📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
2.67 অযোধ্যাকাণ্ড - সপ্তষষ্টিতম সর্গঃ
2.67 Ayodhyakanda - Saptashashtitama Sargah
Valmiki Bengali
শ্রীমদ্বাল্মীকীয রামাযণে অযোধ্যাকাণ্ডম্ ।
অথ সপ্তষষ্টিতমস্সর্গঃ ।
আক্রন্দিতনিরানন্দা সাস্রকণ্ঠজনাকুলা ।
অযোধ্যাযামবততা সা ব্যতীযায শর্বরী ॥ 1 ॥
ব্যতীতাযাং তু শর্বর্যামাদিত্যস্যোদযে ততঃ ।
সমেত্য রাজকর্তারঃ সভামীযুর্দ্বিজাতযঃ ॥ 2 ॥
মার্কণ্ডেযোঽথ মৌদ্গল্যো বামদেবশ্চ কাশ্যপঃ ।
কাত্যাযনো গৌতমশ্চ জাবালিশ্চ মহাযশাঃ ॥ 3 ॥
এতে দ্বিজা স্সহামাত্যৈঃ পৃথগ্বা চ মুদীরযন্ ।
বসিষ্ঠমেবাভিমুখাঃ শ্রেষ্ঠং রাজপুরোহিতম্ ॥ 4 ॥
অতীতা শর্বরী দুঃখং যা নো বর্ষশতোপমা ।
অস্মিন্পঞ্চত্বমাপন্নে পুত্রশোকেন পার্থিবে ॥ 5 ॥
স্বর্গতশ্চ মহারাজো রামশ্চারণ্যমাশ্রিতঃ ।
লক্ষ্মণশ্চাপি তেজস্বী রামেণৈব গতস্সহ ॥ 6 ॥
উভৌ ভরতশত্রুঘ্নৌ কেকযেষু পরন্তপৌ ।
পুরে রাজগৃহে রম্যে মাতামহনিবেশনে ॥ 7 ॥
ইক্ষ্বাকূণামিহাদ্যৈব কশ্চিদ্রাজা বিধীযতাম্ ।
অরাজকং হি নো রাষ্ট্রং বিনাশং সমবাপ্নুযাত্ ॥ 8 ॥
নারাজকে জনপদে বিদ্যুন্মালী মহাস্বনঃ ।
অভিবর্ষতি পর্জন্যো মহীং দিব্যেন বারিণা ॥ 9 ॥
নারাজকে জনপদে বীজমুষ্টিঃ প্রকীর্যতে ।
নারাজকে পিতুঃ পুত্রো ভার্যা বা বর্ততে বশে ॥ 10 ॥
নারাজকে ধনং চাস্তি নাস্তি ভার্যা প্যরাজকে ।
ইদ মত্যাহিতং চান্যত্কুতস্সত্য মরাজকে ॥ 11 ॥
নারাজকে জনপদে কারযন্তি সভাং নরাঃ ।
উদ্যানানি চ রম্যাণি হৃষ্টাঃ পুণ্যগৃহাণি চ ॥ 12 ॥
নারাজকে জনপদে যজ্ঞশীলা দ্বিজাতযঃ ।
সত্রাণ্যন্বাসতে দান্তা ব্রাহ্মণা স্সংশিতব্রতাঃ ॥ 13 ॥
নারাজকে জনপদে মহাযজ্ঞেষু যজ্বনঃ ।
ব্রাহ্মণা বসুসম্পন্না বিসৃজন্ত্যাপ্তদক্ষিণাঃ ॥ 14 ॥
নারাজকে জনপদে প্রভূতনটনর্তকাঃ ।
উত্সবাশ্চ সমাজাশ্চ বর্ধন্তে রাষ্ট্রবর্ধনাঃ ॥ 15 ॥
নারাজকে জনপদে সিদ্ধার্থা ব্যবহারিণঃ ।
কথাভিরনুরজ্যন্তে কথাশীলাঃ কথাপ্রিযৈঃ ॥ 16 ॥
নারাজকে জনপদে উদ্যানানি সমাগতাঃ ।
সাযাহ্নে ক্রীডিতুং যান্তি কুমার্যো হেমভূষিতাঃ ॥ 17 ॥
নারাজকে জনপদে বাহনৈ শশীঘ্রগামিভিঃ ।
নরা নির্যান্ত্যরণ্যানি নারীভিস্সহ কামিনঃ ॥ 18 ॥
নারাজকে জনপদে ধনবন্তস্সুরক্ষিতাঃ ।
শেরতে বিবৃতদ্বারাঃ কৃষিগোরক্ষজীবিনঃ ॥ 19 ॥
নারাজকে জনপদে বদ্ধঘণ্টাবিষাণিনঃ ।
অটন্তি রাজমার্গেষু কুঞ্জরা ষষ্টিহাযনাঃ ॥ 20 ॥
নারাজকে জনপদে শরান্সন্ততমস্যতাম্ ।
শ্রূযতে তলনির্ঘোষ ইষ্বস্ত্রাণামুপাসনে ॥ 21 ॥
নারাজকে জনপদে বণিজো দূরগামিনঃ ।
গচ্ছন্তি ক্ষেমমধ্বানং বহুপণ্যসমাচিতাঃ ॥ 22 ॥
নারাজকে জনপদে চরত্যেকচরো বশী ।
ভাবযন্নাত্মনাঽত্মানং যত্র সাযঙ্গৃহো মুনিঃ ॥ 23 ॥
নারাজকে জনপদে যোগক্ষেমং প্রবর্ততে ।
নচাপ্যরাজকে সেনা শত্রূন্বিষহতে যুধি ॥ 24 ॥
নারাজকে জনপদে হৃষ্টৈঃ পরমবাজিভিঃ ।
নরাস্সংযান্তি সহসা রথৈশ্চ পরিমণ্ডিতাঃ ॥ 25 ॥
নারাজকে জনপদে নরাশ্শাস্ত্রবিশারদাঃ ।
সংবদন্তোঽবতিষ্ঠন্তে বনেষূপবনেষু চ ॥ 26 ॥
নারাজকে জনপদে মাল্যমোদকদক্ষিণাঃ ।
দেবতাভ্যর্চনার্থায কল্প্যন্তে নিযতৈর্জনৈঃ ॥ 27 ॥
নারাজকে জনপদে চন্দনাগরুরূষিতাঃ ।
রাজপুত্রা বিরাজন্তে বসন্ত ইব শাখিনঃ ॥ 28 ॥
যথা হ্যনুদকা নদ্যঃ যথা বাঽপ্যতৃণং বনম্ ।
অগোপালা যথা গাবস্তথা রাষ্ট্রমরাজকম্ ॥ 29 ॥
নারাজকে জনপদে স্বকং ভবতি কস্যচিত্ ।
মত্স্যা ইব নরা নিত্যং ভক্ষযন্তি পরস্পরম্ ॥ 30 ॥
যে হি সম্ভিন্নমর্যাদা নাস্তিকাশ্ছিন্নসংশযাঃ ।
তেঽপি ভাবায কল্পন্তে রাজদণ্ডনিপীডিতাঃ ॥ 31 ॥
যথা দৃষ্টি শ্শরীরস্য নিত্যমেব প্রবর্ততে ।
তথা নরেন্দ্রো রাষ্ট্রস্য প্রভবস্সত্যধর্মযোঃ ॥ 32 ॥
রাজা সত্যং চ ধর্মশ্চ রাজা কুলবতাং কুলম্ ।
রাজা মাতা পিতা চৈব রাজা হিতকরো নৃণাম্ ॥ 33 ॥
যমো বৈশ্রবণ শ্শক্রঃ বরুণশ্চ মহাবলঃ ।
বিশেষ্যন্তে নরেন্দ্রেণ বৃত্তেন মহতা ততঃ ॥ 34 ॥
অহো তম ইবেদং স্যান্নপ্রজ্ঞাযেত কিঞ্চন ।
রাজা চে ন্ন ভবে ল্লোকে বিভজ সাধ্বসাধুনী ॥ 35 ॥
জীবত্যপি মহারাজে তবৈব বচনং বযম্ ।
নাতিক্রমামহে সর্বে বেলাং প্রাপ্যেব সাগরঃ ॥ 36 ॥
স ন স্সমীক্ষ্য দ্বিজবর্য বৃত্তং নৃপং বিনা রাজ্যমরণ্যভূতম্ ।
কুমারমিক্ষ্বাকুসুতং বদান্যং ত্বমেব রাজানমিহাভিষিঞ্চ ॥ 37 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাণ্ডে সপ্তষষ্টিতমস্সর্গঃ ॥
Roman (IAST) Transliteration
śrīmadvālmīkīya rāmāyaṇe ayodhyākāṇḍam |
atha saptaṣaṣṭitamassargaḥ |
ākranditanirānandā sāsrakaṇṭhajanākulā |
ayodhyāyāmavatatā sā vyatīyāya śarvarī || 1 ||
vyatītāyāṃ tu śarvaryāmādityasyodaye tataḥ |
sametya rājakartāraḥ sabhāmīyurdvijātayaḥ || 2 ||
mārkaṇḍeyo'tha maudgalyo vāmadevaśca kāśyapaḥ |
kātyāyano gautamaśca jābāliśca mahāyaśāḥ || 3 ||
ete dvijā ssahāmātyaiḥ pṛthagvā ca mudīrayan |
vasiṣṭhamevābhimukhāḥ śreṣṭhaṃ rājapurohitam || 4 ||
atītā śarvarī duḥkhaṃ yā no varṣaśatopamā |
asminpañcatvamāpanne putraśokena pārthive || 5 ||
svargataśca mahārājo rāmaścāraṇyamāśritaḥ |
lakṣmaṇaścāpi tejasvī rāmeṇaiva gatassaha || 6 ||
ubhau bharataśatrughnau kekayeṣu parantapau |
pure rājagṛhe ramye mātāmahaniveśane || 7 ||
ikṣvākūṇāmihādyaiva kaścidrājā vidhīyatām |
arājakaṃ hi no rāṣṭraṃ vināśaṃ samavāpnuyāt || 8 ||
nārājake janapade vidyunmālī mahāsvanaḥ |
abhivarṣati parjanyo mahīṃ divyena vāriṇā || 9 ||
nārājake janapade bījamuṣṭiḥ prakīryate |
nārājake pituḥ putro bhāryā vā vartate vaśe || 10 ||
nārājake dhanaṃ cāsti nāsti bhāryā pyarājake |
ida matyāhitaṃ cānyatkutassatya marājake || 11 ||
nārājake janapade kārayanti sabhāṃ narāḥ |
udyānāni ca ramyāṇi hṛṣṭāḥ puṇyagṛhāṇi ca || 12 ||
nārājake janapade yajñaśīlā dvijātayaḥ |
satrāṇyanvāsate dāntā brāhmaṇā ssaṃśitavratāḥ || 13 ||
nārājake janapade mahāyajñeṣu yajvanaḥ |
brāhmaṇā vasusampannā visṛjantyāptadakṣiṇāḥ || 14 ||
nārājake janapade prabhūtanaṭanartakāḥ |
utsavāśca samājāśca vardhante rāṣṭravardhanāḥ || 15 ||
nārājake janapade siddhārthā vyavahāriṇaḥ |
kathābhiranurajyante kathāśīlāḥ kathāpriyaiḥ || 16 ||
nārājake janapade udyānāni samāgatāḥ |
sāyāhne krīḍituṃ yānti kumāryo hemabhūṣitāḥ || 17 ||
nārājake janapade vāhanai śaśīghragāmibhiḥ |
narā niryāntyaraṇyāni nārībhissaha kāminaḥ || 18 ||
nārājake janapade dhanavantassurakṣitāḥ |
śerate vivṛtadvārāḥ kṛṣigorakṣajīvinaḥ || 19 ||
nārājake janapade baddhaghaṇṭāviṣāṇinaḥ |
aṭanti rājamārgeṣu kuñjarā ṣaṣṭihāyanāḥ || 20 ||
nārājake janapade śarānsantatamasyatām |
śrūyate talanirghoṣa iṣvastrāṇāmupāsane || 21 ||
nārājake janapade vaṇijo dūragāminaḥ |
gacchanti kṣemamadhvānaṃ bahupaṇyasamācitāḥ || 22 ||
nārājake janapade caratyekacaro vaśī |
bhāvayannātmanā'tmānaṃ yatra sāyaṅgṛho muniḥ || 23 ||
nārājake janapade yogakṣemaṃ pravartate |
nacāpyarājake senā śatrūnviṣahate yudhi || 24 ||
nārājake janapade hṛṣṭaiḥ paramavājibhiḥ |
narāssaṃyānti sahasā rathaiśca parimaṇḍitāḥ || 25 ||
nārājake janapade narāśśāstraviśāradāḥ |
saṃvadanto'vatiṣṭhante vaneṣūpavaneṣu ca || 26 ||
nārājake janapade mālyamodakadakṣiṇāḥ |
devatābhyarcanārthāya kalpyante niyatairjanaiḥ || 27 ||
nārājake janapade candanāgarurūṣitāḥ |
rājaputrā virājante vasanta iva śākhinaḥ || 28 ||
yathā hyanudakā nadyaḥ yathā vā'pyatṛṇaṃ vanam |
agopālā yathā gāvastathā rāṣṭramarājakam || 29 ||
nārājake janapade svakaṃ bhavati kasyacit |
matsyā iva narā nityaṃ bhakṣayanti parasparam || 30 ||
ye hi sambhinnamaryādā nāstikāśchinnasaṃśayāḥ |
te'pi bhāvāya kalpante rājadaṇḍanipīḍitāḥ || 31 ||
yathā dṛṣṭi śśarīrasya nityameva pravartate |
tathā narendro rāṣṭrasya prabhavassatyadharmayoḥ || 32 ||
rājā satyaṃ ca dharmaśca rājā kulavatāṃ kulam |
rājā mātā pitā caiva rājā hitakaro nṛṇām || 33 ||
yamo vaiśravaṇa śśakraḥ varuṇaśca mahābalaḥ |
viśeṣyante narendreṇa vṛttena mahatā tataḥ || 34 ||
aho tama ivedaṃ syānnaprajñāyeta kiñcana |
rājā ce nna bhave lloke vibhaja sādhvasādhunī || 35 ||
jīvatyapi mahārāje tavaiva vacanaṃ vayam |
nātikramāmahe sarve velāṃ prāpyeva sāgaraḥ || 36 ||
sa na ssamīkṣya dvijavarya vṛttaṃ nṛpaṃ vinā rājyamaraṇyabhūtam |
kumāramikṣvākusutaṃ vadānyaṃ tvameva rājānamihābhiṣiñca || 37 ||
ityārṣe śrīmadrāmāyaṇe vālmīkīya ādikāvye ayodhyākāṇḍe saptaṣaṣṭitamassargaḥ ||
InfoLyter.in — Sacred Vedic Knowledge Portal · Free forever