📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
3.70 অরণ্যকাণ্ড - সপ্ততিতম সর্গঃ
3.70 Aranyakanda - Saptatitama Sargah
Valmiki Bengali
শ্রীমদ্বাল্মীকীয রামাযণে অরণ্যকাণ্ডম্ ।
অথ সপ্ততিতমস্সর্গঃ ।
তৌ তু তত্র স্থিতৌ দৃষ্ট্বা ভ্রাতরৌ রামলক্ষ্মণৌ ।
বাহুপাশপরিক্ষিপ্তৌ কবন্ধো বাক্যমব্রবীত্ ॥ 1 ॥
তিষ্ঠতঃ কিং নু মাং দৃষ্ট্বা ক্ষুধার্তং ক্ষত্রিযর্ষভৌ ।
আহারার্থং তু সন্দিষ্টৌ দৈবেন গতচেতসৌ ॥ 2 ॥
তচ্ছ্রুত্বা লক্ষ্মণো বাক্যং প্রাপ্তকালং হিতং তদা ।
উবাচাঽর্তিং সমাপন্নো বিক্রমে কৃতলক্ষণঃ ॥ 3 ॥
ত্বাং চ মাং চ পুরা তূর্ণমাদত্তে রাক্ষসাধমঃ ।
তস্মাদসিভ্যামস্যাশু বাহূ ছিন্দাবহৈ গুরূ ॥ 4 ॥
ভীষণোঽযং মহাকাযো রাক্ষসো ভুজবিক্রমঃ ।
লোকং হ্যতিজিতং কৃত্বা হ্যাবাং হন্তুমিহেচ্ছতি ॥ 5 ॥
নিশ্চেষ্টানাং বধো রাজন্কুত্সিতো জগতীপতেঃ ।
ক্রতুমধ্যোপনীতানাং পশূনামিব রাঘব ॥ 6 ॥
এতত্সঞ্জল্পিতং শ্রুত্বা তযোঃ ক্রুদ্ধস্তু রাক্ষসঃ ।
বিদার্যাঽস্যং তদা রৌদ্রস্তৌ ভক্ষযিতুমারভত্ ॥ 7 ॥
ততস্তৌ দেশকালজ্ঞৌ খড্গাভ্যামেব রাঘবৌ ।
অচ্ছিন্দতাং সুসংবিগ্নৌ বাহূ তস্যাংসদেশতঃ ॥ 8 ॥
দক্ষিণো দক্ষিণং বাহুমসক্তমসিনা ততঃ ।
চিচ্ছেদ রামো বেগেন সব্যং বীরস্তু লক্ষ্মণঃ ॥ 9 ॥
স পপাত মহাবাহুশ্ছিন্নবাহুর্মহাস্বনঃ ।
খং চ গাং চ দিশশ্চৈব নাদযঞ্জলদো যথা ॥ 10 ॥
স নিকৃত্তৌ ভুজৌ দৃষ্ট্বা শোণিতৌঘপরিপ্লুতঃ ।
দীনঃ পপ্রচ্ছ তৌ বীরৌ কৌ যুবামিতি দানবঃ ॥ 11 ॥
ইতি তস্য ব্রুবাণস্য লক্ষ্মণশ্শুভলক্ষণঃ ।
শশংস রাঘবং তস্য কবন্ধস্য মহাত্মনঃ ॥ 12 ॥
অযমিক্ষ্বাকুদাযাদো রামো নাম জনৈশ্শ্রুতঃ ।
অস্যৈবাবরজং বিদ্দি ভ্রাতরং মাং চ লক্ষ্মণম্ ॥ 13 ॥
অস্য দেবপ্রভাবস্য বসতো বিজনে বনে ।
রক্ষসাঽপহৃতা পত্নী যামিচ্ছন্তাবিহাগতৌ ॥ 14 ॥
ত্বং তু কো বা কিমর্থং বা কবন্ধসদৃশো বনে ।
আস্যেনোরসি দীপ্তেন ভগ্নজঙ্ঘো বিচেষ্টসে ॥ 15 ॥
এবমুক্তঃ কবন্ধস্তু লক্ষ্মণেনোত্তরং বচঃ ।
উবাচ পরমপ্রীত স্তদিন্দ্রবচনং স্মরন্ ॥ 16 ॥
স্বাগতং বাং নরব্যাঘ্রৌ দিষ্ট্যা পশ্যামি চাপ্যহম্ ।
দিষ্ট্যা চেমৌ নিকৃত্তৌ মে যুবাভ্যাং বাহুবন্ধনৌ ॥ 17 ॥
বিরূপং যচ্চ মে রূপং প্রাপ্তং হ্যবিনযাদ্যথা ।
তন্মে শৃণু নরব্যাঘ্র তত্ত্বতশ্শংসতস্তব ॥ 18 ॥
ইত্যার্ষে শ্রীমদ্রামাযণে বাল্মীকীয আদিকাব্যে অরণ্যকাণ্ডে সপ্ততিতমস্সর্গঃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha saptatitamassargaḥ |
tau tu tatra sthitau dṛṣṭvā bhrātarau rāmalakṣmaṇau |
bāhupāśaparikṣiptau kabandho vākyamabravīt || 1 ||
tiṣṭhataḥ kiṃ nu māṃ dṛṣṭvā kṣudhārtaṃ kṣatriyarṣabhau |
āhārārthaṃ tu sandiṣṭau daivena gatacetasau || 2 ||
tacchrutvā lakṣmaṇo vākyaṃ prāptakālaṃ hitaṃ tadā |
uvācā'rtiṃ samāpanno vikrame kṛtalakṣaṇaḥ || 3 ||
tvāṃ ca māṃ ca purā tūrṇamādatte rākṣasādhamaḥ |
tasmādasibhyāmasyāśu bāhū chindāvahai gurū || 4 ||
bhīṣaṇo'yaṃ mahākāyo rākṣaso bhujavikramaḥ |
lokaṃ hyatijitaṃ kṛtvā hyāvāṃ hantumihecchati || 5 ||
niśceṣṭānāṃ vadho rājankutsito jagatīpateḥ |
kratumadhyopanītānāṃ paśūnāmiva rāghava || 6 ||
etatsañjalpitaṃ śrutvā tayoḥ kruddhastu rākṣasaḥ |
vidāryā'syaṃ tadā raudrastau bhakṣayitumārabhat || 7 ||
tatastau deśakālajñau khaḍgābhyāmeva rāghavau |
acchindatāṃ susaṃvignau bāhū tasyāṃsadeśataḥ || 8 ||
dakṣiṇo dakṣiṇaṃ bāhumasaktamasinā tataḥ |
ciccheda rāmo vegena savyaṃ vīrastu lakṣmaṇaḥ || 9 ||
sa papāta mahābāhuśchinnabāhurmahāsvanaḥ |
khaṃ ca gāṃ ca diśaścaiva nādayañjalado yathā || 10 ||
sa nikṛttau bhujau dṛṣṭvā śoṇitaughapariplutaḥ |
dīnaḥ papraccha tau vīrau kau yuvāmiti dānavaḥ || 11 ||
iti tasya bruvāṇasya lakṣmaṇaśśubhalakṣaṇaḥ |
śaśaṃsa rāghavaṃ tasya kabandhasya mahātmanaḥ || 12 ||
ayamikṣvākudāyādo rāmo nāma janaiśśrutaḥ |
asyaivāvarajaṃ viddi bhrātaraṃ māṃ ca lakṣmaṇam || 13 ||
asya devaprabhāvasya vasato vijane vane |
rakṣasā'pahṛtā patnī yāmicchantāvihāgatau || 14 ||
tvaṃ tu ko vā kimarthaṃ vā kabandhasadṛśo vane |
āsyenorasi dīptena bhagnajaṅgho viceṣṭase || 15 ||
evamuktaḥ kabandhastu lakṣmaṇenottaraṃ vacaḥ |
uvāca paramaprīta stadindravacanaṃ smaran || 16 ||
svāgataṃ vāṃ naravyāghrau diṣṭyā paśyāmi cāpyaham |
diṣṭyā cemau nikṛttau me yuvābhyāṃ bāhubandhanau || 17 ||
virūpaṃ yacca me rūpaṃ prāptaṃ hyavinayādyathā |
tanme śṛṇu naravyāghra tattvataśśaṃsatastava || 18 ||
ityārṣe śrīmadrāmāyaṇe vālmīkīya ādikāvye araṇyakāṇḍe saptatitamassargaḥ ||
InfoLyter.in — Sacred Vedic Knowledge Portal · Free forever