📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.59 বালকাণ্ড - একোনষষ্টিতম সর্গঃ
1.59 Balakanda - Ekonashashtitama Sargah
Valmiki Bengali
শ্রীমদ্বাল্মীকীয রামাযণে বালকাণ্ডম্ ।
অথ একোনষষ্টিতমস্সর্গঃ ।
উক্তবাক্যং তু রাজানং কৃপযা কুশিকাত্মজঃ ।
অব্রবীন্মধুরং বাক্যং সাক্ষাচ্চণ্ডালরূপিণম্ ॥ 1 ॥
ঐক্ষ্বাক স্বাগতং বত্স জানামি ত্বাং সুধার্মিকম্ ।
শরণং তে ভবিষ্যামি মা ভৈষীর্নৃপপুঙ্গব ॥ 2 ॥
অহমামন্ত্রযে সর্বান্মহর্ষীন্পুণ্যকর্মণঃ ।
যজ্ঞসাহ্যকরান্ রাজন্ ততো যক্ষ্যসি নির্বৃতঃ ॥ 3 ॥
গুরুশাপকৃতং রূপং যদিদং ত্বযি বর্ততে ।
অনেন সহ রূপেণ সশরীরো গমিষ্যসি ॥ 4 ॥
হস্তপ্রাপ্তমহং মন্যে স্বর্গং তব নরাধিপ ।
যস্ত্বং কৌশিকমাগম্য শরণ্যং শরণাগতঃ ॥ 5 ॥
এবমুক্ত্বা মহাতেজাঃ পুত্রান্ পরমধার্মিকান্ ।
ব্যাদিদেশ মহাপ্রাজ্ঞান্ যজ্ঞসম্ভারকারণাত্ ॥ 6 ॥
সর্বান্ শিষ্যান্ সমাহূয বাক্যমেতদুবাচ হ ।
সর্বানৃষিগণান্বত্সা আনযধ্বং মমাজ্ঞযা ।
সশিষ্যসুহৃদশ্চৈব সর্ত্বিজ স্সবহুশ্রুতান্ ॥ 7 ॥
যদন্যো বচনং ব্রূযান্মদ্বাক্যবলচোদিতঃ ।
তত্সর্বমখিলেনোক্তং মমাখ্যেযমনাদৃতম্ ॥ 8 ॥
তস্য তদ্বচনং শ্রুত্বা দিশো জগ্মুস্তদাজ্ঞযা ।
আজগ্মুরথ দেশেভ্য স্সর্বেভ্যো ব্রহ্মবাদিনঃ ॥ 9 ॥
তে চ শিষ্যাঃ সমাগম্য মুনিং জ্বলিততেজসম্ ।
ঊচুশ্চবচনং সর্বে সর্বেষাং ব্রহ্মবাদিনাম্ ॥ 10 ॥
শ্রুত্বা তে বচনং সর্বে সমাযান্তি দ্বিজাতযঃ ।
সর্বদেশেষু চাগচ্ছন্ বর্জযিত্বা মহোদযম্ ॥ 11 ॥
বাসিষ্ঠং তচ্ছতং সর্বং ক্রোধপর্যাকুলাক্ষরম্ ।
যদাহ বচনং সর্বং শৃণু ত্বং মুনিপুঙ্গব ॥ 12 ॥
ক্ষত্রিযো যাজকো যস্য চণ্ডালস্য বিশেষতঃ ।
কথং সদসি ভোক্তারো হবিস্তস্য সুরর্ষযঃ ॥ 13 ॥
ব্রাহ্মণা বা মহাত্মানো ভুক্ত্বা চণ্ডালভোজনম্ ।
কথং স্বর্গং গমিষ্যন্তি বিশ্বামিত্রেণ পালিতাঃ ॥ 14 ॥
এতদ্বচননৈষ্ঠুর্যমূচু স্সংরক্তলোচনাঃ ।
বাসিষ্ঠা মুনিশার্দূল সর্বে তে সমহোদযাঃ ॥ 15 ॥
তেষাং তদ্বচনং শ্রুত্বা সর্বেষাং মুনিপুঙ্গবঃ ।
ক্রোধসংরক্তনযন স্সরোষমিদমব্রবীত্ ॥ 16 ॥
যে দূষযন্ত্যদুষ্টং মাং তপ উগ্রং সমাস্থিতম্ ।
ভস্মীভূতা দুরাত্মানো ভবিষ্যন্তি ন সংশযঃ ॥ 17 ॥
অদ্য তে কালপাশেন নীতা বৈবস্বতক্ষযম্ ।
সপ্তজাতিশতান্যেব মৃতপস্সন্তু সর্বশঃ ॥ 18 ॥
শ্বমাংসনিযতাহারা মুষ্টিকা নাম নির্ঘৃণাঃ ।
বিকৃতাশ্চ বিরূপাশ্চ লোকাননুচরন্ত্বিমান্ ॥ 19 ॥
মহোদযস্তু দুর্বুদ্ধির্মামদূষ্যং হ্যদূষযত্ ।
দূষিত স্সর্বলোকেষু নিষাদত্বং গমিষ্যতি ॥ 20 ॥
প্রাণাতিপাতনিরতো নিরনুক্রোশতাং গতঃ ।
দীর্ঘকালং মম ক্রোধাদ্দুর্গতিং বর্তযিষ্যতি ॥ 21 ॥
এতাবদুক্ত্বা বচনং বিশ্বামিত্রো মহাতপাঃ ।
বিররাম মহাতেজা ঋষিমধ্যে মহামুনিঃ ॥ 22 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাণ্ডে একোনষষ্টিতমস্সর্গঃ ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha ekonaṣaṣṭitamassargaḥ |
uktavākyaṃ tu rājānaṃ kṛpayā kuśikātmajaḥ |
abravīnmadhuraṃ vākyaṃ sākṣāccaṇḍālarūpiṇam || 1 ||
aikṣvāka svāgataṃ vatsa jānāmi tvāṃ sudhārmikam |
śaraṇaṃ te bhaviṣyāmi mā bhaiṣīrnṛpapuṅgava || 2 ||
ahamāmantraye sarvānmaharṣīnpuṇyakarmaṇaḥ |
yajñasāhyakarān rājan tato yakṣyasi nirvṛtaḥ || 3 ||
guruśāpakṛtaṃ rūpaṃ yadidaṃ tvayi vartate |
anena saha rūpeṇa saśarīro gamiṣyasi || 4 ||
hastaprāptamahaṃ manye svargaṃ tava narādhipa |
yastvaṃ kauśikamāgamya śaraṇyaṃ śaraṇāgataḥ || 5 ||
evamuktvā mahātejāḥ putrān paramadhārmikān |
vyādideśa mahāprājñān yajñasambhārakāraṇāt || 6 ||
sarvān śiṣyān samāhūya vākyametaduvāca ha |
sarvānṛṣigaṇānvatsā ānayadhvaṃ mamājñayā |
saśiṣyasuhṛdaścaiva sartvija ssabahuśrutān || 7 ||
yadanyo vacanaṃ brūyānmadvākyabalacoditaḥ |
tatsarvamakhilenoktaṃ mamākhyeyamanādṛtam || 8 ||
tasya tadvacanaṃ śrutvā diśo jagmustadājñayā |
ājagmuratha deśebhya ssarvebhyo brahmavādinaḥ || 9 ||
te ca śiṣyāḥ samāgamya muniṃ jvalitatejasam |
ūcuścavacanaṃ sarve sarveṣāṃ brahmavādinām || 10 ||
śrutvā te vacanaṃ sarve samāyānti dvijātayaḥ |
sarvadeśeṣu cāgacchan varjayitvā mahodayam || 11 ||
vāsiṣṭhaṃ tacchataṃ sarvaṃ krodhaparyākulākṣaram |
yadāha vacanaṃ sarvaṃ śṛṇu tvaṃ munipuṅgava || 12 ||
kṣatriyo yājako yasya caṇḍālasya viśeṣataḥ |
kathaṃ sadasi bhoktāro havistasya surarṣayaḥ || 13 ||
brāhmaṇā vā mahātmāno bhuktvā caṇḍālabhojanam |
kathaṃ svargaṃ gamiṣyanti viśvāmitreṇa pālitāḥ || 14 ||
etadvacananaiṣṭhuryamūcu ssaṃraktalocanāḥ |
vāsiṣṭhā muniśārdūla sarve te samahodayāḥ || 15 ||
teṣāṃ tadvacanaṃ śrutvā sarveṣāṃ munipuṅgavaḥ |
krodhasaṃraktanayana ssaroṣamidamabravīt || 16 ||
ye dūṣayantyaduṣṭaṃ māṃ tapa ugraṃ samāsthitam |
bhasmībhūtā durātmāno bhaviṣyanti na saṃśayaḥ || 17 ||
adya te kālapāśena nītā vaivasvatakṣayam |
saptajātiśatānyeva mṛtapassantu sarvaśaḥ || 18 ||
śvamāṃsaniyatāhārā muṣṭikā nāma nirghṛṇāḥ |
vikṛtāśca virūpāśca lokānanucarantvimān || 19 ||
mahodayastu durbuddhirmāmadūṣyaṃ hyadūṣayat |
dūṣita ssarvalokeṣu niṣādatvaṃ gamiṣyati || 20 ||
prāṇātipātanirato niranukrośatāṃ gataḥ |
dīrghakālaṃ mama krodhāddurgatiṃ vartayiṣyati || 21 ||
etāvaduktvā vacanaṃ viśvāmitro mahātapāḥ |
virarāma mahātejā ṛṣimadhye mahāmuniḥ || 22 ||
ityārṣe śrīmadrāmāyaṇe vālmīkīya ādikāvye bālakāṇḍe ekonaṣaṣṭitamassargaḥ ||
InfoLyter.in — Sacred Vedic Knowledge Portal · Free forever