক্ষসেন্দ্রস্য বাক্যং বাক্যবিশারদঃ ।
প্রত্যুবাচ মহাপ্রাজ্ঞো মারীচো রাক্ষসেশ্বরম্ ॥ 1 ॥
সুলভাঃ পুরুষা রাজন্সততং প্রিযবাদিনঃ ।
অপ্রিযস্য তু পথ্যস্য বক্তা শ্রোতা চ দুর্লভঃ ॥ 2 ॥
ন নূনং বুধ্যসে রামং মহাবীর্যং গুণোন্নতম্ ।
অযুক্তচারশ্চপলো মহেন্দ্রবরুণোপমম্ ॥ 3 ॥
অপি স্বস্তি ভবেত্তাত সর্বেষাং ভুবি রক্ষসাম্ ।
অপি রামো নাসঙ্ক্রুদ্ধঃ কুর্যাল্লোকমরাক্ষসম্ ॥ 4 ॥
অপি তে জীবিতান্তায নোত্পন্না জনকাত্মজা ।
অপি সীতানিমিত্তং চ ন ভবেদ্ব্যসনং মম ॥ 5 ॥
অপি ত্বামীশ্বরং প্রাপ্য কামবৃত্তং নিরঙ্কুশম্ ।
ন বিনশ্যেত্পুরী লঙ্কা ত্বযা সহ সরাক্ষসা ॥ 6 ॥
ত্বদ্বিধঃ কামবৃত্তো হি দুশ্শীলঃ পাপমন্ত্রিতঃ ।
আত্মানং স্বজনং রাষ্ট্রং স রাজা হন্তি দুর্মতিঃ ॥ 7 ॥
ন চ পিত্রা পরিত্যক্তো নামর্যাদঃ কথঞ্চন ।
ন লুব্ধো ন চ দুশ্শীলো ন চ ক্ষত্রিযপাংসনঃ ॥ 8 ॥
ন চ ধর্মগুণৈর্হীনঃ কৌসল্যানন্দবর্ধনঃ ।
ন তীক্ষ্ণো ন চ ভূতানাং সর্বেষামহিতে রতঃ ॥ 9 ॥
বঞ্চিতং পিতরং দৃষ্ট্বা কৈকেয্যা সত্যবাদিনম্ ।
করিষ্যামীতি ধর্মাত্মা তাত প্রব্রজিতো বনম্ ॥ 10 ॥
কৈকেয্যাঃ প্রিযকামার্থং পিতুর্দশরথস্য চ ।
হিত্বা রাজ্যং চ ভোগাংশ্চ প্রবিষ্টো দণ্ডকাবনম্ ॥ 11 ॥
ন রামঃ কর্কশস্তাত নাবিদ্বান্নাজিতেন্দ্রিযঃ ।
অনৃতং দুশ্শ্রুতং চৈব নৈব ত্বং বক্তুমর্হসি ॥ 12 ॥
রামো বিগ্রহবান্ ধর্মস্সাধুস্সত্যপরাক্রমঃ ।
রাজা সর্বস্য লোকস্য দেবানাং মঘবানিব ॥ 13 ॥
কথং ত্বং তস্য বৈদেহীং রক্ষিতাং স্বেন তেজসা ।
ইচ্ছসি প্রসভং হর্তুং প্রভামিব বিবস্বতঃ ॥ 14 ॥
শরার্চিষমাধৃষ্যং চাপখঙ্গেন্ধনং রণে ।
রামাগ্নিং সহসা দীপ্তং ন প্রবেষ্টুং ত্বমর্হসি ॥ 15 ॥
ধনুর্ব্যাদিতদীপ্তাস্যং শরার্চিষমমর্ষণম্ ।
চাপবাণধরং তীক্ষ্ণং শত্রুসৈন্যপ্রহারিণম্ ॥ 16 ॥
রাজ্যং সুখং চ সন্ত্যজ্য জীবিতং চেষ্টমাত্মনঃ ।
নাত্যাসাদযিতুং তাত রামান্তকমিহার্হসি ॥ 17 ॥
অপ্রমেযং হি তত্তেজো যস্য সা জনকাত্মজা ।
ন ত্বং সমর্থস্তাং হর্তুং রামচাপাশ্রযং বনে ॥ 18 ॥
তস্য সা নরসিংহস্য সিংহোরস্কস্য ভামিনী ।
প্রাণেভ্যোঽপি প্রিযতরা ভার্যা নিত্যমনুব্রতা ॥ 19 ॥
ন সা ধর্ষযিতুং শক্যা মৈথিল্যোজস্বিনঃ প্রিযা ।
দীপ্তস্যেব হুতাশস্য শিখা সীতা সুমধ্যমা ॥ 20 ॥
কিমুদ্যমমিমং ব্যর্থং কৃত্বা তে রাক্ষসাধিপ ।
দৃষ্টশ্চেত্বং রণে তেন তদন্তং তব জীবিতম্ ॥ 21 ॥
জীবিতং চ সুখং চৈব রাজ্যং চৈব সুদুর্লভম্ ।
যদীচ্ছসি চিরং ভোক্তুং মা কৃথা রামবিপ্রিযম্ ॥ 22 ॥
স সর্বৈস্সচিবৈস্সার্ধং বিভীষণপুরোগমৈঃ ।
মন্ত্রযিত্বা তু ধর্মিষ্ঠৈঃ কৃত্বা নিশ্চযমাত্মনঃ ॥ 23 ॥
দোষাণাং চ গুণানাং চ সম্প্রধার্য বলাবলম্ ।
আত্মনশ্চ বলং জ্ঞাত্বা রাঘবস্য চ তত্বতঃ ॥ 24 ॥
হিতাহিতং বিনিশ্চিত্য ক্ষমং ত্বং কর্তুমর্হসি ।
অহং তু মন্যে তব ন ক্ষমং রণে সমাগমং কোসলরাজসূনুনা ।
ইদং হি ভূযশ্শৃণু বাক্যমুত্তমং ক্ষমং চ যুক্তং চ নিশাচরেশ্বর ॥ 25 ॥
ইত্যার্ষে শ্রীমদ্রামাযণে বাল্মীকীয আদিকাব্যে অরণ্যকাণ্ডে সপ্তত্রিংশস্সর্গঃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha saptatriṃśassargaḥ |
tacchṛtvā rākṣasendrasya vākyaṃ vākyaviśāradaḥ |
pratyuvāca mahāprājño mārīco rākṣaseśvaram || 1 ||
sulabhāḥ puruṣā rājansatataṃ priyavādinaḥ |
apriyasya tu pathyasya vaktā śrotā ca durlabhaḥ || 2 ||
na nūnaṃ budhyase rāmaṃ mahāvīryaṃ guṇonnatam |
ayuktacāraścapalo mahendravaruṇopamam || 3 ||
api svasti bhavettāta sarveṣāṃ bhuvi rakṣasām |
api rāmo nāsaṅkruddhaḥ kuryāllokamarākṣasam || 4 ||
api te jīvitāntāya notpannā janakātmajā |
api sītānimittaṃ ca na bhavedvyasanaṃ mama || 5 ||
api tvāmīśvaraṃ prāpya kāmavṛttaṃ niraṅkuśam |
na vinaśyetpurī laṅkā tvayā saha sarākṣasā || 6 ||
tvadvidhaḥ kāmavṛtto hi duśśīlaḥ pāpamantritaḥ |
ātmānaṃ svajanaṃ rāṣṭraṃ sa rājā hanti durmatiḥ || 7 ||
na ca pitrā parityakto nāmaryādaḥ kathañcana |
na lubdho na ca duśśīlo na ca kṣatriyapāṃsanaḥ || 8 ||
na ca dharmaguṇairhīnaḥ kausalyānandavardhanaḥ |
na tīkṣṇo na ca bhūtānāṃ sarveṣāmahite rataḥ || 9 ||
vañcitaṃ pitaraṃ dṛṣṭvā kaikeyyā satyavādinam |
kariṣyāmīti dharmātmā tāta pravrajito vanam || 10 ||
kaikeyyāḥ priyakāmārthaṃ piturdaśarathasya ca |
hitvā rājyaṃ ca bhogāṃśca praviṣṭo daṇḍakāvanam || 11 ||
na rāmaḥ karkaśastāta nāvidvānnājitendriyaḥ |
anṛtaṃ duśśrutaṃ caiva naiva tvaṃ vaktumarhasi || 12 ||
rāmo vigrahavān dharmassādhussatyaparākramaḥ |
rājā sarvasya lokasya devānāṃ maghavāniva || 13 ||
kathaṃ tvaṃ tasya vaidehīṃ rakṣitāṃ svena tejasā |
icchasi prasabhaṃ hartuṃ prabhāmiva vivasvataḥ || 14 ||
śarārciṣamādhṛṣyaṃ cāpakhaṅgendhanaṃ raṇe |
rāmāgniṃ sahasā dīptaṃ na praveṣṭuṃ tvamarhasi || 15 ||
dhanurvyāditadīptāsyaṃ śarārciṣamamarṣaṇam |
cāpabāṇadharaṃ tīkṣṇaṃ śatrusainyaprahāriṇam || 16 ||
rājyaṃ sukhaṃ ca santyajya jīvitaṃ ceṣṭamātmanaḥ |
nātyāsādayituṃ tāta rāmāntakamihārhasi || 17 ||
aprameyaṃ hi tattejo yasya sā janakātmajā |
na tvaṃ samarthastāṃ hartuṃ rāmacāpāśrayaṃ vane || 18 ||
tasya sā narasiṃhasya siṃhoraskasya bhāminī |
prāṇebhyo'pi priyatarā bhāryā nityamanuvratā || 19 ||
na sā dharṣayituṃ śakyā maithilyojasvinaḥ priyā |
dīptasyeva hutāśasya śikhā sītā sumadhyamā || 20 ||
kimudyamamimaṃ vyarthaṃ kṛtvā te rākṣasādhipa |
dṛṣṭaścetvaṃ raṇe tena tadantaṃ tava jīvitam || 21 ||
jīvitaṃ ca sukhaṃ caiva rājyaṃ caiva sudurlabham |
yadīcchasi ciraṃ bhoktuṃ mā kṛthā rāmavipriyam || 22 ||
sa sarvaissacivaissārdhaṃ vibhīṣaṇapurogamaiḥ |
mantrayitvā tu dharmiṣṭhaiḥ kṛtvā niścayamātmanaḥ || 23 ||
doṣāṇāṃ ca guṇānāṃ ca sampradhārya balābalam |
ātmanaśca balaṃ jñātvā rāghavasya ca tatvataḥ || 24 ||
hitāhitaṃ viniścitya kṣamaṃ tvaṃ kartumarhasi |
ahaṃ tu manye tava na kṣamaṃ raṇe samāgamaṃ kosalarājasūnunā |
idaṃ hi bhūyaśśṛṇu vākyamuttamaṃ kṣamaṃ ca yuktaṃ ca niśācareśvara || 25 ||
ityārṣe śrīmadrāmāyaṇe vālmīkīya ādikāvye araṇyakāṇḍe saptatriṃśassargaḥ ||
InfoLyter.in — Sacred Vedic Knowledge Portal · Free forever