📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
5.62 সুন্দরকাণ্ড - দ্বিষষ্টিতম সর্গঃ
5.62 Sundarakanda - Dvishashtitama Sargah
Valmiki Bengali
শ্রীমদ্বাল্মীকীয রামাযণে সুন্দরকাণ্ডম্ ।
অথ দ্বিষষ্টিতমস্সর্গঃ ।
তানুবাচ হরিশ্রেষ্ঠো হনুমান্বানরর্ষভঃ ।
অব্যগ্রমনসো যূযং মধু সেবত বানরাঃ ॥ 1 ॥
অহমাবারযিষ্যামি যুষ্মাকং পরিপন্থিনঃ ।
শ্রুত্বা হনুমতো বাক্যং হরীণাং প্রবরোঽঙ্গদঃ ॥ 2 ॥
প্রত্যুবাচ প্রসন্নাত্মা পিবন্তু হরযো মধু ।
অবশ্যং কৃতকার্যস্য বাক্যং হনুমতো মযা ॥ 3 ॥
অকার্যমপি কর্তব্যং কিমঙ্গ পুনরীদৃশম্ ।
অঙ্গদস্য মুখাচ্ছ্রুত্বাবচনং বানরর্ষভাঃ ॥ 4 ॥
সাধুসাধ্বিতি সংহৃষ্টা বানরাঃ প্রত্যপূজযন্ ।
পূজযিত্বাঙ্গদং সর্বে বানরা বানরর্ষভম্ ॥ 5 ॥
জগ্মুর্মধুবনং যত্র নদীবেগ ইব দ্রুমম্ ।
তে প্রবিষ্টা মধুবনং পালানাক্রম্য বীর্যতঃ ॥ 6 ॥
অতিসর্গাচ্চ পটবো দৃষ্ট্বা শ্রুত্বা চ মৈথিলীম্ ।
পপুস্সর্বে মধু তদা রসবত্ফলমাদদুঃ ॥ 7 ॥
উত্পত্য চ ততস্সর্বে বনপালান্ সমাগতান্ ।
তাডযন্তি স্ম শতশ স্সক্তান্মধুবনে তদা ॥ 8 ॥
মধূনি দ্রোণমাত্রাণি বাহুভিঃ পরিগৃহ্য তে ।
পিবন্তি সহিতা স্সর্বে নিঘ্নন্তি স্ম তথাপরে ॥ 9 ॥
কেচিত্পীত্বা প্রবিধ্যন্তি মধূনি মধুপিঙ্গলাঃ ।
মধূচ্ছিষ্টেন কেচিচ্চ জগ্মুরন্যোন্যমুত্কটাঃ ॥ 10 ॥
অপরে বৃক্ষমূলে তু শাখাং গৃহ্য ব্যবস্থিতাঃ ।
অত্যর্থং চ মদগ্লানাঃ পর্ণান্যাস্তীর্য শেরতে ॥ 11 ॥
উন্মত্তভূতাঃ প্লবগা মধুমত্তাশ্চ হৃষ্টবত্ ।
ক্ষিপন্তি চ তথান্যোন্যং স্খলন্তি চ তথাঽপরে ॥ 12 ॥
কেচিত্ ক্ষ্বেলাং প্রকুর্বন্তি কেচিত্ কূজন্তি হৃষ্টবত্ ।
হরযোমধুনা মত্তাঃ কেচিত্সুপ্তা মহীতলে ॥ 13 ॥
কৃত্বা কেচিদ্ধসন্ত্যন্যে কেচিত্কুর্বন্তি চেতরত্ ।
কৃত্বা কেচিদ্বদন্ত্যন্যে কেচিদ্বুধ্যন্তি চেতরত্ ॥ 14 ॥
যেঽপ্যত্র মধুপালা স্স্যুঃ প্রেষ্যা দধিমুখস্য তু ।
তেঽপি তৈর্বানরৈর্ভীমৈঃ প্রতিষিদ্ধা দিশো গতাঃ ॥ 15 ॥
জানুভিস্তু প্রকৃষ্টাশ্চ দেবমার্গং প্রদর্শিতাঃ ।
অব্রুবন্ পরমোদ্বিগ্না গত্বা দধিমুখং বচঃ ॥ 16 ॥
হনূমতা দত্তবরৈর্হতং মধুবনং বলাত্ ।
বযং চ জানুভিঃ কৃষ্টা দেবমার্গং চ দর্শিতাঃ ॥ 17 ॥
ততো দধিমুখঃ ক্রুদ্ধো বনপস্তত্র বানরঃ ।
হতং মধুবনং শ্রুত্বা সান্ত্বযামাস তান্ হরীন্ ॥ 18 ॥
ইহাগচ্ছত গচ্ছামো বানরান্ বলদর্পিতান্ ।
বলেন বারযিষ্যামো মধু ভক্ষযতো বযম্ ॥ 19 ॥
শ্রুত্বা দধিমুখস্যেদং বচনং বানরর্ষভাঃ ।
পুনর্বীরা মধুবনং তেনৈব সহসা যযুঃ ॥ 20 ॥
মধ্যে চৈষাং দধিমুখঃ প্রগৃহ্য তরসা তরুম্ ।
সমভ্যধাবদ্বেগেন তে চ সর্বে প্লবঙ্গমাঃ ॥ 21 ॥
তে শিলাঃ পাদপাংশ্চাপি পর্বতাংশ্চাপি বানরাঃ ।
গৃহীত্বাঽঽভ্যগমন্ ক্রুদ্ধা যত্র তে কপিকুঞ্জরাঃ ॥ 22 ॥
তে স্বামিবচনং বীরা হৃদযেষ্ববসজ্য তত্ ।
ত্বরযা হ্যভ্যধাবন্ত সালতালশিলাযুধাঃ ॥ 23 ॥
বৃক্ষস্থাংশ্চ তলস্থাংশ্চ বানরান্ বলদর্পিতান্ ।
অভ্যক্রামংস্ততো বীরাঃ পালাস্তত্র সহস্রশঃ ॥ 24 ॥
অথ দৃষ্ট্বা দধিমুখং ক্রুদ্ধং বানরপুঙ্গবাঃ ।
অভ্যধাবন্ত বেগেন হনুমত্প্রমুখাস্তদা ॥ 25 ॥
তং সবৃক্ষং মহাবাহুমাপতন্তং মহাবলম্ ।
আর্যকং প্রাহরত্তত্র বাহুভ্যাং কুপিতোঽঙ্গদঃ ॥ 26 ॥
মদান্ধশ্চ ন বেদৈনমার্যকোঽযং মমেতি সঃ ।
অথৈনং নিষ্পিপেষাশু বেগবদ্বসুধাতলে ॥ 27 ॥
স ভগ্নবাহূরুভুজো বিহ্বলশ্শোণিতোক্ষিতঃ ।
মুমোহ সহসা বীরো মুহূর্তং কপিকুঞ্জরঃ ॥ 28 ॥
স সমাশ্বস্য সহসা সঙ্কৃদ্ধো রাজমাতুলঃ ।
বানরান্বারযামাস দণ্ডেন মধুমোহিতান্ ॥ 29 ॥
স কথঞ্চিদ্বিমুক্তস্স্তৈর্বানরৈর্বানরর্ষভঃ ।
উবাচৈকান্তমাশ্রিত্য ভৃত্যান্ স্বান্ সমুপাগতান্ ॥ 30 ॥
এতে তিষ্ঠন্তু গচ্ছামো ভর্তা নো যত্র বানরঃ ।
সুগ্রীবো বিপুলগ্রীবঃ সহ রামেণ তিষ্ঠতি ॥ 31 ॥
সর্বং চৈবাঙ্গদে দোষং শ্রাবযিষ্যামি পার্থিবে ।
অমর্ষী বচনং শ্রুত্বা ঘাতযিষ্যতি বানরান্ ॥ 32 ॥
ইষ্টং মধুবনং হ্যেতত্পার্থিবস্য মহাত্মনঃ ।
পিতৃপৈতামহং দিব্যং দেবৈরপি দুরাসদম্ ॥ 33 ॥
স বানরানিমান্ সর্বান্ মধুলুব্ধান্ গতাযুষঃ ।
ঘাতযিষ্যতি দণ্ডেন সুগ্রীবস্সসুহৃজ্জনান্ ॥ 34 ॥
বধ্যা হ্যেতে দুরাত্মানো নৃপাজ্ঞাপরিভাবিনঃ ।
অমর্ষপ্রভবো রোষস্সফলো নো ভবিষ্যতি ॥ 35 ॥
এবমুক্ত্বা দধিমুখো বনপালান্মহাবলঃ ।
জগাম সহসোত্পত্য বনপালৈস্সমন্বিতঃ ॥ 36 ॥
নিমেষান্তরমাত্রেণ স হি প্রাপ্তো বনালযঃ ।
সহস্রাংশুসুতো ধীমান্ সুগ্রীবো যত্র বানরঃ ॥ 37 ॥
রামং চ লক্ষ্মণং চৈব দৃষ্ট্বা সুগ্রীবমেব চ ।
সমপ্রতিষ্ঠাং জগতীমাকাশান্নিপপাত হ ॥ 38 ॥
সন্নিপত্য মহাবীর্যস্সর্বৈস্তৈঃ পরিবারিতঃ ।
হরির্দধিমুখঃ পালৈঃ পালানাং পরমেশ্বরঃ ॥ 39 ॥
স দীনবদনো ভূত্বা কৃত্বা শিরসি চাঞ্জলিম্ ।
সুগ্রীবস্য শুভৌ মূর্ধ্না চরণৌ পত্যপীডযত্ ॥ 40 ॥
ইত্যার্ষে শ্রীমদ্রামাযণে বাল্মীকীয আদিকাব্যে সুন্দরকাণ্ডে দ্বিষষ্টিতমস্সর্গঃ ॥
Roman (IAST) Transliteration
śrīmadvālmīkīya rāmāyaṇe sundarakāṇḍam |
atha dviṣaṣṭitamassargaḥ |
tānuvāca hariśreṣṭho hanumānvānararṣabhaḥ |
avyagramanaso yūyaṃ madhu sevata vānarāḥ || 1 ||
ahamāvārayiṣyāmi yuṣmākaṃ paripanthinaḥ |
śrutvā hanumato vākyaṃ harīṇāṃ pravaro'ṅgadaḥ || 2 ||
pratyuvāca prasannātmā pibantu harayo madhu |
avaśyaṃ kṛtakāryasya vākyaṃ hanumato mayā || 3 ||
akāryamapi kartavyaṃ kimaṅga punarīdṛśam |
aṅgadasya mukhācchrutvāvacanaṃ vānararṣabhāḥ || 4 ||
sādhusādhviti saṃhṛṣṭā vānarāḥ pratyapūjayan |
pūjayitvāṅgadaṃ sarve vānarā vānararṣabham || 5 ||
jagmurmadhuvanaṃ yatra nadīvega iva drumam |
te praviṣṭā madhuvanaṃ pālānākramya vīryataḥ || 6 ||
atisargācca paṭavo dṛṣṭvā śrutvā ca maithilīm |
papussarve madhu tadā rasavatphalamādaduḥ || 7 ||
utpatya ca tatassarve vanapālān samāgatān |
tāḍayanti sma śataśa ssaktānmadhuvane tadā || 8 ||
madhūni droṇamātrāṇi bāhubhiḥ parigṛhya te |
pibanti sahitā ssarve nighnanti sma tathāpare || 9 ||
kecitpītvā pravidhyanti madhūni madhupiṅgalāḥ |
madhūcchiṣṭena kecicca jagmuranyonyamutkaṭāḥ || 10 ||
apare vṛkṣamūle tu śākhāṃ gṛhya vyavasthitāḥ |
atyarthaṃ ca madaglānāḥ parṇānyāstīrya śerate || 11 ||
unmattabhūtāḥ plavagā madhumattāśca hṛṣṭavat |
kṣipanti ca tathānyonyaṃ skhalanti ca tathā'pare || 12 ||
kecit kṣvelāṃ prakurvanti kecit kūjanti hṛṣṭavat |
harayomadhunā mattāḥ kecitsuptā mahītale || 13 ||
kṛtvā keciddhasantyanye kecitkurvanti cetarat |
kṛtvā kecidvadantyanye kecidbudhyanti cetarat || 14 ||
ye'pyatra madhupālā ssyuḥ preṣyā dadhimukhasya tu |
te'pi tairvānarairbhīmaiḥ pratiṣiddhā diśo gatāḥ || 15 ||
jānubhistu prakṛṣṭāśca devamārgaṃ pradarśitāḥ |
abruvan paramodvignā gatvā dadhimukhaṃ vacaḥ || 16 ||
hanūmatā dattavarairhataṃ madhuvanaṃ balāt |
vayaṃ ca jānubhiḥ kṛṣṭā devamārgaṃ ca darśitāḥ || 17 ||
tato dadhimukhaḥ kruddho vanapastatra vānaraḥ |
hataṃ madhuvanaṃ śrutvā sāntvayāmāsa tān harīn || 18 ||
ihāgacchata gacchāmo vānarān baladarpitān |
balena vārayiṣyāmo madhu bhakṣayato vayam || 19 ||
śrutvā dadhimukhasyedaṃ vacanaṃ vānararṣabhāḥ |
punarvīrā madhuvanaṃ tenaiva sahasā yayuḥ || 20 ||
madhye caiṣāṃ dadhimukhaḥ pragṛhya tarasā tarum |
samabhyadhāvadvegena te ca sarve plavaṅgamāḥ || 21 ||
te śilāḥ pādapāṃścāpi parvatāṃścāpi vānarāḥ |
gṛhītvā''bhyagaman kruddhā yatra te kapikuñjarāḥ || 22 ||
te svāmivacanaṃ vīrā hṛdayeṣvavasajya tat |
tvarayā hyabhyadhāvanta sālatālaśilāyudhāḥ || 23 ||
vṛkṣasthāṃśca talasthāṃśca vānarān baladarpitān |
abhyakrāmaṃstato vīrāḥ pālāstatra sahasraśaḥ || 24 ||
atha dṛṣṭvā dadhimukhaṃ kruddhaṃ vānarapuṅgavāḥ |
abhyadhāvanta vegena hanumatpramukhāstadā || 25 ||
taṃ savṛkṣaṃ mahābāhumāpatantaṃ mahābalam |
āryakaṃ prāharattatra bāhubhyāṃ kupito'ṅgadaḥ || 26 ||
madāndhaśca na vedainamāryako'yaṃ mameti saḥ |
athainaṃ niṣpipeṣāśu vegavadvasudhātale || 27 ||
sa bhagnabāhūrubhujo vihvalaśśoṇitokṣitaḥ |
mumoha sahasā vīro muhūrtaṃ kapikuñjaraḥ || 28 ||
sa samāśvasya sahasā saṅkṛddho rājamātulaḥ |
vānarānvārayāmāsa daṇḍena madhumohitān || 29 ||
sa kathañcidvimuktasstairvānarairvānararṣabhaḥ |
uvācaikāntamāśritya bhṛtyān svān samupāgatān || 30 ||
ete tiṣṭhantu gacchāmo bhartā no yatra vānaraḥ |
sugrīvo vipulagrīvaḥ saha rāmeṇa tiṣṭhati || 31 ||
sarvaṃ caivāṅgade doṣaṃ śrāvayiṣyāmi pārthive |
amarṣī vacanaṃ śrutvā ghātayiṣyati vānarān || 32 ||
iṣṭaṃ madhuvanaṃ hyetatpārthivasya mahātmanaḥ |
pitṛpaitāmahaṃ divyaṃ devairapi durāsadam || 33 ||
sa vānarānimān sarvān madhulubdhān gatāyuṣaḥ |
ghātayiṣyati daṇḍena sugrīvassasuhṛjjanān || 34 ||
vadhyā hyete durātmāno nṛpājñāparibhāvinaḥ |
amarṣaprabhavo roṣassaphalo no bhaviṣyati || 35 ||
evamuktvā dadhimukho vanapālānmahābalaḥ |
jagāma sahasotpatya vanapālaissamanvitaḥ || 36 ||
nimeṣāntaramātreṇa sa hi prāpto vanālayaḥ |
sahasrāṃśusuto dhīmān sugrīvo yatra vānaraḥ || 37 ||
rāmaṃ ca lakṣmaṇaṃ caiva dṛṣṭvā sugrīvameva ca |
samapratiṣṭhāṃ jagatīmākāśānnipapāta ha || 38 ||
sannipatya mahāvīryassarvaistaiḥ parivāritaḥ |
harirdadhimukhaḥ pālaiḥ pālānāṃ parameśvaraḥ || 39 ||
sa dīnavadano bhūtvā kṛtvā śirasi cāñjalim |
sugrīvasya śubhau mūrdhnā caraṇau patyapīḍayat || 40 ||
ityārṣe śrīmadrāmāyaṇe vālmīkīya ādikāvye sundarakāṇḍe dviṣaṣṭitamassargaḥ ||
InfoLyter.in — Sacred Vedic Knowledge Portal · Free forever