5.10 Sundarakanda - Dashama Sargah

ॐ

5.10 সুন্দরকাণ্ড - দশম সর্গঃ

Valmiki Bengali

শ্রীমদ্বাল্মীকীয রামাযণে সুন্দরকাণ্ডম্ ।

অথ দশমস্সর্গঃ ।

তত্র দিব্যোপমং মুখ্যং স্ফাটিকং রত্নভূষিতম্ ।

অবেক্ষমাণো হনুমান্ দদর্শ শযনাসনম্ ॥ 1 ॥

দান্তকাঞ্চনচিত্রাঙ্গৈর্বৈডূর্যৈশ্চ বরাসনৈঃ ।

মহার্হাস্তরণোপেতৈরুপপন্নং মহাধনৈঃ ॥ 2 ॥

তস্য চৈকতমে দেশে সোঽগ্য্রমালাবিভূষিতম্ ।

দদর্শ পাণ্ডুরং ছত্রং তারাধিপতিসন্নিভম্ ॥ 3 ॥

জাতরূপপরিক্ষিপ্তং চিত্রভানুসমপ্রভম্ ।

অশোকমালাবিততং দদর্শ পরমাসনম্ ॥ 4 ॥

বালব্যজনহস্তাভির্বীজ্যমানং সমন্ততঃ ।

গন্ধৈশ্চ বিবিধৈর্জুষ্টং বরধূপেন ধূপিতম্ ॥ 5 ॥

পরমাস্তরণাস্তীর্ণমাবিকাজিনসংবৃতম্ ।

দামভির্বরমাল্যানাং সমন্তাদুপশোভিতম্ ॥ 6 ॥

তস্মিন্ জীমূতসঙ্কাশং প্রদীপ্তোত্তমকুণ্ডলম্ ।

লোহিতাক্ষং মহাবাহুং মহারজতবাসসম্ ॥ 7 ॥

লোহিতেনানুলিপ্তাঙ্গং চন্দনেন সুগন্ধিনা ।

সন্ধ্যারক্তমিবাকাশে তোযদং সতটিদ্গণম্ ॥ 8 ॥

বৃতমাভরণৈর্দিব্যৈঃ সুরূপং কামরূপিণম্ ।

সবৃক্ষবনগুল্মাঢ্যং প্রসুপ্তমিব মন্দরম্ ॥ 9 ॥

ক্রীডিত্বোপরতং রাত্রৌ বরাভরণভূষিতম্ ।

প্রিযং রাক্ষসকন্যানাং রাক্ষসানাং সুখাবহম্ ॥ 10 ॥

পীত্বাঽপ্যুপরতং চাপি দদর্শ স মহাকপিঃ ।

ভাস্বরে শযনে বীরং প্রসুপ্তং রাক্ষসাধিপম্ ॥ 11 ॥

নিঃশ্বসন্তং যথা নাগং রাবণং বানরর্ষভঃ ।

আসাদ্য পরমোদ্বিগ্নস্সোপাসর্পত্সুভীতবত্ ॥ 12 ॥

অথাঽঽরোহণমাসাদ্য বেদিকাঽন্তরমাশ্রিতঃ ।

সুপ্তং রাক্ষসশার্দূলং প্রেক্ষতে স্ম মহাকপিঃ ॥ 13 ॥

শুশুভে রাক্ষসেন্দ্রস্য স্বপতঃ শযনোত্তমম্ ।

গন্ধহস্তিনি সংবিষ্টে যথা প্রস্রবণং মহত্ ॥ 14 ॥

কাঞ্চনাঙ্গদসন্নধ্দৈ চ দদর্শ স মহাত্মনঃ ।

বিক্ষিপ্তৌ রাক্ষসেন্দ্রস্য ভুজাবিন্দ্রধ্বজোপমৌ ॥ 15 ॥

ঐরাবতবিষাণাগ্রৈরাপীডনকৃতব্রণৌ ।

বজ্রোল্লিখিতপীনাংসৌ বিষ্ণুচক্রপরিক্ষতৌ ॥ 16 ॥

পীনৌ সমসুজাতাংসৌ সঙ্গতৌ বলসংযুতৌ ।

সুলক্ষণনখাঙ্গুষ্ঠা স্বঙ্গুলীতললক্ষিতৌ ॥ 17 ॥

সংহতৌ পরিঘাকারৌ বৃত্তৌ করিকরোপমৌ ।

বিক্ষিপ্তৌ শযনে শুভ্রে পঞ্চশীর্ষাবিবোরগৌ ॥ 18 ॥

শশক্ষতজকল্পেন সুশীতেন সুগন্ধিনা ।

চন্দনেন পরার্ধ্যেন স্বনুলিপ্তৌ স্বলঙ্কৃতৌ ॥ 19 ॥

উত্তমস্ত্রীবিমৃদিতৌ গন্ধোত্তমনিষেবিতৌ ।

যক্ষপন্নগগন্ধর্বদেবদানবরাবিণৌ ॥ 20 ॥

দদর্শ স কপিস্তত্র বাহূ শযনসংস্থিতৌ ।

মন্দরস্যান্তরে সুপ্তৌ মহাহী রুষিতাবিব ॥ 21 ॥

তাভ্যাং স পরিপূর্ণাভ্যাং ভুজাভ্যাং রাক্ষসেশ্বরঃ ।

শুশুভেঽচলসঙ্কাশঃ শৃঙ্গাভ্যামিব মন্দরঃ ॥ 22 ॥

চূতপুন্নাগসুরভির্বকুলোত্তমসংযুতঃ ।

মৃষ্টান্নরসসংযুক্তঃ পানগন্ধপুরস্কৃতঃ ॥ 23 ॥

তস্য রাক্ষসসিংহস্য নিশ্চক্রাম মহামুখাত্ ।

শযানস্য বিনিঃশ্বাসঃ পূরযন্নিব তদ্ গৃহম্ ॥ 24 ॥

মুক্তামণিবিচিত্রেণ কাঞ্চনেন বিরাজিতম্ ।

মকুটেনাপবৃত্তেন কুণ্ডলোজ্বলিতাননম্ ॥ 25 ॥

রক্তচন্দনদিগ্ধেন তথা হারেণ শোভিনা ।

পীনাযতবিশালেন বক্ষসাঽভিবিরাজিতম্ ॥ 26 ॥

পাণ্ডরেণাপবিদ্ধেন ক্ষৌমেণ ক্ষতজেক্ষণম্ ।

মহার্হেণ সুসংবীতং পীতেনোত্তমবাসসা ॥ 27 ॥

মাষরাশিপ্রতীকাশং নিশ্শ্বসন্তং ভুজঙ্গবত্ ।

গাঙ্গে মহতি তোযান্তে প্রসুপ্তমিব কুঞ্জরম্ ॥ 28 ॥

চতুর্ভিঃ কাঞ্চনৈর্দীপৈদ্ধীপ্যমানচতুর্দিশম্ ।

প্রকাশীকৃতসর্বাঙ্গং মেঘং বিদ্যুদ্গণৈরিব ॥ 29 ॥

পাদমূলগতাশ্চাপি দদর্শ সুমহাত্মনঃ ।

পত্নীঃ স প্রিযভার্যস্য তস্য রক্ষঃপতের্গৃহে ॥ 30 ॥

শশিপ্রকাশবদনাশ্চারুকুণ্ডলভূষিতাঃ ।

অম্লানমাল্যাভরণা দদর্শ হরিযূথপঃ ॥ 31 ॥

নৃত্তবাদিত্রকুশলা রাক্ষসেন্দ্রভুজাঙ্কগাঃ ।

বরাভরণধারিণ্যো নিষণ্ণা দদৃশে হরিঃ ॥ 32 ॥

বজ্রবৈডূর্যগর্ভাণি শ্রবণান্তেষু যোষিতাম্ ।

দদর্শ তাপনীযানি কুণ্ডলান্যঙ্গদানি চ ॥ 33 ॥

তাসাং চন্দ্রোপমৈর্বক্ত্রৈশ্শুভৈর্ললিতকুণ্ডলৈঃ ।

বিররাজ বিমানং তন্নভস্তারাগণৈরিব ॥ 34 ॥

মদব্যাযামখিন্নাস্তা রাক্ষসেন্দ্রস্য যোষিতঃ ।

তেষু তেষ্ববকাশেষু প্রসুপ্তাস্তনুমধ্যমাঃ ॥ 35 ॥

অঙ্গহারৈস্তথৈবান্যা কোমলৈর্নৃত্তশালিনী ।

বিন্যস্তশুভসর্বাঙ্গী প্রসুপ্তা বরবর্ণিনী ॥ 36 ॥

কাচিদ্বীণাং পরিষ্বজ্য প্রসুপ্তা সম্প্রকাশতে ।

মহানদীপ্রকীর্ণেব নলিনী পোতমাশ্রিতা ॥ 37 ॥

অন্যা কক্ষগতেনৈব মড্ডুকেনাসিতেক্ষণা ।

প্রসুপ্তা ভামিনী ভাতি বালপুত্রেব বত্সলা ॥ 38 ॥

পটহং চারুসর্বাঙ্গী পীড্য শেতে শুভস্তনী ।

চিরস্য রমণং লব্ধ্বা পরিষ্বজ্যেব ভামিনী ॥ 39 ॥

কাচিদ্বংশং পরিষ্বজ্য সুপ্তা কমললোচনা ।

রহঃ প্রিযতমং গৃহ্য সকামেব চ কামিনী ॥ 40 ॥

বিপঞ্চীং পরিগৃহ্যান্যা নিযতা নৃত্তশালিনী ।

নিদ্রাবশমনুপ্রাপ্তা সহ কান্তেব ভামিনী ॥ 41 ॥

অন্যা কনকসঙ্কাশৈর্মৃদুপীনৈর্মনোরমৈঃ ।

মৃদঙ্গং পরিপীড্যাঙ্গৈঃ প্রসুপ্তা মত্তলোচনা ॥ 42 ॥

ভুজপার্শ্বান্তরস্থেন কক্ষগেন কৃশোদরী ।

পণবেব সহানিন্দ্যা সুপ্তা মদকৃতশ্রমা ॥ 43 ॥

ডিণ্ডিমং পরিগৃহ্যান্যা তথৈবাসক্তডিণ্ডিমা ।

প্রসুপ্তা তরুণং বত্সমুপগূহ্যেব ভামিনী ॥ 44 ॥

কাচিদাডম্বরং নারী ভুজসংযোগপীডিতম্ ।

কৃত্বা কমলপত্রাক্ষী প্রসুপ্তা মদমোহিতা ॥ 45 ॥

কলশীমপবিধ্যান্যা প্রসুপ্তা ভাতি ভামিনী ।

বসন্তে পুষ্পশবলা মালেব পরিমার্জিতা ॥ 46 ॥

পাণিভ্যাং চ কুচৌ কাচিত্সুবর্ণকলশোপমৌ ।

উপগূহ্যাবলা সুপ্তা নিদ্রাবলপরাজিতা ॥ 47 ॥

অন্যা কমলপত্রাক্ষী পূর্ণেন্দুসদৃশাননা ।

অন্যামালিঙ্গ্য সুশ্রোণীং প্রসুপ্তা মদবিহ্বলা ॥ 48 ॥

আতোদ্যানি বিচিত্রাণি পরিষ্বজ্য বরস্ত্রিযঃ ।

নিপীড্য চ কুচৈস্সুপ্তা কামিন্যঃ কামুকানিব ॥ 49 ॥

তাসামেকান্তবিন্যস্তে শযানাং শযনে শুভে ।

দদর্শ রূপসম্পন্নামপরাং স কপিঃ স্ত্রিযম্ ॥ 50 ॥

মুক্তামণিসমাযুক্তৈর্ভূষণৈঃ সুবিভূষিতাম্ ।

বিভূষযন্তীমিব তত্স্বশ্রিযা ভবনোত্তমম্ ॥ 51 ॥

গৌরীং কনকবর্ণাভামিষ্টামন্তঃ পুরেশ্বরীম্ ।

কপির্মন্দোদরীং তত্র শযানাং চারুরূপিণীম্ ॥ 52 ॥

স তাং দৃষ্ট্বা মহাবাহুর্ভূষিতাং মারুতাত্মজঃ ।

তর্কযামাস সীতেতি রূপযৌবনসম্পদা ॥ 53 ॥

হর্ষেণ মহতা যুক্তো ননন্দ হরিযূথপঃ ।

আস্ফোটযামাস চুচুম্ব পুচ্ছং ননন্দ চিক্রীড জগৌ জগাম ।

স্তম্ভানরোহন্নিপপাত ভূমৌ নিদর্শযন্ স্বাং প্রকৃতিং কপীনাম্ ॥ 54 ॥

ইত্যার্ষে শ্রীমদ্রামাযণে বাল্মীকীয আদিকাব্যে সুন্দরকাণ্ডে দশমস্সর্গঃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha daśamassargaḥ |

tatra divyopamaṃ mukhyaṃ sphāṭikaṃ ratnabhūṣitam |

avekṣamāṇo hanumān dadarśa śayanāsanam || 1 ||

dāntakāñcanacitrāṅgairvaiḍūryaiśca varāsanaiḥ |

mahārhāstaraṇopetairupapannaṃ mahādhanaiḥ || 2 ||

tasya caikatame deśe so'gyramālāvibhūṣitam |

dadarśa pāṇḍuraṃ chatraṃ tārādhipatisannibham || 3 ||

jātarūpaparikṣiptaṃ citrabhānusamaprabham |

aśokamālāvitataṃ dadarśa paramāsanam || 4 ||

vālavyajanahastābhirvījyamānaṃ samantataḥ |

gandhaiśca vividhairjuṣṭaṃ varadhūpena dhūpitam || 5 ||

paramāstaraṇāstīrṇamāvikājinasaṃvṛtam |

dāmabhirvaramālyānāṃ samantādupaśobhitam || 6 ||

tasmin jīmūtasaṅkāśaṃ pradīptottamakuṇḍalam |

lohitākṣaṃ mahābāhuṃ mahārajatavāsasam || 7 ||

lohitenānuliptāṅgaṃ candanena sugandhinā |

sandhyāraktamivākāśe toyadaṃ sataṭidgaṇam || 8 ||

vṛtamābharaṇairdivyaiḥ surūpaṃ kāmarūpiṇam |

savṛkṣavanagulmāḍhyaṃ prasuptamiva mandaram || 9 ||

krīḍitvoparataṃ rātrau varābharaṇabhūṣitam |

priyaṃ rākṣasakanyānāṃ rākṣasānāṃ sukhāvaham || 10 ||

pītvā'pyuparataṃ cāpi dadarśa sa mahākapiḥ |

bhāsvare śayane vīraṃ prasuptaṃ rākṣasādhipam || 11 ||

niḥśvasantaṃ yathā nāgaṃ rāvaṇaṃ vānararṣabhaḥ |

āsādya paramodvignassopāsarpatsubhītavat || 12 ||

athā''rohaṇamāsādya vedikā'ntaramāśritaḥ |

suptaṃ rākṣasaśārdūlaṃ prekṣate sma mahākapiḥ || 13 ||

śuśubhe rākṣasendrasya svapataḥ śayanottamam |

gandhahastini saṃviṣṭe yathā prasravaṇaṃ mahat || 14 ||

kāñcanāṅgadasannadhdai ca dadarśa sa mahātmanaḥ |

vikṣiptau rākṣasendrasya bhujāvindradhvajopamau || 15 ||

airāvataviṣāṇāgrairāpīḍanakṛtavraṇau |

vajrollikhitapīnāṃsau viṣṇucakraparikṣatau || 16 ||

pīnau samasujātāṃsau saṅgatau balasaṃyutau |

sulakṣaṇanakhāṅguṣṭhā svaṅgulītalalakṣitau || 17 ||

saṃhatau parighākārau vṛttau karikaropamau |

vikṣiptau śayane śubhre pañcaśīrṣāvivoragau || 18 ||

śaśakṣatajakalpena suśītena sugandhinā |

candanena parārdhyena svanuliptau svalaṅkṛtau || 19 ||

uttamastrīvimṛditau gandhottamaniṣevitau |

yakṣapannagagandharvadevadānavarāviṇau || 20 ||

dadarśa sa kapistatra bāhū śayanasaṃsthitau |

mandarasyāntare suptau mahāhī ruṣitāviva || 21 ||

tābhyāṃ sa paripūrṇābhyāṃ bhujābhyāṃ rākṣaseśvaraḥ |

śuśubhe'calasaṅkāśaḥ śṛṅgābhyāmiva mandaraḥ || 22 ||

cūtapunnāgasurabhirvakulottamasaṃyutaḥ |

mṛṣṭānnarasasaṃyuktaḥ pānagandhapuraskṛtaḥ || 23 ||

tasya rākṣasasiṃhasya niścakrāma mahāmukhāt |

śayānasya viniḥśvāsaḥ pūrayanniva tad gṛham || 24 ||

muktāmaṇivicitreṇa kāñcanena virājitam |

makuṭenāpavṛttena kuṇḍalojvalitānanam || 25 ||

raktacandanadigdhena tathā hāreṇa śobhinā |

pīnāyataviśālena vakṣasā'bhivirājitam || 26 ||

pāṇḍareṇāpaviddhena kṣaumeṇa kṣatajekṣaṇam |

mahārheṇa susaṃvītaṃ pītenottamavāsasā || 27 ||

māṣarāśipratīkāśaṃ niśśvasantaṃ bhujaṅgavat |

gāṅge mahati toyānte prasuptamiva kuñjaram || 28 ||

caturbhiḥ kāñcanairdīpaiddhīpyamānacaturdiśam |

prakāśīkṛtasarvāṅgaṃ meghaṃ vidyudgaṇairiva || 29 ||

pādamūlagatāścāpi dadarśa sumahātmanaḥ |

patnīḥ sa priyabhāryasya tasya rakṣaḥpatergṛhe || 30 ||

śaśiprakāśavadanāścārukuṇḍalabhūṣitāḥ |

amlānamālyābharaṇā dadarśa hariyūthapaḥ || 31 ||

nṛttavāditrakuśalā rākṣasendrabhujāṅkagāḥ |

varābharaṇadhāriṇyo niṣaṇṇā dadṛśe hariḥ || 32 ||

vajravaiḍūryagarbhāṇi śravaṇānteṣu yoṣitām |

dadarśa tāpanīyāni kuṇḍalānyaṅgadāni ca || 33 ||

tāsāṃ candropamairvaktraiśśubhairlalitakuṇḍalaiḥ |

virarāja vimānaṃ tannabhastārāgaṇairiva || 34 ||

madavyāyāmakhinnāstā rākṣasendrasya yoṣitaḥ |

teṣu teṣvavakāśeṣu prasuptāstanumadhyamāḥ || 35 ||

aṅgahāraistathaivānyā komalairnṛttaśālinī |

vinyastaśubhasarvāṅgī prasuptā varavarṇinī || 36 ||

kācidvīṇāṃ pariṣvajya prasuptā samprakāśate |

mahānadīprakīrṇeva nalinī potamāśritā || 37 ||

anyā kakṣagatenaiva maḍḍukenāsitekṣaṇā |

prasuptā bhāminī bhāti bālaputreva vatsalā || 38 ||

paṭahaṃ cārusarvāṅgī pīḍya śete śubhastanī |

cirasya ramaṇaṃ labdhvā pariṣvajyeva bhāminī || 39 ||

kācidvaṃśaṃ pariṣvajya suptā kamalalocanā |

rahaḥ priyatamaṃ gṛhya sakāmeva ca kāminī || 40 ||

vipañcīṃ parigṛhyānyā niyatā nṛttaśālinī |

nidrāvaśamanuprāptā saha kānteva bhāminī || 41 ||

anyā kanakasaṅkāśairmṛdupīnairmanoramaiḥ |

mṛdaṅgaṃ paripīḍyāṅgaiḥ prasuptā mattalocanā || 42 ||

bhujapārśvāntarasthena kakṣagena kṛśodarī |

paṇaveva sahānindyā suptā madakṛtaśramā || 43 ||

ḍiṇḍimaṃ parigṛhyānyā tathaivāsaktaḍiṇḍimā |

prasuptā taruṇaṃ vatsamupagūhyeva bhāminī || 44 ||

kācidāḍambaraṃ nārī bhujasaṃyogapīḍitam |

kṛtvā kamalapatrākṣī prasuptā madamohitā || 45 ||

kalaśīmapavidhyānyā prasuptā bhāti bhāminī |

vasante puṣpaśabalā māleva parimārjitā || 46 ||

pāṇibhyāṃ ca kucau kācitsuvarṇakalaśopamau |

upagūhyābalā suptā nidrābalaparājitā || 47 ||

anyā kamalapatrākṣī pūrṇendusadṛśānanā |

anyāmāliṅgya suśroṇīṃ prasuptā madavihvalā || 48 ||

ātodyāni vicitrāṇi pariṣvajya varastriyaḥ |

nipīḍya ca kucaissuptā kāminyaḥ kāmukāniva || 49 ||

tāsāmekāntavinyaste śayānāṃ śayane śubhe |

dadarśa rūpasampannāmaparāṃ sa kapiḥ striyam || 50 ||

muktāmaṇisamāyuktairbhūṣaṇaiḥ suvibhūṣitām |

vibhūṣayantīmiva tatsvaśriyā bhavanottamam || 51 ||

gaurīṃ kanakavarṇābhāmiṣṭāmantaḥ pureśvarīm |

kapirmandodarīṃ tatra śayānāṃ cārurūpiṇīm || 52 ||

sa tāṃ dṛṣṭvā mahābāhurbhūṣitāṃ mārutātmajaḥ |

tarkayāmāsa sīteti rūpayauvanasampadā || 53 ||

harṣeṇa mahatā yukto nananda hariyūthapaḥ |

āsphoṭayāmāsa cucumba pucchaṃ nananda cikrīḍa jagau jagāma |

stambhānarohannipapāta bhūmau nidarśayan svāṃ prakṛtiṃ kapīnām || 54 ||

ityārṣe śrīmadrāmāyaṇe vālmīkīya ādikāvye sundarakāṇḍe daśamassargaḥ ||