4.61 Kishkindhakanda - Ekashashtitama Sargah

ॐ

4.61 কিষ্কিন্ধাকাণ্ড - একষষ্টিতম সর্গঃ

Valmiki Bengali

শ্রীমদ্বাল্মীকীয রামাযণে কিষ্কিন্ধাকাণ্ডম্ ।

অথ একষষ্টিতমস্সর্গঃ ।

ততস্তদ্দারুণং কর্ম দুষ্করং সহসাত্কৃতম্ ।

আচচক্ষে মুনেস্সর্বং সূর্যানুগমনং তথা ॥ 1 ॥

ভগবন্ব্রণযুক্তত্বাল্লজ্জযা ব্যাকুলেন্দ্রিযঃ ।

পরিশ্রান্তো ন শক্নোমি বচনং পরিভাষিতুম্ ॥ 2 ॥

অহং চৈব জটাযুশ্চ সঙ্ঘর্ষাদ্ধর্পমোহিতৌ ।

আকাশং পতিতৌ বীরৌ জিজ্ঞাসন্তৌ পরাক্রমম্ ॥ 3 ॥

কৈলাসশিখরে বদ্ধ্বা মুনীনামগ্রতঃ পণম্ ।

রবিস্স্যাদনুযাতব্যো যাবদস্তং মহাগিরিম্ ॥ 4 ॥

অথাঽবাং যুগপত্প্রাপ্তাবপশ্যাব মহীতলে ।

রথচক্রপ্রমাণানি নগরাণি পৃথক্পৃথক্ ॥ 5 ॥

ক্বচিদ্বাদিত্রঘোষাংশ্চ ব্রহ্মঘোষাংশ্চ শুশ্রুবঃ ।

গাযন্তীশ্চাঙ্গনা বহ্বীঃ পশ্যাবো রক্তবাসসঃ ॥ 6 ॥

তূর্ণমুত্পত্য চাকাশমাদিত্যপথমাশ্রিতৌ ।

আবামালোকযাবস্তদ্বনং শাদ্বলসন্নিভম্ ॥ 7 ॥

উপলৈরিব সঞ্ছন্না দৃশ্যতে ভূশ্শিলোচ্চযৈঃ ।

আপগাভিশ্চ সংবীতা সূত্রৈরিব বসুন্ধরা ॥ 8 ॥

হিমবাংশ্চৈব বিন্ধ্যশ্চ মেরুশ্চ সুমহান্নগঃ ।

ভূতলে সম্প্রকাশন্তে নাগা ইব জলাশযে ॥ 9 ॥

তীব্রস্স্বেদশ্চ খেদশ্চ ভযং চাসীত্তদাঽঽবযোঃ ।

সমাবিশতি মোহশ্চ তমো মূর্ছা চ দারুণা ॥ 10 ॥

ন দিগ্বিজ্ঞাযতে যাম্যা নাগ্নেযী ন চ বারুণী ।

যুগান্তে নিযতো লোকো হতো দগ্ধ ইবাগ্নিনা ॥ 11 ॥

মনশ্চ মে হতং ভূযস্সন্নিবর্ত্যতু সংশ্রযম্ ।

যত্নেন মহতা হ্যস্মিন্পুনস্সন্ধায চক্ষুষী ॥ 12 ॥

যত্নেন মহতা ভূযো ভাস্করঃ প্রতিলোকিতঃ ।

তুল্যঃ পৃথ্বীপ্রমাণেন ভাস্করঃ প্রতিভাতি নৌ ॥ 13 ॥

জটাযুর্মামনাপৃচ্ছ্য নিপপাত মহীং ততঃ ।

তং দৃষ্ট্বা তূর্ণমাকাশাদাত্মানং মুক্তবানহম্ ॥ 14 ॥

পক্ষাভ্যাং চ মযা গুপ্তো জটাযুর্ন প্রদহ্যতে ।

প্রমাদাত্তত্র নির্দগ্ধঃ পতন্বাযুপথাদহম্ ॥ 15 ॥

আশঙ্কে তং নিপতিতং জনস্থানে জটাযুষম্ ।

অহং তু পতিতো বিন্ধ্যে দগ্ধপক্ষো জডীকৃতঃ ॥ 16 ॥

রাজ্যেন হীনো ভ্রাত্রা চ পক্ষাভ্যাং বিক্রমেণ চ ।

সর্বথা মর্তুমেবেচ্ছন্পতিষ্যে শিখরাদ্গীরেঃ ॥ 17 ॥

ইত্যার্ষে শ্রীমদ্রামাযণে বাল্মীকীয আদিকাব্যে কিষ্কিন্ধাকাণ্ডে একষষ্টিতমস্সর্গঃ ॥

Roman (IAST) Transliteration

śrīmadvālmīkīya rāmāyaṇe kiṣkindhākāṇḍam |

atha ekaṣaṣṭitamassargaḥ |

tatastaddāruṇaṃ karma duṣkaraṃ sahasātkṛtam |

ācacakṣe munessarvaṃ sūryānugamanaṃ tathā || 1 ||

bhagavanvraṇayuktatvāllajjayā vyākulendriyaḥ |

pariśrānto na śaknomi vacanaṃ paribhāṣitum || 2 ||

ahaṃ caiva jaṭāyuśca saṅgharṣāddharpamohitau |

ākāśaṃ patitau vīrau jijñāsantau parākramam || 3 ||

kailāsaśikhare baddhvā munīnāmagrataḥ paṇam |

ravissyādanuyātavyo yāvadastaṃ mahāgirim || 4 ||

athā'vāṃ yugapatprāptāvapaśyāva mahītale |

rathacakrapramāṇāni nagarāṇi pṛthakpṛthak || 5 ||

kvacidvāditraghoṣāṃśca brahmaghoṣāṃśca śuśruvaḥ |

gāyantīścāṅganā bahvīḥ paśyāvo raktavāsasaḥ || 6 ||

tūrṇamutpatya cākāśamādityapathamāśritau |

āvāmālokayāvastadvanaṃ śādvalasannibham || 7 ||

upalairiva sañchannā dṛśyate bhūśśiloccayaiḥ |

āpagābhiśca saṃvītā sūtrairiva vasundharā || 8 ||

himavāṃścaiva vindhyaśca meruśca sumahānnagaḥ |

bhūtale samprakāśante nāgā iva jalāśaye || 9 ||

tīvrassvedaśca khedaśca bhayaṃ cāsīttadā''vayoḥ |

samāviśati mohaśca tamo mūrchā ca dāruṇā || 10 ||

na digvijñāyate yāmyā nāgneyī na ca vāruṇī |

yugānte niyato loko hato dagdha ivāgninā || 11 ||

manaśca me hataṃ bhūyassannivartyatu saṃśrayam |

yatnena mahatā hyasminpunassandhāya cakṣuṣī || 12 ||

yatnena mahatā bhūyo bhāskaraḥ pratilokitaḥ |

tulyaḥ pṛthvīpramāṇena bhāskaraḥ pratibhāti nau || 13 ||

jaṭāyurmāmanāpṛcchya nipapāta mahīṃ tataḥ |

taṃ dṛṣṭvā tūrṇamākāśādātmānaṃ muktavānaham || 14 ||

pakṣābhyāṃ ca mayā gupto jaṭāyurna pradahyate |

pramādāttatra nirdagdhaḥ patanvāyupathādaham || 15 ||

āśaṅke taṃ nipatitaṃ janasthāne jaṭāyuṣam |

ahaṃ tu patito vindhye dagdhapakṣo jaḍīkṛtaḥ || 16 ||

rājyena hīno bhrātrā ca pakṣābhyāṃ vikrameṇa ca |

sarvathā martumevecchanpatiṣye śikharādgīreḥ || 17 ||

ityārṣe śrīmadrāmāyaṇe vālmīkīya ādikāvye kiṣkindhākāṇḍe ekaṣaṣṭitamassargaḥ ||