Subrahmanya Bhujanga Stotram

ॐ

সুব্রহ্মণ্য ভুজঙ্গ স্তোত্রম্

Murugan Stotram Bengali

সদা বালরূপাঽপি বিঘ্নাদ্রিহন্ত্রী

মহাদন্তিবক্ত্রাঽপি পঞ্চাস্যমান্যা ।

বিধীন্দ্রাদিমৃগ্যা গণেশাভিধা মে

বিধত্তাং শ্রিযং কাঽপি কল্যাণমূর্তিঃ ॥ 1 ॥

ন জানামি শব্দং ন জানামি চার্থং

ন জানামি পদ্যং ন জানামি গদ্যম্ ।

চিদেকা ষডাস্যা হৃদি দ্যোততে মে

মুখান্নিঃসরন্তে গিরশ্চাপি চিত্রম্ ॥ 2 ॥

মযূরাধিরূঢং মহাবাক্যগূঢং

মনোহারিদেহং মহচ্চিত্তগেহম্ ।

মহীদেবদেবং মহাবেদভাবং

মহাদেববালং ভজে লোকপালম্ ॥ 3 ॥

যদা সন্নিধানং গতা মানবা মে

ভবাম্ভোধিপারং গতাস্তে তদৈব ।

ইতি ব্যঞ্জযন্সিন্ধুতীরে য আস্তে

তমীডে পবিত্রং পরাশক্তিপুত্রম্ ॥ 4 ॥

যথাব্ধেস্তরঙ্গা লযং যান্তি তুঙ্গা-

স্তথৈবাপদঃ সন্নিধৌ সেবতাং মে ।

ইতীবোর্মিপঙ্ক্তীর্নৃণাং দর্শযন্তং

সদা ভাবযে হৃত্সরোজে গুহং তম্ ॥ 5 ॥

গিরৌ মন্নিবাসে নরা যেঽধিরূঢা-

স্তদা পর্বতে রাজতে তেঽধিরূঢাঃ ।

ইতীব ব্রুবন্গন্ধশৈলাধিরূঢঃ

স দেবো মুদে মে সদা ষণ্মুখোঽস্তু ॥ 6 ॥

মহাম্ভোধিতীরে মহাপাপচোরে

মুনীন্দ্রানুকূলে সুগন্ধাখ্যশৈলে ।

গুহাযাং বসন্তং স্বভাসা লসন্তং

জনার্তিং হরন্তং শ্রযামো গুহং তম্ ॥ 7 ॥

লসত্স্বর্ণগেহে নৃণাং কামদোহে

সুমস্তোমসঞ্ছন্নমাণিক্যমঞ্চে ।

সমুদ্যত্সহস্রার্কতুল্যপ্রকাশং

সদা ভাবযে কার্তিকেযং সুরেশম্ ॥ 8 ॥

রণথংসকে মঞ্জুলেঽত্যন্তশোণে

মনোহারিলাবণ্যপীযূষপূর্ণে ।

মনঃষট্পদো মে ভবক্লেশতপ্তঃ

সদা মোদতাং স্কন্দ তে পাদপদ্মে ॥ 9 ॥

সুবর্ণাভদিব্যাম্বরৈর্ভাসমানাং

ক্বণত্কিঙ্কিণীমেখলাশোভমানাম্ ।

লসদ্ধেমপট্টেন বিদ্যোতমানং

কটিং ভাবযে স্কন্দ তে দীপ্যমানাম্ ॥ 10 ॥

পুলিন্দেশকন্যাঘনাভোগতুঙ্গ-

স্তনালিঙ্গনাসক্তকাশ্মীররাগম্ ।

নমস্যাম্যহং তারকারে তবোরঃ

স্বভক্তাবনে সর্বদা সানুরাগম্ ॥ 11 ॥

বিধৌ ক্লৃপ্তদণ্ডান্স্বলীলাধৃতাণ্ডা-

ন্নিরস্তেভশুণ্ডান্দ্বিষত্কালদণ্ডান্ ।

হতেন্দ্রারিষণ্ডান্জগত্রাণশৌণ্ডা-

ন্সদা তে প্রচণ্ডান্শ্রযে বাহুদণ্ডান্ ॥ 12 ॥

সদা শারদাঃ ষণ্মৃগাঙ্কা যদি স্যুঃ

সমুদ্যন্ত এব স্থিতাশ্চেত্সমন্তাত্ ।

সদা পূর্ণবিম্বাঃ কলঙ্কৈশ্চ হীনা-

স্তদা ত্বন্মুখানাং ব্রুবে স্কন্দ সাম্যম্ ॥ 13 ॥

স্ফুরন্মন্দহাসৈঃ সহংসানি চঞ্চ-

ত্কটাক্ষাবলীভৃঙ্গসঙ্ঘোজ্জ্বলানি ।

সুধাস্যন্দিবিম্বাধরাণীশসূনো

তবালোকযে ষণ্মুখাম্ভোরুহাণি ॥ 14 ॥

বিশালেষু কর্ণান্তদীর্ঘেষ্বজস্রং

দযাস্যন্দিষু দ্বাদশস্বীক্ষণেষু ।

মযীষত্কটাক্ষঃ সকৃত্পাতিতশ্চে-

দ্ভবেত্তে দযাশীল কা নাম হানিঃ ॥ 15 ॥

সুতাঙ্গোদ্ভবো মেঽসি জীবেতি ষড্ধা

জপন্মন্ত্রমীশো মুদা জিঘ্রতে যান্ ।

জগদ্ভারভৃদ্ভ্যো জগন্নাথ তেভ্যঃ

কিরীটোজ্জ্বলেভ্যো নমো মস্তকেভ্যঃ ॥ 16 ॥

স্ফুরদ্রত্নকেযূরহারাভিরাম-

শ্চলত্কুণ্ডলশ্রীলসদ্গণ্ডভাগঃ ।

কটৌ পীতবাসাঃ করে চারুশক্তিঃ

পুরস্তান্মমাস্তাং পুরারেস্তনূজঃ ॥ 17 ॥

ইহাযাহি বত্সেতি হস্তান্প্রসার্যা-

হ্বযত্যাদরাচ্ছঙ্করে মাতুরঙ্কাত্ ।

সমুত্পত্য তাতং শ্রযন্তং কুমারং

হরাশ্লিষ্টগাত্রং ভজে বালমূর্তিম্ ॥ 18 ॥

কুমারেশসূনো গুহ স্কন্দ সেনা-

পতে শক্তিপাণে মযূরাধিরূঢ ।

পুলিন্দাত্মজাকান্ত ভক্তার্তিহারিন্

প্রভো তারকারে সদা রক্ষ মাং ত্বম্ ॥ 19 ॥

প্রশান্তেন্দ্রিযে নষ্টসঞ্জ্ঞে বিচেষ্টে

কফোদ্গারিবক্ত্রে ভযোত্কম্পিগাত্রে ।

প্রযাণোন্মুখে ময্যনাথে তদানীং

দ্রুতং মে দযালো ভবাগ্রে গুহ ত্বম্ ॥ 20 ॥

কৃতান্তস্য দূতেষু চণ্ডেষু কোপা-

দ্দহচ্ছিন্দ্ধি ভিন্দ্ধীতি মাং তর্জযত্সু ।

মযূরং সমারুহ্য মা ভৈরিতি ত্বং

পুরঃ শক্তিপাণির্মমাযাহি শীঘ্রম্ ॥ 21 ॥

প্রণম্যাসকৃত্পাদযোস্তে পতিত্বা

প্রসাদ্য প্রভো প্রার্থযেঽনেকবারম্ ।

ন বক্তুং ক্ষমোঽহং তদানীং কৃপাব্ধে

ন কার্যান্তকালে মনাগপ্যুপেক্ষা ॥ 22 ॥

সহস্রাণ্ডভোক্তা ত্বযা শূরনামা

হতস্তারকঃ সিংহবক্ত্রশ্চ দৈত্যঃ ।

মমান্তর্হৃদিস্থং মনঃক্লেশমেকং

ন হংসি প্রভো কিং করোমি ক্ব যামি ॥ 23 ॥

অহং সর্বদা দুঃখভারাবসন্নো

ভবান্দীনবন্ধুস্ত্বদন্যং ন যাচে ।

ভবদ্ভক্তিরোধং সদা ক্লৃপ্তবাধং

মমাধিং দ্রুতং নাশযোমাসুত ত্বম্ ॥ 24 ॥

অপস্মারকুষ্টক্ষযার্শঃ প্রমেহ-

জ্বরোন্মাদগুল্মাদিরোগা মহান্তঃ ।

পিশাচাশ্চ সর্বে ভবত্পত্রভূতিং

বিলোক্য ক্ষণাত্তারকারে দ্রবন্তে ॥ 25 ॥

দৃশি স্কন্দমূর্তিঃ শ্রুতৌ স্কন্দকীর্তি-

র্মুখে মে পবিত্রং সদা তচ্চরিত্রম্ ।

করে তস্য কৃত্যং বপুস্তস্য ভৃত্যং

গুহে সন্তু লীনা মমাশেষভাবাঃ ॥ 26 ॥

মুনীনামুতাহো নৃণাং ভক্তিভাজা-

মভীষ্টপ্রদাঃ সন্তি সর্বত্র দেবাঃ ।

নৃণামন্ত্যজানামপি স্বার্থদানে

গুহাদ্দেবমন্যং ন জানে ন জানে ॥ 27 ॥

কলত্রং সুতা বন্ধুবর্গঃ পশুর্বা

নরো বাথ নারী গৃহে যে মদীযাঃ ।

যজন্তো নমন্তঃ স্তুবন্তো ভবন্তং

স্মরন্তশ্চ তে সন্তু সর্বে কুমার ॥ 28 ॥

মৃগাঃ পক্ষিণো দংশকা যে চ দুষ্টা-

স্তথা ব্যাধযো বাধকা যে মদঙ্গে ।

ভবচ্ছক্তিতীক্ষ্ণাগ্রভিন্নাঃ সুদূরে

বিনশ্যন্তু তে চূর্ণিতক্রৌঞ্চশৈল ॥ 29 ॥

জনিত্রী পিতা চ স্বপুত্রাপরাধং

সহেতে ন কিং দেবসেনাধিনাথ ।

অহং চাতিবালো ভবান্ লোকতাতঃ

ক্ষমস্বাপরাধং সমস্তং মহেশ ॥ 30 ॥

নমঃ কেকিনে শক্তযে চাপি তুভ্যং

নমশ্ছাগ তুভ্যং নমঃ কুক্কুটায ।

নমঃ সিন্ধবে সিন্ধুদেশায তুভ্যং

পুনঃ স্কন্দমূর্তে নমস্তে নমোঽস্তু ॥ 31 ॥

জযানন্দভূমং জযাপারধামং

জযামোঘকীর্তে জযানন্দমূর্তে ।

জযানন্দসিন্ধো জযাশেষবন্ধো

জয ত্বং সদা মুক্তিদানেশসূনো ॥ 32 ॥

ভুজঙ্গাখ্যবৃত্তেন ক্লৃপ্তং স্তবং যঃ

পঠেদ্ভক্তিযুক্তো গুহং সম্প্রণম্য ।

স পুত্রান্কলত্রং ধনং দীর্ঘমাযু-

র্লভেত্স্কন্দসাযুজ্যমন্তে নরঃ সঃ ॥ 33 ॥

Roman (IAST) Transliteration

sadā bālarūpā'pi vighnādrihantrī

mahādantivaktrā'pi pañcāsyamānyā |

vidhīndrādimṛgyā gaṇeśābhidhā me

vidhattāṃ śriyaṃ kā'pi kalyāṇamūrtiḥ || 1 ||

na jānāmi śabdaṃ na jānāmi cārthaṃ

na jānāmi padyaṃ na jānāmi gadyam |

cidekā ṣaḍāsyā hṛdi dyotate me

mukhānniḥsarante giraścāpi citram || 2 ||

mayūrādhirūḍhaṃ mahāvākyagūḍhaṃ

manohāridehaṃ mahaccittageham |

mahīdevadevaṃ mahāvedabhāvaṃ

mahādevabālaṃ bhaje lokapālam || 3 ||

yadā sannidhānaṃ gatā mānavā me

bhavāmbhodhipāraṃ gatāste tadaiva |

iti vyañjayansindhutīre ya āste

tamīḍe pavitraṃ parāśaktiputram || 4 ||

yathābdhestaraṅgā layaṃ yānti tuṅgā-

stathaivāpadaḥ sannidhau sevatāṃ me |

itīvormipaṅktīrnṛṇāṃ darśayantaṃ

sadā bhāvaye hṛtsaroje guhaṃ tam || 5 ||

girau mannivāse narā ye'dhirūḍhā-

stadā parvate rājate te'dhirūḍhāḥ |

itīva bruvangandhaśailādhirūḍhaḥ

sa devo mude me sadā ṣaṇmukho'stu || 6 ||

mahāmbhodhitīre mahāpāpacore

munīndrānukūle sugandhākhyaśaile |

guhāyāṃ vasantaṃ svabhāsā lasantaṃ

janārtiṃ harantaṃ śrayāmo guhaṃ tam || 7 ||

lasatsvarṇagehe nṛṇāṃ kāmadohe

sumastomasañchannamāṇikyamañce |

samudyatsahasrārkatulyaprakāśaṃ

sadā bhāvaye kārtikeyaṃ sureśam || 8 ||

raṇathaṃsake mañjule'tyantaśoṇe

manohārilāvaṇyapīyūṣapūrṇe |

manaḥṣaṭpado me bhavakleśataptaḥ

sadā modatāṃ skanda te pādapadme || 9 ||

suvarṇābhadivyāmbarairbhāsamānāṃ

kvaṇatkiṅkiṇīmekhalāśobhamānām |

lasaddhemapaṭṭena vidyotamānaṃ

kaṭiṃ bhāvaye skanda te dīpyamānām || 10 ||

pulindeśakanyāghanābhogatuṅga-

stanāliṅganāsaktakāśmīrarāgam |

namasyāmyahaṃ tārakāre tavoraḥ

svabhaktāvane sarvadā sānurāgam || 11 ||

vidhau klṛptadaṇḍānsvalīlādhṛtāṇḍā-

nnirastebhaśuṇḍāndviṣatkāladaṇḍān |

hatendrāriṣaṇḍānjagatrāṇaśauṇḍā-

nsadā te pracaṇḍānśraye bāhudaṇḍān || 12 ||

sadā śāradāḥ ṣaṇmṛgāṅkā yadi syuḥ

samudyanta eva sthitāścetsamantāt |

sadā pūrṇabimbāḥ kalaṅkaiśca hīnā-

stadā tvanmukhānāṃ bruve skanda sāmyam || 13 ||

sphuranmandahāsaiḥ sahaṃsāni cañca-

tkaṭākṣāvalībhṛṅgasaṅghojjvalāni |

sudhāsyandibimbādharāṇīśasūno

tavālokaye ṣaṇmukhāmbhoruhāṇi || 14 ||

viśāleṣu karṇāntadīrgheṣvajasraṃ

dayāsyandiṣu dvādaśasvīkṣaṇeṣu |

mayīṣatkaṭākṣaḥ sakṛtpātitaśce-

dbhavette dayāśīla kā nāma hāniḥ || 15 ||

sutāṅgodbhavo me'si jīveti ṣaḍdhā

japanmantramīśo mudā jighrate yān |

jagadbhārabhṛdbhyo jagannātha tebhyaḥ

kirīṭojjvalebhyo namo mastakebhyaḥ || 16 ||

sphuradratnakeyūrahārābhirāma-

ścalatkuṇḍalaśrīlasadgaṇḍabhāgaḥ |

kaṭau pītavāsāḥ kare cāruśaktiḥ

purastānmamāstāṃ purārestanūjaḥ || 17 ||

ihāyāhi vatseti hastānprasāryā-

hvayatyādarācchaṅkare māturaṅkāt |

samutpatya tātaṃ śrayantaṃ kumāraṃ

harāśliṣṭagātraṃ bhaje bālamūrtim || 18 ||

kumāreśasūno guha skanda senā-

pate śaktipāṇe mayūrādhirūḍha |

pulindātmajākānta bhaktārtihārin

prabho tārakāre sadā rakṣa māṃ tvam || 19 ||

praśāntendriye naṣṭasañjñe viceṣṭe

kaphodgārivaktre bhayotkampigātre |

prayāṇonmukhe mayyanāthe tadānīṃ

drutaṃ me dayālo bhavāgre guha tvam || 20 ||

kṛtāntasya dūteṣu caṇḍeṣu kopā-

ddahacchinddhi bhinddhīti māṃ tarjayatsu |

mayūraṃ samāruhya mā bhairiti tvaṃ

puraḥ śaktipāṇirmamāyāhi śīghram || 21 ||

praṇamyāsakṛtpādayoste patitvā

prasādya prabho prārthaye'nekavāram |

na vaktuṃ kṣamo'haṃ tadānīṃ kṛpābdhe

na kāryāntakāle manāgapyupekṣā || 22 ||

sahasrāṇḍabhoktā tvayā śūranāmā

hatastārakaḥ siṃhavaktraśca daityaḥ |

mamāntarhṛdisthaṃ manaḥkleśamekaṃ

na haṃsi prabho kiṃ karomi kva yāmi || 23 ||

ahaṃ sarvadā duḥkhabhārāvasanno

bhavāndīnabandhustvadanyaṃ na yāce |

bhavadbhaktirodhaṃ sadā klṛptabādhaṃ

mamādhiṃ drutaṃ nāśayomāsuta tvam || 24 ||

apasmārakuṣṭakṣayārśaḥ prameha-

jvaronmādagulmādirogā mahāntaḥ |

piśācāśca sarve bhavatpatrabhūtiṃ

vilokya kṣaṇāttārakāre dravante || 25 ||

dṛśi skandamūrtiḥ śrutau skandakīrti-

rmukhe me pavitraṃ sadā taccaritram |

kare tasya kṛtyaṃ vapustasya bhṛtyaṃ

guhe santu līnā mamāśeṣabhāvāḥ || 26 ||

munīnāmutāho nṛṇāṃ bhaktibhājā-

mabhīṣṭapradāḥ santi sarvatra devāḥ |

nṛṇāmantyajānāmapi svārthadāne

guhāddevamanyaṃ na jāne na jāne || 27 ||

kalatraṃ sutā bandhuvargaḥ paśurvā

naro vātha nārī gṛhe ye madīyāḥ |

yajanto namantaḥ stuvanto bhavantaṃ

smarantaśca te santu sarve kumāra || 28 ||

mṛgāḥ pakṣiṇo daṃśakā ye ca duṣṭā-

stathā vyādhayo bādhakā ye madaṅge |

bhavacchaktitīkṣṇāgrabhinnāḥ sudūre

vinaśyantu te cūrṇitakrauñcaśaila || 29 ||

janitrī pitā ca svaputrāparādhaṃ

sahete na kiṃ devasenādhinātha |

ahaṃ cātibālo bhavān lokatātaḥ

kṣamasvāparādhaṃ samastaṃ maheśa || 30 ||

namaḥ kekine śaktaye cāpi tubhyaṃ

namaśchāga tubhyaṃ namaḥ kukkuṭāya |

namaḥ sindhave sindhudeśāya tubhyaṃ

punaḥ skandamūrte namaste namo'stu || 31 ||

jayānandabhūmaṃ jayāpāradhāmaṃ

jayāmoghakīrte jayānandamūrte |

jayānandasindho jayāśeṣabandho

jaya tvaṃ sadā muktidāneśasūno || 32 ||

bhujaṅgākhyavṛttena klṛptaṃ stavaṃ yaḥ

paṭhedbhaktiyukto guhaṃ sampraṇamya |

sa putrānkalatraṃ dhanaṃ dīrghamāyu-

rlabhetskandasāyujyamante naraḥ saḥ || 33 ||