Dhruva Stutih — InfoLyter.in

ॐ

ধ্রুব স্তুতিঃ

Dhruva Stutih

Vyasa Bengali

(বিষ্ণুপুরাণান্তর্গতা; মুখ্য স্তুতি শ্লোকাঃ 51-74)

ধ্রুব উবাচ ।

ভূমিরাপোঽনলো বাযুঃ খং মনো বুদ্ধিরেব চ ।

ভূতাদিরাদিপ্রকৃতির্যস্য রূপং নতোঽস্মি তম্ ॥ 51 ॥

শুদ্ধঃ সূক্ষ্মোঽখিলব্যাপী প্রধানাত্পরতঃ পুমান্ ।

যস্য রূপং নমস্তস্মৈ পুরুষায গুণাশিনে ॥ 52 ॥

ভূরাদীনাং সমস্তানাং গন্ধাদীনাং চ শাশ্বতঃ ।

বুদ্ধ্যাদীনাং প্রধানস্য পুরুষস্য চ যঃ পরঃ ॥ 53 ॥

তং ব্রহ্মভূতমাত্মানমশেষজগতঃ পতিম্ ।

প্রপদ্যে শরণং শুদ্ধং ত্বদ্রূপং পরমেশ্বর ॥ 54 ॥

বৃহত্ত্বাদ্বৃংহণত্বাচ্চ যদ্রূপং ব্রহ্মসঞ্জ্ঞিতম্ ।

তস্মৈ নমস্তে সর্বাত্মন্যোগিচিন্ত্যাবিকারিণে ॥ 55 ॥

সহস্রশীর্ষা পুরুষঃ সহস্রাক্ষঃ সহস্রপাত্ ।

সর্বব্যাপী ভুবঃ স্পর্শাদত্যতিষ্ঠদ্দশাঙ্গুলম্ ॥ 56 ॥

যদ্ভূতং যচ্চ বৈ ভব্যং পুরুষোত্তম তদ্ভবান্ ।

ত্বত্তো বিরাট্ স্বরাট্ সম্রাট্ ত্বত্তশ্চাপ্যধিপূরুষঃ ॥ 57 ॥

অত্যরিচ্যত সোঽধশ্চ তির্যগূর্ধ্বং চ বৈ ভুবঃ ।

ত্বত্তো বিশ্বমিদং জাতং ত্বত্তো ভূতভবিষ্যতী ॥ 58 ॥

ত্বদ্রূপধারিণশ্চান্তঃ সর্বভূতমিদং জগত্ ।

ত্বত্তো যজ্ঞঃ সর্বহুতঃ পৃষদাজ্যং পশুর্দ্বিধা ॥ 59 ॥

ত্বত্ত ঋচোঽথ সামানি ত্বত্তশ্ছন্দাংসি জজ্ঞিরে ।

ত্বত্তো যজূংষ্যজাযন্ত ত্বত্তোঽশ্বাশ্চৈকতো দতঃ ॥ 60 ॥

গাবস্ত্বত্তঃ সমুদ্ভূতাস্ত্বত্তোঽজা অবযো মৃগাঃ ।

ত্বন্মুখাদ্ব্রাহ্মণাস্ত্বত্তো বাহোঃ ক্ষত্রমজাযত ॥ 61 ॥

বৈশ্যাস্তবোরুজাঃ শূদ্রাস্তব পদ্ভ্যাং সমুদ্গতাঃ ।

অক্ষ্ণোঃ সূর্যোঽনিলঃ প্রাণাচ্চন্দ্রমা মনসস্তব ॥ 62 ॥

প্রাণোঽন্তঃসুষিরাজ্জাতো মুখাদগ্নিরজাযত ।

নাভিতো গগনং দ্যৌশ্চ শিরসঃ সমবর্তত ॥ 63 ॥

দিশঃ শ্রোত্রাত্ক্ষিতিঃ পদ্ভ্যাং ত্বত্তঃ সর্বমভূদিদম্ ॥ 64 ॥

ন্যগ্রোধঃ সুমহানল্পে যথা বীজে ব্যবস্থিতঃ ।

সংযমে বিশ্বমখিলং বীজভূতে তথা ত্বযি ॥ 65 ॥

বীজাদঙ্কুরসম্ভূতো ন্যগ্রোধঃ স সমুচ্ছ্রিতঃ ।

বিস্তারং চ যথা যাতি ত্বত্তঃ সৃষ্টৌ তথা জগত্ ॥ 66 ॥

যথা হি কদলী নান্যা ত্বক্পত্রাদপি দৃশ্যতে ।

এবং বিশ্বস্য নান্যস্ত্বং ত্বত্স্থাযীশ্বর দৃশ্যতে ॥ 67 ॥

হ্লাদিনী সন্ধিনী সংবিত্ত্বয্যেকা সর্বসংস্থিতৌ ।

হ্লাদতাপকরী মিশ্রা ত্বযি নো গুণবর্জিতে ॥ 68 ॥

পৃথগ্ভূতৈকভূতায ভূতভূতায তে নমঃ ।

প্রভূতভূতভূতায তুভ্যং ভূতাত্মনে নমঃ ॥ 69 ॥

ব্যক্তং প্রধানপুরুষৌ বিরাট্ সম্রাট্ স্বরাট্ তথা ।

বিভাব্যতেঽন্তঃকরণে পুরুষেষ্বক্ষযো ভবান্ ॥ 70 ॥

সর্বস্মিন্ সর্বভূতস্ত্বং সর্বঃ সর্বস্বরূপধৃক্ ।

সর্বং ত্বত্তস্ততশ্চ ত্বং নমঃ সর্বাত্মনেঽস্তু তে ॥ 71 ॥

সর্বাত্মকোঽসি সর্বেশ সর্বভূতস্থিতো যতঃ ।

কথযামি ততঃ কিং তে সর্বং বেত্সি হৃদি স্থিতম্ ॥ 72 ॥

সর্বাত্মন্সর্বভূতেশ সর্বসত্ত্বসমুদ্ভব ।

সর্বভূতো ভবান্বেত্তি সর্বসত্ত্বমনোরথম্ ॥ 73 ॥

যো মে মনোরথো নাথ সফলঃ স ত্বযা কৃতঃ ।

তপশ্চ তপ্তং সফলং যদ্দৃষ্টোঽসি জগত্পতে ॥ 74 ॥

Roman (IAST) Transliteration

(viṣṇupurāṇāntargatā; mukhya stuti ślokāḥ 51-74)

dhruva uvāca |

bhūmirāpo'nalo vāyuḥ khaṃ mano buddhireva ca |

bhūtādirādiprakṛtiryasya rūpaṃ nato'smi tam || 51 ||

śuddhaḥ sūkṣmo'khilavyāpī pradhānātparataḥ pumān |

yasya rūpaṃ namastasmai puruṣāya guṇāśine || 52 ||

bhūrādīnāṃ samastānāṃ gandhādīnāṃ ca śāśvataḥ |

buddhyādīnāṃ pradhānasya puruṣasya ca yaḥ paraḥ || 53 ||

taṃ brahmabhūtamātmānamaśeṣajagataḥ patim |

prapadye śaraṇaṃ śuddhaṃ tvadrūpaṃ parameśvara || 54 ||

bṛhattvādbṛṃhaṇatvācca yadrūpaṃ brahmasañjñitam |

tasmai namaste sarvātmanyogicintyāvikāriṇe || 55 ||

sahasraśīrṣā puruṣaḥ sahasrākṣaḥ sahasrapāt |

sarvavyāpī bhuvaḥ sparśādatyatiṣṭhaddaśāṅgulam || 56 ||

yadbhūtaṃ yacca vai bhavyaṃ puruṣottama tadbhavān |

tvatto virāṭ svarāṭ samrāṭ tvattaścāpyadhipūruṣaḥ || 57 ||

atyaricyata so'dhaśca tiryagūrdhvaṃ ca vai bhuvaḥ |

tvatto viśvamidaṃ jātaṃ tvatto bhūtabhaviṣyatī || 58 ||

tvadrūpadhāriṇaścāntaḥ sarvabhūtamidaṃ jagat |

tvatto yajñaḥ sarvahutaḥ pṛṣadājyaṃ paśurdvidhā || 59 ||

tvatta ṛco'tha sāmāni tvattaśchandāṃsi jajñire |

tvatto yajūṃṣyajāyanta tvatto'śvāścaikato dataḥ || 60 ||

gāvastvattaḥ samudbhūtāstvatto'jā avayo mṛgāḥ |

tvanmukhādbrāhmaṇāstvatto bāhoḥ kṣatramajāyata || 61 ||

vaiśyāstavorujāḥ śūdrāstava padbhyāṃ samudgatāḥ |

akṣṇoḥ sūryo'nilaḥ prāṇāccandramā manasastava || 62 ||

prāṇo'ntaḥsuṣirājjāto mukhādagnirajāyata |

nābhito gaganaṃ dyauśca śirasaḥ samavartata || 63 ||

diśaḥ śrotrātkṣitiḥ padbhyāṃ tvattaḥ sarvamabhūdidam || 64 ||

nyagrodhaḥ sumahānalpe yathā bīje vyavasthitaḥ |

saṃyame viśvamakhilaṃ bījabhūte tathā tvayi || 65 ||

bījādaṅkurasambhūto nyagrodhaḥ sa samucchritaḥ |

vistāraṃ ca yathā yāti tvattaḥ sṛṣṭau tathā jagat || 66 ||

yathā hi kadalī nānyā tvakpatrādapi dṛśyate |

evaṃ viśvasya nānyastvaṃ tvatsthāyīśvara dṛśyate || 67 ||

hlādinī sandhinī saṃvittvayyekā sarvasaṃsthitau |

hlādatāpakarī miśrā tvayi no guṇavarjite || 68 ||

pṛthagbhūtaikabhūtāya bhūtabhūtāya te namaḥ |

prabhūtabhūtabhūtāya tubhyaṃ bhūtātmane namaḥ || 69 ||

vyaktaṃ pradhānapuruṣau virāṭ samrāṭ svarāṭ tathā |

vibhāvyate'ntaḥkaraṇe puruṣeṣvakṣayo bhavān || 70 ||

sarvasmin sarvabhūtastvaṃ sarvaḥ sarvasvarūpadhṛk |

sarvaṃ tvattastataśca tvaṃ namaḥ sarvātmane'stu te || 71 ||

sarvātmako'si sarveśa sarvabhūtasthito yataḥ |

kathayāmi tataḥ kiṃ te sarvaṃ vetsi hṛdi sthitam || 72 ||

sarvātmansarvabhūteśa sarvasattvasamudbhava |

sarvabhūto bhavānvetti sarvasattvamanoratham || 73 ||

yo me manoratho nātha saphalaḥ sa tvayā kṛtaḥ |

tapaśca taptaṃ saphalaṃ yaddṛṣṭo'si jagatpate || 74 ||